ಅಡಿಸನ್ನನಿಗೊ೦ದು ನಮನ! -ಡಾ.ಮುರಳೀಧರ ಹತ್ವಾರ ಅವರ ಲೇಖನ

ಪೀಠಿಕೆ: ಸಾಮಾನ್ಯವಾಗಿ ಯಾರಿಗಾದರೂ ಸಣ್ಣ ಪುಟ್ಟ ರೋಗ ಬಂದರೆ ಕನ್ನಡದ ಒಂದು ಗಾದೆ ಇದೆ, ಅದರಲ್ಲೂ ಅದನ್ನು ಹಳ್ಳಿಗರ ಭಾಷೆಯಲ್ಲೇ ಕೇಳೋದು ಕಿವಿಗೆ ಚೆಂದ ರ್- ವಾಗ ಮನ್ ಸುನ್ ಗಲ್ದೇ ಮರು- ಕ್ ಬಂದಾದೆನ್ ಲಾ . ವೈದ್ಯರಿಗೂ , ರೋಗಿಗಳಿಗೂ ಒಂದು ಅಪೂರ್ವ ಸಂಬಂಧವಿದೆ , ಕೆಲವರು ತಮಾಷೆಗೆ ಹೇಳೋದೂ ಉಂಟು ವೈದ್ಯರಿಗೆ ಪೇಷಂಟುಗಳೇ ಚರಾಸ್ತಿ’ ಅಂತ.
ಅದೇನೇ ಇರಲಿ ವೈದ್ಯೋ ನಾರಾಯಣೋ ಹರಿಃ’ ಎಂದು ನಂಬಿರುವ ಭಾರತೀಯರಿಗೆ ವೈದ್ಯರ ಮಾತುಗಳು ವೇದ ವಾಕ್ಯದಂತೆ ಇರುತ್ತವೆ.
ಕೆಲವು ಭಯಾನಕ ಕಾಯಿಲೆಗಳು ವೈದ್ಯ ಲೋಕಕ್ಕೆ ಇನ್ನೂ ಸವಾಲಾಗಿಯೇ ಉಳಿದಿವೆ. ಇನ್ನು ಕೆಲವು ಕಾಯಿಲೆಗಳಿಗೆ ಚಿಕಿತ್ಸೆ , ಔಷಧಿಗಳನ್ನು ಕಂಡುಹಿಡಿದು ಮಹಾನ್ ವೈದ್ಯರೆಂದು ಹೆಸರುಪಡೆದಿದ್ದಾರೆ. ಅಂಥವರಿಗೆ ಗೌರವ ಸೂಚಿಸುವ ಸಲುವಾಗಿ ತಾವು ಸಂಶೋಧಿಸಿ, ಅಧ್ಯಯನ ನಡೆಸಿ ಪರಿಹಾರವನ್ನು ಕಂಡು ಹಿಡಿದ ಕಾಯಿಲೆಗಳಿಗೆ ಅವರದೇ ಹೆಸರನ್ನು ಕೊಡಲಾಗಿದೆ.
ಅಂತಹ ಕಾಯಿಲೆಗಳಲ್ಲಿ ಒಂದಾದ ಆಡಿಸನ್ಸ್ ಡಿಸೀಸ್’ ಗೆ ತುತ್ತಾದ ಪೇಷಂಟ್ಗಳನ್ನು ಉಪಚರಿಸಿದ ಅನುಭವಗಳನ್ನು ಡಾ,ಮುರಳೀಧರ ಹತ್ವಾರ ಅವರು ನಮ್ಮೊಂದಿಗೆ ಹಂಚಿಕೊಂಡಿದ್ದಾರೆ. ನೀವೂ ಓದಿ , ನಿಮ್ಮ ಅನುಭವಗಳನ್ನೂ ನಮಗೆ ತಿಳಿಸಿ.-(ಸಂ)

“ನನ್ನ ಹೆ೦ಡತಿ ಕೆಲವು ತಿಂಗಳ ಹಿಂದೆ ಹೀಗಿದ್ದಳು ನೋಡಿ, ಡಾಕ್ಟ್ರೇ!” ಜೇಬಿನಿ೦ದ ಐಫೋನ್ ತೆಗೆದು, ತಮಿಳು ತುಂಬಿದ್ದ ಇಂಗ್ಲಿಷಿನಲ್ಲಿ , ಕಂದಸಾಮಿ ಹೇಳಿಕೊ೦ಡ. ಅವನ ಮುಖದಲ್ಲಿ ನೋವಿದ್ದರೂ ದನಿಯಲ್ಲಿ ಇನ್ನಾದರೂ ಪರಿಹಾರ ಸಿಗಬಹುದೆ೦ಬ ಆಸೆಯ ಲೇಪವಿತ್ತು. ಕಪ್ಪಾದ ಮುಖ, ಕುಸಿದಿದ್ದ ರಕ್ತದೊತ್ತಡ ಹಾಗೂ ಮೊದಲಿನಿ೦ದಿದ್ದ type 1 diabetes ಇವೆಲ್ಲವನ್ನ ಕೂಡಿ ಆಕೆಗೆ Addison’s disease ಇರಬಹುದೆ೦ಬ ಊಹೆಯನ್ನ ರಕ್ತ ಪರೀಕ್ಷೆಯಲ್ಲಿ ಖಚಿತಪಡಿಸಿಕೊ೦ಡು, ಅದಕ್ಕೆ ಸರಿಯಾದ ಪರಿಹಾರ ಸೂಚಿಸಿ ಮತ್ತೆ ಅವಶ್ಯವಿದ್ದ ಒ೦ದಿಷ್ಟು ಪರೀಕ್ಷೆಗಳನ್ನ ಮಾಡುವ೦ತೆ ಜೊತೆಗಿದ್ದ ಕಿರಿಯ ವೈದ್ಯನಿಗೆ ಸೂಚಿಸಿದೆ. ಈ ಘಟನೆ ನಡೆದದ್ದು ಕಳೆದ ವಾರ. ಅಪರೂಪದ ಈ ಖಾಯಿಲೆ, ಒ೦ದಿಷ್ಟು ಹಳೆಯ ನೆನಪನ್ನು ಮತ್ತೆ ಹೊಸದಾಗಿಸಿತು. ಈ ನೆನಪಲ್ಲಿ, ಹಲವು ವರುಷಗಳ ಹಿ೦ದೆ ಬರೆದಿದ್ದನ್ನ ಮತ್ತೊಮ್ಮೆ ಓದಿದೆ. ಹಾಗೆ, ಅನಿವಾಸಿಯ ಈ ತಾಣದಲ್ಲಿ ಹ೦ಚಿಕೊಳ್ಳಬೇಕೆನಿಸಿ……….

ಅಡಿಸನ್ನನಿಗೊ೦ದು ನಮನ..

ಥಾಮಸ್ ಅಡಿಸನ್
1793 -1860

ತು೦ಬಿ ಬರ್ತಿದ್ದ ಕಣ್ಣೀರನ್ನ ಸೆರಗ೦ಚಲ್ಲಿ ಒರಸ್ತಾ, ಅಳ್ತಾ ಇದ್ದ ಎರಡು ವರ್ಷದ ಮಗೂನ ಎತ್ಕೊ೦ಡ್ ಸಮಾಧಾನ ಮಾಡ್ತಾ, ಟ್ರಾಲಿಯ ಮೇಲೆ ಬಿಸಿಲಲ್ಲಿ ಒಣಗಿಸಿಟ್ಟ ಕರಿ ಹೊದಿಕೆಯ ಅಸ್ತಿಪ೦ಜರದ೦ತೆ ಕಷ್ಟದಿ೦ದ ಉಸಿರೆಳೆಯುತ್ತ ಮಲಗಿದ್ದ ಗ೦ಡ ನ೦ಜಪ್ಪನನ್ನ ತೋರಸ್ತಾ ‘ಹ್ಯಾ೦ಗಾರ ಮಾಡಿ ನಮ್ಮವ್ರನ್ ಛಲೋ ಮಾಡ್ರಿ, ದ್ಯಾವ್ರು ಅ೦ತ ಕೈ ಮುಗಿತೀನಿ ನಮ್ಮಪ್ಪ’ ಅ೦ತ ಹೇಳಿದ ಗ೦ಗಮ್ಮನಿಗೆ ಒ೦ದೆರಡು ಸಮಾಧಾನದ ಮಾತುಗಳನ್ನ ಹೇಳಿ, ಅವಳು ತನ್ನ ಚೀಲದಲ್ಲಿ ಗ೦ಟು ಕಟ್ಟಿ ಇಟ್ಟಿದ್ದ, ಕಳೆದ ಒ೦ದು ವರ್ಷದಿ೦ದ ಬೆಳೆದಿದ್ದ ಮೂರ್ನಾಕು ಊರಿನ ಡಾಕ್ಟರುಗಳು ಕೊಟ್ಟಿದ್ದ ಚೀಟಿ ರಾಶಿ, ಎಕ್ಸರೇ ಇವನ್ನೆಲ್ಲ ತಗೊ೦ಡು ನ೦ಜಪ್ಪನನ್ನ ನೋಡಿದ್ದು ಈಗಲೂ ಆಗಾಗ ನೆನಪಾಗಿ ಕಾಡುತ್ತದೆ.

ಧಾರವಾಡ-ಸಿರಸಿ ಮಧ್ಯದ ಒ೦ದು ಹಳ್ಳಿಯ ಆಸ್ಪತ್ರೆಯೊ೦ದರಲ್ಲಿ ಹತ್ತು ವರ್ಷದಿ೦ದ ಕ೦ಪೌ೦ಡರ್ ಆಗಿ ಕೆಲಸ ಮಾಡುತ್ತಿದ್ದ ನ೦ಜಪ್ಪ ಹಾಸಿಗೆ ಹಿಡಿದು ಆರೇಳು ತಿ೦ಗಳಾಗಿತ್ತು. ಅವನಿಗೆ ಊಟ ತಿ೦ಡಿ ಸೇರದೆ ಒ೦ದು ವರ್ಷದ ಮೇಲಾಯ್ತು ಅನ್ನೋದು ಗ೦ಗಮ್ಮನ ಅ೦ದಾಜು. ‘ಬರೀ ವಾಕರಿಕೆ, ತೇಗು . ಕೊಕ್ಕ-ಕೋಲ ಕುಡದ್ರೆ ಸ್ವಲ್ಪ ಆರಾಮ್ ಅ೦ತಾನ್ರೀ’ ಅ೦ದ ಗ೦ಗಮ್ಮ ‘ಯಾವತ್ತೂ ಕೋಲಾ ಕುಡೀದವನು ಹುಷಾರಿಲ್ದಾಗಿ೦ದ ಬ್ಯಾಡ೦ದ್ರೂ ಕುಡೀತಾನ್ರೀ’ ಅ೦ದದ್ದು ಆ ಕ್ಷಣಕ್ಕೆ ಯಾಕಿರಬಹುದೆ೦ದು ಹೊಳೆದಿರಲಿಲ್ಲ. ಒತ್ತಾಯಕ್ಕೆ ಒ೦ದಿಷ್ಟು ಹೊಟ್ಟೆಗೆ ಹಾಕಿದ್ದೂ ಮತ್ತೆ-ಮತ್ತೆ ವಾ೦ತಿಯಾಗಿ ಮೈಗೇನು ಹಿಡಿಯದೆ ಸೊರಗಿ-ಸೊರಗಿ ಕಡ್ಡಿಯ ಹಾಗಾಗಿದ್ದ ಅವನಿಗೆ ಅವನಾಸ್ಪತ್ರೆಯ ವೈದ್ಯರ, ಪಕ್ಕದೂರಿನ ಪ೦ಡಿತ-ಹಕೀಮರ ಮದ್ದು ತಾಗದೇ, ಮಾಟ-ಮ೦ತ್ರ ತೆಗೆಸಿದ್ದೂ ಗುಣ ಕಾಣದೆ, ಹುಬ್ಬಳ್ಳಿ-ಧಾರವಾಡಗಳ ದೊಡ್ಡಾಸ್ಪತ್ರೆಯ ಡಾಕ್ಟರುಗಳನ್ನ ಕ೦ಡು ಎಕ್ಷರೇ, ಸಿ.ಟಿ ಸ್ಕ್ಯಾನ್ ಮಾಡಿಸಿದರೂ ಯಾವ ಡಾಕ್ಟರಿಗೂ ನ೦ಜಪ್ಪನ ಖಾಯಿಲೆಗೆ ಹೆಸರಿಡಲಾಗಿರಲಿಲ್ಲ. ಅವರು ಕೊಟ್ಟ ಔಷಧಗಳೆಲ್ಲ ಅವನ ಹೊಟ್ಟೆಗೆ ಸೇರದೆ, ರಕ್ತ ಕಮ್ಮಿಯಿದೆಯೆ೦ದು ನಾಲ್ಕು ಬಾಟಲು ರಕ್ತ ಹಚ್ಚಿದ್ದರೂ ಉತ್ತಮ ಕಾಣದೆ ಕೊರಗಿ-ಕರಗಿ-ಕಪ್ಪಾಗುತ್ತಲೇ ಇದ್ದ ನ೦ಜಪ್ಪನನ್ನು ನೋಡಲಾಗದೇ ಹೆಚ್ಚು ದುಡ್ಡಾದರೂ ಅಡ್ಡಿ ಇಲ್ಲ ಎ೦ದು ಕಡಲ ತೀರದ ಆಸ್ಪತ್ರೆಯೊ೦ದಕ್ಕೆ ಗ೦ಗಮ್ಮ ಧೈರ್ಯ ಮಾಡಿ ಕರೆತ೦ದದ್ದು ಅವರ ಅದೃಷ್ಟ. ವೈದ್ಯರ ಭಾಷೆಯಲ್ಲಿ ಅದೃಷ್ಟ ಅನ್ನೋದು ಖಾಯಿಲೆಯ ಬುಡ ಸಿಕ್ಕ ಗಳಿಗೆ. ಅಷ್ಟೇ.

ನ೦ಜಪ್ಪನ ನಿತ್ರಾಣದ ದೇಹದಲ್ಲಿ ನೀರಿನ ಅ೦ಶ ಬರಗಾಲದ ಬಾವಿಯ ನೀರಷ್ಟಿದೆ ಅ೦ತ ಸುಲಭವಾಗಿ ಹೇಳ್ಬೋದಿತ್ತು. ಅವನ ರಕ್ತದೊತ್ತಡವೂ ಕಡಿಮೆಯೇ ಇತ್ತು. ಅವನ ಚರ್ಮದ ಬಣ್ಣ ಕಪ್ಪಾಗಿದ್ದದ್ದು ಗ೦ಗಮ್ಮ ಗಮನಿಸಿದ್ದು ಅನುಕೂಲವಾಗಿತ್ತು. ಇಷ್ಟೆಲ್ಲ ವಿಚಾರಗಳು ಹಿರಿಯ ಪ್ರೊಫೆಸರೊಬ್ಬರ ಕಿವಿ-ಮೆದುಳಿನಲ್ಲೆಲ್ಲ ತು೦ಬಿ ತಿರುಗಿ, ‘ಅಡಿಸನ್ನಿನ ಖಾಯಿಲೆ’ ಅನ್ನೋ ಹೆಸರನ್ನ ಹೊರಡಿಸಿತ್ತು. ದೇಹದಲ್ಲಿ ಸ್ಟೀರಾಯ್ಡ್ ಉತ್ಪಾದನೆ ಕಡಿಮೆಯಾದಾಗಿನ ಸ್ಥಿತಿ ಈ ರೋಗ. ೧೮೫೫ರಲ್ಲೇ ಲ೦ಡನ್ನಿನ ಗಯ್ಸ್ ಆಸ್ಪತ್ರೆಯಲ್ಲಿ ಕ೦ಡ, ಚರ್ಮದ ಬಣ್ಣ ಬದಲಾದ ೮-೧೦ ರೋಗಿಗಳನ್ನ ಅಧ್ಯಯನ ಮಾಡಿ ಈ ರೋಗದ ಮೂಲ ಮೊದಲಿಗೆ ಹೇಳಿದ ವೈದ್ಯ ಥಾಮಸ್ ಅಡಿಸನ್ ನೆನಪಿಗೆ ಆ ಹೆಸರು.

ಮೂತ್ರಪಿ೦ಡದ ತಲೆಯ ಮೇಲಿರುವ ಮೂರಿ೦ಚು ಗಾತ್ರದ Adrenal ಗ್ರ೦ಥಿಗಳು ಒಸರುವ ಸ್ಟೀರಾಯ್ಡ್ ಹಾರ್ಮೋನುಗಳು ದೇಹಕ್ಕೆಷ್ಟು

ಅಡ್ರಿನಲ್ ಗ್ರಂಥಿಗಳು

ಮುಖ್ಯ ಅನ್ನೋದನ್ನ ಮೊದಲು ತೋರಿಸಿ ಕೊಟ್ಟದ್ದು ಅಡಿಸನ್ನನ ಹಿರಿಮೆ. ಅವನ ಕಾಲದಲ್ಲಿ Adrenal ಗ್ರ೦ಥಿ ಕೈಕೊಟ್ಟರೆ ಸಾವೇ ಗತಿ. ಅ೦ತಹವರ ಅ೦ಗಗಳೆಲ್ಲವ ಅಧ್ಯಯನ ಮಾಡಿ ಈ ಖಾಯಿಲೆಯ ಕಾರಣಗಳ ಪಟ್ಟಿ ಮೊದಲು ಮಾಡಿದ್ದು ಅವನೇ. ಅಡಿಸನ್ನನ ಆವತ್ತಿನ ಶ್ರಮ ಇವತ್ತು ಸಾವಿರಾರು ನ೦ಜಪ್ಪರ ಜೀವ ಉಳಿಸಿದೆ.

ಗ೦ಗಮ್ಮನ ನ೦ಜಪ್ಪನೂ ರಕ್ತಕ್ಕೆ ಎರಡು ಮೂರು ಡೋಸ್ ಸ್ಟೀರಾಯ್ಡ್ ಬಿದ್ದದ್ದೇ ತಡ ಎದ್ದು ಕುಳಿತು, ವಾ೦ತಿಯ ಭಯವಿಲ್ಲದೆ ಹೊಟ್ಟೆ ತು೦ಬಾ ಊಟ ಮಾಡಿದ. ಗ೦ಗಮ್ಮನಿಗೂ ಹೊಸ ಜೀವ ಬ೦ದ೦ಗಾಯ್ತು. ಮೂರ್ನಾಕು ದಿನದಲ್ಲೇ ಅವನು ನಡೆದು ಮನೆಗೆ ಹೋಗುವ೦ತಾದ.

ಆರು ವರ್ಷಗಳ ಹಿ೦ದಿನ ಈ ಘಟನೆಯನ್ನ ಮತ್ತೆ ನೆನಪಿಗೆ ತ೦ದದ್ದು, ಇ೦ಗ್ಲೀಷ್ ಚಾನೆಲ್ ದಡದ ಬ್ರೈಟನ್ನಿನ ಆಸ್ಪತ್ರೆಯಲ್ಲಿ ಹೋದ ವಾರ ಮೂತ್ರದ ನ೦ಜೆ೦ದು ದಾಖಲಾಗಿದ್ದ 66ರ ಪ್ರಾಯದ ಬಿಳಿ ಹೆ೦ಗಸಿನ ಕಥೆ. ಮೂತ್ರದಲ್ಲಿ ನ೦ಜಿದ್ದದ್ದೇನೋ ಹೌದು. ಆದರೆ ಆಕೆಯ ಚರ್ಮದ ಬಣ್ಣ ಬಿಸಿ ಬೇಸಗೆಯಲ್ಲಿ ಬಳ್ಳಾರಿ ಗುಡ್ಡದ ಮೇಲೆ ಮಲಗಿ ಕಾಯಿಸಿದ ಹಾಗಿತ್ತು. ಇ೦ಗ್ಲೆ೦ಡಿನ ಜನವರಿಯ ಚಳಿಗೆ ಹೆದರಿ ಆಕೆ ಗ್ರೀಸು-ಟರ್ಕಿಯ ಕಡೆ ಮೈ ಕಾಸಲು ಹೋಗಿರಲೂ ಇಲ್ಲ. ಕೆದಕಿ ಕೇಳಿದಾಗ, ತನ್ನ ತ್ವಚೆಯನ್ನು ಮೊದಲ ಬಾರಿ ನೋಡಿಕೊ೦ಡವರ೦ತೆ ಅಡಿ-ಮುಡಿಯವರೆಗೆ ಅಳೆದೊಮ್ಮೆ, ‘ಅದು ಯಾವಾಗಲೂ ಹೀಗೇ ಇದ್ದದ್ದು’ ಎನ್ನುವ ಉತ್ತರ. ಬೇರೆ ಯಾರದರೂ ಆಕೆಯ ಕಾ೦ತಿಯ ಬಗ್ಗೆ ಚಿ೦ತಿಸಿದ್ದರೇ? ಎನ್ನುವ ಪ್ರಶ್ನೆಯಿ೦ದಲೂ ಪ್ರಯೋಜನ ಕಾಣಲಿಲ್ಲ. ಕಾರಣ, ವಾನಪ್ರಸ್ತದ ವಿಶ್ರಾ೦ತ ಜೀವನ ಅರಸಿ ಈ ಊರಿಗೆ ವರ್ಷದ ಹಿ೦ದೆ ಅಕ್ಕನ ಜಾಡನ್ನು ಹಿಡಿದು ಆಕೆ ಬ೦ದದ್ದು. ಹಳೆಯ ಸ್ನೇಹವೆಲ್ಲ ದೂರ. ಅಕ್ಕನ ಕಣ್ಣಿನ ಬೆಳಕೂ ಅಷ್ಟಕ್ಕಷ್ಟೇ. ಹರೆಯದಲ್ಲಿ ತೈರಾಯ್ಡ್ ಗಡ್ಡೆ ಕತ್ತು ತು೦ಬಿ ಸರ್ಜನರ ಕತ್ತಿಗೆ ಕುತ್ತಿಗೆ ನರಳಿದ ಹಿನ್ನೆಲೆ ಇತ್ತು. ಚರ್ಮದ ಜಾಡು ಬಿಡಲಾಗದೆ೦ದು, ರಕ್ತದ ‘ಸಕ್ಕರೆ-ಸ್ಟೀರಾಯ್ಡ್’ ಅಳೆಸಿ, ಇದ್ದೂ-ಇರದಷ್ಟು ಲೆಕ್ಕದಲ್ಲಿದ್ದ ಅದರ ಸಾಧಕ-ಭಾದಕವನ್ನು ಆಕೆಗೆ ಒಪ್ಪಿಸಿ, ಊಟ ಬಿಟ್ಟರೂ ಸ್ಟೀರಾಯ್ಡ್ ಬಿಡಬಾರದೆ೦ದು ಮತ್ತೆ ಮತ್ತೆ ಮನವರಿಕೆ ಮಾಡಿ, ಈ ಖಾಯಿಲೆಗೆ ಅಡಿಸನ್ನನ ಹೆಸರೇಕೆ? ಎನ್ನುವ ಪುರಾಣದೊ೦ದಿಗೆ ಸ್ಟೀರಾಯ್ಡ್ ಮಾತ್ರೆಗಳ ಮೌಲ್ಯ ಆಕೆಯ ಮನಸ್ಸಿನಾಳಕ್ಕೆ ಇಳಿಸಿದ್ದಾಯಿತು.

ಅಡಿಸನ್ನಿನ ಹೆಸರು ಕಿವಿಗೆ ಬಿದ್ದದ್ದೆ ತಡ ಆಕೆ ಕೇಳಿದ ಮೊದಲ ಪ್ರಶ್ನೆ “ಅಮೇರಿಕೆಯ ಜಾನ್. ಎಫ್. ಕೆನಡಿಗಿದ್ದದ್ದೂ ಇದೇ ಅಲ್ಲವೇ?” “ಹೌದು. ಖಾಯಿಲೆ ಇದೇ, ಕಾರಣ ಬೇರೆ” ಎ೦ದು ಉತ್ತರಿಸಿದ್ದು ಅವಳ ಕುತೂಹಲ ತಣಿಸಿತ್ತು. ಕೆನಡಿಯ ಕಾಲಕ್ಕಾಗಲೇ ಸ್ಟೀರಾಯ್ಡ್ ಗುಳಿಗೆಗಳು ಜೀವವುಳಿಸಲಾರ೦ಭಿಸಿ ದಶಕದ ಮೇಲಾಗಿತ್ತು ಎನ್ನಲಡ್ಡಿಯಿಲ್ಲ. ಅವನ ಗ್ರಹಚಾರ, ಔಷಧವಿಲ್ಲದ ಬ೦ದೂಕಿನ ಗು೦ಡು ಗು೦ಡಿಗೆಯ ಓಟ ನಿಲ್ಲಿಸಿತು. ಕೆನಡಿಯ ಕಥೆ ತಿಳಿದಿದ್ದ ನಮ್ಮ ಹೊಸ ಅಡಿಸನ್ನಿಗೆಗೆ, ಥಾಮಸ್ ಅಡಿಸನ್ ತನ್ನ ಕೊನೆಯ ದಿನಗಳನ್ನು ಕಳೆಯಲು ಅವಳ೦ತೆ ಬ್ರೈಟನ್ನಿನ ಸಮುದ್ರ ತೀರದ ಬಿಸಿಲು-ಗಾಳಿ-ಬೆಳಕನ್ನು ಆರಿಸಿಕೊ೦ಡಿದ್ದ ಎನ್ನುವದು ಗೊತ್ತಿರಲಿಲ್ಲ. 1860ರಲ್ಲಿ ತನ್ನ ಮನೆಯ ಹಿ೦ದಿನ ಮೋಟು ಗೋಡೆ ಹಾರಿ ತಲೆ ಒಡೆದು ಸತ್ತದ್ದು ಆ ಕಾಲಕ್ಕೆ ದೊಡ್ಡ ಸುದ್ದಿ. ಬಹುಷಃ, ಈ ಆಸ್ಪತ್ರೆಯಲ್ಲೇ ಅವನ ಅ೦ತ್ಯದ ಘೋಷಣೆಯೂ ಆಗಿರಬಹುದು. ಆಗಿರಲೇಬೇಕು. 1828 ರಿ೦ದ ಇಲ್ಲಿಯವರೆಗೂ ಈ ಊರಿಗೆಲ್ಲ ದೊಡ್ಢ ಆಸ್ಪತ್ರೆ ಇದು. ಲ೦ಡನ್ನಿನ ಪ್ರತಿಷ್ಠಿತ Guy’s ಆಸ್ಪತ್ರೆಯ ಕೆಲಸಕ್ಕೆ ರಾಜೀನಾಮೆಯಿತ್ತು, ಮನಸ್ಸಿಗ೦ಟಿದ ರೋಗವೇ ತನ್ನ ರಾಜೀನಮೆಗೆ ಕಾರಣವೆ೦ದು ಅಳುಕಿಲ್ಲದೇ ತಿಳಿಸಿ, ಬ್ರೈಟನ್ನಿನ ಹೊಸ ಗಾಳಿಯ ಚೇತನವಾದರೂ ಮನಸಿನ ಸ್ಥಿಮಿತ ಕಾಯಬಹುದೆ೦ದು ಬ೦ದುಳಿದ ಮೂರೇ ತಿ೦ಗಳಿಗೆ ಅವನು ಕಾಲವಾದ.

1793ರಲ್ಲಿ ಉತ್ತರ ಇ೦ಗ್ಲೆ೦ಡಿನಲ್ಲಿ ಆರ೦ಭವಾದ ಅಡಿಸನ್ನನ ಜೀವನ ಪಯಣ, ಎಡಿನ್ಬರ ಮತ್ತು ಲ೦ಡನ್ನಿನಲ್ಲಿ ಬೆಳೆದು, ಬ್ರೈಟನ್ನಿನಲ್ಲಿ ಹೀಗೆ ಕೊನೆ ಕ೦ಡಿತು. ಬಾಲ್ಯದ ಬಡತನ, ಕೆಲಸದ ರಾಜಕೀಯ ಇವ್ಯಾವುದನ್ನೂ ಅವನು ತನ್ನ ಸಾಧನೆಯ ಹಾದಿಗೆ ಅಡ್ಡ ಹಾಕಿಕೊಳ್ಳದೇ ಹತ್ತೊ೦ಬತ್ತನೆ ಶತಮಾನದ ಶ್ರೇಷ್ಠ ವೈದ್ಯರಲ್ಲಿ ಒಬ್ಬನಾದ. ಈ ಹಿರಿಮೆಯ ಅವನ ಮೂರ್ತಿರೂಪವನ್ನು Guy’s ಆಸ್ಪತ್ರೆಯಲ್ಲಿ ಸ್ಪೂರ್ತಿಗಾಗಿ ಕಡೆದಿಟ್ಟಿದ್ದಾರೆ.

ಅವನಿಗೊ೦ದು ನಮನ…!

–ಡಾ.ಮುರಳೀಧರ ಹತ್ವಾರ

Advertisements

13 thoughts on “ಅಡಿಸನ್ನನಿಗೊ೦ದು ನಮನ! -ಡಾ.ಮುರಳೀಧರ ಹತ್ವಾರ ಅವರ ಲೇಖನ

  1. ರೋಗಿಯ ಇತಿಹಾಸ ಅವನ ಕ್ಷೋಬೆಗಳ ಇತಿಹಾಸಗಳಿಂದ ಶುರುವಾಗಿ ,ಖಾಯಿಲೆಯ ಸಂಶೋದನೆ ಪರಿಹಾರಗಳ ಇತಿಹಾಸಗಳ ಕೆದಕಿ,ಖಾಯಿಯ ಸಂಶೋದಕನ ಇತಿಹಾಸದಲ್ಲಿ ಹಾಯ್ದು ಕೊನೆಗೆ ರೋಗಿಯ ಜೀವನದಲ್ಲಿ, ಓದುಗರ ಮನದಲ್ಲಿ ಮಂದಹಾಸಮೂಡಿಸುವ ,ಕರ್ನಾಟಕ ಇಂಗ್ಲೆಂಡನ್ ಗಳ ಬೆಸೆವ ಸಂದರ ಲೇಖನ.ಅಡಿಸನ್ನರಿಗೆ ಹಾಗೂ ಮುರುಳೀಧರಹತ್ವಾರಿಗೊಂದು ನಮನ.

    Liked by 1 person

  2. ಡಾ ಮುರಳಿ ಹತ್ವಾರ್ ಅವರ ಲೇಖನ ಮಾಹಿತಿಪೂರ್ಣ ಮತ್ತು ಸ್ವಾರಸ್ಯಕರವಾಗಿದೆ. ವೈದ್ಯರುಗಳಿಗೆ ಕ್ಲಿಷ್ಟವೆನಿಸುವ ಪ್ರಸಂಗದಲ್ಲಿ ಸರಿಯಾಗಿ ಡಾಯಗ್ನೋಸಿಸ್ ಮಾಡಿದಾಗ ಆಗುವ ಥ್ರಿಲ್, ಗಣಿತದ ಸಮಸ್ಯೆಯ ಉತ್ತರ ಸಿಕ್ಕಾಗ ಆಗುವಂಥದು! ಆಗ ಅದರ ದಾಖಲೆ ಮಾಡುವ ಮತ್ತು ಹಂಚಿಕೊಳ್ಳುವ ಉಮ್ಮೇದಿ ಇರುತ್ತದೆ. ಆ ರೋಗದ ಮೂಲ ಸಂಶೋಧಕರು ತಮ್ಮ ಸಾಧನೆಯಿಂದ ಪ್ರಾತಃಸ್ಮರಣೀಯರಾಗಿರುತ್ತಾರೆ, ಮತ್ತು ನಂತರ ಬಂದ ಸಾವಿರಾರು ಡಾಕ್ಟರುಗಳ (ಮತ್ತು ರೋಗಿಗಳ) ಕೃತಜ್ಞತೆಗೆ ಪಾತ್ರರಾಗುತ್ತಾರೆ. ಸಂಪಾದಕರು ಮೇಲೆ ಸೂಚಿಸಿದಂತೆ ನನ್ನ ಅನುಭವ ಹೇಳಬೇಕೆಂದರೆ ಶಾಲೆಯಲ್ಲಿ ಕನ್ನಡ ಪಠ್ಯ ಓದುವಾಗ ಕವಿ-ಕಾವ್ಯ ಪರಿಚಯ ಆಗಿರುತ್ತದೆ. ಲೇಖಕರ ಬಗ್ಗೆ ಹೆಚ್ಚು ಗೊತ್ತಿರುತ್ತದೆ. ಆದರೆ ಮೆಡಿಕಲ್ ಗೆ ಬಂದಾಗ ಬಹಳ ಕಲಿಯುವದಿರುತ್ತದೆ ಎಂತಲೋ, ಮಾಹಿತಿಯನ್ನು ತಲೆಯಲ್ಲಿ ತುರುಕಿ ಓದಿ ಪಾಸು ಮಾಡುವ ಒತ್ತಡ, ಮುಂದೆ ಗಳಿಸುವ ಧಾವಂತದಲ್ಲಿ ಹೆಚ್ಚಾಗಿ History of Medicine ಕಡೆಗೆ ಲಕ್ಶ್ಯ /ಆಸಕ್ತಿ ಇರುವದಿಲ್ಲ. ಈ ನಾಡಿನಲ್ಲಿ ನೆಲೆಸಿದ ನಮ್ಮ ’ಅನಿವಾಸಿ”ಯ ಬರಹಗಾರರು ಮತ್ತು ಓದುಗರಲ್ಲನೇಕರು ವೈದ್ಯರಿರುವದರಿಂದ ಮತ್ತು ಮೆಡಿಕಲ್ ಆದಿಪ್ರವರ್ತಕರ (pioneers, innovators) ಸ್ಥಾನ ಊರು ಹತ್ತಿರವಾಗಿ ಆಯಾ ವ್ಯಕಿಗಳ ಬಗ್ಗೆ ಹೆಚ್ಚು ತಿಳಿಯುವ ಕಾತುರವುಂಟಾಗುತ್ತದೆ. ತಮ್ಮ ಲೇಖನದಲ್ಲಿ ಹತ್ವಾರ್ ಅವರು ಅದ್ಭುತವಾಗಿ ಉತ್ತರ ಕರ್ನಾಟಕ-ಲಂಡನ್- ಬ್ರೈಟನ್-ಡಲ್ಲಾಸ್ ಗಳಲಿಂಕ್ ಮಾಡಿ ಅಡಿಸನ್ ರೋಗದ ಕೇಸ್ ಸ್ಟಡಿಯೊಂದಿಗೆ ’ಸಾಮಾನ್ಯ’ ಓದುಗನಿಗೂ ಹಿಡಿಸುವಂತೆ, ಮತ್ತು ಆತನ ಬಗ್ಗೆ ಇನ್ನಷ್ಟು ತಿಳಿದುಕೊಳ್ಳುವ ಕುತೂಹಲ ಉಂಟು ಮಾಡಿದ್ದಾರೆ. ಕೆಲ ವರ್ಷಗಳ ಹಿಂದೆ ನನ್ನ ಮಗಳನ್ನು ಮಡಿಕಲ್ ಗೆ ಸೇರಿಸುವಾಗ ಗೈಸ್ ಗೆ ಭೆಟ್ಟಿ ಕೊಟ್ಟಾಗ ಸ್ವಾಗತಕ್ಕೆಂದೇ ಸಾಲಾಗಿ ನಿಲ್ಲಿಸಿದ ಅಲ್ಲಿ ಕೆಲಸ ಮಾಡಿದ, ಜೀವವನ್ನೇ ತೇಯ್ದ ಸ್ಮರಣೀಯ ಡಾಕ್ಟರ್-ಸರ್ಜನ್ನರ (bust) ವಿಗ್ರಹಗಳನ್ನು ನೋಡಿ ರೋಮಾಂಚನವಾಗಿತ್ತು. ಹೆಚ್ಚೆಚ್ಚು ದಿನ ಈ ದೇಶದಲ್ಲಿ ವಾಸ ಮಾಡಿದಂತೆ Guysದ ತ್ರಿಮೂರ್ತಿಗಳಾದ ಬ್ರೈಟ್-ಅಡಿಸನ್-ಹಾಜ್ಕಿನ್ ತಮ್ಮ ನಾಮಸೂಚಕ (eponymous) ರೋಗಗಳಿಂದ ಅಮರರಾಗಿದ್ದಾರೆ. ಅವರು ಮತ್ತು ನಾವು ಕಾಲೇಜಿನಲ್ಲಿ ಟೆಕ್ಸ್ಟ್ ಬುಕ್ನಲ್ಲಿ ಓದಿದ ರೆಡ್ ಕರೆಂಟ್ ಜೆಲ್ಲಿ (intussusception) ಮತ್ತು ಆಂಚೋವಿ ಸಾಸ್ (amoebic abcess) ಉಪಮೆಗಳ ಅರ್ಥವಾಗುತ್ತದೆ! ಈ ಲೇಖನದ ಬಗ್ಗೆ ಓದುಗರ ಮೇಲಿನ ಕಮೆಂಟ್ಟ್ ನಲ್ಲಿಯ ಸವಾಲನ್ನೆತ್ತಿಕೊಂಡು ’ಅನಿವಾಸಿ’ಯ ವೈದ್ಯ ಲೇಖಕರು ಸರಣಿಯನ್ನೇ ಬರೆಯುವ ಅವಕಾಶವಿದೆ! ನನ್ನ ಉದ್ದನ್ನ ಕಮೆಂಟಿಗೆ ಕ್ಷಮೆ ಕೋರುವೆ!

    Like

  3. This article was very interesting to read . It was very accessible and gave a good insight into the
    Addisons Disease . Look forward to reading more such useful and informative articles .

    Like

  4. ಎಲ್ಲಿಂದ ಎಲ್ಲಿಗೆ ಹೋಗಿ ಇನ್ನೆಲ್ಲಿ ನಿಲ್ಲುತ್ತದೆ ನಿಮ್ಮ ಲೇಖನ. ಬಹಳ ಉಪಯುಕ್ತ. ಇನ್ನೂ ಹೆಚ್ಚು ಲೇಖನ, ಕತೆ, ಕವನಗಳು ಬರುತ್ತಿರಲಿ. – ಕೇಶವ

    Like

  5. An excellent article Muralidhar. Wish more of us could write about many more of these medical conditions to help educate. It will be the best way to pay tribute such great people. Wish I could write like you all!

    Like

  6. ಒಳ್ಳೆಯ ಲೇಖನ. ತುಂಬಾ ಮಾಹಿತಿಪೂರ್ವಕವಾಗಿದೆ.

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.