ಲೇಕ್ ಡಿಸ್ಟ್ರಿಕ್ಟಿನ ಶಿಖರಗಳಲ್ಲಿ (ಭಾಗ -೧) ಡಾ|| ಜಿ. ಎಸ್. ಶಿವಪ್ರಸಾದ್

ಸನ್ಮಿತ್ರ ಓದುಗರೇ !!
ಕಳೆದ ಒಂದು ವರೆ ವರ್ಷದಿಂದ ಯುನೈಟೆಡ್ ಕಿಂಗ್ಡಮ್ ನಲ್ಲಿ ಲಾಕ್ಡೌನ್ ನಿರ್ಬಂಧದ ನಿಯಮಗಳಿಂದಾಗಿ ಪ್ರವಾಸೋದ್ಯಮಕ್ಕೆ ಕಡಿವಾಣ ಹಾಕಲಾಗಿದ್ದು , ನಮಗೆ ವಾರಾಂತ್ಯದ ಭೋಗವೆಲ್ಲ ಶಮನವಾಗಿತ್ತು. ಇತ್ತೀಚೆಗಷ್ಟೇ ನಿರ್ಬಂಧಗಳು ಹಂತ ಹಂತವಾಗಿ ಸಡಿಲಗೊಂಡಿದ್ದು , ನಮ್ಮ ಅನಿವಾಸಿಯ ಸದಸ್ಯರಾದ ಡಾ||ಜಿ. ಎಸ್. ಶಿವಪ್ರಸಾದ್ ದಂಪತಿಗಳ ವಾಯುವ್ಯ ಇಂಗ್ಲೆಂಡಿನಲ್ಲಿರುವ ಲೇಕ್ ಡಿಸ್ಟ್ರಿಕ್ಟ್ ನ ಒಂದು ಸಾಪ್ತಾಹಿಕ ಪ್ರವಾಸೋದ್ಯಮದ, ಪ್ರಣಯ ವಿಹಾರದ , ಸವಿಸ್ತಾರವಾದ ಪ್ರಥಮ ಭಾಗದ ‘ಲೇಕ್ ಡಿಸ್ಟ್ರಿಕ್ಟಿನ ಶಿಖರಗಳಲ್ಲಿ (ಭಾಗ-೧)’ ಎಂಬ ಶೀರ್ಷಿಕೆಯ ಲೇಖನ ನಿಮ್ಮ ಮುಂದೆ ಈ ವಾರದ ಸಂಚಿಕೆಯಲ್ಲಿ. ಓದಿ ಕಮೆಂಟಿಸಿ !! -ಸವಿ.ಸಂ

ಲೇಕ್ ಡಿಸ್ಟ್ರಿಕ್ಟಿನ ಶಿಖರಗಳಲ್ಲಿ (ಭಾಗ ಒಂದು)


ಕರೋನ ಪಿಡುಗಿನಿಂದಾಗಿ ಸುಮಾರು 18 ತಿಂಗಳ ಕಾಲ ಮನೆಯಲ್ಲೇ ಕಾಯುತ್ತ ಕೂತು, ಸುದಿನಗಳ ನಿರೀಕ್ಷೆಯಲ್ಲಿ
ದಿನಗಳನ್ನು ತಳ್ಳುತ್ತಿದ್ದ ನನಗೆ ಕೊನೆಗೂ ಲಾಕ್ ಡೌನ್ ಹಗುರಗೊಳಿಸುವ ಸುದ್ದಿ ತಿಳಿದ ಕೂಡಲೇ ಒಂದು ವಾರದ
ಮಟ್ಟಿಗೆ ಲೇಕ್ ಡಿಸ್ಟ್ರಿಕ್ಟಿನಲ್ಲಿ ಪ್ರವಾಸ ಮಾಡುವ ಆಲೋಚನೆ ಥಟ್ಟನೆ ಮನಸ್ಸಿನಲ್ಲಿ ಮೂಡಿತು.

ಅಂತರ್ಜಾಲವನ್ನು ಕೆದಕಿ ವಿಂಡರ್ ಮಿಯರ್ ಸರೋವರದ ಉತ್ತರ ತುದಿಯಲ್ಲಿರುವ ಅಂಬಲ್ ಸೈಡ್ ಎಂಬ
ಊರಿನಲ್ಲಿ ಸರೋವರದ ದಡದಲ್ಲೇ ಇರುವ ಒಂದು ಚಿಕ್ಕದಾದ ಅಪಾರ್ಟ್ಮೆಂಟನ್ನು ನಾನು ಮತ್ತು ನನ್ನ ಶ್ರೀಮತಿ
ಬಾಡಿಗೆಗೆ ಕಾದಿರಿಸಿದೆವು. ಅಂದ ಹಾಗೆ ನಾನು ಬಹಳ ಹಿಂದೆ ಲೇಕ್ ಡಿಸ್ಟ್ರಿಕ್ಟ್ ಪ್ರವಾಸ ಮಾಡಿದ್ದು ಅದು ನನ್ನ
ನೆನಪಿನಲ್ಲಿ ಅಷ್ಟಾಗಿ ಉಳಿದಿರಲಿಲ್ಲ. ಹೀಗಾಗಿ ಅದು ಒಂದು ಹೊಸ ಪ್ರವಾಸ ತರುವ ಉಲ್ಲಾಸಗಳನ್ನು ನಿರೀಕ್ಷೆಗಳನ್ನು
ಕಟ್ಟಿ ಕೊಟ್ಟಿತು. ಸೆಲ್ಫ್ ಕೇಟರಿಂಗ್ ಅಪಾರ್ಟ್ಮೆಂಟ್ ಇಬ್ಬರಿಗೆಷ್ಟೇ (ನನಗೆ ಮತ್ತು ನನ್ನ ಶ್ರೀಮತಿಗೆ) ಸಜ್ಜಾಗಿದ್ದು, ಅಲ್ಲಿ
ಅಡುಗೆ ಕೋಣೆ ಇದ್ದು, ನಮ್ಮ ಕರ್ನಾಟಕದ ಅಡುಗೆಯನ್ನು ಮಾಡಿಕೊಳ್ಳಲು ಅವಕಾಶವಿತ್ತು. ಇದು ನಮಗೆ
ನೆಮ್ಮದಿಯ ವಿಚಾರವಾಗಿತ್ತು. ಶೆಫೀಲ್ಡಿನಿಂದ ಅಂಬಲ್ ಸೈಡಿಗೆ ಸುಮಾರು ಎರಡುವರೆ ತಾಸು ಪಯಣ. ಶಾಲಾ
ರಜೆಗಳು ಇನ್ನೂ ಪ್ರಾರಂಭವಾಗಬೇಕಾಗಿದ್ದು ರಸ್ತೆಗಳು ಹಾಯಾಗಿದ್ದವು. ನಾವು ಎರಡು ತಾಸು ಪಯಣ ಮಾಡಿ
ಲ್ಯಾನ್ ಕ್ಯಾಸ್ಟರ್ ಸರ್ವಿಸ್ಸಿನಲ್ಲಿ ವಿಶ್ರಾಂತಿ ಪಡೆದವು. ಈ ಸರ್ವಿಸ್ಸಸ್ ನನ್ನ ನೆಚ್ಚಿನ ತಾಣ. ಇಲ್ಲಿರುವ ಭವ್ಯವಾದ ಬಹು
ಅಂತಸ್ತಿನ ಮೇಲಿನ ಮಜಲಲ್ಲಿ ಕುಳಿತು ದೂರದ ಬೆಟ್ಟಗಳನ್ನು ಮತ್ತು ಕಾಲಡಿಯ M6 ಹೆದ್ದಾರಿಯಲ್ಲಿ ಭುರ್ ಎಂದು
ಸಾಗುವ ವಾಹನಗಳನ್ನು ವೀಕ್ಷಿಸುತ್ತಾ ಕಾಸ್ಟ ಕಾಫಿ ಹೀರುವುದೂ ಒಂದು ಅನುಭವವೇ ಸರಿ! ಕಾಫಿ ಮತ್ತು
ಪನೀನಿಗಳು ನನ್ನ ಪ್ರವಾಸ ಪ್ರಜ್ಞೆಗಳನ್ನು ಜಾಗೃತಗೊಳಿಸಿದವು. ವಿಂಡರ್ ಮಿಯರ್ ಸರೋವರದ ಬದಿಯಲ್ಲೇ
ಸಾಗುವ ರಸ್ತೆಯಲ್ಲಿ ಬೆಟ್ಟಗಳನ್ನು ಸರೋವರಗಳನ್ನು ನೋಡುತ್ತಾ ಅಂಬಲ್ ಸೈಡ್ ತಲುಪಿ ವಿಶ್ರಾಂತಿ ಪಡೆದವು.

ಲೇಕ್ ಡಿಸ್ಟ್ರಿಕ್ಟ್ ಪ್ರವಾಸಿಗರಲ್ಲಿ ಎರಡು ಬಗೆ; ಸಾಮಾನ್ಯವಾಗಿ ಒಂದೆರಡು ದಿನಕ್ಕೆ ಬಂದು, ಪ್ರಮುಖ ಪ್ರವಾಸ
ತಾಣಗಳಲ್ಲಿ ಕಾರು ನಿಲ್ಲಿಸಿ ಸರೋವರದ ದೋಣಿಯಲ್ಲಿ ವಿಹರಿಸಿ, ಫೋಟೋ ತೆಗೆದು, ತೆಗೆಯಿಸಿಕೊಂಡು ವಿಂಡರ್
ಮಿಯರ್ ಮತ್ತು ಅಂಬಲ್ ಸೈಡಿನ ಶಾಪಿಂಗ್ ಬೀದಿಗಳಲ್ಲಿ ಅಡ್ಡಾಡಿ, ರಿಟೇಲ್ ಥೆರಪಿ ಪಡೆದು, ಕೆಫೆಗಳ
ಹೊರಾಂಗಣದಲ್ಲಿ ಆಸೀನರಾಗಿ ಬಿಯರ್ ಹೀರುತ್ತಾ ಪೀಪಲ್ ವಾಚಿಂಗ್ ಮತ್ತು ಹರಟೆಯಲ್ಲಿ ಮಗ್ನರಾಗುವ
ಪ್ರವಾಸಿಗರು ಒಂದು ಗುಂಪಾದರೆ ಇನ್ನು ಎರಡನೇ ವರ್ಗಕ್ಕೆ ಸೇರಿದವರು ಸಾಹಸ ಪ್ರಿಯರು. ಅವರು ಲೇಕ್
ಡಿಸ್ಟ್ರಿಕ್ಟಿನಲ್ಲಿ ದಿನಗಟ್ಟಲೆ ಠಿಕಾಣಿ ಹಾಕುವವರು. ಇವರು ಪ್ರಮುಖ ಪ್ರೇಕ್ಷಣೆಯ ಸ್ಥಳಗಳನ್ನು ತ್ಯಜಿಸಿ, ಕಣಿವೆ
ಪರ್ವತಗಳನ್ನು ಕಾಲ್ನಡಿಗೆಯಲ್ಲಿ ಅರಸಿಕೊಂಡು, ಬ್ಯಾಕ್ ಪ್ಯಾಕಿನಲ್ಲಿ ಬೆಚ್ಚನೆ ಉಡುಪು, ನೀರು, ತಿನಿಸುಗಳನ್ನು
ಸೇರಿಸಿಕೊಂಡು, ವಾಕಿಂಗ್ ಪೋಲ್ ಹಿಡಿದು ಹತ್ತಾರು ಮೈಲಿ ಚಾರಣ ಮಾಡುವವರು ಎಂದು ಗುರುತಿಸಬಹುದು.
ಹಿಂದೆ ನಾನು ಲೇಕ್ ಡಿಸ್ಟ್ರಿಕ್ಟಿನ ಸಾಮಾನ್ಯ ಪ್ರೇಕ್ಷಣೀಯ ಸ್ಥಳಗಳನ್ನು ಕಂಡಿದ್ದು ಹಾಗೆಯೇ ನಮಲ್ಲಿ ಹೆಚ್ಚಿನ
ಸಮಯವಿದ್ದು ಈ ಬಾರಿ ಕಾರನ್ನು ಹಿಂದಕ್ಕೆ ಬಿಟ್ಟು ಆದಷ್ಟು ಕಾಲ್ನಡಿಗೆಯಲ್ಲಿ ಬೆಟ್ಟಗಳನ್ನು ಸುತ್ತುವ ಸಂಕಲ್ಪ
ಮಾಡಿಕೊಂಡಿವೆ. ಹೀಗೆ ಮಾಡುವಲ್ಲಿ ಎಷ್ಟೋ ಅಪೂರ್ವ ಸುಂದರ ತಾಣಗಳನ್ನು ಪತ್ತೆ ಹಚ್ಚಿದೆವು. ಈ ಚಾರಣಕ್ಕೆ
ಬೇಕಾದ ಬ್ಯಾಕ್ ಪ್ಯಾಕ್, ನೀರು, ತಿನಿಸು, ವಾಕಿಂಗ್ ಪೋಲ್, ಭೂಪಟ ಇತ್ಯಾದಿಗಳ ಸಿದ್ಧತೆ ಮಾಡಿಕೊಂಡೆವು.
ನಾನು ವಾಸವಾಗಿರುವ ಶೆಫೀಲ್ಡ್ ಪಕ್ಕದಲ್ಲೇ ಇರುವ ಪೀಕ್ ಡಿಸ್ಟ್ರಿಕ್ಟಿನಲ್ಲಿ ಹಿಂದೆ ಮಾಡಿದ್ದ ಚಾರಣ ಅನುಭವ ಆ
ಆತ್ಮವಿಶ್ವಾಸವನ್ನು ನೀಡಿತ್ತು. ಸರಿ ಅಂಬಲ್ ಸೈಡ್ ಹತ್ತಿರವಿರುವ ಗ್ರೇಟ್ ಲ್ಯಾ೦ಗ್ ಡೇಲ್ ವ್ಯಾಲಿ ಬಹಳ
ಸುಂದರವಾಗಿದೆಯೆಂದು ಕೇಳಿದ್ದೆ. ಹೀಗಾಗಿ ನೇರವಾಗಿ ಅಂಬಲ್ ಸೈಡಿನಿಂದ A592 ರಸ್ತೆ ಹಿಡಿದು ಸ್ಕೆಲ್ವಿಥ್ ಬ್ರಿಡ್ಜ್
ಎಂಬ ಸಣ್ಣ ಊರಿನಲ್ಲಿರುವ ಕಾರ್ ಪಾರ್ಕಿನಲ್ಲಿ ಕಾರನ್ನು ಬಿಟ್ಟು ‘ಪಬ್ಲಿಕ್ ಫುಟ್ಪಾತ್ ಟು ಎಲ್ಟ್ ವಾಟರ್’ ಎಂಬ
ಫಲಕವನ್ನು ಪತ್ತೆಹಚ್ಚಿ ನಡೆಯಲು ಶುರುಮಾಡಿದೆವು. ಈ ಚಾರಣದ ದಾರಿ ನದಿಯ ಪಕ್ಕ ದಟ್ಟ ಮರಗಳ ಕಾಡಿನ
ನಡುವೆ ಸಾಗುತ್ತದೆ. ಕೆಲವೇ ನಿಮಿಷಗಳಲ್ಲಿ ಜಲಪಾತದ ಮೊರೆತ ಕಿವಿಗೆ ಬಿದ್ದು ಒಂದೆರಡು ಹೆಜ್ಜೆಯ ನಂತರ
ಹಾದಿಯ ಬದಿಗೆ ಸ್ಕೆಲ್ವಿಥ್ ಫೋರ್ಸ್ (ಜಲಪಾತ) ಕಾಣುತ್ತದೆ. ಅಂದಹಾಗೆ ನಾರ್ಸ್ ಮತ್ತು ಹಳೇ ಇಂಗ್ಲಿಷ್
ಭಾಷೆಯಲ್ಲಿ ಫೋರ್ಸ್ ಎಂದರೆ ಜಲಪಾತ. ಫೇಲ್ ಎಂದರೆ ಬೆಟ್ಟ, ಡೇಲ್ ಎಂದರೆ ಕಣಿವೆ, ಮಿಯರ್ ಎಂದರೆ
ಸರೋವರ. ಈ ಪದಗಳ ಪ್ರಯೋಗ ಮುಂದಕ್ಕೆ ಈ ಬರಹದಲ್ಲಿ ಕಾಣಿಸಿಕೊಳ್ಳುವುದರಿಂದ ಈ ವಿವರಣೆ ಈ
ಹಂತದಲ್ಲಿ ಕೊಡುವುದು ಉಚಿತ.

ಸುಮಾರು ೨೫ ಅಡಿಗಳ ಜಲಪಾತದ ತಳಕ್ಕೆ ನಡೆಯಲು ಕೆಲವು ಮೆಟ್ಟಿಲು ಮತ್ತು ಕಬ್ಬಿಣದ ಕಟಕಟೆಯನ್ನು
ನಿರ್ಮಿಸಲಾಗಿದೆ. ಇನ್ನು ಅರ್ಧ ಮೈಲಿ ನದಿಯ ಪಕ್ಕಕ್ಕೆ ಸಾಗಿದಂತೆ ಕಾಡುಕಳೆದು ಒಂದು ದೊಡ್ಡ ಕಣಿವೆ
ಎದುರಾಗುತ್ತದೆ. ಹಸಿರುಹುಲ್ಲಿನಿಂದ, ಪುಟ್ಟ ಹೂಗಳಿಂದ ತುಂಬಿದ ಈ ಕಣಿವೆಯ ಸುತ್ತಾ ಎಲ್ಲಿ ನೋಡಿದರು
ಮೇರು ಪರ್ವತಗಳೇ! ಈ ಪರ್ವತ ಶ್ರೇಣಿಗೆ ಲ್ಯಾ೦ಗ್ ಡೇಲ್ ಪೈಕ್ ಎಂದು ಕರೆಯುತ್ತಾರೆ.

ಇನ್ನೂ ಅರ್ಧ ಮೈಲಿ ಈ ಸಮತಟ್ಟಾದ ರಸ್ತೆಯಲ್ಲಿ ನಡೆದರೆ, ಅಲ್ಲಿ ಒಂದು ಸುಂದರ ಸರೋವರ ನಮನ್ನು
ಎದುರುಗೊಳ್ಳುತ್ತದೆ, ಇದೇ ಎಲ್ಟ್ ವಾಟರ್. ಈ ತಾಣ ಬಹಳ ಸುಂದರವಾಗಿಯೂ ಹಾಗು ಬಹಳ ಪ್ರಶಸ್ತವಾಗಿಯೂ
ಇದೆ. ಬಹಳ ಜನ ಇಲ್ಲಿ ಪಿಕ್ನಿಕ್ ಮಾಡುತ್ತಾ ಅಥವಾ ಸರೋವರದಲ್ಲಿ ಈಜುತ್ತಾ ಬೇಸಿಗೆ ದಿನಗಳನ್ನು
ಕಳೆಯುತ್ತಾರೆ. ಇಲ್ಲಿ ಕೆಲಕಾಲ ವಿಶ್ರಮಿಸಿ ಎಲ್ಟ್ ವಾಟರ್ ಊರನ್ನು ತಲಿಪಿದೆವು. ಇಲ್ಲಿ ಕೆಫೆ ಮತ್ತು ಶೌಚಾಲಯ
ಸೌಲಭ್ಯಗಳಿವೆ. ನಮ್ಮ ಅಗತ್ಯಗಳನ್ನು ಪೂರೈಸಿ ನದಿಯನ್ನು ದಾಟಿ ಸೇತುವೆಯ ಬಳಿಕ ಕೂಡಲೇ ಬಲಕ್ಕೆ
ತಿರುಗಿದರೆ ಅಲ್ಲಿ ಮುಖ್ಯ ರಸ್ತೆಯಿಂದ ಕವಲೊಡೆದ ಕಡಿದಾದ ಟಾರ್ ರೋಡಿನಲ್ಲಿ ಬೆಟ್ಟವನ್ನು ಹತ್ತ ಬೇಕು.
ಮೇಲೇರಿದಂತೆ ನೋಟ ಇನ್ನೂ ಮನೋಹರವಾಗಿದೆ. ಒಂದು ತಿರುವಿನಲ್ಲಿ ಲ್ಯಾ೦ಗ್ ಡೇಲ್ ಹೋಟೆಲ್ ಎಂಬ
ಪಂಚತಾರಾ ರೆಸಾರ್ಟ್ ಕೆಳಗೆ ಕಣಿವೆಯಲ್ಲಿ ಕಾಣಸಿಗುತ್ತದೆ. ಅಲ್ಲಿಂದ ಮುಂದಕ್ಕೆ ಇಳಿಜಾರಿನಲ್ಲಿ ನಡೆದು ಚಾಪೆಲ್
ಸ್ಟೈಲ್ ಎಂಬ ಊರನ್ನು ತಲುಪಿದೆವು. ಈ ಊರಿನ ಹೊರ ವಲಯದಲ್ಲಿ ಪ್ರಖ್ಯಾತ ‘ವೈನ್ ರೈಟ್ ಇನ್’ ಎಂಬ ಪಬ್
ನಮನ್ನು ಎದುರಾಗುತ್ತದೆ. ವೈನ್ ರೈಟ್ ಎಂಬ ಹೆಸರನ್ನು ಹಲವು ಓದುಗರು ಗುರುತಿಸಬಹುದು.

ಆಲ್ಫ್ರೆಡ್ ವೈನ್ ರೈಟ್ ಲೇಕ್ ಡಿಸ್ಟ್ರಿಕ್ಟಿನ ಹೆಸರಾಂತ ಫೇಲ್ ವಾಕರ್ (ಪರ್ವತಾರೋಹಿ). ಈ ಸಾಹಸಿಗ ಇಲ್ಲಿಯ
ಅಸಂಖ್ಯಾತ ಬೆಟ್ಟಗಳಲ್ಲಿ ಚಾರಣ ಮಾಡಿ ಅಲ್ಲಿಯ ಮಾರ್ಗಗಳನ್ನು, ಪರ್ವತಗಳ ಬಗ್ಗೆ ವಿವರಣೆಗಳನ್ನು,
ಭೂಪಟವನ್ನು ತನ್ನ ಪುಸ್ತಕಗಳಲ್ಲಿ ರೇಖಾ ಚಿತ್ರದೊಂದಿಗೆ ಒದಗಿಸಿ ಪ್ರಖ್ಯಾತನಾಗಿದ್ದಾನೆ. ಈತನ ಬಗ್ಗೆ ಹಲವಾರು
ಟಿ.ವಿ ಕಾರ್ಯಕ್ರಮಗಳು ಮೂಡಿ ಬಂದಿವೆ. ಲೇಕ್ ಡಿಸ್ಟ್ರಿಕ್ಟಿನಲ್ಲಿ ಚಾರಣ ಮಾಡುವವರಿಗೆ ಈ ಪುಸ್ತಕಗಳು ಮತ್ತು
ಮಾಹಿತಿ ಅತ್ಯಗತ್ಯ. ಈ ಬೆಟ್ಟಗಳು ದೂರದಿಂದ ರಮ್ಯವಾಗಿ ಮತ್ತು ಸೌಮ್ಯವಾಗಿ ಕಂಡರೂ, ಇಲ್ಲಿ ಅನೇಕ
ಪ್ರಾಣಾಂತಿಕ ಅಪಾಯಗಳು ಸಂಭವಿಸಿವೆ. ಬೆಟ್ಟದಲ್ಲಿನ ಹವಾಮಾನ ಬುಡದ ಕಣಿವೆಗಿಂತ ಬಹುಬೇಗ ಬದಲಾಗುವ
ಸಾಧ್ಯತೆಗಳಿವೆ. ಕಾಲ್ದಾರಿಗಳು ಹಲವೆಡೆ ಕಾವಲಾಗುವುದರಿಂದ ನೆನೆಪಿನಲ್ಲಿ ಉಳಿಯುವುದು ಸುಲಭವಲ್ಲ. ಬೆಟ್ಟದ
ಮೇಲೆ ಬೀಸುವ ಬಲವಾದ ಗಾಳಿ, ಮಳೆ, ಮಂಜು ಹಿಮಪಾತಗಳು ಹೆಚ್ಚಿನ ಸವಾಲನ್ನು ಒಡ್ಡುತ್ತವೆ. ಚಳಿಗಾಲದಲ್ಲಿ
ಬೇಗ ಕತ್ತಲಾಗುವುದರಿಂದ ಈ ಆರೋಹಣ ಮಧ್ಯಾನ್ಹ ಶುರುಮಾಡುವುದು ಒಳಿತಲ್ಲ. ಈ ಕಾರಣಗಳಿಂದ ಬೆಟ್ಟದ
ಮೇಲೆ ಚಾರಣ ಮಾಡುವವರು ಸಾಕಷ್ಟು ಸಿದ್ಧತೆಗಳನ್ನು ಮಾಡಿಕೊಳ್ಳ ಬೇಕಾಗುತ್ತದೆ. ಇತ್ತೀಚಿನ ದಿನಗಳಲ್ಲಿ
ಮೌಂಟನ್ ರೆಸ್ಕ್ಯೂ ತಂಡವನ್ನು ಸಂಪರ್ಕಿಸಲು ಬೇಕಾದ ಮೊಬೈಲ್ ಆಪ್ ಇದೆಯೆಂದು ಕೇಳಿದ್ದೇನೆ. ಕೆಲವಡೆ
ಮೊಬೈಲ್ ಸಿಗ್ನಲ್ ಸಿಗುವುದು ಸುಲಭವಲ್ಲ. ಈ ವಿಚಾರಗಳನ್ನು ನೆನಪಿನಲ್ಲಿ ಇಡುವುದು ಒಳಿತು. ನಾವು ವೈನ್
ರೈಟ್ ಪಬ್ ದಾಟಿ ಬೇಸ್ ಬ್ರೌನ್ ಕ್ಯಾಂಪಿನವರೆಗೆ ನಡೆದೆವು. ಕೆಲವು ಕ್ಷಣಗಳ ಹಿಂದೆ ಇಲ್ಲೇ ಹತ್ತಿರದಲ್ಲಿ ಇದ್ದಂತೆ
ಕಂಡ ಪರ್ವತಗಳು ನಮಗೆ ತಿಳಿಯದೆ ಇನ್ನೂ ಹಿಂದಕ್ಕೆ ಸರಿದಿತ್ತು, ಮರೀಚಿಕೆಯಂತೆ! ಸರಿ ಇನ್ನು ಈ
ಪರ್ವತಗಳನ್ನು ಬೆನ್ನಟ್ಟುವುದು ಸಾಕು ಎನಿಸಿತು. ಅಲ್ಲೇ ನದಿಯ ಪಕ್ಕ ಕಾಡಿನ ಮಧ್ಯೆ ಬಂಡೆಗಳ ಮೇಲೆ ಕುಳಿತು
ಫ್ಲ್ಯಾಸ್ಕಿನಲ್ಲಿ ತಂದಿದ್ದ ಬಿಸಿ ಮಸಾಲಾ ಟೀ ಕುಡಿದು ಬಂದ ದಾರಿಯಲ್ಲೇ ಮತ್ತೆ 3 ಮೇಲೆ ನಡೆದು ಸ್ಕೆಲ್ವಿಥ್ ಬ್ರಿಡ್ಜ್
ಬರುವ ಹೊತ್ತಿಗೆ ಕಾಲಗಳು ಪದ ಹೇಳುತ್ತಿದ್ದವು!
ನಮ್ಮ ಅಪಾರ್ಟ್ಮೆಂಟಿಗೆ ವಾಪಸ್ಸಾಗಿ ಶವರ್ ಮಾಡಿ ಅಂಬಲ್ ಸೈಡ್ ಊರಿನ ಮಧ್ಯದಲ್ಲಿರುವ ಒಂದು ಥಾಯ್
ರೆಸ್ಟಾರಾಂಟಿನಲ್ಲಿ ಮಾಡಿದ ಊಟ; ಹಸಿವು ಹಾಗೂ ಸುಸ್ತಿನ ಪರಿಣಾಮವೇನೋ ರುಚಿಯಾದ ಮೃಷ್ಟಾನ್ಹ
ಭೋಜನವಾಗಿತ್ತು! ಅಂದ ಹಾಗೆ ಅಂಬೆಲ್ ಸೈಡಿನಲ್ಲಿ ಇತ್ತೀಚಿಗೆ ಗಾಂಧಿ ಮತ್ತು ಜಫರಾಲಿಸ್ ಎಂಬ ಮಾಂಸ
ರಹಿತ, ಬರಿ ವೆಜಿಟೇರಿಯನ್ ರೆಸ್ಟುರಾಂಟ್ಗಳು ಇದ್ದು ಈ ವಿಚಾರ ಸಸ್ಯಾಹಾರಿಗಳಿಗೆ ಒಳ್ಳೆ ಸುದ್ದಿ ಎನ್ನಬಹುದು.
ಇಲ್ಲಿ ತಯಾರಾಗುವ ಪೀಝ, ಪಾಸ್ಟಾ, ನಟ್ ರೋಸ್ಟ್ ಇತ್ಯಾದಿ ಎಲ್ಲಾ ಪಾಶ್ಚಿಮಾತ್ಯ ಖಾದ್ಯಗಳು ಒಂದೇ ಒಂದು
ತುಣುಕು ಮಾಂಸವಿಲ್ಲದೆ ತಯಾರಿಸಿದ ಅಪ್ಪಟ ಸಸ್ಯಾಹಾರಿ ಖಾದ್ಯಗಳು. ನಮ್ಮ ಒಪ್ಪಿಗೆ ಇಲ್ಲದೆ ಚೀಸ್ ಕೂಡ
ಹಾಕುವುದಿಲ್ಲ. ಇದು ಎಕ್ಸ್ ಕ್ಲ್ಯೂಸಿವ್ ವೆಜೆಟೇರಿಯನ್ ರೆಸ್ಟಾರೆಂಟ್ಗಳು ಎನ್ನಬಹುದು. ಇಲ್ಲಿ ಚಪಾತಿ ಅನ್ನ ಇತ್ಯಾದಿ
ಸಿಗುವುದಿಲ್ಲ ಹೀಗಾಗಿ ಅದು ಇಂಡಿಯನ್ ಅಲ್ಲ ಎನ್ನಬಹುದು. ಈ ಪ್ರಪಂಚದಲ್ಲಿ ಸಸ್ಯಾಹಾರಿಗಳೂ ಇದ್ದಾರೆ,
ಮಾಂಸ ಇಲ್ಲದೆ ರುಚಿಯಾದ ಅಡುಗೆ ಮಾಡುವ ಸಾಧ್ಯತೆ ಇದೆ ಎನ್ನುವ ವಿಚಾರ, ಇಷ್ಟು ವರ್ಷಗಳ ನಂತರ
ಪಾಶ್ಚಿಮಾತ್ಯರ ಗ್ರಹಿಕೆಗೆ ನಿಲುಕಿ, ಜಫರಾಲಿಸ್ ರೀತಿಯ ಎಕ್ಸ್ ಕ್ಲ್ಯೂಸಿವ್ ವೆಜೆಟೇರಿಯನ್ ರೆಸ್ಟೋರೆಂಟ್ಗಳು
ಅಸ್ತಿತ್ವದಲ್ಲಿರುವುದು ಸಮಾಧಾನದ ವಿಚಾರ. ನಾವು ನಮ್ಮ ಇರುವಿಕೆಯ ಸಂಧರ್ಭದಲ್ಲಿ ಈ ರೆಸ್ಟೋರೆಂಟ್ಗಳಲ್ಲಿ
ಭೋಜನ ಮಾಡಿದೆವು. ಅಂದಹಾಗೆ ಪಾಕಿಸ್ತಾನದವರು ನಡೆಸುವ ಇಂಡಿಯನ್ ರೆಸ್ಟೋರೆಂಟ್ ಅಂಬಲ್
ಸೈಡಿನಲ್ಲಿದೆ ಇದೆ ಎಂಬ ಸಂಗತಿಯನ್ನು ಪ್ರಸ್ತಾಪ ಮಾಡುತ್ತಿದ್ದೇನೆ. ಇತ್ತೀಚಿನ ದಿನಗಳಲ್ಲಿ ಪ್ರಪಂಚದ ಮೂಲೆ
ಮೂಲೆಯಲ್ಲಿ ಇಂಡಿಯನ್ ರೆಸ್ಟೋರೆಂಟ್ ಗಳಿರುವುದು ಸಾಮಾನ್ಯವಾದ ಸಂಗತಿ.

ಲೇಕ್ ಡಿಸ್ಟ್ರಿಕ್ಟಿನ ಎಲ್ಲ ಸರೋವರಗಳಿಗಿಂತ ಉತ್ತರದಲ್ಲಿರುವ ಬಟರ್ ಮಿಯರ್ ಲೇಕ್ ಬಹಳ ಸುಂದರವಾಗಿದೆ
ಎಂದು ಕೇಳಿದ್ದೆ. ಹಿಂದೆ ನೋಡಲಾಗದಿದ್ದ ಈ ಸುಂದರ ತಾಣಕ್ಕೆ ಈ ಬಾರಿ ಭೇಟಿ ನೀಡಲು ನಿರ್ಧರಿಸಿದೆವು.
ನಾವಿದ್ದ ಅಂಬಲ್ ಸೈಡಿನಿಂದ ಕೆಸಿಕ್ ತಲುಪಿ ಅಲ್ಲಿ ಡರ್ವೆಂಟ್ ಸರೋವರದ ಪಕ್ಕದಲ್ಲಿ ಹಾದು ಹೋಗುವ
B5289 ರಸ್ತೆಯಲ್ಲಿ ಪ್ರಯಾಣ ಶುರು ಮಾಡಿದೆವು. ಪರ್ವತಗಳ ಮತ್ತು ಅರಣ್ಯಗಳ ಮಧ್ಯ ಹಾಯುವ ಈ ರಸ್ತೆ
ಬಾರೊಡೇಲ್ ಎಂಬ ಸುಂದರ ಕಣಿವೆಯಲ್ಲಿ ಹಬ್ಬಿದೆ. ಲೋ ಡೋರ್ ಫಾಲ್ಸ್ ಹೋಟೆಲ್ ಮತ್ತು ಸ್ಪಾ ಎಂಬ
ಪ್ರತಿಷ್ಠಿತ ಹೋಟೆಲ್ ದಾಟಿ ಇದೇ B5289 ರಸ್ತೆಯಲ್ಲಿ ಮುಂದುವರಿದರೆ ಇಲ್ಲಿಯಾ ಘಾಟಿ ರಸ್ತೆಯನ್ನು ಹಾನಿಸ್ಟರ್
ಪಾಸ್ ಎಂದು ಗುರುತಿಸಬಹುದು. ಈ ರಸ್ತೆ ಇಂಗ್ಲೆಂಡಿನ ಅತಿ ಕಠಿಣ ಮತ್ತು ಪ್ರಯಾಸ ನೀಡುವ ರಸ್ತೆಗಳಲ್ಲಿ ಒಂದು
ಎಂದು ಪರಿಗಣಿಸಲಾಗಿದೆ. ಬಾರೊಡೇಲ್ ಬುಡದಿಂದ ಏರುವ ಈ ಅಂಕು ಡೊಂಕಾದ ರಸ್ತೆ ಹಾನಿಸ್ಟರ್ ಗಣಿ ಹತ್ತಿರ
ಒಂದುಸಾವಿರ ಅಡಿ ಎತ್ತರವನ್ನು ತಲುಪುತ್ತದೆ. ನಮ್ಮ ಪಶ್ಚಿಮ ಘಟ್ಟದ ಆಗುಂಬೆ ಚಾರ್ಮಾಡಿ ರಸ್ತೆಗೆ ಹೋಲಿಸಿದರೆ
ಇದು ಹೆಚ್ಚಿನದೇನಲ್ಲ ಎನ್ನ ಬಹುದು. ಇಲ್ಲಿ ಸುತ್ತಣ ಕಣಿವೆಗಳ ಮತ್ತು ಉತ್ತುಂಗ ಶಿಖರಗಳ ವಿಹಂಗಮ ನೋಟ
ದೊರೆಯುತ್ತದೆ. ಇಲ್ಲಿಂದ ಮುಂದೆ ರಸ್ತೆ 25% ಇಳಿಜಾರಿನಲ್ಲಿ (Gradient) ಇಳಿಯುತ್ತದೆ. ಇಲ್ಲಿ ವಾಹನವನ್ನು
ಇಳಿಸುವುದು ಚಾಲಕರಿಗೆ ದೊರಕುವ ಪುಳಕಿತ ಅನುಭವ. ಹೊರಡುವ ಮುನ್ನ ಕಾರಿನ ಬ್ರೇಕ್ ಸರಿಯಾಗಿದೆಯೇ
ಎಂದು ಖಾತ್ರಿ ಮಾಡಿಕೊಳ್ಳುವುದು ಒಳಿತು! ನಾವು ಕೆಳಗೆ ಇಳಿದಂತೆ ಮೇಲೆ ಹತ್ತುತಿರುವ ಕೆಲವು ಪುಟ್ಟ ಕಾರುಗಳ
ಒದ್ದಾಟಕ್ಕೆ ಮರುಗುತ್ತ ಈ ದೈತ್ಯಾಕಾರದ “ಜಾರುಬಂಡೆ” ಯನ್ನು ಇಳಿದೆವು.

ಅಂದ ಹಾಗೆ ಹಾನಿಸ್ಟರ್ ಪಾಸಿನ ಪ್ರಯಾಸದ ಪ್ರಯಾಣ ಬೇಡವೆನಿಸಿದವರಿಗೆ ಕೆಸಿಕ್ಕಿನಿಂದ ಕಾಕರ್ಮೌತಿಗೆ
ಹೋಗುವ ಹಿರಿದಾದ A66 ರಸ್ತೆಯಲ್ಲಿ ತೆರಳಿ ನಂತರ B5292 ಹಿಡಿದು ಬಟರ್ ಮಿಯರನ್ನು ತಲುಪಬಹುದು.
ಇತ್ತೀಚಿನ ಯುಗದಲ್ಲಿ ನನ್ನಂತೆ ಮ್ಯಾಪ್ ತೆಗೆದು ಊರು ದಾರಿಗಳನ್ನು ನೋಡುವವರು ವಿರಳ. ಸುಮ್ಮನೆ ಸ್ಯಾಟ್
ನ್ಯಾವಿನಲ್ಲಿ ಪೋಸ್ಟ್ ಕೋಡ್ ಹಾಕಿದರೆ ಸಾಲದೇ ಎಂದು ಆಲೋಚಿಸುವುದು ಸಾಮಾನ್ಯ. ನಾನು ಹಳೆ

ತಲೆಮಾರಿನವನು. ಹಲವಾರು ದಶಕಗಳ ಕಾಲಾವಧಿಯಲ್ಲಿ ಇಂಗ್ಲೆಂಡ್ ಸ್ಕಾಟ್ಲೆಂಡ್ ರಸ್ತೆಗಳಲ್ಲಿ ಮ್ಯಾಪ್ ಹಿಡಿದು
ಕಾರ್ ಓಡಿಸಿದ್ದೇನೆ. ನನಗೆ ಗುರಿ ತಲುಪುದುಕ್ಕಿಂತ ಆ ಮಾರ್ಗ ಎಲ್ಲಿಂದ ಸಾಗುತ್ತದೆ? ಅಲ್ಲಿ ಸಿಗುವ
ಊರುಗಳೇನು? ಅಲ್ಲಿ ರಸ್ತೆ ಹೇಗಿದೆ? ಅಲ್ಲಿ ಸಿಗುವ ಪರ್ವತ ನದಿ ಸರೋವರ ಇವುಗಳ ಹೇಗಿರಬಹುದು?
ಎಂಬುದರ ಬಗ್ಗೆ ಕುತೂಹಲ. ನಾನೇ ಅರಿತು ಕಲ್ಪಿಸಿಕೊಂಡ ಮಾರ್ಗ ಮೆಶೀನು ತೋರುವ ಮಾರ್ಗದರ್ಶನಕ್ಕಿಂತ
ಮಿಗಿಲು ಎಂಬುದು ನನ್ನ ಅಭಿಪ್ರಾಯ. ಅಂದ ಹಾಗೆ ಎಷ್ಟೋ ಸಾರಿ ಸ್ಯಾಟ್ ನಾವ್ ಗಳು ಚಾಲಕರನ್ನು ತಪ್ಪು
ದಾರಿಗೆಳೆದು ‘ಇಗೋ ನೀನು ನಿನ್ನ ಗುರಿಯನ್ನು ಮುಟ್ಟಿದೆ’ ಎಂದು ನಮ್ಮ ಗುರಿಯನ್ನು ಅವೇ ನಿರ್ಧರಿಸುತ್ತವೆ !!
ಇದು ಸರಿಯಲ್ಲ ಎಂದು ಸ್ಯಾಟ್ ನಾವ್ ಜೊತೆ ವಾದ ಮಾಡಲು ಸಾಧ್ಯವೇ?
ವೈಯುಕ್ತಿಕವಾಗಿ ನನಗೆ;
“Journey is more important than the destination!”

ಬಟರ್ ಮಿಯರ್ ಸರೋವರ 1.5 ಮೈಲಿ ಉದ್ದವಿದ್ದು ಒಂದು ಮೈಲಿ ಅಗಲವಿದೆ. ಈ ಸರೋವರವನ್ನು ಒಂದು
ಸುತ್ತು ಹೊಡೆಯಲು ಸರೋವರದ ಬದಿಯಲ್ಲಿ (ಬೆಟ್ಟದ ಇಳಿಜಾರಿನಲ್ಲಿ) ಸಮತಟ್ಟಾದ ರಸ್ತೆ ಇದ್ದು ವಿಹಾರಕ್ಕೆ
ಅನುಕೂಲವಾಗಿದೆ. ಇಲ್ಲಿಯ ವಿಶೇಷವೆಂದರೆ ಈ ಸರೋವರದ ಸುತ್ತ ಭಾರಿ ಬೆಟ್ಟಗಳು ಹಬ್ಬಿವೆ. ಬೆಟ್ಟಗಳಿಂದ
ಸುರಿಯುವ ನೀರು ಹಲವಾರು ಹಂತದಲ್ಲಿ ಜಲಪಾತವಾಗಿ ಧುಮುಕಿ ಸರೋವರವನ್ನು ಸೇರುತ್ತದೆ. ಇಲ್ಲಿ ನಾವು
ನಡೆಸಿದ ಚಾರಣ ನನ್ನ ಮೈ ಮನಗಳನ್ನು ಹದವಾಗಿಸಿತು. ರಸ್ತೆಯ ಇಕ್ಕೆಲದಲ್ಲಿ ನಿಂತ ಪೈನ್ ಮರಗಳು, ಬೆಟ್ಟಗಳ
ಮೇಲಿನ ಹಸಿರು ಹೊದಿಕೆ, ನೀಲಿ ಆಕಾಶ, ಸರೋವರದಲ್ಲಿನ ಬೆಟ್ಟ, ಮರ ಮತ್ತು ಆಕಾಶಗಳ ಪ್ರತಿಬಿಂಬ,
ಪ್ರಶಾಂತ ನೀರವತೆ, ಮಧ್ಯೆ ಮಧ್ಯೆ ಕುರಿಗಳ ಬ್ಯಾ ಎಂಬ ಸದ್ದು , ಮೃದುವಾಗಿ ಅಪ್ಪಳಿಸುವ ನೀರ ಮೇಲಿನ
ಅಲೆಗಳ ನಿನಾದ, ಸರೋವರಕ್ಕೆ ಇಳಿಯುವ ತೊರೆಗಳ ತವಕ, ಜುಳು ಜುಳು ಮರ್ಮರ ಇವು ನನ್ನನ್ನು
ಬೇರೊಂದು ಭಾವನಾ ಲೋಕಕ್ಕೆ ಕರೆದೊಯ್ದವು. ನಾನು ಭಾವ ಪರವಶನಾಗಿ ಕೆಲವು ಕಾಲ ಮೌನದಲ್ಲಿ ಕುಳಿತು
ಈ ವಿಶೇಷ ಅನುಭವದಲ್ಲಿ ಮಿಂದು, ಈ ದೃಶ್ಯಗಳನ್ನು ಕಣ್ಣಿನಲ್ಲಿ ತುಂಬಿಸಿಕೊಳ್ಳುವುದಲ್ಲದೆ ನನ್ನ ಕ್ಯಾಮರದಲ್ಲೂ
ತುಂಬಿಸಿ ಬಿಟ್ಟೆ!

ಚಿತ್ರಗಳ ಕೃಪೆ: ಡಾ|| ಜಿ. ಎಸ್ .ಶಿವಪ್ರಸಾದ್

ಬಟರ್ ಮಿಯರಿಗೂ ಬೆಣ್ಣೆಗೂ ಯಾವ ಸಂಭಂದವಿಲ್ಲ. ಈ ಹೆಸರು ಬಂದ ಹಿನ್ನೆಲೆ ಹೀಗಿದೆ; 10 ನೇ ಶತಮಾನದಲ್ಲಿ
ವೈಕಿಂಗ್ ಮೂಲದವರು ಈ ಪ್ರದೇಶದಲ್ಲಿದ್ದು ಇಲ್ಲಿಯ ಸ್ಥಳೀಯ ನಾಯಕನ ಹೆಸರು ನಾರ್ಸ್ ಭಾಷೆಯಲ್ಲಿ ಭೂತರ್
ಎಂತಿದ್ದು, ಹಿಂದೆ ತಿಳಿಸಿದಂತೆ ಮಿಯರ್ ಎಂದರೆ ಸರೋವರ, ಹೀಗೆ ಭೂತರಿನ ಸರೋವರ ಕಾಲ ಕ್ರಮೇಣ
ಬಟರ್ ಮಿಯರ್ ಎಂದು ಕರೆಯಲ್ಪಟ್ಟಿತು. 18ನೇ ಶತಮಾನದಲ್ಲಿ ನಡೆದ ಒಂದು ಸ್ವಾರಸ್ಯಕರವಾದ ಸಾಮಾಜಿಕ
ಪ್ರಸಂಗದಿಂದಾಗಿ ಬಟರ್ ಮಿಯರ್ ಸಾಹಿತ್ಯ ಲೋಕದಲ್ಲೂ ಪ್ರವೇಶ ಮಾಡಿತು. ಅದನ್ನು ಮುಂದಕ್ಕೆ ವಿಸ್ತರಿಸುವೆ.
ಬಟರ್ ಮಿಯರ್ ಸರೋವರವನ್ನು ಪ್ರವೇಶಿಸುವುದಕ್ಕೆ ಮುನ್ನ ಒಂದು ಹುಲ್ಲುಗಾವಲಿಯಲ್ಲಿ ಬಟರ್ ಮಿಯರ್ ಹಳ್ಳಿ
ಇದೆ. ಇಲ್ಲಿ ‘ಫಿಶ್ ಇನ್’ ಎಂಬ ಸ್ಥಳ ಪ್ರಖ್ಯಾತವಾಗಿದೆ. ಈ ಪಬ್ಬಿನ ಮಾಲಿಕನ ಮಗಳು ಮೇರಿ ರಾಬಿನ್ಸನ್ (1798
-1837) ತನ್ನ ಯೌವ್ವನದಲ್ಲಿ ಬಹಳ ಚಲುವೆಯಾಗಿ, ಅವಳ ಚೆಲುವು ಇಲ್ಲಿಯ ಮನೆ ಮಾತಾಗಿದ್ದು ಅವಳನ್ನು
‘ಮೇಯ್ಡ್ ಆಫ್ ಬಟರ್ ಮಿಯರ್’ ಎಂದು ಗುರುತಿಸಲಾಗಿತ್ತು. ಕೆಲವರು ಅವಳನ್ನು ‘ಕಂಬ್ರಿಯನ್ ಆಫ್ರೋಡೈಟಿ’
ಎಂದು ಕೂಡ ಕರೆದಿದ್ದರು. ಜೋಸೆಫ್ ಪಾಮರ್ ಎಂಬ ಲೇಖಕ ತನ್ನ ಕೃತಿಯಲ್ಲಿ (Fortnight’s ramble to the
lakes) ಮೇರಿಯ ಸೌಂದರ್ಯದ ಬಗ್ಗೆ ಹಾಡಿ ಹೊಗಳಿದ್ದ. ಇದನ್ನು ತಿಳಿದ ವರ್ಡ್ಸ್ ವರ್ಥ್ ಮತ್ತು ಅವನ ಗೆಳೆಯ
ಕವಿ ಕೋಲ್ರಿಜ್, ಬಟರ್ ಮಿಯರಿಗೆ ವಿಹಾರಕ್ಕೆಂದು ಬಂದು ಹಾಗೆ ಮೇರಿಯನ್ನು ನೋಡಿಕೊಂಡು ಹೋದರು. ಸರಿ
ಒಂದು ದಿನ ಜಾನ್ ಹ್ಯಾಟ್ ಫೀಲ್ಡ್ ಎಂಬ ಕೆಳ ದರ್ಜೆ ಮೋಸಗಾರ ಆಗಲೇ ಮದುವೆಯಾಗಿದ್ದರೂ ತಾನು
ಮೇರಿಗೆ ತಕ್ಕ ವರನೆಂದು ತಾನು ಪ್ರತಿಷ್ಠಿತ ‘ಕರ್ನಲ್ ಹೋಪ್’ ಎಂದು ನಕಲಿ ವ್ಯಕ್ತಿತ್ವದಲ್ಲಿ ಸುಳ್ಳುಗಳನ್ನು ಹೆಣೆದು
ಮೇರಿ ತಂದೆಯನ್ನು ಭೇಟಿ ಮಾಡಿ ಮೇರಿಯನ್ನು ಮದುವೆಯಾಗುವ ಪ್ರಸ್ತಾಪ ಮಾಡಿದ. ಮೇರಿಯ ತಂದೆ
ಹಿಂದೆ-ಮುಂದೆ ವಿಚಾರಿಸದೆ ಅವಸರದಲ್ಲಿ ಮೇರಿಯನ್ನು ಈತನಿಗೆ ಕೊಟ್ಟು ಮದುವೆಮಾಡಿಬಿಟ್ಟ ! ಈ ಮದುವೆಯ
ಬಗ್ಗೆ ಕೋಲ್ರಿಜ್ ಲಂಡನ್ನಿನ ಮಾರ್ನಿಂಗ್ ಪೋಸ್ಟ್ ಎಂಬ ಪತ್ರಿಕೆಯಲ್ಲಿ ಬರೆದು ‘ರೋಮ್ಯಾಂಟಿಕ್ ಮ್ಯಾರಿಯೇಜ್’

ಎಂದು ಉದ್ಗರಿಸಿದ. ಬಹುಶಃ ಆಗಿನ ಕಾಲಕ್ಕೆ ಇದು ಈಗಿನ ಡಯಾನಾ ಸ್ಪೆನ್ಸರ್ ಮದುವೆಯಷ್ಟು ಪ್ರಚಾರ
ಪಡೆದಿದ್ದಿರಬಹುದು.
ಕಾಲ ಕ್ರಮೇಣ ಜಾನ್ ಹ್ಯಾಟ್ ಫೀಲ್ಡ್ ಗುಟ್ಟು ಬಯಲಾಗಿ ಅವನು ದೊಡ್ಡ ಮೋಸಗಾರನೆಂದು ತಿಳಿಯಿತು.
ಅವನಿಗಾಗಲೇ ಮದುವೆಯಾಗಿದ್ದರಿಂದ ಮೇರಿಯೊಡನೆ ನಡೆದ ವಿವಾಹ ಆಗಿನ ಕಾಲಕ್ಕೆ ಕಾನೂನು ಬಾಹಿರವಾದ
ಬೈಗ್ಯಾಮಸ್ ಮದುವೆ ಎಂದು ಪರಿಗಣಿಸಲ್ಪಟ್ಟು ಮೇರಿ ಅವಿವಾಹಿತೆ ಎಂದು ಘೋಷಿಸಲಾಯಿತು. ಹಾಗೆಯೇ ಈ
ಕುತಂತ್ರ ಹೂಡಿದ ಜಾನ್ ಹ್ಯಾಟ್ ಫೀಲ್ಡಿಗೆ ಗಲ್ಲು ಶಿಕ್ಷೆ ವಿಧಿಸಲಾಯಿತು. ಸ್ಥಳೀಯರು ಮೇರಿಯ ಮೇಲೆ ಅನುಕಂಪೆ
ತೋರಿಸಿ ಅವಳಿಗಾಗಿ ಹಣ ಸಂಗ್ರಹ ಮಾಡಿ ಸ್ಥಳೀಯ ರೈತನೊಬ್ಬನ ಜೊತೆ ಮಾಡುವೆ ಮಾಡಿಕೊಟ್ಟರು. ಮೇರಿ
ತನ್ನ ಮುಂದಿನ ಬಾಳನ್ನು ನೆಮ್ಮದಿಯಿಂದ ಗೌರವದಿಂದ ಜೀವಿಸಲು ಸಾಧ್ಯವಾಯಿತು. ಮುಂದಿನ ಕೆಲವು
ಸಮಯದ ನಂತರ ವರ್ಡ್ಸ್ ವರ್ಥ್ ತನ್ನ ‘ಪ್ರಿಲೂಡ್’ ಎಂಬ ದೀರ್ಘ ಆತ್ಮಕಥನ ಕವಿತೆಯಲ್ಲಿ ಮೇರಿಯ ಬಗ್ಗೆ
ಬರೆದಿದ್ದಾನೆ. ಇತ್ತೀಚಿನ ಕೆಲವು ವರ್ಷಗಳಲ್ಲಿ “ಮೇಡ್ ಆಫ್ ಬಟರ್ ಮಿಯರ್” ಎಂಬ ಕಾದಂಬರಿಯನ್ನು ಖ್ಯಾತ
ಬರಹಗಾರ, ರೇಡಿಯೋ 4 ರ ಕಾರ್ಯಕ್ರಮಗಳ ನಿರೂಪಕ ಮೆಲ್ವಿನ್ ಬ್ರಾಗ್ ಬರೆದಿದ್ದಾನೆ. ಈ ಕಥೆ ನಾಟಕ
ರೂಪದಲ್ಲೂ ಕೂಡ ಪ್ರಸ್ತುತಿಗೊಂಡಿದೆ. ಮೇರಿಯ ಚಿತ್ರ “ಮೇಡ್ ಆಫ್ ಬಟರ್ ಮಿಯರ್” ಎಂಬ ಶೀರ್ಷಿಕೆಯಲ್ಲಿ
ಲಂಡನ್ನಿನ ಬ್ರಿಟಿಷ್ ಮ್ಯೂಸಿಯಂನಲ್ಲಿ ಇಂದಿಗೂ ಕಾಣಬಹುದು.
ಅಂದ ಹಾಗೆ ಈ ಫಿಶ್ಇನ್, ಬಟರ್ ಮಿಯರಿನಲ್ಲಿ ಇಂದಿಗೂ ಅಸ್ತಿತ್ವದಲ್ಲಿದ್ದು ಇತ್ತೀಚಿಗೆ ವ್ಯವಸ್ಥೆ ಬದಲಾಗಿ ‘ಮೇಡ್
ಆಫ್ ಬಟರ್ ಮಿಯಾರ್ ಇನ್’ ಎಂಬ ಹೆಸರಲ್ಲಿ ನಡೆಯುತ್ತಿದೆ. ನಾವು ಅಲ್ಲಿ ತೆರಳಿದಾಗ ಕೂರಲು ಸ್ಥಳಾವಕಾಶ
ದೊರೆಯಲಿಲ್ಲ. ಪಕ್ಕದಲ್ಲೇ ಐಸ್ ಕ್ರೀಮ್ ಮಾರುತ್ತಿದ್ದ ಅಂಗಡಿಯಲ್ಲಿ ತಂಪಾದ ಐಸ್ಕ್ರೀಂ ಪಡೆದು, ನಾನು ನನ್ನ
ಶ್ರೀಮತಿ ಕೋನಿನಿಂದ ಕರಗಿ ಜಾರುವ ಐಸ್ಕ್ರೀಮನ್ನು ಕೆಳಗೆ ಬೀಳದಂತೆ ನೆಕ್ಕುವ “ಸ್ಪರ್ಧೆ”ಗೆ ತೊಡಗಿದೆವು. ಹೀಗೆ
ಐಸ್ಕ್ರೀಮ್ ತಿನ್ನುತ್ತಾ ಇಲ್ಲಿಯ ಇತಿಹಾಸದೊಳಗೆ ನಮ್ಮ ಕೆಲವು ಹೆಜ್ಜೆಗಳನ್ನೂ ಸೇರಿಸಿ, ಮೇರಿಯನ್ನು ನೆನೆದು,
ಅಲ್ಲಿಂದ ಹೊರಟೆವು.

ಮುಂದುವರೆಯುವುದು ಎರಡನೇ ಭಾಗವನ್ನು ನಿರೀಕ್ಷಿಸಿ
ಸ್ಕೇಲ್ವಿಥ್ ಜಲಪಾತದ ವಿಡಿಯೋ ಮತ್ತು ಬಟರ್ ಮಿಯರ್ ಸರೋವರದ ವಿಡಿಯೋ ಚಿತ್ರವನ್ನು ಕೆಳಗೆ
ನೀಡಲಾಗಿದೆ. ಪ್ರಸಾದ್ ಅವರ ಛಾಯಾಗ್ರಹಣಕ್ಕೆ ಅವರೇ ಕನ್ನಡದ ಜನಪ್ರಿಯ ಹಾಡುಗಳನ್ನು ಗೂಗಲ್
ಕೃಪೆಯಿಂದೆ ಆಯ್ದುಕೊಂಡು ಸಂಗೀತ ಅಳವಡಿಸಿದ್ದಾರೆ.

ಲೇಕ್ ಡಿಸ್ಟ್ರಿಕ್ಟಿನ ಶಿಖರಗಳಲ್ಲಿ ಸೆರೆ ಹಿಡಿದ ಕೆಲವು ನಯನ ಮನೋಹರ ದೃಶ್ಯಾವಳಿಗಳು !!!! ಕೊಂಡಿಗಳನ್ನು ಕ್ಲಿಕ್ಕಿಸಿ.

https://drive.google.com/file/d/1HLfJEnAL513W7XkK-hbvIj-jaisVmIdB/view?usp=drivesdk

https://drive.google.com/file/d/1HPsBbV8J-Fs1Lf39alqoYIAtFIQbtZAI/view?usp=drivesdk

https://drive.google.com/file/d/1HVDED_7QRcoDY93rbGJ8OX1Ipsg4m1ki/view?usp=drivesdk

ಡಾ. ಜಿ. ಎಸ್. ಶಿವಪ್ರಸಾದ್

ಲಕ್ಷ್ಮಮ್ಮ – ಡಾ||ಸತ್ಯವತಿ ಮೂರ್ತಿ ಹಾಗು ಪೂರಿ-ಸಿ.ಹೆಚ್.ಸುಶೀಲೇ೦ದ್ರ ರಾವ್

ಆತ್ಮೀಯ ಓದುಗರೇ !!!
ತಾವೆಲ್ಲ ವಿಧವಿಧವಾದ ಜೀವ-ನಿರ್ಜೀವ ವಸ್ತುಗಳ, ಭಾವನೆಗಳ, ಪ್ರಕೃತಿಯ, ವ್ಯಕ್ತಿಗಳನ್ನಾದಾರಿತ ಕವಿತೆಗಳನ್ನು ಓದುತ್ತಾ ಬಂದಿದ್ದೀರಿ. ಆದರೆ ನಮ್ಮ ಈ ವಾರದ ಸಂಚಿಕೆಯಲ್ಲಿ ಡಾ||ಸತ್ಯವತಿ ಮೂರ್ತಿ ರವರು ತಮ್ಮ ಮನೆಗೆಲಸಕ್ಕೆ ಬರುತ್ತಿದ್ದ ‘ಲಕ್ಷಮ್ಮ’ ಎಂಬಾಕೆಯ ಮೇಲೆ ಒಂದು ಕಿರುಗವನವನ್ನು ಹಾಗು ಶ್ರೀ. ಸಿ.ಹೆಚ್. ಸುಶೀಲೇಂದ್ರ ರಾವ್ ರವರ ‘ಪೂರಿ’ ಎಂಬ ಶೀರ್ಷಿಕೆಯ ಒಂದು ವಿನೋದಗವನವನ್ನು ನಿಮ್ಮ ಮುಂದಿಟ್ಟಿದ್ದಾರೆ .ಓದಿ ಕಮೆಂಟಿಸಿ. -ಸವಿ.ಸಂ

ಲಕ್ಷಮ್ಮ

ನಮ್ಮ ಮನೇ ಕೆಲಸದವಳು ಲಕ್ಷಮ್ಮ
ಅಲಂಕಾರದಲಿ ಅಪ್ಪಟ ಲಕ್ಷ್ಮಿದೇವತೆಯೇ
ಎಣ್ಣೆ ಹಾಕಿ ಬಾಚಿ ತಿದ್ದಿ ತೀಡಿ ಮೇಲೆತ್ತಿ ಕಟ್ಟಿದಾ ಗಂಟು
ಅದಕೆ ಮೇಲೊಂದು ಹೂವಿನಾ ನಂಟು
ಎಲೆ ಅಡಿಕೆ ಜಿಗಿದು ಕೆಂಪಾದ ತುಟಿಗೇಕೆ ಲಿಪ್ಸ್ಟಿಕ್ಕು?
ತುಟಿಯ ರಂಗನೂ ಮೀರಿದಾ ಹಲ್ಲಿನಾ ಕೆಂಪು
ಮುಖದ ತುಂಬ ಘಮಘಮಿಸುವ ಪೌಡರ್
ಹಸಿರು ಕೆಂಪು ಬಳೆಗಳ ಮೇಳ ಕೈಯಲ್ಲಿ
ಪೊರಕೆ ಮೂರು ಮೊಳದುದ್ದ
ಅಚ್ಚೇನು ಅದರೆತ್ತರ ಅವಳುದ್ದ
ಎಲ್ಲರಂತೆ ಕರಪರ ಕಸ ಕೊರೆಯ್ವಳಿವಳಲ್ಲ
ಸೊಂಟಕ್ಕೆ ಸೆರಗನ್ನು ಸಿಕ್ಕಿಸಿ
ಒಮ್ಮೆ ಪೊರಕೆಯನೆತ್ತಿ ಬೀಸಿದರೆ ಈಕೆ
ಯಾವ ಬ್ಯಾಟ್ಸ್ಮನ್ನು ತಾನೆ ಏಕೆ?

– ಡಾ||ಸತ್ಯವತಿ ಮೂರ್ತಿ

-⌘ ⌘ ⌘ ⌘ ⌘ ⌘ ⌘ ⌘ ⌘ ⌘ ⌘ ⌘ ⌘ ⌘ ⌘ ⌘-

ಪೂರಿ

ಸಾಮಾನ್ಯವಾಗಿ ಮಗು ಹುಟ್ಟುವ ಮುನ್ನ ಅಥವ ನ೦ತರ ತ೦ದೆ ತಾಯ೦ದಿರು ಸಮಯೋಚಿತವಾಗಿ ನಾಮಕರಣ ಮಾಡುವುದು೦ಟು.
ಹೀಗೆ ಮಾಡುವ ಪದ್ದತಿಗಳು ಹಲವಾರು.  ಈ ಬಗ್ಯೆ ಹಾಸ್ಯ ಗಣ್ಯರು ಅನೇಕಟೀಕೆ ಟಿಪ್ಪಣಿ ಮಾಡುವುದೂ ಉ೦ಟು.  ಈ ಹೆಣ್ಣು ಗ೦ಡುಗಳ
ಹೆಸರುಗಳ ಹಾವಳಿಯಲ್ಲಿ ಸ್ವಲ್ಪ ಮು೦ದುವರಿದು ನಿತ್ಯ ಜೀವನದಲ್ಲಿ ಸ್ವಾಭಾವಿಕವಾಗಿ ನಡೆದು ಬ೦ದಿರುವ ಮುದ್ದಿನ ಹೆಸರುಗಳ ಬಗ್ಗೆ
ಒ೦ದು ಚಿಕ್ಕ ಕಾಲ್ಪನಿಕ ವಿವರಣಾ ಚಿತ್ರ  ಈ ಕವನ.

ಗ೦ಡು ಹೆಣ್ಣುಗಳ ಹೆಸರುಗಳ ಹಾವಳಿ

ರೆಕ್ಕೆಇಲ್ಲ ಪುಕ್ಕ ಇಲ್ಲ ಗರುಡಯ್ಯ೦ಗಾರ್
ಅ೦ದವಿಲ್ಲ ಚೆ೦ದವಿಲ್ಲ ಸು೦ದ್ರಮ್ಮ
ಕೈಯಲ್ಲಿ ಕಾಸಿಲ್ಲ ಸ೦ಪತ್ ಕುಮಾರ
ವಿದ್ಯೆಇಲ್ಲ ಬುಧ್ದಿ ಇಲ್ಲ ಶಾರದಮ್ಮ.

ಹೀಗೆ ಅನೇಕ ಹೆಸರುಗಳ ಟೀಕೆ/ಹಾಸ್ಯ
ಮಾಡುವುದು ಸಾಮಾನ್ಯವಾದ ವಾಡಿಕೆ
ಅಲ್ಲದೆ ಉತ್ತಮ ಹೆಸರುಗಳನ್ನು ಪ್ರೀತಿ
ಅಥವ ಅನುಕೂಲಕ್ಕೋಸುಗ ಮೊಟಕು
ಮಾಡಿ ಕರೆಯುವುದು ಕೂಡ ಸಹಜ.

ಸುಮ್ಮನೆ ಈ ಮೊಟಕು ಮಾಡಿ ಕರೆವ
ಹೆಸರುಗಳು ಹೇಗೆ ಅಭ್ಯಾಸದಲ್ಲಿವೆ
ನೋಡುವ ಬನ್ನಿ.

ಕಮಲಾಕ್ಷಿ………..ಕಮ್ಮಿ
ಪಾರಿಜಾತ………..ಪಾರಿ
ಪಾವನ…………..ಪಾವಿ
ಭಾವನ…………..ಭಾವಿ
ಮ೦ದಾರ………..ಮ೦ದಿ

ಹೀಗೆ ಪೂಣಿ೯ಮ ಎನ್ನುವ ಹೆಸರು
ಮೊಟಕಾಗಿ ಕರೆಯುವಾಗ..ಪೂರಿ
ಆಗಿ ಅಲ್ಲಿ೦ದ ಮು೦ದೆ ಸಾಗಿ
ಹಲವಾರು ಕಾಲ್ಪನಿಕ ಹ೦ತಗಳಲ್ಲಿ
ಪರಿವರ್ತಿಸಿದ ಚಿತ್ರ ಗಮನಿಸಿ ನೋಡಿ.        ಪೂರಿ

ಸು೦ದರ ಹುಡುಗಿ ಪೂರ್ಣಿಮ ನಿತ್ಯ
ಹೊರಗೆ ಹೋಗುವಾಗ ಅವಳಿಗೆ ನೀರಿನ
ಬಾಟಲು ಬೇಕೇ ಬೇಕು. ಶಾಲೆಯ
ಸ್ನೇಹಿತೆ ತಮಾಷೆಯಾಗಿ ಮಾತಾಡುವಾಗ
ಪಾನಿ ಪೂರಿ ಎ೦ದು ಕರೆದಳು. ಆ ಹೆಸರು
ಅ೦ದಿನಿ೦ದ ಉಳಿದು ಹೋಯಿತು.            ಪಾನಿ ಪೂರಿ

ಪೂರ್ಣಿಮ ಒಮ್ಮೆ ಸ್ವಿಮಿ೦ಗ್ ಪೂಲ್ ಬಳಿ
ಸೆಲ್ಫಿ ತೆಗೆಯುವಾಗ ಜಾರಿ ಬಿದ್ದಳು.ಆಗ
ಅಲ್ಲಿದ್ದ ಜನರು ಸೇವ್ ಪೂರಿ ಸೇವ್ ಪೂರಿ
ಎ೦ದು ಕೂಗಲು ಗಾರ್ಡಗಳು ಅವಳನ್ನು
ಬದುಕಿಸಿದರು.ಅಲ್ಲಿ ಅವಳು ಸೇವ್ ಪೂರಿ
ಆದಳು.                                        ಸೇವ್ ಪೂರಿ

ಈ ಸುದ್ದಿ ಪೋಲೀಸರಿಗೆ ತಿಳಿದಾಗ
ಇವಳು ಆತ್ಮ ಹತ್ಯೆ ಮಾಡಿಕೊಳ್ಳಲು
ಪ್ರಯತ್ನಿಸಿದಳೆ೦ದು ಅವಳಮೇಲೆ
ಕೇಸ್ ಹಾಕಿದರು. ಆಗ ಅವಳ ಸ್ನೇಹಿತರು
ದೊಡ್ಡ ಬಾವುಟ ಹಿಡಿದು ಬೇಲ್ ಪೂರಿ
ಎ೦ದು ಚಳವಳಿ ಮಾಡಿ ಬಿಡಿಸಿದರು.           ಬೇಲ್ ಪೂರಿ

ಈ ಚಳವಳಿ ವೀಕ್ಷಿಸಿದ ಪತ್ರಿಕಾ
ಮಾಧ್ಯಮಗಳು ಮತ್ತಷ್ಟು ಉಪ್ಪು
ಖಾರ ಮಸಾಲೆ ಸೇರಿಸಿ ರುಬ್ಬಿ ರುಬ್ಬಿ
ಪತ್ರಿಕೆಗಳಲ್ಲಿ ಪ್ರಕಟಿಸಿದರು. ಆಗ
ಅವಳು ಮಸಾಲೆ ಪೂರಿ ಆದಳು.              ಮಸಾಲೆ ಪೂರಿ

ಈ ಗಲಭೆಗಳೆಲ್ಲಾ ಮುಗಿದನ೦ತತರ
ಪೂರ್ಣಿಮ ಚೇತರಿಸಿಕೊ೦ಡು ಅವಳ
ಬಾಲ್ಯ ಸ್ನೇಹಿತನಾದ ಜಗನ್ನಾಥನನ್ನು
ಮದುವೆಯಾದಳು. ಅ೦ದಿನಿ೦ದ
ಅವಳು ಪೂರಿ ಜಗನ್ನಾಥ ಆದಳು
ಎ೦ಬುದು ಸ೦ತೋಷದ ಸುದ್ದಿ.                 ಪೂರಿ ಜಗನ್ನಾಥ

ಮು೦ದಿನ ಪೂರಿ ಜಗನ್ನಾಥರ ಸುಗಮ
ದಾ೦ಪತ್ಯ ಜೀವನದಲ್ಲಿ ಅನೇಕ ಬಗೆಯ
ರುಚಿ ರುಚಿ ಸಿಹಿ  ಪೂರಿ ಶ್ರೀಕ೦ಟ
ಪೂರಿ ಬಾಸು೦ದಿ ಇತ್ಯಾದಿಗಳನ್ನು ಸವಿದು
ಬಾಳಿದರೆ೦ದು ಹಾರಿ ಹೋಗುವ
ಹಕ್ಕಿಯೊ೦ದು ತಿಳಿಯ ಹೇಳಿತು.

ಸಿ.ಹೆಚ್.ಸುಶೀಲೇ೦ದ್ರ ರಾವ್
                                        ಬ್ರಾಮ್ಹಾಲ್.ಚಷೈರ್