ಜಲಾಲ್ ಅಲ್-ದೀನ್ ಮುಹಮ್ಮದ್ ಬಲಖೀ ೧೩ ನೇ ಶತಮಾನದ ಸೂಫಿ ಸಂತ, ಕವಿ ಹಾಗೂ ಧರ್ಮಶಾಸ್ತ್ರಜ್ಞ . ರೂಮೀ ಎಂದೇ ಆತ ಚಿರಪರಿಚಿತ . ಇಂದಿನ ಅಫ್ಘಾನಿಸ್ಥಾನದ ಬಲ್ಖ್ ಎಂಬಲ್ಲಿ ಜನಿಸಿದ ರೂಮೀ, ಉಜ್ಹ್ಬೇಕಿಸ್ಥಾನದ ಸಮರ್ ಖಂಡದಲ್ಲಿ ಬೆಳೆಯುತ್ತಾನೆ . ತನ್ನ ತಂದೆಯಿಂದ ಧರ್ಮಶಾಸ್ತ್ರವನ್ನು ಅಭ್ಯಾಸ ಮಾಡುವಾಗ, ಮಂಗೋಲರ ದಾಳಿಯಿಂದ ತಪ್ಪಿಸಿಕೊಳ್ಳಲು ಪರಿವಾರದ ಸಮೇತ ಪರ್ಷಿಯಾಕ್ಕೆ ಬರುತ್ತಾನೆ . ಅಲ್ಲಿ ಅತ್ತರ್ ಹಾಗೂ ಶಮ್ಸ್ ತಬ್ರಿಝಿ ಎಂಬ ಫ಼ಾರ್ಸಿ ಭಾಷೆಯ ಕವಿಗಳಿಂದ ಪ್ರೇರೇಪಿತನಾದ ಎಂಬ ಹೇಳಿಕೆಯಿದೆ . ರೂಮೀ ತನ್ನ ಫ಼ಾರ್ಸಿ ಕವಿತೆಗಳಿಂದಲೇ ಹೆಸರುವಾಸಿ . ಸೂಫಿ ಪಂಥವು ಕಾವ್ಯ , ಸಂಗೀತ , ನೃತ್ಯ , ಪ್ರಯಾಣಗಳನ್ನು ದೈವತ್ವಕ್ಕೆ ಹಾದಿ ಎಂದು ನಂಬುತ್ತದೆ . ಇವನ್ನು ರೂಮೀಯ ಕವನಗಳಲ್ಲಿ ಕಾಣಬಹುದು . ಆತನ ಕವನಗಳಲ್ಲಿ ಜೀವನದಲ್ಲಿ ಎದುರಾಗುವ ಸವಾಲು, ಭಯಗಳನ್ನು ಎದುರಿಸುವ ವಿವರಗಳಿವೆ. ದುರ್ಬಲತೆಯಲ್ಲಿ ಬಲವನ್ನು ಕಾಣುವುದನ್ನು , ಪ್ರತಿಕೂಲ ಪರಿಸ್ಥಿತಿಯಲ್ಲಿ ವಿಕಸಿಸುವುದನ್ನು ಅನ್ವೇಷಿಸುವುದು ರೂಮೀಯ ವಿಶೇಷತೆ . ಆದ್ದರಿಂದಲೇ ಇಂದಿಗೂ ಆತ ಪ್ರಸ್ತುತನಾಗುತ್ತಾನೆ . ಈ ವಾರದ ಸಂಚಿಕೆಗೆ ರಾಧಿಕಾ ಜೋಷಿಯವರು ರೂಮೀಯ ಕವನದ ಭಾಷಾಂತರ ಮಾಡಿದ್ದಾರೆ . ಇದರಿಂದ ಪ್ರೇರೇಪಿತನಾಗಿ ಸಂಪಾದಕನೂ ಒಂದು ಚಿಕ್ಕ ಕವನದ ಭಾಷಾಂತರದ ಪ್ರಯತ್ನ ಮಾಡಿದ್ದಾನೆ . ಇವೆರಡನ್ನೂ ನಿಮ್ಮೆದುರಿಗೆ ಇಡುತ್ತಿದ್ದೇನೆ (ಎರಡೂ ಕವನಗಳ ಮೂಲ ಇಂಗ್ಲೀಷ್ ಕವನಗಳನ್ನೂ ಲಗತ್ತಿಸಲಾಗಿದೆ). ಕಳೆದ ವಾರ ಹನೀಫ್ ಅವರು ಆಧ್ಯಾತ್ಮಿಕ ಮೆರುಗಿನ ಕವನಗಳನ್ನು ಪ್ರಕಟಿಸಿದ್ದರು . ಓದುಗರು ಇವು ಸೂಫಿ ತತ್ವದಿಂದ ಸ್ಫೂರ್ತಿ ಪಡೆದಿರಬಹುದೇ ಎಂದು ಉದ್ಗರಿಸಿದ್ದನ್ನು ನೆನೆಯಬಹುದು. ಇಂದಿನ ಕವನಗಳು ಸೂಫಿ ಸಂತನ ಕಲಮಿನಿಂದಲೇ ಹೊಮ್ಮಿವೆ; ಮೂಲ ಕವನಕ್ಕೆ ನ್ಯಾಯ ಒದಗಿಸಿವೆಯೇ ಎಂಬುದು ಓದುಗರ ಜಿಜ್ಞಾಸೆಗೆ .

ಅನಿವಾಸಿಯ ದಶಮಾನೋತ್ಸವದಲ್ಲಿ ಬರಹಗಳು ಧ್ವನಿ ಮಾಧ್ಯಮದಲ್ಲೂ ಬಿಡುಗಡೆ ಮಾಡಿದರೆ , ಕೇಳುತ್ತ ಆನಂದಿಸಬಹುದು ; ಪ್ರಯಾಣ ಮಾಡುವಾಗಲೋ, ವಾಕಿಂಗ್ ಹೋಗುವಾಗಲೋ, ದೈನಂದಿನ ಕೆಲಸದ ಸಮಯದಲ್ಲೋ ಕೇಳಬಹುದು ಎಂಬ ಸಲಹೆ ಬಂದಿತ್ತು . ಆ ಸಲಹೆಯನ್ನು ಕಾರ್ಯರೂಪಕ್ಕೆ ತರುವ ಪ್ರಯತ್ನ ಇಂದಿನ ಸಂಚಿಕೆಯಲ್ಲಿ ಮಾಡಲಾಗಿದೆ. (ಪೋಡ್ಕಾಸ್ಟ್ ಕೇಳಲು ಕೆಳಗಿನ ಸೌಂಡ್ ಕ್ಲಾವುಡ್ ಕೊಂಡಿ ನೋಡಿರಿ). ಅನಿವಾಸಿಯ ಕೋಗಿಲೆ ಅಮಿತಾ ರವಿಕಿರಣ್ ಉತ್ಸಾಹದಿಂದ ಕವನಗಳನ್ನು ಓದಿದ್ದಾರೆ. ರೆಸಿಡೆಂಟ್ ಚಿತ್ರಕಾರ ಗುಡೂರ್ ತಮ್ಮ ಕುಂಚದ ಚಮತ್ಕಾರದಿಂದ ಸಂಚಿಕೆಯ ಅಂದ ಹೆಚ್ಚಿಸಿದ್ದಾರೆ . ಅವರಿಬ್ಬರಿಗೂ ಸಂಪಾದಕನ ಕೃತಜ್ಞತೆಗಳು .

**********************************************

ಆಡಿಯೋ ಕೇಳಲು Listen in browser ಮೇಲೆ ಒತ್ತಿರಿ ⬆️⬆️

ಅರಳುವ ಗುಲಾಬಿ ದಳಗಳು

'ದೇವರು  ಸೃಷ್ಟಿಸಿದ ಸುಂದರ ಸೂಕ್ಷ್ಮ ಈ ಮುಗ್ಧ ಗುಲಾಬಿಯ ಮೊಗ್ಗು 
ಈ ಮೊಗ್ಗಿನ ದಳವನ್ನು ಈ ನನ್ನ ನಯವಿಲ್ಲದ ಕೈಗಳಿಂದ ಹೇಗೆ ಅರಳಿಸಲಿ 

ನನ್ನಂತಹ ಅನರ್ಹನಿಗೆ ತಿಳಿಯದ ಈ ರಹಸ್ಯ 
ದೇವ ಎಷ್ಟು ಮೃದುವಾಗಿ ನಾಜೂಕಾಗಿ ಅರಳಿಸಿದ 
ಈ ಇನಿದಾದ ಹೂ, ನನ್ನ ಕರದಲ್ಲಿ ಬಾಡಿಹೋಗುತ್ತದೆ 

ಆ ಭಗವಂತನು  ಕಲ್ಪಿಸಿದ  ಗುಲಾಬಿಯ ಮೊಗ್ಗನ್ನು 
ನನ್ನಿಂದ ಅರಳಿಸಲಾಗಲಿಲ್ಲ 
ಈ ನನ್ನ ಜೀವನವನ್ನು ವಿಕಸಿತ ಗೊಳಿಸಲು 
ನನ್ನಲಿ ಯಾವ ವಿವೇಕವು ಇದೆ? 

ಅವನ ಮೇಲೆ ಭರವಸೆ ಇರಿಸಿ  ಅವನನ್ನೇ ಅರಿಸಿ 
ದಿನದ ಪ್ರತಿ ಕ್ಷಣವೂ ನಾನು ಅವನ ಮೊರೆ ಹೋಗುವೆ 
ಅವನ ದರ್ಶನದ  ಹಾದಿಯಲಿ ಈ ಯಾತ್ರಿಕನು 
ಅವನ ಮಾರ್ಗದರ್ಶನದಿಂದ ಪ್ರತಿ ಹೆಜ್ಜೆ ಇಡುವೆ

ಆ ದಿವ್ಯ ತೇಜಸ್ವಿಯೇ ಬಲ್ಲ!  ನನ್ನ ಮುಂದಿರುವ ಹಾದಿ 
ಸಾಗುತ್ತಿರುವೆ  ನಾನು ಅವನನ್ನೇ ನಂಬಿ  
ಆ ಮುಗ್ಧ ಗುಲಾಬಿಯ ಪ್ರತಿಯೊಂದು  ಪಕಳೆಯನ್ನು ಅರಳಿಸುವಂತೆ 
ನನ್ನ ಜೀವನದ ಪ್ರತಿಯೊಂದು ಕ್ಷಣವನ್ನು ಪದರುಪದರಾಗಿ ಮುಂದಿಡುತ್ತಾನೆ
ಎನ್ನುವ ಭರವಸೆ ನನ್ನಲಿದೆ 

- ರಾಧಿಕಾ ಜೋಷಿ

UNFOLDING  THE ROSE 🌷
It is only a tiny rosebud,
A flower of God's design;
But I cannot unfold the petals
With these clumsy hands of mine.

The secret of unfolding flowers
Is not known to such as I.
GOD opens this flower so sweetly,
When in my hands they fade and die. 🥀

If I cannot unfold a rosebud, 
This flower of God's design,
Then how can I think I have wisdom
To unfold this life of mine?

So I'll trust in Him for His leading
Each moment of every day.
I will look to Him for His guidance
Each step of the pilgrim way.

The pathway that lies before me,
Only my Heavenly Father knows.
I'll trust Him to unfold the moments,
Just as He unfolds the rose.

******************************************

ವಿವಾಹ

ಸಪ್ತಪದಿಗೆ  ಎಲ್ಲರ ಹಾರೈಕೆ ಇರಲಿ
ಬೆಲ್ಲ ಕಲೆತ ಹಾಲಾಗಲಿ 
ಮಧುವಾಗಲಿ, ಮೈಸೂರುಪಾಕಿನಂತಿರಲಿ  
ಫಲವನ್ನೂ, ನೆರಳನ್ನೂ ನೀಡಲಿ 
ಮಾವಿನ ಮರದಂತೆ 
ನಗುವಿನಲಿ ತೇಲಾಡಲಿ 
ಪ್ರತಿ ಕ್ಷಣ ಸ್ವರ್ಗಕ್ಕೆ ಕಿಚ್ಚಾಗಲಿ 
ಸಹಾನುಭೂತಿಯ ಸಂಕೇತವಾಗಲಿ 
ಎಂದಿಗೂ, ಎಂದೆಂದಿಗೂ ಆನಂದ ತುಳುಕಲಿ
ನ್ಯಾಯವಿರಲಿ, ಹೆಸರಾಗಲಿ 
ಚಂದಿರನ ಬರಮಾಡುವ ಶುಭ್ರ ನೀಲಾಕಾಶವಾಗಲಿ 
ಭಗವಂತನ ಸತ್ವ ಇಳಿವಂದವ 
ಬಣ್ಣಿಸಲು ಮಾತೇ ಮರೆವಂತಾಗಲಿ   

- ರಾಂ.

This Marriage

May these vows and this marriage be blessed.
May it be sweet milk,
this marriage, like wine and halvah.
May this marriage offer fruit and shade
like the date palm.
May this marriage be full of laughter,
our every day a day in paradise.
May this marriage be a sign of compassion,
a seal of happiness here and hereafter.
May this marriage have a fair face and a good name,
an omen as welcomes the moon in a clear blue sky.
I am out of words to describe
how spirit mingles in this marriage.

********************************************

ನಮಸ್ಕಾರ ಎಲ್ಲರಿಗೂ. 
ಇವತ್ತಿನ ಆವೃತ್ತಿಯಲ್ಲಿ ಅನಿವಾಸಿ ಭಾರತೀಯ ವೈದ್ಯ ಕವಿಗೋಷ್ಠಿಯ ಎರಡನೆಯ ಅಂತಿಮ ಭಾಗವಿದೆ. ಇಲ್ಲಿ ನಮ್ಮ ಅನಿವಾಸಿ ಗುಂಪಿನ ಇಬ್ಬರು ಕವಿಗಳ ಕವನಗಳೊಂದಿಗೆ, ಆಯೊಜಕರಾಗಿದ್ದ ಡಾ. ಗಡ್ಡಿ ದಿವಾಕರ ಹಾಗೂ ಡಾ. ವೀಣಾ ಎನ್ ಸುಳ್ಯ ಅವರ ರಚನೆಗಳೂ ಇವೆ. ಕಾರ್ಯಕ್ರಮವನ್ನು ಸುರಳೀತವಾಗಿ ನಡೆಸಿಕೊಡುವ ಜವಾಬ್ದಾರಿಯ ಜೊತೆಗೆ, ಎರಡು ಒಳ್ಳೆಯ ಕವನಗಳನ್ನು ಅಂದಿನ ಕಾರ್ಯಕ್ರಮದಲ್ಲಿ ಪ್ರಸ್ತುತ ಪಡಿಸಿದ್ದಕ್ಕೂ, ಅವನ್ನು ಅನಿವಾಸಿ ಬ್ಲಾಗಿನಲ್ಲಿ ಪ್ರಕಟಿಸಲು ಅನುಮತಿಸಿದ್ದಕ್ಕೂ ಡಾ. ದಿವಾಕರ ಹಾಗೂ ಡಾ. ಸುಳ್ಯ ಅವರಿಗೆ ನನ್ನ ಕೃತಜ್ಞತೆಗಳು.  
ಹೆಚ್ಚೇನೂ ಬರೆಯುವುದು ಬೇಕಿಲ್ಲ ಸಂಪಾದಕನಿಗೆ. ಮುಂದಿನ ಕೆಲಸ ನಿಮ್ಮದು, ಪ್ರಸ್ತುತಿಯನ್ನು ಓದಿ ನಿಮ್ಮ ಅನಿಸಿಕೆಗಳನ್ನು ತಿಳಿಸುವುದು. 
- ಲಕ್ಷ್ಮೀನಾರಾಯಣ ಗುಡೂರ (ವಾರದ ಸಂಪಾದಕ).

*********************************************************

ಉಡುಗೊರೆ

 

ಅಪ್ಪ-ಅಮ್ಮ ಮಾಡಿದ ಕೋಪ,ಮಾಸ್ತರರ ಬೆತ್ತ 

ಬಿಸಿಲಲ್ಲಿ ಅಜ್ಜಿ ಕೊಟ್ಟ ಮಜ್ಜಿಗೆ 

ಇಂದು ತುಪ್ಪಟ ಹಾಸಿದ ಹಾಸಿಗೆ 



ಜೊತೆಗಾರನ ತೋಳು, ಮಗುವಿನ ಮುಗ್ಧ ನಗು

ಗಟ್ಟಿ ಗೆಳೆಯರ ಪೊಗರು 

ಇದ್ದರೆ ಸಂಸಾರ ಹಗುರು



ಲಿಂಗ ಭೇದವಿಲ್ಲದ ಪ್ರೀತಿ, ಮತಭೇದವಿಲ್ಲದ ದೋಸ್ತಿ 

ವೀಸಾ ಹಮ್ಮಿಲ್ಲದೇ ಹಾರುವ ಹಕ್ಕಿಗಳ ವ್ಯಾಪ್ತಿ 

ಒರೆಯಿಡದೇ ಬೆರೆತ ತೃಪ್ತಿ 



ಸೋತು ಕಲಿತ ಪಾಠ, ಸ್ಪರ್ಧೆಯಿಲ್ಲದ ಓಟ 

ಹಸಿರೇ ಹರಿಯುವ ನೋಟ 

ಕೈಗೆಟುಕುವ ಹಣ್ಣಿನ ತೋಟ



ಬಕಾಸುರನಾಗದ ಬದುಕು, ಜಗ ಸುತ್ತಿ ಬರದ ಸರಕು 

ಪೋಲಾಗದ ನೀರು, ಹಂಚಿ ಕುಡಿದರೆ ಸಾರು 

ಉಳಿದೀತು ಬರಡಲ್ಲದ ನಾಡು 



ಗೀತೆ, ಬೈಬಲ್, ಕುರಾನ್, ಗ್ರಂಥ ಸಾಹಿಬ್ ಗಳ ಸಾರ 

ಬುದ್ಧ, ಶರಣರ ಉದ್ಗಾರ 

ಸಂತೃಪ್ತ ಜೀವನಕೆ ಆಧಾರ 



-ರಾಂ.

****************************

ನಲ್ಲೆಗೊಂದು ನಲ್ಮೆಯ ಕವನ



ರವಿವರ್ಮನ  ಕುಂಚದಲ್ಲಿ ಬಳಕಿರುವ ಬಾಲೆ ನೀನು 

ಕಾಳಿದಾಸನ ಕಲ್ಪನೆ ನೀನು 

ನಿನ್ನಂದವ ಬಣ್ಣಿಸಲೆನಗೆ ಈ ಜನ್ಮ ಸಾಲದಿನ್ನು 

ಮರು ಜನ್ಮ ಬಾರದೇನು?



ಬೇಲೂರಿನ ಶಿಲೆಗಳಲ್ಲಿ 

ಶಿಲ್ಪಿಗಳ ಕಲ್ಪನೆಯಲ್ಲಿ 

ಏನೋ ಒಂದು ಕೊರತೆ ಇತ್ತು

ಏನೋ ಒಂದು ಕೊರತೆ  ಇತ್ತು!!

ಬಾಲೆಯರ  ಸಾಲಿನಲ್ಲಿ ನಿನಗೂ 

ಒಂದು ಸ್ಥಳ ಬೇಕಿತ್ತು 



ಯಮುನಾ ನದಿ ತೀರದಲ್ಲಿ 

ಶಿಲ್ಪಿಗಳ ಮನಸಿನಲ್ಲಿ 

ಏನೋ ಒಂದು ಕೊರತೆ ಇತ್ತು

ಏನೋ ಒಂದು  ಕೊರತೆ ಇತ್ತು!!

ತಾಜಮಹಲಿನ  ಗೋಡೆಯ ಮೇಲೆ 

ನಿನ್ನ ಬಿಂಬಕೆ ಸ್ಥಳ ಬೇಕಿತ್ತು


- ಶಿವಶಂಕರ ಮೇಟಿ.

*********************************

ಸಪ್ತಸಾಗರದಾಚೆ



ಸಪ್ತಸಾಗರದಾಚೆ ಬದುಕು

ಅರಸಿ ವಲಸೆ ಹೋದವರು,

ಮಾಂಸಮಜ್ಜೆಗಳ

ತನುವಿಹುದಿಲ್ಲಿ 

ಮನವೆಲ್ಲ ತಾಯ್ನೆಲದಲ್ಲಿ!



ಹೆತ್ತವರು ಒಡಹುಟ್ಟಿದವರು

ಎಲ್ಲ ತಾಯ್ನೆಲದಲ್ಲಿ,

ನಿತ್ಯನಿರತರು ನಾವು

ಪರಕೀಯರಾಗಿ ಪರದೇಶದಲ್ಲಿ

ಜೋಳಿಗೆ ತುಂಬುವಲ್ಲಿ !



ಅಮ್ಮನ ಕೈತುತ್ತಿನ ಬಯಕೆ

ಅಪ್ಪನ ಸಾಂತ್ವಾನಕ್ಕೆ ಚಡಪಡಿಕೆ,

ಅಂಬೆಗಾಲಿಟ್ಟು ಆಡಿದ

ತಾಯ್ನಾಡು 

ಕೈಬೀಸಿ ಕರೆದಂತಿದೆ ನೋಡು!



ವಯಸ್ಸು ನಿರ್ದಾಕ್ಷಿಣ್ಯ

ಅಮ್ಮನಿಗೆ ಮಧುಮೇಹ

ಅಪ್ಪನಿಗೆ ವಯಸ್ಸಿನ ಕ್ಷಯ!

ನಾವು ಊರುಗೋಲಾಗದ ಸಂಧಿವಾತ

ಹಿತಸಾಂತ್ವಾನ ಕೇವಲ

ಬಾನುಲಿಗೆ ಸೀಮಿತ!



ಅಪ್ಪನ ಉಸಿರು ನಿದ್ದೆಯಲೆ ನಿಂತಂತೆ ದುಸ್ವಪ್ನ,

ಅಪರಾಧಿ ಭಾವದಲಿ 

ಮನ ಕನಸಲ್ಲೆ ಮಾಡಿದೆ ಕಾಲ್ಜಾರಿ 

ಬೀಳುವ ಅಮ್ಮನ ಹಿಡಿಯುವ ಯತ್ನ!



ಇದ್ದುಇಲ್ಲದ ಬದುಕು 

ಸಪ್ತಸಾಗರದಾಚೆ 

ಮುಟ್ಟಿದೆ ಸಾಗಿ,

ನಡೆದಿದೆ ಜೀವಚ್ಛವವಾಗಿ

ಹಾಗೆ ಸುಮ್ಮನೆ!



- ಡಾ॥ ಗಡ್ಡಿ ದಿವಾಕರ.

*****************************

ಭೋಗದಲಿ ಮುಳುಗದಿರಿ 



ಜಗದ ಬಯಕೆಯು ಜೀವ ತಳೆಯುತ

ಹುಟ್ಟಿ ಬಂದಿಹ ಮನುಜ ಕುಲಜರೆ

ಮರೆತು ಬಿಟ್ಟಿರೆ ಬಂದ ಕಜ್ಜವ ಮುಳುಗಿ ಭೋಗದಲಿ|

ತಂದೆ ತಾಯಿಯ ನೀತಿ ನಿಯಮದ

ಮಾತ ಕೇಳುತ ಬೆಳೆದು ಬಂದರೂ

ಎಲ್ಲಿ ಹೋಯಿತು ಸತ್ಯ ತ್ಯಾಗದ ಶಾಂತಿ ಮಂತ್ರವದು||



ಎಲ್ಲಿ ನೋಡಲು ಅಲ್ಲಿ ನಡೆಯುವ

ಮೋಸ ಜಾಲದ ಕುಟಿಲ ತಂತ್ರವ

ನೋಡು ನೋಡುತ ಶಿಥಿಲವಾಗಿದೆ ಮನದ ಭಾವಗಳು|

ಮನದ ಕಣ್ಣನು ಒಮ್ಮೆ ತೆರೆಯುತ

ನಡೆದು ಬಂದಿಹ ದಾರಿ ನೋಡಲು

ತಪ್ಪು ಸರಿಗಳ ಮುಸುಕು ಸರಿಯಲು ನಿಜವು ಕಾಣುವುದು||



- ಡಾ. ವೀಣಾ ಎನ್ ಸುಳ್ಯ

***********************************************************