ನಮ್ಮ ‘ಅನಿವಾಸಿ’ ಗುಂಪಿನ ಸಕ್ರಿಯ ಬರಹಗಾರರಾದ ಡಾ. ಜಿ.ಎಸ್. ಶಿವಪ್ರಸಾದ್ ರಿಗೆ ಕಳೆದ ತಿಂಗಳು ಆಗಸ್ಟ್ ನಲ್ಲಿ ಅರವತ್ತು ತುಂಬಿದ ಸಂಭ್ರಮ. ಸರಿ, ಅವರ ಕುಟುಂಬದವರು, ಸ್ನೇಹಿತರು ಸುಮ್ಮನಿದ್ದರೆ?! ಬೆಂಗಳೂರಿನಲ್ಲಿ ಒಂದು ಕಾರ್ಯಕ್ರಮವನ್ನು ನಡೆಸೇಬಿಟ್ಟರು. ಆ ಸಂಭ್ರಮದಲ್ಲಿ ಪಾಲ್ಗೊಂಡವರಿಗೆ ಕಾದಿತ್ತು ಸರ್ ಪ್ರೈಸ್! ಶಿವಪ್ರಸಾದ್ ರಿಗೆ ಎಲ್ಲರೂ ಕೊಡುವ ಉಡುಗೊರೆಯ ಮಾತಿರಲಿ, ಅವರೇ ಎಲ್ಲರಿಗೂ ತಮ್ಮ ಕವನಗಳ ಉಡುಗೊರೆಯನ್ನು (ಪುಸ್ತಕ ಬಿಡುಗಡೆ) ಕೊಟ್ಟು ಸತ್ಕರಿಸಿದರು. ಹಾಂ, ಆ ಸಮಾರಂಭದ ಬಗ್ಗೆ “ಅನಿವಾಸಿ” ಜಾಲ ಜಗುಲಿಯಲ್ಲಿ ಸೆಪ್ಟೆಂಬರ್ ೯ ರ ಇಂಗ್ಲೆಂಡಿನ ಕನ್ನಡಿಗ ಮತ್ತು ಹುಟ್ಟುಹಬ್ಬ – ಡಾ. ಪ್ರೇಮಲತ ಬಿ.ಲೇಖನವನ್ನು ಓದಿ, ಮತ್ತಷ್ಟು ಆಸಕ್ತ ವಿವರಗಳು ಸಿಗುತ್ತವೆ . ಈ ಶುಕ್ರವಾರದ ಜಗುಲಿಯಲ್ಲಿ ಶಿವಪ್ರಸಾದ್ ರ ಮೊದಲ ದ್ವಿಭಾಷಿಕ ಕವನ ಸಂಗ್ರಹದಿಂದ ಆಯ್ದ ಒಂದು ಕವನವಿದೆ, ತಪ್ಪದೆ ಓದಿ. – ಸಂ.

ಇಂಗ್ಲೆಂಡಿನಲ್ಲಿ ಮಳೆ

ಮಳೆ, ಮಳೆ, ಜಡಿ ಮಳೆ

ಹಗಲಿರುಳು ಸುರಿಯುವ ಮಳೆ

ಜಿನುಗಿ, ಜಿನುಗಿ, ಜಿಗುಪ್ಸೆ ತರುವ ಮಳೆ

ಹಲವೊಮ್ಮೆ

ಹದವಾಗಿ ಇಳಿಯುವ ತುಂತುರು ಮಳೆ

ನಾಡಿನ ಅಡಿಯಿಂದ ಮುಡಿಯವರೆಗೆ

ಹಸಿರು ಮೂಡಿಸಿ

ಕಣ್ಣಿಗೆ ತಂಪನ್ನೀಯುವ ಮಳೆ

ಮೋಡ ಕಟ್ಟಿ ಮಬ್ಬು ಕವಿದ

ಬೇಸರ ದಿನಗಳ ಹಿಂದೆ ಮಳೆ

 ಹೆನ್ರಿ ದೊರೆ ದಂಡೆತ್ತಿ ಹೋದಾಗ

ವಿಜಯೊತ್ಸಾಹದಲಿ ಸುರಿದ ಮಳೆ

ಆನ್ ಬಲೀನಳ ಶಿರಚ್ಛೇದನವಾಗಿ

ರುಂಡ ಉರುಳಿದಾಗ ರೋದಿಸಿದ ಮಳೆ

ಶತಮಾನಗಳ ಇತಿಹಾಸದಲಿ

ಬೆರತು ಮಣ್ಣಾದ ಮಳೆ

ಟೆನ್ನಿಸ್ ರಾಣಿ ವೀನಸ್ ಆಟ ಕಾವೇರಿದಾಗ

ಹೃದಯ ಮಿಡಿತಗಳ ಹಿಡಿದಿಟ್ಟ ಮಳೆ

ಎಲಿಜ಼ಬತ್ ರಾಣಿ ಹುಟ್ಟು ಹಬ್ಬದ

ಸಡಗರವನ್ನಡಗಿಸಲು ಅವತರಿಸಿದ ಮಳೆ

ಹಲವು ಬಿಳಿ ತಲೆಗಳ ಒಳಗೆ

ವರ್ಣ ಭೇದ (ರೇಸಿಸಮ್)  ಭಾವನೆಗಳ

ತೊಳೆಯಲೆತ್ನಿಸಿ ವಿಫಲವಾದ ಮಳೆ

ಇಂಗ್ಲಿಷ್ ಸಂಸ್ಕೃತಿಯ ಸೌಜನ್ಯ

ನಯ ನಾಜೂಕುಗಳ ಬದುಕಿನ

ಹಾಸು ಹೊಕ್ಕಾಗಿ, ಸಾರಿ, ಥ್ಯಾಂಕ್ಯುಗಳ

ನಡುವೆ ಎಡಬಿಡದೆ ಸುರಿಯುವ ಮಳೆ

ಡಾ. ಜಿ.ಎಸ್. ಶಿವಪ್ರಸಾದ್