ಗುರುವೇ ದೇವರೆನಿಸಿದಾಗ…

“ಆಚಾರ್ಯ ದೇವೊಭವ” ಎನ್ನುತ್ತದೆ ನಮ್ಮ ಸಂಸ್ಕಾರ. ಉತ್ತಮ ಗುರುವಿನ ಕಾಣಿಕೆ, ವಿದ್ಯಾರ್ಥಿಗಳನ್ನು ಮಾತ್ರವಲ್ಲ, ಇಡಿಯ ಸಮಾಜವನ್ನು ಉದ್ಧಾರ ಮಾಡಬಲ್ಲದು. ನಮ್ಮ ಬದುಕಿನ ಜಂಜಾಟದಲ್ಲಿ, ನಮ್ಮನ್ನು ಉತ್ತೇಜಿಸಿದ, ರೂಪಿಸಿದ ಗುರುಗಳನ್ನು ನಾವು ನೆನಪಿಸಿಕೊಳ್ಳುವುದು ಕಡಿಮೆ. ಮಾನವನಲ್ಲಿ ದೇವರನ್ನು ಕಾಣುವ ಅವಕಾಶ ದೊರಕಿದವರು ಭಾಗ್ಯಶಾಲಿಗಳು. ಈ ಭಾವುಕ ಸಣ್ಣಕತೆ ನಮ್ಮ ಸಮಾಜದ ಕೆಲ ಅನ್ಯಾಯ ಮತ್ತು ಕೊರತೆಗಳನ್ನು ಎತ್ತಿ ಹಿಡಿಯುವುದರ ಜೊತೆಗೆ, ಅಂಥಾ ಕಷ್ಟಗಳಲ್ಲೂ ಜೀವನದ ಮೌಲ್ಯಗಳನ್ನು ಮರೆಯದ ಒಬ್ಬ ಶಿಕ್ಷಕಿಯ ಪಾತ್ರವನ್ನು ಪರಿಚಯಿಸುತ್ತದೆ.
ಡಾ ರಾಜಶ್ರೀ ಪಾಟೀಲರ ಚೊಚ್ಚಲ ಪ್ರಕಟಣೆ ನಮ್ಮ ಅನಿವಾಸಿ ಅಂಗಳದಲ್ಲಿ. ಓದಿ ಪ್ರತಿಕ್ರಿಯಿಸಿ – ಸಂ

ಡಾ ರಾಜಶ್ರೀ ಪಾಟೀಲ

ಪರಿಚಯ‌

ನಾನು ಮೂಲತಃ ಗದಗ ಜೆಲ್ಲೆಯ ಶಿಗ್ಲಿ ಎಂಬ ಹಳ್ಳಿಯವಳು. ಮೂಲ ವೈದ್ಯಕೀಯ ತರಬೇತಿಯನ್ನ ದಾವಣಗೆರೆಯಲ್ಲಿ ಮುಗಿಸಿದ್ದು, ನನ್ನ ಪತಿ ಮನೆಯವರು ದಾವಣಗೆರೆಯಲ್ಲಿ ನೆಲೆಸಿದ್ದಾರೆ. ಸದ್ಯಕ್ಕೆ ಲೆಸ್ಟರ್ನಲ್ಲಿ ಪತಿ ಮತ್ತು ಮಕ್ಕಳೊಂದಿಗೆ ವಾಸವಾಗಿದ್ದು , ರೇಡಿಯಾಲಜಿ ಸೀನಿಯರ್ ಟ್ರೈನಿಯಾಗಿ ವೃತ್ತಿ ಮಾಡುತ್ತಿದ್ದೇನೆ. ಕವನ ಮತ್ತು ಕಿರು ಲೇಖನಗಳನ್ನ ಬರೆಯುವದು ಹವ್ಯಾಸವಾಗಿದ್ದು, ಲೆಸ್ಟರ್ ಕನ್ನಡ ಸಂಘ ಪ್ರತಿ ವರ್ಷ  ನಡೆಸುವ ಯುಗಾದಿ ಸಂಭ್ರಮಾಚರಣೆಯಲ್ಲಿ ಸಕ್ರೀಯ ಭಾಗ ತೆಗೆದುಕೊಳ್ಳುತ್ತೇವೆ.

ಗುರುವೇ ದೇವರೆನಿಸಿದಾಗ

ಸುಂದರ ಹಳ್ಳಿಯ ಸ್ವಚ್ಛಂದ ವಾತಾವರಣದಲ್ಲಿ, ಕಲ್ಮಷವಿಲ್ಲದ ಬಾಂಧವ್ಯಗಳಲ್ಲಿ ಬೆಳೆದ ಸುಂದರ ಪುಷ್ಪ ನನ್ನ ಕಥಾ ನಾಯಕಿ. ಭವಿಷ್ಯದ ನೂರಾರು ಪ್ರಶ್ನೆಗಳಿಗೆ ಉತ್ತರ ಹುಡುಕಿ ಹೊರಟ ಇವಳು ಶಾರದೆಯ ಕೃಪಾರೂಪವಾಗಿದ್ದಳು. ನಡೆನುಡಿ, ವಿದ್ಯೆ, ವಿಚಾರ ಎಲ್ಲದರಲ್ಲೂ ಮುಂಚೂಣಿ. ತಾಯಿಯ ಕಣ್ಣಮಿಂಚು, ತಂದೆಯ ಅಭಿಮಾನ ಮತ್ತು ಗುರುಗಳ ಅತೀ ಪ್ರೀತಿಯ ಶಿಷ್ಯೆ. ಅವಳಿಗೋ ಶಾಲೆಯೇ ದೇವಸ್ಥಾನ, ಗುರುಗಳೇ ದೇವರು.

The Companion

ಅತೀ ಪ್ರೀತಿಯ ಗುರುಗಳು ಹಲಗೇರಿ ಟೀಚೆರೆಂದರೆ ಅವಳಿಗೆ ಪ್ರಾಣ. ಅದರಂತೆ ಅವರದ್ದೂ ಕೂಡ ಗೌರವಕ್ಕೆ ಮೀರಿ ನಿಂತ ಬದುಕು, ಸದಾ ಕಲಿಕೆಗೆ ಒತ್ತು, ಎಂದೂ ಗದರಿದವರಲ್ಲ, ನಗುಮುಖ, ಉನ್ನತ ವಿಚಾರೋಕ್ತಿ ಮತ್ತು ಆದರ್ಶಕ್ಕೆ ಇನ್ನೊಂದು ಹೆಸರೇ ಅವರಾಗಿದ್ದರು.

ಒಂದು ದಿನ ಹಲಗೇರಿ ಟೀಚರ್ ರಜೆಯ ಮೇಲಿದ್ದ ಕಾರಣ ಅವರಿಗೆ ಪತ್ರವೊಂದನ್ನು ತಲುಪಿಸುವ ಜವಾಬ್ದಾರಿಯೊಂದನ್ನ ಪುಷ್ಪಾಳಿಗೆ ಮುಖ್ಯೋಪಾಧ್ಯಾಯರು ನೀಡಿದರು. ಅದರಂತೆ ಅವರ ಮನೆಯ ಬಾಗಿಲಲ್ಲಿ ನಿಂತ ಪುಷ್ಪಾಳಿಗೆ ಕಂಡ ಆ ದೃಶ್ಯ ಅವಳ ಜೀವಮಾನದಲ್ಲಿ ಮರೆಯಲಾಗದಂತದು. ಒಂದೇ ಒಂದು ಕೋಣೆಯ ಅವಳ ಟೀಚರ್ ಮನೆಯಲ್ಲಿ ಅವರ ಪತಿ ಕುಡಿದ ಮತ್ತಲ್ಲಿ ಅವರನ್ನ ಕಾಲಿನಿಂದ ಹತ್ತಿಕ್ಕುವದನ್ನ, ಅವಾಚ್ಯ ಶಬ್ದಗಳಲ್ಲಿ ಸಂಶಯಭರಿತ ಮಾತುಗಳಲ್ಲಿ ನಿಂದಿಸುವದನ್ನ ಕಂಡು ಕಣ್ಣೀರ ಧಾರೆ ದಳ ದಳನೇ ಹರಿದು ಮುಖದಿಂದ ಜಾರಿ ಧರೆ ಮುಟ್ಟಿದ್ದು ಅವಳಿಗೆ ಅರಿವಾಗೋ ಮುನ್ನವೇ ಓಡೋಡಿ ಶಾಲೆ ತಲುಪಿದ್ದಳು. ಪುಷ್ಪ ಆ ದಿನ ಕಂಡದ್ದು ಒಂದು ಸುಳ್ಳೆಂದು ಮರೆಯಬೇಕೆಂದುಕೊಂಡಳು. ಇನ್ನೂ ಟೀಚರ್ ಮುಖ ನೋಡಲು ವಾರಗಳೇ ಆಗಬಹುದೆಂದುಕೊಂಡಿದ್ದವಳಿಗೆ ಮರುದಿನ ಕಂಡ ಟೀಚರ್ ನ ನಗುಮುಖ, ನಿನ್ನೆ ನಡೆದದ್ದೆಲ್ಲ ಕನಸೆಬಂತೆ ತೋರುತಿತ್ತು ಮತ್ತು ಆ ಘಟನೆಯು ಅವರಿಗೆ ಹೊಸತೇನಲ್ಲವೆನ್ನುವ ಅರಿವನ್ನು ಮಾಡಿತ್ತು. ಆದಿನ ಟೀಚರ್ ಹೊದ್ದಿಕೊಂಡಿದ್ದ ಸೆರಗಿನಡಿಯಲ್ಲಿ ಅಡಗಿಕೊಂಡ ಹರಿದ ರವಿಕೆ ಅವರ ಬಡತನದ ಇನ್ನೊಂದು ಮುಖವನ್ನೂ ಪರಿಚಯ ಮಾಡಿತ್ತು.

ಪಠ್ಯ ಮತ್ತು ಪಠ್ಯೇತರ ಚಟುವಟಿಗೆಳಲ್ಲಿ ಪ್ರಶಸ್ತಿಗಳ ಸರಮಾಲೆಗಳನ್ನ ಪುಷ್ಪಾ ಜೋಡಿಸುತ್ತಿರುವಾಗ ಅವಳಿಗಿಂತ ಹೆಚ್ಚು ಸಂತಸ ಪಟ್ಟವರು, ಬೆನ್ನುತಟ್ಟಿ ಹುರಿದುಂಬಿಸಿದವರು ಅವಳ ಟೀಚರ್. ಆ ದಿನದ ಘಟನೆ ಅವಳ ಗುರಿ ತಲುಪುವ ಪ್ರಯತ್ನಕ್ಕೆ ಇನ್ನೊಂದು ಕಾರಣ ಒದಗಿಸಿತ್ತು. ಪ್ರಯತ್ನಕ್ಕೆ ದಕ್ಕದ ಫಲವಿಲ್ಲವೆಂಬತೆ ಅವಳು ಗುರಿ ಮುಟ್ಟುವದು ತಡವಾಗಲಿಲ್ಲ. ಒಂದು ಉನ್ನತ, ಗೌರವಾನ್ವಿತ ಹುದ್ದೆ ಸೇರಿಕೊಂಡ ಅವಳಿಗೆ ವೃತ್ತಿಪರ ಬದುಕು, ಜೀವನದ ಪ್ರತಿದಿನದ ಓಡಾಟಗಳಲ್ಲಿ ಹಿಂದೆ ಕಂಡ ಕನಸುಗಳು, ಆದರ್ಶಗಳೊಂದಿಗಿನ ನಂಟುಗಳು ದಿನೇ ದಿನೇ ಮಸುಕಾಗತೊಡಗಿದ್ದವು.

ಹೀಗೆ ದಿನಗಳು ಸಾಗಿ, ಕೆಲವೊಂದು ವರ್ಷಗಳ ನಂತರ ಅವಳ ತಾಯಿ ವಿಚಾರವೊಂದನ್ನ ಫೋನಲ್ಲಿ ತಿಳಿಸಿದಾಗ ಪುಷ್ಪಾಳಿಗೆ ನಿಂತ ನೆಲವೇ ಕುಸಿದಂತಾಯಿತು. ಅವಳ ತಾಯಿ ಬಹುದಿನದ ಮೇಲೆ ಹಲಗೇರಿ ಟೀಚೆರನ್ನ ಭೇಟಿ ಮಾಡಿದ್ದಾಗಿಯೂ, ಉಭಯಕುಶಲೋಪರಿ ಮಾತನಾಡುತ್ತಿರುವಾಗ ಅವರಿಗೆ, ತಮ್ಮ ಹಿರಿ ಮಗಳು ಅವಳ ಕನಸಿನಂತೆ ವೈದ್ಯಕೀಯ ತರಬೇತಿಗೆ ಪ್ರವೇಶ ದೊರಕಿದ್ದಾಗಿಯೂ ಆದರೆ ಹಣಕಾಸಿನ ತೊಂದರೆಯಿಂದ ಅನುಕೂಲವಿರುವ ಸ್ಥಳೀಯ ಕಾಲೇಜಿನಲ್ಲಿ ಬೇರೆ ವಿದ್ಯಾಭ್ಯಾಸ ಮುಗಿಸಿ ಈಗ ಹುದ್ದೆ ಸೇರಿದ್ದಾಳೆ ಎಂದು ತಿಳಿಸಿದರು. ಆದರೆ ಅವಳ ಕನಸನ್ನ ತಾಯಿಯಾಗಿ ಪೂರೈಸಲಾಗಲಿಲ್ಲವಲ್ಲ ಎಂದು ಬೇಸರಗೊಂಡರೆಂದು ತಿಳಿಸಿದರು. ಆಗ ನಿಮ್ಮ ಶಿಷ್ಯೆಯ ನೆನಪಾಗಲಿಲ್ಲವೇ ಎಂದು ನನ್ನ ತಾಯಿ ಕೇಳಿದಾಗ ನಾನು ಅವಳ ಸಹಾಯ ಕೇಳಿದ್ದರೆ ನಾನೇ ’ಅವಳಿಗೆ ಕಲಿಸಿದ ಸ್ವಾಭಿಮಾನ’ ಪಾಠಕ್ಕೆ ಮೋಸವಾಗುತ್ತಿತ್ತೆಂದು, ಅಲ್ಲದೆ ಇತ್ತೀಚಿನ ದಿನಗಳಲ್ಲಿ ಸಂಪರ್ಕವೇ ಇಲ್ಲದಿರುವಾಗ ನನಗೆ ದಾರಿಯೂ ತೋರಲಿಲ್ಲವೆಂಬ ಅವರ ಉತ್ತರ ಪುಷ್ಪಾಳ ಸಾಧನೆಗಳ ಕಂಬವನ್ನೇ ಅಲುಗಾಡಿಸಿತ್ತು.

ತಡಮಾಡದೆ ಊರಿಗೆ ಪ್ರಯಾಣ ಬೆಳೆಸಿ ಅವರನ್ನ ಭೇಟಿಮಾಡಿ ತಾನು ಚಿಕ್ಕವಳಿದ್ದಾಗ ಅವರ ಮಕ್ಕಳನ್ನ ತನ್ನ ಒಡಹುಟ್ಟಿದವರೆಂದು ಭಾವಿಸಿದ್ದು ಮತ್ತು ಅವರ ಭವಿಷ್ಯದಲ್ಲಿ ನೆರವಾಗಬೇಕೆಂದುಕೊಂಡಿದ್ದನ್ನು ಹೇಳಿಕೊಂಡು, ಅದಕ್ಕೆ ತಕ್ಕನಾಗಿ ನಿಲ್ಲಲಾಗದೆ ಋಣಭಾರ ತೀರಿಸುವ ಅವಕಾಶ ಕಳೆದುಕೊಂಡೆನೆಂದು ಕ್ಷಮೆಯಾಚಿಸಿದಳು. ಆಗ ಟೀಚರ್ ನೀನೆಂದು ಅಂದುಕೊಂಡ ಗುರಿ ತಲುಪಿದೆಯೋ ಅಂದೇ ನನ್ನ ಋಣಭಾರ ತೀರಿಸಿದೆಯೆಂದು ಬಾಚಿ ತಬ್ಬಿಕೊಂಡರು. ಪುಷ್ಪಾಳಿಗೆ ನೆಚ್ಚಿನ ಗುರುಗಳ ಆದರ್ಶ ಇನ್ನೂ ಬೃಹದಾಕಾರಕ್ಕೆ ಬೆಳೆದಿದ್ದಲ್ಲದೆ, ಅಂದು ಕಲಿತ ಇನ್ನೊಂದು ಪಾಠ ‘ಸಮಯಕ್ಕಾಗದ ಹಣ, ಕಷ್ಟಕ್ಕಾಗದ ಸಂಬಂಧಗಳೆಂದೂ ವ್ಯರ್ಥ’ ಎಂಬುದು ಕಣ್ಮುಂದೆ ಹಾದು ಹೋಯಿತು. ಇನ್ನೆಂದೂ ಜೀವನದಲ್ಲಿ ಇಂಥ ಘಟನೆಗಳಿಗೆ ಅವಕಾಶಕೊಡಬಾರದೆಂದು ಕಣ್ಣೀರು ಒರೆಸಿಕೊಂಡಳು. ಆಗ ಟೀಚರ್ ನ ದೊಡ್ಡ ಮಗಳು ನಗುಮುಖದೊಂದಿಗೆ ತಿಂಡಿ ತಟ್ಟೆ ತಂದು ಹಿಡಿದು ಅಕ್ಕ, ಅಮ್ಮನ ಬಾಯಲ್ಲಿ ಸದಾ ನಿನ್ನ ಮಾತೆ ಎಂದಾಗ ಎಲ್ಲರ ಮುಖದಲ್ಲಿ ನಗು ತೇಲಿತು.

ಡಾ ರಾಜಶ್ರೀ ಪಾಟೀಲ್

‘ಥಟ್ ಅಂತ ಹೇಳಿ‘ – ಅಂತಿಮ ಹಣಾಹಣಿ — ಕೇಶವ ಕುಲಕರ್ಣಿ ಬರೆದ ಲೇಖನ

ಪ್ರಿಯ ಓದುಗರೆ, ನೀವು‘ ಅನಿವಾಸಿ ಬಳಗ‘ದ ಸದಸ್ಯರು ಭಾಗವಹಿಸಿ ಬರೆದ “ಥಟ್ ಅಂತ ಹೇಳಿ“ ಕಾರ್ಯಕ್ರಮದ ಮೊದಲ ಎರಡು ಕಂತುಗಳನ್ನು ಓದಿರುತ್ತೀರಿ ಮತ್ತು ನಿಮ್ಮಲ್ಲಿ ಬಹಳಷ್ಟು ಜನ ಕಾರ್ಯಕ್ರಮವನ್ನು ನೋಡಿಯೂ ಇರುತ್ತೀರಿ. ಮೂರನೆಯ ಮತ್ತು ಅಂತಿಮ ಸುತ್ತಿನ ಕಾರ್ಯಕ್ರಮದ ವರದಿಯನ್ನು ಅದರಲ್ಲಿ ಭಾಗವಹಿಸಿದ ಡಾ. ಕೇಶವ ಕುಲಕರ್ಣಿ, ಅದು ನಡೆದ ಬಗೆ, ಆಂಗ್ಲನಾಡಿಗೆ ಕರುನಾಡಿನಿಂದ ಪಯಣಿಸಿದ ರೀತಿ, ಪ್ರೇಕ್ಷಕರ ಮನ ಗೆದ್ದ ಅಶುಕವಿತೆಯ ವಿವರದ ಜೊತೆಗೆ ಹಾಸ್ಯದ ಮೆರುಗನ್ನು ಸೇರಿಸಿ ಬರೆದಿದ್ದಾರೆ ಮತ್ತು ಹಿಂದಿನ ಕಾರ್ಯಕ್ರಮಗಳನ್ನು ನೋಡುವ ಅವಕಾಶವನ್ನೂ ಸಹ ನಮ್ಮ ಮುಂದಿಟ್ಟಿದ್ದಾರೆ. ಈ ಕಾರ್ಯಕ್ರಮ ಗಮನಾರ್ಹ ಅಂಕೆಯಲ್ಲಿ ಕನ್ನಡಿಗರನ್ನು ತಲುಪಿ ಯಶಸ್ವಿಯಾಗಿದೆ – (ದಾಕ್ಷಾಯಿಣಿ ಗೌಡ -ಸಂ)

ಕ್ವಿಜ಼್ ಮಾಸ್ತರ್ (ಮಾಸ್ಟರ್) ಡಾ. ನಾ ಸೋಮೇಶ್ವರ:  

ಡಾ. ನಾ ಸೋಮೇಶ್ವರ (ನಾಸೋ) ಅವರ ಹೆಸರು ಕೇಳದ ಕನ್ನಡಿಗನಿಲ್ಲ ಎಂದರೆ ಅತಿಶಯೋಕ್ತಿ ಏನಲ್ಲ. ಅವರ ವಿದ್ವತ್ತು, ಕನ್ನಡ ಭಾಷೆಯ ಮೇಲಿನ ಪ್ರೀತಿ, ಅಚ್ಚ ಕನ್ನಡದಲ್ಲಿ, ಸುಲಿದ ಬಾಳೆಯಹಣ್ಣಿನಂದದಿ, ಸಂಭಾಷಿಸುವ ವೈಖರಿಗೆ ಮಾರುಹೋಗದವರಿಲ್ಲ. ನಿತ್ಯಹಸನ್ಮುಖಿಯಾಗಿ ವಿನಯಪೂರ್ವಕವಾಗಿ ಮಾತನಾಡುತ್ತ ಕೆಲವೇ ನಿಮಿಷದಲ್ಲಿ ಆಪ್ತವಾಗುವ ಪರಿಭಾವ ಅವರದು.

ಡಾ. ನಾ ಸೋಮೇಶ್ವರ

ನಾಸೋ ಅವರೊಂದಿಗೆ ಮಾತನಾಡುವ, ಕಾಲ ಕಳೆಯುವ ಅವಕಾಶ ಸಿಗುತ್ತದೆ, ಎನ್ನುವ ಒಂದೇ ಕಾರಣಕ್ಕೆ ’ಅನಿವಾಸಿ’ಯ ಸ್ನೇಹಿತರು ನಾ ಮುಂದು ತಾ ಮುಂದು ಎಂದು ಈ ಇ-ಕ್ವಿಜ಼್‍ನಲ್ಲಿ ಪಾಲ್ಗೊಳ್ಳಲು ಮುಂದಾದದ್ದು ಸುಳ್ಳೇನಲ್ಲ.

ನಾಸೋ ಅವರು ವಿನಯಪೂರ್ಣ, ಸ್ಪುಟವಾದ, ಸ್ಪಷ್ಟವಾದ  ಕನ್ನಡದಲ್ಲಿ ಮಾತಾಡುತ್ತಿದ್ದರೆ, ಕನ್ನಡವನ್ನು ಕೇಳುತ್ತಲೇ ಇರಬೇಕು ಎನಿಸುತ್ತದೆ. ಅವರು ಗಾದೆಗಳನ್ನು ವಿವರಿಸುವ ರೀತಿ ಇರಬಹುದು, ಒಗಟುಗಳನ್ನು ವರ್ಣಿಸುವ ರೀತಿ ಇರಬಹುದು, ಸ್ಪರ್ಧಾಳುಗಳನ್ನು ಹುರಿದುಂಬಿಸುವ ರೀತಿ ಇರಬಹುದು, ಅದನ್ನು ನೋಡುವುದೇ ಚಂದ, ಕೇಳುತ್ತ ಕೂರುವುದೇ ಚಂದ.

ಕರ್ನಾಟಕದ ಭೂಗೋಲ ಮಾಹಿತಿ, ಇತಿಹಾಸ, ಜಾನಪದ, ಸಂಸ್ಕೃತಿ, ಒಗಟುಗಳು, ಗಾದೆಗಳು, ಸುಗಮಸಂಗೀತ, ಚಲನಚಿತ್ರ, ಕ್ರೀಡೆ, ಸಾಹಿತ್ಯ, ನಾಟಕ…ಒಂದೇ ಎರಡೇ… ಆಡುಮುಟ್ಟದ ಗಿಡವಿಲ್ಲ, ನಾಸೋ ಕೇಳದ ಪ್ರಶ್ನೆಯಿಲ್ಲ ಎನ್ನಬಹುದೇನೋ. ಅವರು ಕಾರ್ಯಕ್ರಮವನ್ನು ರೂಪಿಸುವ ರೀತಿಯಲ್ಲಿ ಸಮಗ್ರ ಕರ್ನಾಟಕದ ದರ್ಶನವಾಗುತ್ತದೆ.

3500ಕ್ಕೂ ಹೆಚ್ಚು ಕಂತುಗಳಲ್ಲಿ ದೂರದರ್ಶನದಲ್ಲಿ ಪ್ರಸಾರವಾಗಿರುವ ನಾಸೋ ಅವರ ’ಥಟ್ ಅಂತ ಹೇಳಿ’ ಕಾರ್ಯಕ್ರಮ ಜಾಲದ ಕಾರಣದಿಂದಾಗಿ ಇಂಗ್ಲಂಡಿಗೂ ಬಂದಿದ್ದು ನಮ್ಮ ಸುಯೋಗ.

ಸತ್ಯಪ್ರಮೋದ ಲಕ್ಕುಂಡಿ:

ಕರ್ನಾಟಕದ ದೂರವಾಹಿನಿಯಲ್ಲಿ ಮನೆಮಾತಾಗಿರುವ ಅವರ ’ಥಟ್ ಅಂತ ಹೇಳಿ’ ಕಾರ್ಯಕ್ರಮ ಕೊರೊನಾ ಕಾರಣದಿಂದಾಗಿ ಜಾಲಕ್ಕೆ ತರುವ, ಕರ್ನಾಟಕದಿಂದ ಹೊರಗೆ ತರುವ ಕೆಲಸದ ರುವಾರಿ ಹೊತ್ತವರು ಸತ್ಯಪ್ರಮೋದ ಅವರು.

ಸತ್ಯಪ್ರಮೋದ ಅವರು ಮಾತು ಕಡಿಮೆ, ಕೆಲಸ ಜಾಸ್ತಿ ಎಂದು ಹೇಳುತ್ತಾರಲ್ಲ, ಆ ಪಂಗಡಕ್ಕೆ ಸೇರಿದವರು. ಅವರು ನಡೆಸುವ ’ಮೂಕ ಟ್ರಸ್ಟ್’, ’ವಿವಿಡ್ಲಿಪಿ’ಗಳೇ ಅದಕ್ಕೆ ಸಾಕ್ಷಿ. ’ಮೂಕ ಟ್ರಸ್ಟ್’ ಹೆಸರಿನಿಂದ ಪ್ರತಿ ವಾರವೂ ಜಾಲದಲ್ಲಿ ಕನ್ನಡದ ಖ್ಯಾತ ಸಾಹಿತಿಗಳ, ಸಾಹಿತ್ಯ  ಕೃತಿಗಳ ಭಾಷಣಮಾಲೆಗಳನ್ನು ಏರ್ಪಡಿಸುತ್ತಾರೆ.

ನಾಸೋ ಅವರ, ’ಕ್ವಿಜ಼್ ನಡೆದು ಬಂದ ದಾರಿ’ ಎನ್ನುವ ಕಾರ್ಯಕ್ರಮವೂ ವಿವಿಡ್ಲಿಪಿಯ ಕಾರ್ಯಕ್ರಮದಲ್ಲಿದೆ. ಅದನ್ನು ನೋಡಲು ಇಲ್ಲಿ ಒತ್ತಿ.

ಇಂಗ್ಲಂಡಿನಲ್ಲಿ ’ಥಟ್ ಅಂತ ಹೇಳಿ’

’ಥಟ್ ಅಂತ ಹೇಳಿ’, ಕರ್ನಾಟಕದಲ್ಲಿ ಜನಪ್ರಿಯವಾದ ಜನಜನಿತವಾದ ಕ್ವಿಜ಼್ ಕಾರ್ಯಕ್ರಮ. ಯಾವ ಆಡಂಬರವಿಲ್ಲದೇ ಯಾವ ಆಮಿಷಗಳಿಲ್ಲದೇ ಕನ್ನಡ ಭಾಷೆ ಸಾಹಿತ್ಯ ಸಂಸ್ಕೃತಿ ಇತಿಹಾಸವನ್ನು ಮನೆಯಲ್ಲಿ ಕೂತಲ್ಲೇ ಮನೋರಂಜಕವಾಗಿ ಡಾ|ನಾ ಸೋಮೇಶ್ವರ ಅವರು ದಶಕಗಳಿಂದ ಉಣಬಡಿಸುತ್ತ ಬಂದಿದ್ದಾರೆ. ವೈದ್ಯರಾಗಿ ವೈದ್ಯಕೀಯ ಕಾರ್ಯಗಳನ್ನು ನಿರ್ವಹಿಸುತ್ತಲೇ ’ಥಟ್ ಅಂತ ಹೇಳಿ’ ಕಾರ್ಯಕ್ರಮವನ್ನು ಚಾಚೂ ತಪ್ಪದೇ ನಡೆಸಿಕೊಂಡು ಬಂದಿದ್ದಾರೆ. ಕರ್ನಾಟಕದ ಮೂಲೆ ಮೂಲೆಗಳಿಂದ ಸ್ಪರ್ಧಾರ್ಥಿಗಳನ್ನು ಕರೆತಂದು ಕನ್ನಡದ ಮೂಲೆ ಮೂಲೆಗೆ ರಸದೌತಣವನ್ನು ಹಂಚುತ್ತಿದ್ದಾರೆ.

ಕೊರೊನಾ ಮಾರಿ ವಿಶ್ವವನ್ನೆಲ್ಲಿ ವ್ಯಾಪಿಸಿರುವಾಗ ವಿವಿಡ್ಲಿಪಿಯ ಶ್ರೀ ಸತ್ಯಪ್ರಮೋದ ಲಕ್ಕುಂಡಿಯವರ ’ಮೂಕ ಟ್ರಸ್ಟ್’ ಈ ಸುಂದರ ಕಾರ್ಯಕ್ರಮನನ್ನು ಅಂತರಜಾಲದ ಮೂಲಕ ಇಂಗ್ಲಂಡಿಗೂ ತಂದೇ ಬಿಟ್ಟಿದ್ದು ನಿಮಗೆಲ್ಲ ತಿಳಿದೇ ಇದೆ. ಈಗ ಎರಡು ತಿಂಗಳಲ್ಲಿ, ’ಕನ್ನಡ ಸಾಹಿತ್ಯ ಮತ್ತು ಸಾಂಸ್ಕೃತಿಕ ವಿಚಾರ ವೇದಿಕೆ (KSSVV)’ಯ ಸ್ನೇಹಿತರಿಗೆ ಮನೆಯಲ್ಲೇ ಕೂತು ಬೆಂಗಳೂರಿನಿಂದ ನಾಸೋ ಅವರು ’ಥಟ್ ಅಂತ ಹೇಳಿ’ ಕಾರ್ಯಕ್ರಮವನ್ನು ಪಾಕ್ಷಿಕವಾಗಿ ನಡೆಸಿಕೊಟ್ಟಿದ್ದಾರೆ. ಪ್ರತಿ ಕಾರ್ಯಕ್ರಮದಲ್ಲಿ ನಾಲ್ಕು ಸ್ಪರ್ಧಾರ್ಥಿಗಳು. ಹತ್ತು ಸುತ್ತುಗಳು. ಪ್ರತಿ ಸುತ್ತಿನಲ್ಲಿ ನಾಲ್ಕು ಪ್ರಶ್ನೆಗಳು, ಬಜ಼ರ್ ಒತ್ತಿದ ಮೊದಲ ಅಭ್ಯರ್ಥಿಗೆ ಮೊದಲ ಅವಕಾಶ; ಉತ್ತರ ತಪ್ಪಿದ್ದರೆ ಬಜ಼ರ್ ಒತ್ತಿದ ಎರಡನೇಯವರಿಗೆ. ಋಣಾಂಕವಿಲ್ಲ. ಸರಿ ಉತ್ತರಕ್ಕೆ ವಿವಿಡ್ಲಿಪಿಯ ವತಿಯಿಂದ ಪುಸ್ತಕ. ಪ್ರತಿ ಸ್ಪರ್ಧೆಯ ವಿಜೇತರು ಅಂತಿಮ ಸುತ್ತಿಗೆ.

ಮೊದಲ ಸುತ್ತಿನ ವರದಿಗಾಗಿ ಇಲ್ಲಿ ಒತ್ತಿ

ಎರಡನೇ ಸುತ್ತಿನ ವರದಿಗಾಗಿ ಇಲ್ಲಿ ಒತ್ತಿ

ಮೂರನೇ ಸುತ್ತು:

ಮೂರನೇ ಸುತ್ತಿನಲ್ಲಿ ಇದ್ದವರು ಮುರಳಿ ಹತ್ವಾರ್, ರಮ್ಯಾ ಭಾದ್ರಿ, ಸ್ವರೂಪ ಮಠ ಮತ್ತು ನಾನು (ಕೇಶವ ಕುಲಕರ್ಣಿ) ಭಾಗವಹಿಸಿದ್ದೆವು. ಮುರಳಿ ಮತ್ತು ರಮ್ಯಾ ಅವರು ಆರಂಭದ ಸುತ್ತುಗಳಿಂದಲೇ ಪಿಂಚ್ ಹಿಟ್ಟಿಂಗ್ ಶುರು ಮಾಡಿದರು, ಅಂದರೆ ಬಜ಼ರ್ ಒತ್ತಿ ಸರಿ ಉತ್ತರಗಳನ್ನು ಕೊಟ್ಟರು. ಸ್ವರೂಪ ಮತ್ತು ನಾನು ಟೆಸ್ಟ್ ಆಟಗಾರರ ತರಹ ನಿಧಾನವಾಗಿ ಆರಂಭಿಸಿದೆವು. ಕನ್ನಡ ಭೂಗೋಲ, ಇತಿಹಾಸ ಹಾಗೂ ಕನ್ನಡ ಸಾಹಿತ್ಯದ ಪ್ರಶ್ನೆಗಳು ತುಂಬ ಉಪಯುಕ್ತವಾಗಿದ್ದವು, ಆದರೆ ಉತ್ತರ ಮಾತ್ರ ನನಗೆ ಗೊತ್ತಿರಲಿಲ್ಲ. ಕನ್ನಡದ ಗಾದೆ ಮಾತುಗಳನ್ನು ಒಗಟುಗಳನ್ನು ನಾಸೋ ಅವರು ವಿವರಿಸುವ ರೀತಿ ಅನನ್ಯ. ಅವರ ಮಾತಿನ ಮೋಡಿಯಲ್ಲಿ, ಮುರಳಿಯವರ ಭರ್ಜರಿ ಬ್ಯಾಟಿಂಗ್‍ನಲ್ಲಿ ಕೆಲ ನಿಮಿಷ ನಾನು ಸ್ಪರ್ಧಾರ್ಥಿ ಎನ್ನುವುದನ್ನೂ ಮರೆತು ನೋಡುಗನಾಗಿ ಆನಂದಿಸುತ್ತ ಕೊತಿದ್ದು ಸುಳ್ಳಲ್ಲ.

ಬೇಂದ್ರೆಯವರ ಬದುಕು ಬರಹದ ಬಗ್ಗೆ ’ಚಿಟ್ ಪಟ್ ಚಿನಕುರುಳಿ’ ಸುತ್ತಿನಲ್ಲಿ ’ನರಬಲಿ’ ಎನ್ನುವ ಉತ್ತರ ಗೊತ್ತಿದ್ದರೂ ನನಗೆ ಉತ್ತರ ನಾಲಿಗೆಗೆ ಬರಲಿಲ್ಲ; ಕೈಗೆ ಬಂದ ತುತ್ತು ಬಾಯಿಗೆ ಬರಲಿಲ್ಲ. ಹಾಗೆಂದು ಕಾರ್ಯಕ್ರಮ ಮುಗಿದ ಮೇಲೆ ನನ್ನ ತಮ್ಮನಿಗೆ ’ಹಾಟ್‍ಸೀಟ್’ ಪ್ರಭಾವ ಎಂದು ಹೇಳುತ್ತಿದ್ದೆ. ಅದಕ್ಕೆ ನನ್ನ ತಮ್ಮನ  ಪುಟ್ಟ ಮಗ, ’ಕಾಕಾ ಎಲ್ಲೆ ಹಾಟ್‍ಸೀಟ್‍ನ್ಯಾಗ ಕೂತಿದ್ರು? ಅವರು ತಮ್ಮ ಮನ್ಯಾಗ ಅವರ ಕುರ್ಚಿ ಮ್ಯಾಲೆ ಕೂತಿದ್ರು,’ ಎನ್ನಬೇಕೇ?

ಮೂರನೇ ಸುತ್ತನ್ನು ಮುರಳಿ ಹತ್ವಾರ್ ಅವರು ಲೀಲಾಜಾಲವಾಗಿ ಗೆದ್ದು ಅಂತಿಮ ಸುತ್ತಿಗೆ ನಡೆದರು. 150ಕ್ಕೂ ಹೆಚ್ಚಿನ ಅಂಕ ಪಡೆದ ಖುಷಿ ಮತ್ತು ನಾಸೋ ಅವರೊಂದಿಗೆ ಮಾತನ್ನಾಡುವ ಅವಕಾಶ ಸಿಕ್ಕಿದ್ದು ನನ್ನ ಆನಂದಕ್ಕೆ ಪಾರವೇ ಇರಲಿಲ್ಲ.

ಅಂತಿಮ ಹಣಾಹಣಿ (ಫೈನಲ್ಸ್) :

ಮೊದಲ ಸುತ್ತಿನಲ್ಲಿ ಲಕ್ಷ್ಮೀನಾರಾಯಣ ಗುಡೂರ್, ಎರಡನೇ ಸುತ್ತಿನಲ್ಲಿ ದಿವ್ಯತೇಜ, ಮತ್ತು ಮೂರನೇ ಸುತ್ತಿನಲ್ಲಿ ಮರಳಿ ಹತ್ವಾರ್ ವಿಜೇತರಾಗಿದ್ದರು. ನಾಲ್ಕನೇಯ ಅಭ್ಯರ್ಥಿ ಯಾರಿರಬಹುದು ಎನ್ನುವುದು ಕೊನೆಯ ಕ್ಷಣದಲ್ಲಿ ಘೋಷಿಸಲಾಯಿತು. ಲಂಡನ್ನಿನ ’ಭಾರತೀಯ ವಿದ್ಯಾಭವನ’ದ ನಿರ್ದೇಶಕರಾದ ಡಾ. ಮತ್ತೂರು ನಂದಕುಮಾರ ಅವರು ವೈಲ್ಡ್‍ಕಾರ್ಡ್ ಸೆಲಿಬ್ರಿಟಿ ಗೆಸ್ಟ್ ಆಗಿ ನಾಲ್ಕನೇ ಸ್ಪರ್ಧಾರ್ಥಿಯಾದರು. ಕಾರ್ಯಕ್ರಮಕ್ಕೆ ಕಳೆ ಬಂದಿತು.

ಡಾ ಮತ್ತೂರು ನಂದಕುಮಾರ

ಸ್ವಾತಂತ್ರ್ಯ ದಿನಾಚರಣೆಯ ಮುಂದಿನ ದಿನ, ಅಂದರೆ ಅಗಷ್ಟ್ 16 ರಂದು, ’ಏರ್-ಮೀಟ್’ ಮಾಧ್ಯಮದ ಮೂಲಕ ಯಶಸ್ವಿಯಾಗಿ ನಡೆಯಿತು. 

ಕಾರ್ಯಕ್ರಮವನ್ನು ಪೂರ್ತಿ ನೋಡಲು ಇಲ್ಲಿ ಒತ್ತಿ. ಕಾರ್ಯಕ್ರಮದ ಕೆಲವು ಪ್ರಮುಖ ಅಂಶಗಳನ್ನು ಇಲ್ಲಿ ದಾಖಲಿಸಿದ್ದೇನೆ:

ಫೈನಲ್ಸ್-ನಲ್ಲಿ ನಿಯಮಗಳಲ್ಲಿ ಒಂದು ಮಹತ್ವದ ಬದಲಾವಣೆಯಾಯಿತು. ಬಜ಼ರನ್ನು ತೆಗೆದು ಹಾಕಲಾಯಿತು. ಇದರಿಂದಾದ ಅನುಕೂಲಗಳ ಎರಡು: ಎಲ್ಲರಿಗೂ ಅವಕಾಶ ಸಿಕ್ಕಿದ್ದು ಮತ್ತು ಸಮಯದ ಉಳಿತಾಯ.

ಕಾರ್ಯಕ್ರಮದಲ್ಲಿ ಪಾಲ್ಗೊಳ್ಳುತ್ತಲೇ ಗುಡೂರ್ ಅವರು ನಂದಕುಮಾರ ಮತ್ತು ಮುರಳಿಯವರ ಕ್ಯಾರಿಕೇಚರ್ ಬರೆದದ್ದು ವಿಶೇಷವಾಗಿತ್ತು. (ಕೆಳಗೆ ನೋಡಿರಿ)

ಚಿತ್ರಕಾವ್ಯ ಸುತ್ತಿನಲ್ಲಿ ಬರೆದ ನಾಕು ಸಾಲಿನ ಕವನಗಳ ಆಶುಕವಿತೆಗಳು ಅದ್ಭುತವಾಗಿದ್ದವು.

ಗುಡೂರ್ ಅವರು ಬರೆದ ಆಶುಕವನವನ್ನು ಇಲ್ಲಿ ಉಲ್ಲೇಖಿಸುತ್ತೇನೆ. ತಂದೆಯ ಹೆಗಲ ಮೇಲೆ ಕುಳಿತ ಮಗುವಿನ ಚಿತ್ರಕ್ಕೆ ಅವರು ಬರೆದ ಕವನ:

‘ನನ್ನ ಅಪ್ಪನ ಹೆಗಲು ಕಡಿಮೆಯೇ ಯಾವಸಿಂಹಾಸನಕ್ಕೆ?

ಮೇಲೇರಿ ಕೂಡುವನು ಹೊರಡುವೆನು ಅಲ್ಲಿಂದ

ಜೀವನದ ಸಿಂಹಾವಲೋಕನಕ್ಕೆ’’

ಲಕ್ಷ್ಮಿನಾರಾಯಣ ಗುಡೂರ್

ಗಾಯಕಿಯರನ್ನು ಗುರುತಿಸುವ ಶ್ರವ್ಯಕಾವ್ಯ ಕಷ್ಟಕರವಾಗಿತ್ತು.

ನಾಸೋ ಅವರು ಅಂಕಗಳನ್ನು ಎಣಿಸಲು ಬ್ರೇಕ್ ತೆಗೆದುಕೊಂಡಾಗ, ಪ್ರವೀಣ B V ಅವರು ಸುಶ್ರಾವ್ಯವಾಗಿ ಕನ್ನಡದ ಭಾವಗೀತೆಗಳನ್ನು ಹಾಡಿದರು. ಕೈಲಾಸಂ ಅವರ ‘ತಿಪ್ಪಾರಳ್ಳಿ’ ಹಾಡನ್ನು ಹಾಡಿ ಖುಷಿಪಡಿಸಿದರು. ಆ ಹಾಡು ಮುಗಿದ ಮೇಲೆ ನಾಸೋ ಅವರು ಆ ಹಾಡಿನ ಇತಿಹಾಸವನ್ನು ಮೆಲುಕು ಹಾಕಿದರು. ಪ್ರವೀಣ ಅವರು ಶರೀಫರ ಮತ್ತು ಕುವೆಂಪು ಅವರ ಕೃತಿಗಳನ್ನೂ ಹಾಡಿದರು. ಪ್ರವೀಣ್ B V ಮತ್ತು ಪ್ರದೀಪ್ B V ಅವರದು ಜೋಡಿ ಸಂಗೀತ. ವೃತ್ತಿಯಲ್ಲಿ ಐಟಿಯಾದರೂ ಅವರು ಕನ್ನಡ ಸುಗಮಸಂಗೀತದಲ್ಲಿ ತೊಡಗಿಸಿಕೊಂಡಿದ್ದಾರೆ. ಸಿ ಅಶ್ವಥ್ ಅವರ ಗರಡಿಯಲ್ಲಿ ಪಳಗಿದ್ದಾರೆ. ನಾಟಕಸಂಗೀತ ಮತ್ತು ಭಕ್ತಿಸಂಗೀತದಲ್ಲೂ ತಮ್ಮನ್ನು ತೊಡಗಿಸಿಕೊಂಡಿದ್ದಾರೆ. ಅವರ ಹಾಡುಗಳನ್ನು ಕೇಳಲು ಇಲ್ಲಿ ಒತ್ತಿ.

ಡಾ ನಂದಕುಮಾರ ಅವರ ಪತ್ರ

ಅ ಆ ಇ ಈ ಕಲಿತರೆ ಭಾಷೆಯ ಓದಲು ಬಲು ಸುಲಭ’ ಎಂದು ತಾವು ಬರೆದು ಸ್ವರಸಂಯೋಜಿಸಿದ ಹಾಡನ್ನು ಸುಶ್ರಾವ್ಯವಾಗಿ ನಂದಕುಮಾರ್ ಅವರು ಹಾಡಿದರು. ಈ ಹಾಡನ್ನು ನಾಗತಿಹಳ್ಳಿ ಚಂದ್ರಶೇಖರ್ ಅವರು ತಮ್ಮ ಇತ್ತೀಚಿನ ಚಿತ್ರ ’ಇಂಗ್ಲಂಡ್ ವರ್ಸಸ್ ಇಂಡಿಯಾ’ ಸಿನಿಮಾದಲ್ಲಿ ಬಳಸಿಕೊಂಡಿದ್ದಾರೆ.

ನಾಸೋ ಅವರಿಗೆ ’ಅನಿವಾಸಿ’ ಬಳಗದಿಂದ ಕೃತಜ್ಞತಾಪೂರ್ವಕವಾದ ವಂದನೆಗಳು ಮತ್ತು ಸತ್ಯಪ್ರಮೋದ ಅವರಿಗೆ ಧನ್ಯವಾದಗಳು.

ಅಂಕಿಅಂಶಗಳು:

ಮೂರನೇ ಸುತ್ತು ಸುಮಾರು ಐವತ್ತು ಸಾವಿರ ಜನರನ್ನು ತಲುಪಿದೆ. ಫೈನಲ್ಸ್ ಈಗಾಗಲೇ 34,891 ಜನರನ್ನು ತಲುಪಿದೆ. ಅಷ್ಟಲ್ಲದೇ ಲೋಕಲ್ ಚಾನಲ್ ಗಳು ಈ ಕಾರ್ಯಕ್ರಮಗಳ ನೇರ ಪ್ರಸಾರ ಮಾಡಿದ್ದಾರೆ; ಇದು ಕೂಡ ಸಾವಿರಾರು ಜನರನ್ನು ತಲುಪಿದೆ. Engagements: 1,104; Comments: 154; 33 shares; 14.000 views.

ಕೇಶವ ಕುಲಕರ್ಣಿ