ಸನ್ಮಿತ್ರ ಓದುಗರೇ !!
ನಾದಮಯ ಈ ಪ್ರಕೃತಿಯೆಲ್ಲಾ … ಪ್ರಾಕೃತಿಕ ಸಂಗೀತ ಎಷ್ಟು ಮುದ ನೀಡುವುದೋ ಓರ್ವ ಸಂಗೀತ ವಾದಕನಿಗೆ ಪ್ರಕೃತಿಯ ಮಡಿಲಲ್ಲಿ ನುಡಿಸುವ ಸಂಗೀತ, ಆಡೋ ನೃತ್ಯವು ಮಗದಷ್ಟು ಮನೋಲ್ಲಾಸ ನೀಡುವುದು. ನಮ್ಮ ಈ ವಾರದ ಸಂಚಿಕೆಯಲ್ಲಿ ಯುನೈಟೆಡ್ ಕಿಂಗ್ಡಮ್ ನ ಲಂಡನ್ ನಿವಾಸಿಯಾದ ಖ್ಯಾತ ವೈಣಿಕರಾದ ವಿದ್ವಾನ್. ಶ್ರೀ .ಪ್ರಮೋದ್ ಪ್ರಸನ್ನಕುಮಾರ್ ರುದ್ರಪಟ್ನ ‘ಹಸಿರು ಮತ್ತು ಸಂಗೀತ ‘ ಎಂಬ ಶೀರ್ಷಿಕೆಯ ಒಂದು ಸಂಕ್ಷೀಪ್ತ ಲೇಖನ ನಿಮ್ಮ ಮುಂದಿಟ್ಟಿದ್ದಾರೆ . ಓದಿ ಪ್ರತಿಕ್ರಿಯಿಸಿ . – ಸವಿ. ಸಂ

ಲೇಖಕರ ಪರಿಚಯ

ವಿದ್ವಾನ್. ಆರ್.ಪಿ.ಪ್ರಮೋದ್ ಅವರು ಯುನೈಟೆಡ್ ಕಿಂಗ್ಡಮ್ ನ ಲಂಡನ್ ನಿವಾಸಿಯಾಗಿದ್ದು ಯು.ಕೆಯ ಹೆಸರಾಂತ ವೈಣಿಕರು. ಇವರು ಬಿ.ಇ ಪದವಿದಾರರಾಗಿದ್ದು ಒಂದು ಖಾಸಗಿ ಸಂಸ್ಥೆಯಲ್ಲಿ ಸಾಫ್ಟ್ವೇರ್ ಎಂಜಿನೀರ್ ಆಗಿ ಕೆಲಸ ಮಾಡುತಿದ್ದಾರೆ .
ರುದ್ರಪಟ್ಟಣದ ಸಂಗೀತದ ಮನೆತನದಿಂದ ಬಂದಿರುವ ವಿದ್ವಾನ್. ಆರ್.ಪಿ.ಪ್ರಮೋದ್ ರವರು ರುದ್ರಪಟ್ಟಣ ವೀಣಾ ಸಹೋದರರು ಎಂದೇ ಪ್ರಸಿದ್ದರಾಗಿದ್ದಾರೆ. ಈ ಸಹೋದರರು ಖ್ಯಾತ ಸಂಗೀತ ವಿದ್ವಾಂಸರಾದ ಕಂಚೀ ಕಾಮಕೋಟಿ ಪೀಠಂ ಆಸ್ಥಾನ ವಿದ್ವಾನ್ ಸುವರ್ಣ ಕರ್ನಾಟಕ ಚೇತನ R K ಪ್ರಸನ್ನ ಕುಮಾರ್ ರವರ ಸುಪುತ್ರರು.
ಈ ದ್ವಯರು – ಸಹೋದರರು ಖ್ಯಾತ ವೀಣಾ ವಾದಕರಾದ ಮೈಸೂರು ಅರಮನೆಯ ಆಸ್ಥಾನ ವಿದ್ವಾಂಸರಾಗಿದ್ದ “ವೈಣಿಕ ಪ್ರವೀಣ” ಶ್ರೀ. ಆರ್.ಎಸ್. ಕೇಶವ ಮೂರ್ತಿ ರವರ ಮೊಮ್ಮಕ್ಕಳು . ಇಬ್ಬರು 3 ಮತ್ತು 7 ನೇ ವಯಸ್ಸಿನಲ್ಲಿ ವೀಣೆ ನುಡಿಸಲು ಆರಂಭಿಸಿದರು.
ವಿದ್ವಾನ್. ಪ್ರಮೋದ್ 4 ನೇ ವಯಸ್ಸಿನಲ್ಲಿ ಕಿರುತೆರೆಯಲ್ಲಿ ಪಾದಾರ್ಪಣೆ ಮಾಡಿದರು.
ಸಹೋದರರು ತಮ್ಮ ವೀಣಾ ಯುಗಳ ವಾದನದ ಕಾರ್ಯಕ್ರಮವನ್ನು 2003 ರಲ್ಲಿ ಪ್ರಾರಂಭಿಸಿ, ಅನೇಕ ಕಾರ್ಯಕ್ರಮಗಳನ್ನು ನೀಡುತ್ತಾ ಬಂದಿದ್ದಾರೆ.
ಆಕಾಶವಾಣಿ, ಕನ್ನಡ ಸಂಸ್ಕೃತಿ ಇಲಾಖೆಯ ಯುವ ಸೌರಭ, ಹಲವು ಸಭೆಗಳು, ಟಿ.ವಿ ಚಾನೆಲ್‌ಗಳು, ಖಾಸಗಿ ಮತ್ತು ಸಾರ್ವಜನಿಕ ಸಮಾರಂಭಗಳಲ್ಲಿ ದ್ವಂದ್ವ ವೀಣಾ ವಾದನದ ಕಛೇರಿಗಳನ್ನು ಸಹೋದರರು ನೀಡಿದ್ದಾರೆ. ಅವರು ಪ್ರತಿಷ್ಠಿತ cleavland ತ್ಯಾಗರಾಜ ಆರಾಧನಾ ಉತ್ಸವ, US ಹಾಗೂ ಯುನೈಟೆಡ್ ಸ್ಟೇಟ್ಸ್ ಮತ್ತು ಯುನೈಟೆಡ್ ಕಿಂಗ್‌ಡಂನ ಇತರ ಪ್ರಸಿದ್ಧ ವೇದಿಕೆಗಳ ಪ್ರದರ್ಶನ ನೀಡಿದ್ದಾರೆ.
ಸಹೋದರರು ತಮ್ಮ ವಿಶಿಷ್ಟ ಶೈಲಿಯ ಪ್ರದರ್ಶನಕ್ಕಾಗಿ ಉತ್ತಮ ಮೆಚ್ಚುಗೆಯನ್ನು ಗಳಿಸಿದ್ದಾರೆ.
ಸಹೋದರರು ಶುಭೋದಯ ಟ್ರಸ್ಟ್‌ನಿಂದ “ನವೋದಯ ಪ್ರಶಸ್ತಿ” ಗೆ ಭಾಜನರಾಗಿದ್ದಾರೆ.
ಇವರ ಮುಖ್ಯ ಗುರಿ ಕುಟುಂಬಕ್ಕೆ ಹಾಗೂ ರಾಷ್ಟ್ರಕ್ಕೆ ಶ್ರೇಣಿ ತರುವುದು. ಭಾರತೀಯ ಸಂಸ್ಕೃತಿಯನ್ನು ಪ್ರಪಂಚದಾದ್ಯಂತ ಪ್ರಚಾರ ಮಾಡುವುದು.

🎼 🎼 🎼 🎼 🎼 🎼 🎼 🎼

ಹಸಿರು ಉಸಿರು !!
ಆಹಾ!! ಎಷ್ಟು ಸೊಗಸಾದ ಶೀರ್ಷಿಕೆ.ಈ ಭೂಮಿಯ ಸಕಲ ವಾಯು ಜೀವರಾಶಿಗಳ ಕಾರ್ಯ ಚಟುವಟಿಕೆಗಳ ಸುಲಲಿತ ಚಲನೆಗೆ, ಚಾಲನೆ ನೀಡುವ, ಉತ್ತೇಜನ ನೀಡುವ, ಅನರ್ಘ್ಯವಾದ ಅತ್ಯಮೂಲ್ಯವಾದ ಉಸಿರು ನೀಡುವ ಹಸಿರು ಸಿರಿಗೆ ನಮ್ಮ ಹೃದಯ ಪೂರ್ವಕ ಕೃತಜ್ಞತೆಗಳು. 
ಇಂತಹ ಸುಂದರ ಹಸಿರು ವನ ರಾಶಿಯಲ್ಲಿ ಸಂಗೀತ ಹಾಡುವುದಾಗಲಿ, ನುಡಿಸುವುದಾಗಲಿ, ಕೇಳುವುದಾಗಲಿ ಮಾಡಿದಾಗ ನಮ್ಮ ಮನಕೆ ಮುದ, ಮೋದ ಹಾಗೂ ಪ್ರಮೋದ ನೀಡುತ್ತದೆ. ಅಷ್ಟೇ ಅಲ್ಲದೆ ಈ ಪ್ರಶಾಂತವಾದ ಹಸಿರು ನೋಟ ಕಣ್ಮನ ಪ್ರಸನ್ನವಾಗಿಸುತ್ತದೆ. 

ಪರಿಸರ ಪ್ರೇಮಿಗಳಾದ ನಾವು, ಈ ಮನಮೋಹಕ ವಾತಾವರಣದಲ್ಲಿ ವೀಣಾವಾದನ ಮಾಡಿದಾಗ ವಿಶೇಷವಾದ ಅತಿಶಯವಾದ ಜ್ಞಾನ ಪಡೆಯಲು ಸಹಾಯ ಮಾಡುತ್ತದೆ. ದೈನಂದಿನ ತಾಪತ್ರಯಗಳ ನಡುವೆ, ಈ ರೀತಿಯ ಪ್ರಯೋಗಗಳು ನಮ್ಮೆಲ್ಲರ ಜೀವನದಲ್ಲಿ ಅತ್ಯವಶ್ಯಕ. 
ಇದರಲ್ಲಿ ಸಿಗುವ ಪರಿಪೂರ್ಣತೆ, ಸ್ವಚ್ಛವಾದ ಸ್ವಾತಿ ಮುತ್ತಿನ ಹಾಗೆ ನಮ್ಮ ಹೃನ್ಮನಗಳಿಗೆ ಧನ್ಯತಾ ಭಾವ ಉಂಟುಮಾಡುತ್ತದೆ. 

ನಮ್ಮೆಲ್ಲರ ಜೀವನಾಧಾರವಾಗಿರುವ ಹಸಿರಿನ ಜೊತೆಗೆ , ಅನಂತವಾದ ಸಂಗೀತವಾಗಲಿ, ನಾಟ್ಯವಾಗಲಿ ಅಥವಾ ಯಾವ ಕಲೆಯಾಗಲಿ ಆಸ್ವಾದಿಸಿದರೆ, ಕಷ್ಟ, ನೋವು, ಸಂಕಟ, ರೋಗ ರುಜಿನಗಳು ಗುಣವಾಗುತ್ತದೆ ಎಂಬುದು ಅನೇಕರ ಅನುಭವ. ಏಕೆಂದರೆ ಹಸಿರು ಮತ್ತು ಸಂಗೀತ , ರಸದೌತಣದೊಂದಿಗೆ ಚಿಕಿತ್ಸಕ ಶಕ್ತಿಯೂ ಹೌದು. ಈ ರಾಸಾನುಭವವನ್ನು ಸರಿಸೃಪಾದಿಯಾಗಿ ಎಲ್ಲಾ ಜೀವಿಗಳು ಆನಂದಿಸುತ್ತದೆ ಎಂಬ ಉಲ್ಲೇಖವಿದೆ.

 
‘ಶಿಶುರ್ವೇತ್ತಿ ಪಶುರ್ವೇತ್ತಿ ವೇತ್ತಿ ಗಾನ ರಸಂಫಣೀ’ ಎನ್ನುತ್ತಾರೆ,  ಅಂದರೆ ಮಕ್ಕಳು, ಪ್ರಾಣಿಗಳೂ, ಸರೀಸೃಪವಾದ ಹಾವೂ ಸಹ ಸಂಗೀತರಸ ಮಾಧುರ್ಯವನ್ನು ಸವಿಯುತ್ತವೆ.  

ಹಸಿರಲ್ಲಿ ಸಂಗೀತ ಎಂಬ ಪರಿಕಲ್ಪನೆಯನ್ನು ಹೊತ್ತುತಂದ ಅನಿವಾಸಿ ತಂಗುದಾಣದ ಪ್ರಸ್ತುತ ಸಂಪಾದಕಿಯಾದ ಶ್ರೀಮತಿ. ಸವಿತಾ ಸುರೇಶ್ ರವರಿಗೆ ನನ್ನ ಧನ್ಯವಾದಗಳು. 
ಭೂ ಪ್ರದೇಶದಲ್ಲಿ ಸುಮಾರು 25% ಶೇಖಡ ಭಾಗ ಹಸಿರಿನಿಂದ ತುಂಬಿದೆ ಎನ್ನಬಹುದು. ಈ ಹಸಿರನ್ನು ಉಳಿಸಿ ಮುಂದಿನ ಸಾವಿರಾರು ಪೀಳಿಗೆಗೆ ಅನುಕೂಲ ಮಾಡಿಕೊಡುವ ಬೃಹತ್ ಜವಾಬ್ದಾರಿ ನಮ್ಮೆಲ್ಲರ ಮೇಲಿದೆ.. 

ಹಸಿರು ಬೆಳೆಸೋಣ !!

ಪರಿಸರ ಉಳಿಸೋಣ !!

ಸಂಗೀತರಸ ಸವಿಯೋಣ !!

🎼 🎼 🎼 🎼 🎼 🎼 🎼 🎼

ಹಸಿರ ಬಸಿರಲ್ಲಿ ಓರ್ವ ವೈಣಿಕನಾಗಿ ಇನ್ನೋರ್ವ ವೈಣಿಕ ನನ್ನ ಸಹೋದರನಾದ ವಿದ್ವಾನ್. ಶ್ರೀ .ಪ್ರಶಾಂತ್ ಪ್ರಸನ್ನಕುಮಾರ್ ರುದ್ರಪಟ್ನ ಸಂಗಡ ಕೂಡಿ ಸಂಗೀತ ನುಡಿಸುದ ನಾಗಮಂಡಲ ಚಿತ್ರದ, ಸಿ. ಅಶ್ವಥ್ ಅವರ ಸಂಗೀತ ನಿರ್ದೇಶನದ , ಶ್ರೀಮತಿ. ಸಂಗೀತ್ ಕಟ್ಟಿ ಅವರ ಮೂಲ ಗಾಯನದ , ‘ಈ ಹಸಿರು ಸಿರಿಯಲಿ ‘ ಎಂಬ ಹಾಡನ್ನು ನುಡಿಸಿದ್ದೇವೆ . ವೀಕ್ಷಣೆಗಾಗಿ ಈ ಕೆಳಗಿನ ಕೊಂಡಿಯನ್ನು ಕ್ಲಿಕ್ಕಿಸಿ .

-ವಿದ್ವಾನ್. ಶ್ರೀ .ಪ್ರಮೋದ್ ಪ್ರಸನ್ನಕುಮಾರ್ ರುದ್ರಪಟ್ನ

ಆತ್ಮೀಯ ಓದುಗರೇ !!!
ಈ ವಾರದ ಸಂಚಿಕೆಯಲ್ಲಿ ಸುಶೀಲೇಂದ್ರ ರಾವ್ ಅವರು ನಮ್ಮ ಮನಸ್ಸು ಚಿಂತಾವಲೋಕನದಲ್ಲಿ ಮಿಂದಾಗ ಹಾಸ್ಯದಿಂದ ಹೇಗೆ ಅದೇ ಮನಸ್ಸು ಮುದವಾಗಲು ಸಾಧ್ಯ ಎಂಬುದು ತಮ್ಮ ‘ಹಾಸ್ಯಾವಲೋಕನ’ ಎಂಬ ಶೀರ್ಷಿಕೆಯ ಲೇಖನದಲ್ಲಿ ಹಾಸ್ಯ ಪ್ರಾಸಗಳ ಸಾಲುಗಳಲ್ಲಿ ನಿಮ್ಮ ಮುಂದಿಟ್ಟಿದ್ದಾರೆ . ಓದಿ ಪ್ರತಿಕ್ರಿಯಿಸಿ. ಎರಡನೇ ಶ್ರಾವಣ ಶುಕ್ರವಾರ !!!! ಏನ್ ಗೊತ್ತಲ್ವಾ???? ಹೌದು- ಶ್ರೀ ವರಮಹಾಲಕ್ಷ್ಮೀ ವ್ರತ. ನಿಮಗೆಲ್ಲರಿಗೂ ಅನಿವಾಸಿ ತಂಗುದಾಣದ ವತಿಯಿಂದ ಶ್ರೀ ವರಮಹಾಲಕ್ಷ್ಮಿ ಪೂಜೆಯ ಹಾರ್ದಿಕ ಶುಭಾಷಯಗಳು. ಸವಿ.ಸಂ

ಹಾಸ್ಯ ಎಲ್ಲರಲ್ಲೂ ಮತ್ತು ಎಲ್ಲಾಕಾಲದಲ್ಲೂ ಮನಸ್ಸಿನ ಅನೇಕ  ಭಾವನೆಗಳನ್ನು ಬದಲಾಯಿಸಿ  ಹಗುರ ಮಾಡುತ್ತದೆ ಎ೦ದು ಹೇಳುವುದು೦ಟು.
ಸುಮ್ಮನೆ ಕುಳಿತಿರುವಾಗ ಏನಾದರೂ ಚಿ೦ತೆ ಮಾಡುವುದರ ಬದಲುಹಲವು ಹಾಸ್ಯ ಸ೦ಕಲನಗಳನ್ನು ಬರೆಯುವ ಪ್ರಯತ್ನ ಮಾಡುವುದಾಗಿ
ಯೋಚಿಸಿ ಓದುಗರ ಮು೦ದೆ ನಿ೦ತಿದ್ದೇನೆ. ಆಕಸ್ಮಿಕವಾಗಿ ನೀವು ಆಗಲೇ ಇವುಗಳನ್ನು ಕೇಳಿದ್ದರೆ ದಯವಿಟ್ಟು ಕ್ಷಮಿಸಿ.

ಕೈಲಾಸಕ್ಕೂ ಮತ್ತು ಕೈ ಸಾಲಕ್ಕೂ ಇರುವ ವ್ಯತ್ಯಾಸವೇನು ?
ಮೊದಲನೆಯದು ಸಿಗುವುದು ಅನುಮಾನ. ಎರಡನೆಯದು ಸಿಕ್ಕರೂ
ಅದನ್ನು ತೀರಿಸುವ ಜವಾಬ್ದಾರಿ. ಇವೆಲ್ಲಕ್ಕಿ೦ತ ಮುಖ್ಯವಾದ ವ್ಯತ್ಯಾಸ
ಎರಡರಲ್ಲೂ ಕೈ ಇದ್ದೇ ಇರುವುದು ಆದರೆ ಸಾಲ ಮಾತ್ರ ತಿರುವು ಮುರುವು. ಸಾಲ……..ಲಾಸ  ಕೈ ನಿಮಗೆ ಬೇಕಾದಲ್ಲಿ ಸೇರಿಸಿ. ಮಾನವರ ನಿತ್ಯ ಬದುಕೇ ಒ೦ದು ಸು೦ದರ  ಕಾವ್ಯ ಎಂದು ಕೆಲವರ ಅಭಿಪ್ರಾಯ. ಅದು ಖ೦ಡಿತ ನಿಜ ಅ೦ತೆಯೇ  ಬದುಕಲ್ಲಿ  ಸಾಮಾನ್ಯವಾಗಿ ಆಗುವ ಅನೇಕ ರಗಳೆಗಳೂ ಸಹ ಖ೦ಡಿತ ಕಾವ್ಯದ ಒ೦ದು ಭಾಗ ಅಲ್ಲವೇ..?

ಗುಬ್ಬಿ ಹೊಡೆಯಲು ಭ್ರಮ್ಹಾಸ್ತರ ಬೇಕೆ…?  ಎ೦ದು ಹಳೆಯ ವಾಡಿಕೆ
ಅದೇ ರೀತಿಯಲ್ಲಿ ಉಗುರಿನಿ೦ದ ಆಗೋದಕ್ಕೆ ಕೊಡಲಿ ಯೇಕೆ ಎ೦ದು
ಹೇಳುವುದೂ ಉ೦ಟು ಆದರೆ ಇತ್ತೀಚಿನ ಜನ ಸ್ವಲ್ಪ ಮು೦ದುವರಿದು
ಒನ್ ಬೈ ಟೂ ಚಹ ದಿ೦ದಾಗುವ  ಕೆಲಸಕ್ಕೆ ಒ೦ದು ಫುಲ್ ಬಾಟಲ್
ಕೊಡಿಸಬೇಕು ಏಕೆ ಅ೦ತಾರೆ.

ಜ್ಞಾನಿಗಳು ಮತ್ತು ಮೇಧಾವಿಗಳನ್ನು ಗಮನಿಸಿ, ಅವರಲ್ಲಿ ಅನೇಕರಿಗೆ
ಸಾಮಾನ್ಯ ಜ್ಞಾನ(common sence) ಇರುವುದಿಲ್ಲ. ಅದರಲ್ಲೂ
ಮೇ..ಧಾವಿಗಳಿಗಳಿಗೆ  ಏಪ್ರಿಲ್ನನಲ್ಲಿ ಏನು ನಡೆಯಿತು ಅನ್ನುವುದೇ
ಗೊತ್ತಿರುವುದಿಲ್ಲ.

ಖಾರಗಳಲ್ಲಿ ಎಷ್ಟು ವಿಧಗಳು ಎ೦ದು ಪ್ರಶ್ನೆ.  ಸಾಮಾನ್ಯವಾಗಿ
ಅಲ್ಪಸ್ವಲ್ಪ ಖಾರ ಮಧ್ಯಮಖಾರ ಘೋರಖಾರ ಎ೦ದು ಹೇಳುವರು
ಜೊತೆಗೆ ಅಹ೦ಕಾರ ಝೇ೦ಕಾರ ಓ೦ಕಾರಗಳೂ ಸೇರಬಹುದು
ಅಲ್ಲದೆ ಸ್ವತಹ ಖಾರ ತಿನ್ನುವ ಅಭ್ಯಾಸಿಗಳಿಗೆ ಅಹ೦  ಖಾರ.

ಹೆ೦ಗಸರು ಗ೦ಡ೦ದಿರಿ೦ದ ಗ೦ಡಸರ ಸ್ವಭಾವ ತಿಳಿದಿರುತ್ತಾರೆ
ಎ೦ಬುದು ಹಲವರ ಅಭಿಪ್ರಾಯ.  ಆದರೆ ಹೆ೦ಗಸರಿಗೆ ಅವರವರ
ಗ೦ಡ೦ದಿರ ಸ್ವಭಾವ ತಿಳಿದಿರುವುದೇ ಹೊರತು, ಎಲ್ಲಾ ಗ೦ಡಸರು
ಗಳೂ ಅದೇ ಸ್ವಭಾವ ಎ೦ಬುದು ಸರಿಯಲ್ಲ……ಗ೦ಡಸರು
ಹೆ೦ಗಸರ ಸ್ವಭಾವ ತಿಳಿಯಲು ಪ್ರಾರ೦ಬಿಸುವ ಹೊತ್ತಿಗೆ ಆಗಲೇ
ಒ೦ದೆರಡು ಮಕ್ಕಳಾಗಿರುತ್ತವೆ ಆಗ ಯಾವ ಸ್ವಭಾವವನ್ನೂ ತಿಳಿವ
ಸಮಯ ಮತ್ತು ಅವಕಾಶ ಇರುವುದಿಲ್ಲ.

ಭಗವ೦ತನು ಮಾನವ ಶ್ರುಷ್ಟಣೆ ಮಾಡುವಾಗ ಗುರುತಿಸಲು ಸಾಧ್ಯ
ಆಗಲೆ೦ದು ಎಲ್ಲರನ್ನೂ ಸಾಧ್ಯವಾದಷ್ಟು ಮಟ್ಟಿಗೆ ಭಿನ್ನ ಭಿನ್ನವಾಗಿಯೇ
ಹುಟ್ಟಿಸಿದ. ಹೀಗೆ ಮಡುತ್ತಾ  ಚೀನಾ ಜಪಾನ್ ದೇಶಕ್ಕೆ ಬರುವ
ಹೊತ್ತಿಗೆ ಬಹುಶಹ ಅವನಿಗೂ ಸಾಕಾಗಿ ಹೋಯಿತೆ೦ದು ಅನಿಸುತ್ತೆ
ಅದು ಅವನ ತಪ್ಪಲ್ಲ.

ಯಾರಾದರೂ ನಮ್ಮ ಮನೆಯಲ್ಲಿ ಇವತ್ತು ನಳಪಾಕ ಎ೦ದರೆ ಬಹಳ
ಋಚಿಕರ ಎ೦ದು ಹಿಗ್ಗಬೇಡಿ ಇದ್ದ ಪಧಾಥ೯ಕ್ಕೆ ನಳದ ನೀರನ್ನು ಹಾಕಿ
ಹೆಚ್ಚುವರಿ ಮಾಡಿರಲೂ ಬಹುದು.

ಯಾರದೋ ದುಡ್ಡು ಯಲ್ಲಮ್ಮನ ಜಾತ್ರೆ ಅನ್ನುವ ಗಾದೆ ತು೦ಬಾ
ಹಳೆಯದು  ಅನ್ನುವವರಿಗೆ ಈಗ ” ಯಾರದೋ ದುಡ್ಡು ಎಮ್ಮೆಲ್ಯೆ
ಗಳಜಾತ್ರೆ” ಎ೦ಬ ಹೊಸ ಗಾದೆ ಜಾರಿಯಲ್ಲಿದೆ. ಬೇಕಾದರೆ ನೀವು
ಎ೦ಪೀಗಳನ್ನೂ ಸೇರಿಸ ಬಹುದು.

ಪರಿಸರ ಮತ್ತು ಪರಿಕಾರಗಳ ವ್ಯತ್ಯಾಸವೇನು ಎ೦ದು ಕೇಳಿದರೆ
ಎರಡರಲ್ಲೂ ಪರಿ ಪರಿ ಇದೆ ಹಾಗೆ೦ದು ಪಿರಿ ಪಿರಿಅಲ್ಲ.ಮು೦ದಿನ
ಅರ್ದಗಳ ಜೋಡಣೆ ಸರಕಾರವಾಗುತ್ತದೆ.

ಪರಿ ಪರಿಯಾಗಿ ನಿತ್ಯಾ ಸರ ಕೊಡಿಸಿ ಎ೦ದು ಪಿರಿ ಪಿರಿ ಮಾಡುವ
ಹೆ೦ಗಸರನ್ನು ಪರಿಸರ ವಾದಿಗಳು ಎನ್ನಬಹುದೇ?

ಕಲೆ ಎ೦ದರೆ ಸಾಮಾನ್ಯವಾಗಿ ಎಲ್ಲಾ ಕಲೆಗಳೂ ಪ್ರೀಯವಾದವುಗಳು
ಎ೦ದು ಅಭಿಪ್ರಾಯ ಆದರೆ ಕೆಲವೊ೦ದು ಕಲೆಗಳನ್ನು ಕ೦ಡು ಬಹು
ದ್ವೇಷಿಸುವವರೂ ಇರುವರು -ಎ೦ದರೆ ಅವರು ಪ್ರಮುಖವಾಗಿ ಪಾತ್ರೆ
ತೊಳೆಯುವವರು, ನೆಲಾವರೆಸುವವರು ಮತ್ತು ಬಟ್ಟೆ ಒಗೆಯುವವರು.

ಮೊಬೈಲ್ ಸ೦ಸ್ಕೃತಿ ಜೀವನದಲ್ಲಿ ಹಾಸಿಗೆ ಎ೦ದರೆ ಕೆಲವರಪಾಡಿಗೆ
ಚಿ೦ತನ ವೇದಿಕೆ ಎ೦ದೂ ಕಾರಣ ಎದ್ದುಹೋಗುವವರೆಗೂ ಅತ್ಯ೦ತ
ಒಳ್ಳೆಯ ವಿಚಾರಗಳು ಬರುತ್ತಲೇ ಇರುತ್ತವೆ ಎ೦ದು ಅಭಿಪ್ರಾಯ.
ಅ೦ತೆಯೇ ರಾತ್ರೆ ನಿದ್ದೆ ಬರುವುದಿಲ್ಲ ಬೆಳಿಗ್ಯೆ ಎಚ್ಚರವಾಗುವುದೇ
ಇಲ್ಲ ಅನ್ನೋದು ಸಮಸ್ಯೆಯೋ ಅಥವಾ ಗೊ೦ದಲವೋ ಗೊತ್ತೇ
ಆಗುವುದಿಲ್ಲ.

ಹೆ೦ಗಸರು ಜೋತಿಷಿಗಳಲ್ಲಿ ಕೇಳಬೇಕೆ೦ದಿರುವುದು ಗ೦ಡನ ಭೂತ
ಕಾಲದ ಸ೦ಗತಿಗಳು ಮಾತ್ರ. ನ೦ತರ ಭವಿಷತ್ ವಿಚಾರಕ್ಕೆಬ೦ದಾಗ
ಆವಿಚಾರ ನಮಗೆ ಬೇಡ ಎನ್ನುವರು ಕಾರಣ ಅದು ನಮ್ಮ ಕೈಯಲ್ಲಿ
ಇದೆ ಯೆ೦ಬುದು!

ಎಲ್ಲರ ಒಳಗೂ ಒಬ್ಬ ಕವಿ ಇರುತ್ತಾನೆ ಎ೦ಬುದು ವಾಡಿಕೆ. ಎಷ್ಟೋ
ಬಾರಿ ಅವನು ಅಲ್ಲಿಯೇ ಇದ್ದರೆ ಒಳ್ಳೆಯದು ಅನಿಸುತ್ತದೆ!
ದನಗಳಕಾಯುವ ಹುಡುಗನೊಬ್ಬ  ಕನ್ನಡ ಸಿನೆಮಾ ಹಾಡನ್ನು
“ಏನಿದು ರಮಣಿ
ಕನಸೋ ನೆನಸೋ
ಏನೆ೦ಬುದ ನೀ ಹೇಳೆ” ಎ೦ಬುದನ್ನು
ಹೀಗೆ ಹೇಳಿದಾಗ.

ಏನಿದು ರಮಣಿ
ಸೀರೆಗೆಲ್ಲಾ ಸೆಗಣಿ
ಏನೆ೦ಬುದ ನೀ ಹೇಳೆ !

                                        -ಸಿ.ಹೆಚ್.ಸುಸೀಲೇ೦ದ್ರರಾವ್

ಬ್ರಾಮ್ಹಾಲ್ ಚಷೈರ್

🌺🌼🌺🌼🌺🌼🌺🌼🌺🌼🌺🌼🌺🌼🌺🌼🌺🌼🌺🌼🌺🌼🌺🌼🌺🌼🌺🌼🌺🌼🌺🌼🌺🌼🌺🌼

🌺🌼🌺🌼🌺🌼🌺🌼🌺🌼🌺🌼🌺🌼🌺🌼🌺🌼🌺🌼🌺🌼🌺🌼🌺🌼🌺🌼🌺🌼🌺🌼🌺🌼🌺🌼