ಸನ್ಮಿತ್ರ ಓದುಗರೇ !!!!
ಈ ವಾರದ ಸಂಚಿಕೆಯಲ್ಲಿ ಒಂದು ವಿಶೇಷ ಪ್ರೇಮ ಪ್ರಸಂಗ ಕವನ ‘ ಈ ಪ್ರೇಮ ಸಂಭಾಷಣೆ ‘ಎಂಬ ಶೀರ್ಷಿಕೆಯಲ್ಲಿ ಡಾ।। ದಾಕ್ಷಾಯಿಣಿ ಗೌಡ ಅವರಿಂದ ಹಾಗು ಹಸಿರು ಉಸಿರು ಸರಣಿಯಲ್ಲಿ ವಿಜಯನರಸಿಂಹ ಅವರ ಗೃಹದೋಟದಲ್ಲಿ ಅರಳಿದ ಗುಲಾಬಿಯ ‘ಜೀವಕಳೆ’ ಎಂಬ ಶೀರ್ಷಿಕೆಯಲ್ಲಿ ಮಗದೊಂದು ಕವನ ನಿಮ್ಮ ಮುಂದೆ. ಓದಿ ಪ್ರತಿಕ್ರಿಯಿಸಿ. -ಸವಿ.ಸಂ

ನನ್ನ ಮದುವೆಯಾದ ಹೊಸತರಲ್ಲಿ, ನನ್ನ ಅತ್ತೆಯ ಮನೆಗೆ ಭೇಟಿಕೊಟ್ಟಾಗಲೆಲ್ಲ, ಅಜ್ಜ ಅಜ್ಜಿಯರ ಈ ಹೊಸಬಗೆಯ ಜಗಳವನ್ನು ಕುತೂಹಲದಿಂದ ವೀಕ್ಷಿಸುತ್ತಿದ್ದೆ. ಅವರ ಮೊಮ್ಮಕ್ಕಳಿಗೆ ಇದು ಹೊಸದಾಗಿರಲಿಲ್ಲ, ಹಾಗಾಗಿ ಅವರುಗಳು,
ಇವರಿಬ್ಬರ ಕಲಹವನ್ನ ಉದಾಸೀನ ಮಾಡುತ್ತಿದ್ದರು ಅಥವಾ ಮಾಡಿ ತಮಾಷೆ ಮಾಡಿ ನಗುತ್ತಿದ್ದರು.
ಅವರ ಗೇಲಿಗೆ ವಾಗಲೂ ಗುರಿಯಾಗುತ್ತಿದ್ದುದು ಅಜ್ಜನೇ ಹೊರತು ಅಜ್ಜಿಯಲ್ಲ. ನಾನು ಸದಾ ಅಜ್ಜನ ಪರವಹಿಸಿ, ಅಜ್ಜಿಯ ಸಿಡಿಮಿಡಿ ಸ್ವಭಾವನ್ನು ಖಂಡಿಸುತ್ತಿದ್ದೆ.

ಪ್ರೀತಿಗೆ ಹಲವು ಮುಖ. ಬಾರಿ ಬಾರಿಗೆ ” ಲವ್ ಯೂ” ಎಂದು ಮುತ್ತು ಕೊಡುವುದು ಪಾಶ್ಚಿಮಾತ್ಯರ ರೀತಿ. ಕುಂಟುಂಬದ ಮುಂದೆ ಸಹ ಪತ್ನಿ/ ಪತಿಯ ಬಗೆಗಿನ ಪ್ರೇಮವನ್ನು ವ್ಯಕ್ತಪಡಿಸಲು ಸಂಕೋಚಿಸುವುದು ನಮ್ಮ ಹಿರಿಯರ ಪೀಳಿಗೆಯ ಪರಿಯಾಗಿತ್ತು. ಅಜ್ಜ ಅಜ್ಜಿಯರ ಈ ವಿಚಿತ್ರ, ದಿನನಿತ್ಯದ ಕಲಹದ ಹಿಂದಿರುವ ಕಾಳಜಿ, ಪ್ರೀತಿಯನ್ನು ಅರ್ಥಮಾಡಿಕೊಳ್ಳಲು ನನಗೆ ಕೆಲ ವರ್ಷಗಳೇ ಬೇಕಾದವು. ಈ ಹೊಸ ರೀತಿಯ, ನಿಜಕ್ಕೂ ನಡೆಯುತ್ತಿದ್ದ ಈ ಪ್ರೇಮ ಸಂಭಾಷಣೆಯನ್ನು ನಿಮ್ಮೊಡನೆ ಇಂದು ಹಂಚಿಕೊಳ್ಳುತ್ತಿದ್ದೇನೆ.

💘 ಈ ಪ್ರೇಮ ಸಂಭಾಷಣೆ 💘

ನಮ್ಮ ಮದುವೆಯಾಗಿ ಅಯಿತು ಅರವತ್ತು ವರುಷ,
ಆರಾಮಕುರ್ಚಿ ತೂಗುತ್ತ, ನಗುತ್ತ ನುಡಿದ ವೃದ್ಧ ಪುರುಷ.
ಮೊಮ್ಮಕ್ಕಳು, ಮರಿಮಕ್ಕಳು, ಬದುಕೆಲ್ಲ ಹರುಷ,
ನಮಗಿನ್ನೇನು ಬೇಕು, ನಮ್ಮದಾಗಿರೆ ಆರೋಗ್ಯ, ಆಯುಷ್ಯ.

ವರ್ಷಗಳು ಉರುಳುತ್ತವೆ ತಂತಾನೆ, ಬೇಕಿಲ್ಲದಿದ್ದರೂ ಮುದುಕ,
ದಿನಾ ಸಂಜೆ ಅದ ಮತ್ತೆ, ಮತ್ತೆ ವದರುತ್ತೀಯ ಯಾಕ?
ಸುಕ್ಕುಗಟ್ಟಿದ, ಲಕ್ಷಣದ, ಬಿಳಿಮೊಗವ ತಿರುಗಿಸಿದಳಾಕೆ,
ತುಟಿಯಂಚಿನಲ್ಲಿ ಹುದುಗಿಸಿ ಕಿರುನಗೆಯ ಪುಳಕ.

ಬಿಳಿಧೋತರ ಕೊಡವಿ, ಊರುಗೋಲ ಅದುಮಿ ಎದ್ದು,
ಪೊಟ್ಟಣದಲ್ಲಿ ಕಟ್ಟಿದ್ದ ಬಿಸಿಬೋಂಡ ಮೆಲ್ಲಗೆ ಮೆದ್ದು.
ಅಜ್ಜನುಲಿದ, “ಹಿಡಿ, ಹಿಡಿ ಬಾಯಿಗೆ ಹಿತ, ನೀನೂ ತಗೋ ಸ್ವಲ್ಪ,
ಮರೆಯದೆ ಕುಡಿ ಹಾರ್ಲಿಕ್ಸನ್ನು, ನೀನು ತಿನ್ನುವುದು ಅಲ್ಪ.”

ಇದಕ್ಕಾಗಿ ಹೋದೆಯಾ ನೀನು ಸಂಜೆಯ ಸಂತೆಗೆ,
ವಾಹನಗಳ, ಎಳುಬೀಳುಗಳ ಭಯವಿಲ್ಲವೆ ನಿನಗೆ.
ನಿನ್ನ ಒಳಿತಿನ ಬಗೆಗೆ ಸದಾ ಚಿಂತೆ ನನಗೆ
ದೂಡುವೆ ಬಹುಬೇಗ ನನ್ನ ನೀ ಚಿತೆಗೆ.

ವಾರಕ್ಕೆರಡು ಬಾರಿಯಾದರೂ ನಡೆವ ಈ ಕದನ,
ರಾಜಿಯಾಗದ, ಮುಗಿಯದ ವಿಚಿತ್ರ ಕವನ.
ಅಜ್ಜ ಅಜ್ಜಿಯ ಜೀವನದ ಈ ಪ್ರಯಾಣ,
ಮೊಮ್ಮಕ್ಕಳಿಗಿದು ಮುಗಿಯದ ಪುರಾಣ.

ಆಳ ಅಂತ್ಯವಿಲ್ಲದ ಈ ಪ್ರೀತಿ,
ಕವಿ ಲೇಖನಿಗರಿವಿಲ್ಲಇದರ ರೀತಿ.
ಕಷ್ಟಸುಖದಲ್ಲಿ ಸಾಗಿ, ಮಾಗಿಬಂದ ಈ ಪ್ರೇಮ,
ಇದಕ್ಕಿಲ್ಲ ಹೋಲಿಕೆ, ಈ ಪ್ರೇಮ ಅನುಪಮ.

–ಡಾ. ದಾಕ್ಷಾಯಿಣಿ ಗೌಡ

🌹 🌹 🌹 🌹 🌹 🌹 🌹 🌹 🌹 🌹 🌹 🌹 🌹 🌹 🌹 🌹 🌹 🌹 🌹

ಜೀವ ಕಳೆ

ಮೈ ತುಂಬಿ ಅರಳಿವೆ ಇಲ್ಲಿ ಒಂದೊಂದು ಗುಲಾಬಿ

ಕಣ್ ತುಂಬಲು ನಡೆಸಿವೆ ಒಂದೊಂದು ದಳವೂ ಲಾಬಿ

ಮೊಗ್ಗಲಿ ಕಂಡರೂ ಕಾಣದ ಸಣ್ಣ ಹರಳುಗಳಂತೆ

ಮತ್ತೆ ಬೆರೆತ ಕೆಂಪು ಬಣ್ಣದೋಕುಳಿಯಂತೆ

ದಳಗಳು ಬಲಿತಂತೆ ಬಣ್ಣ ಬದಲಿಸುತ ಬೆಳೆವುದು

ಸುಂದರದ ಹಂದರವದು ಮನಸನು ಸೆಳೆವುದು

ಒಂದೇ ಗಿಡದಲಿ ಕಂಡಂತೆ ಸುಮ ವನವನು

ಸವಿದಿದೆ ಮನಸು  ಅಮೃತದ ಒಂದೊಂದು ಹನಿಯನು

ಬಣ್ಣಗಳ ಮೆರುಗು ನೋಡುವ ಕಣ್ಣು ಧನ್ಯವೋ

ಮೆರುಗನು ಸವಿದು ಮೈ ಮರೆವ ಮನಸು ಧನ್ಯವೋ

ಗಿಡಗಳು ಮಾತನಾಡವು ಎಂಬುದನು ಬಲ್ಲಿರಿ

ಹೂಗಳ ನಗುವಿಗೆ  ನಮ್ಮ ಕಣ್ಗಳು ಕಿವಯಾದವು ಅರಿಯಿರಿ

ಧನ್ಯವಾದಗಳನಿಲ್ಲಿ ಸಲ್ಲಿಸುವುದು ಹೇಳಿ ಯಾರಿಗೋ

ಮಾಲೀಕರಿಗೋ, ಮೇಲೆ ಮಣ್ಣಿಗೋ, ಒಳಗೆ ಬೇರಿಗೋ

ಜೀವ ಕಳೆಯಿಲ್ಲಿ ಎದುರಿಗಿದೆ, ಮರೆ ಮಾಚಿದೆ

ಮುಳ್ಳುಗಳ

ಅಂತೆಯೇ ನಮ್ಮ ಜೀವನವಿರಬೇಕು ಸುಖಿಸುತ

ಮರೆ ಮಾಚುತ ಕಹಿಗಳ

–ವಿಜಯನರಸಿಂಹ

ನೆಚ್ಚಿನ ಓದುಗರೇ !! ಜೇಷ್ಠ ಮಾಸದ ಕಾರುಹುಣ್ಣಿಮೆಯಂದು ಉತ್ತರ ಕರುನಾಡಲ್ಲಿ ಮುತ್ತೈದೆಯರೆಲ್ಲರೂ ವಿಜೃಂಭಣೆಯಿಂದ ಆಚರಿಸುವ ವಿಶೇಷ ಹಬ್ಬ ‘ವಟ ಸಾವಿತ್ರಿ’.
ಕಳೆದ ವಾರ ೨೪ನೇ ಜೂನ್ ರಂದು ನಮ್ಮ ಅನಿವಾಸಿ ಸದಸ್ಯೆಯಾದ ಗೌರಿ ಪ್ರಸನ್ನ ಅವರು ತಮ್ಮ ಸ್ವಗೃಹದಲ್ಲಿ ವಟ ಸಾವಿತ್ರಿ ಹಬ್ಬವನ್ನು ಆಚರಿಸಿ ಮಾಹಿತಿಗಳೊಂದಿಗೆ ‘ಲಂಡನಿನ್ನಲಿ ವಟ ಸಾವಿತ್ರಿ’ ಎಂಬ ಶೀರ್ಷಿಕೆಯ ಲೇಖನವನ್ನು ಹಾಗು ‘ಹಸಿರು ಉಸಿರು’ ಸರಣಿಯಲ್ಲಿ ಬೇಸಿಂಗ್ ಸ್ಟೋಕ್ ನ ರಾಮಮೂರ್ತಿಯವರು ತಮ್ಮ ಗೃಹದೋಟದ ಚಿತ್ರಗಳೊಂದಿಗೆ ‘ತೋಟಗಾರಿಕೆ ‘ ಶೀರ್ಷಿಕೆಯ ಒಂದು ಸಂಕ್ಷಿಪ್ತ ಲೇಖನ ನಿಮ್ಮ ಮುಂದೆ. ಓದಿ ಪ್ರತಿಕ್ರಿಯಿಸಿ ! ಸವಿ.ಸಂ

ಲಂಡನ್ನಿನಲ್ಲಿ ವಟಸಾವಿತ್ರಿ

ಸತ್ಯವಾನ್ ಸಾವಿತ್ರಿಯ ಕಥೆ ಕೇಳಿರದ ಭಾರತೀಯನೇ ಇರಲಿಕ್ಕಿಲ್ಲ. ಮಹಾಭಾರತದ ಆರಣ್ಯಕ ಪವ೯ದಲ್ಲಿ ಉಲ್ಲೇಖಿತವಾದ
ಕಥೆಯಿದು. ಮದ್ರ ದೇಶದ ರಾಜಕುಮಾರಿ..ಪ್ರಾಪ್ತ ವಯಸ್ಕಳಾದಾಗ ತಂದೆಯ ಅಪ್ಪಣೆಯೊಂದಿಗೆ ತನ್ನ ವರನನ್ನು ತಾನೇ
ಹುಡುಕಿಕೊಳ್ಳಲು ಹೊರಡುವ ಸಾವಿತ್ರಿ ತನ್ನ ದಿಟ್ಟತನ, ಸ್ವತಂತ್ರ ನಿಲುವುಗಳಿಗಾಗಿ ವೈಯುಕ್ತಿಕವಾಗಿ ನನಗೆ ಬಹಳ
ಇಷ್ಟವಾಗಿಬಿಟ್ಟಿದ್ದಳು ಸಣ್ಣಂದಿನಲ್ಲಿ..ಯಾರೂ ಹೆದರಿ ನಡಗುವ ಯಮರಾಯನ ಜೊತೆಯಲ್ಲೇ ಹೆಜ್ಜೆ ಹಾಕಿ ‘ ಏಳು ಹೆಜ್ಜೆ ಜೊತೆ
ನಡೆದರೆ ಸ್ನೇಹಿತರಾಗಿಬಿಡುತ್ತಾರೆಂದು ಹೇಳಿ ನಿಯಮಗಳ ಕಟ್ಟಾಪಾಲನಧಾರಿ ಯಮನನ್ನೇ ತಬ್ಬಿಬ್ಬು ಮಾಡಿಸಿ ವರ ಪಡೆದು ‘ ಹೋದ
ಜೀವ ಮರಳಿ ಬಾರದು’ ಎಂಬ ಮಾತನ್ನೇ ಸುಳ್ಳು ಮಾಡಿದ ಅಪ್ಪಟ ಛಲಗಾತಿ. ಬಹುಶ: ಅದಕ್ಕಂದೇ ಹಿರಿಯರು ವಿವಾಹಿತ ಸ್ತ್ರೀಯರಿಗೆ ‘
ಮುತ್ತೈದೆ ಸಾವಿತ್ರಿಯಾಗು’ ಎಂದು ಹರಸುತ್ತಿದ್ದರೇನೋ?!

ವಟಸಾವಿತ್ರಿ ವ್ರತಾಚರಣೆಯನ್ನು ಕಾರಹುಣ್ಣಿಮೆಯಂದು ಭಾರತದ ಬಹಳಷ್ಟು ಭಾಗಗಳಲ್ಲಿ ಬೇರೆ ಬೇರೆ ಪದ್ಧತಿಗಳ ಪ್ರಕಾರವಾಗಿ
ಆಚರಿಸಲಾಗುತ್ತದೆ.ನನಗೆ ಆ ಹಬ್ಬವೆಂದರೆ ಥಟ್ಟನೇ ನೆನಪಾಗುವುದು ನೇರಳೆಹಣ್ಣು ಹಾಗೂ ಮಾವಿನಹಣ್ಣುಗಳು ಹಾಗೂ ನಮ್ಮ
ಬಲಕುಂದಿಯ ಹಳ್ಳದ ಹಣಮಪ್ಪನ ಗುಡಿಯ ಆ ಬೃಹತ್ ವಟವೃಕ್ಷ..ಅಲ್ಲಿನ ಹಾಗೂ ಮನೆಯಲ್ಲಿನ ವಟಸಾವಿತ್ರಿ ಪೂಜೆ,
ವ್ರತಕಥೆಗಳು..ಅಮ್ಮ, ಮಾಂಶಿ, ಮಾಮಿಯಂದಿರ ಹೊಸ ಸೀರೆಗಳ ಸರಭರ, ಕುಂಕುಮ-ಹೂ-ಉಡಿಗಳ ಸಂಭ್ರಮ, ಒಗಟು ಹಾಕಿ ಗಂಡನ
ಹೆಸರು ಹೇಳುವಾಗಿನ ಅವರ ಮೊಗದಲ್ಲಿ ತುಳುಕುವ ಸಂತಸ-ನಾಚಿಕೆಗಳು, ಮಾತು, ನಗು, ಹರಟೆಗಳು…ಒಟ್ಟಿನಲ್ಲಿ ಮುದಗೊಳಿಸುವ
ಹಿತವಾದ ವಾತಾವರಣ.ಮಧ್ಯಾಹ್ನ ಸೀಕರಣೆ ಪೂರಿಯೋ, ಹೋಳಿಗೆ ಪಾಯಸವೋ ಇರಲೇಬೇಕು ಊಟಕ್ಕೆ. ಅದಕ್ಕೆಂದೇ ಈಗಲೂ
ಹಬ್ಬಗಳೆಂದರೆ ನನಗೆ ಪ್ರೀತಿ..ಯಾವ ತಕಾ೯ತಕ೯ದ ಪ್ರಶ್ನೆಗೂ ಆಸ್ಪದ ನೀಡಹೋಗುವುದಿಲ್ಲ ನಾನು.
೮- ೧೦ ದಿನಗಳ ಮುಂಚಿನಿಂದಲೂ ಫೋನ್ ಮಾಡಿದಾಗೊಮ್ಮೆ ಅಮ್ಮ ನೆನಪು ಮಾಡುತ್ತಿರುತ್ತಾಳೆ..’ ಸಾವಿತ್ರಿ ಫೋಟೊ ಇಲ್ಲಿಂದ
ಒಯ್ದಿದ್ದೀಯಲಾ ಅದು ಅದನೋ ಇಲ್ಲೋ? ಏನ ಭಾಳಿಲ್ಲಾ..ಹರಸಿ ಎಣ್ಣಿ ಹಚಗೊಂಡು ಎರಕೊಂಡು ( ಅಶ್ವತ್ಥಾಮೋ
ಬಲೀರ್ವ್ಯಾಸೋ..ಅಂತ ಚಿರಂಜೀವಿಗಳನ್ನ ನೆನಸಕೋತನೇ ಎಣ್ಣಿ ಹಚ್ಚೂದು ಅಕೀನ ಪದ್ಧತಿ) ತುಪ್ಪದ ದೀಪಾ ಹಚ್ಚಿಟ್ಟು,
ನೀರಲ್ಹಣ್ಣು ಉಡಿ ತುಂಬಿ , ಮಾವಿನಹಣ್ಣೋ, ಹಾಲುಸಕ್ರಿನೋ ನೈವೇದ್ಯ ತೋರಿಸಿದ್ರಾಯ್ತು’ ಅಂತ ಹೇಳತನೇ ಇರತಾಳ. (‘ನಾವು
ನಮಸ್ಕಾರ ಮಾಡಿದ್ರ ‘ಮುತ್ತೈದೆ ಸಾವಿತ್ರಿಯಾಗು..ಅಖಂಡ ಸೌಭಾಗ್ಯವತಿ ಭವ ಅಂತ ನಮ್ಮ ಗಂಡಂದಿರಿಗೆ ದೀಘಾ೯ಯುಷ್ಯದ
ಆಶೀವಾ೯ದ ಮಾಡತೀರಲಾ..ಅನ್ನುವಂಥ ನನ್ನ ಸ್ತ್ರೀವಾದಿ ಮಾತುಗಳನ್ನ ಅವಳು ಹಿಂದೆ ಬಹಳ ಸಲ ನನ್ನ ಬಾಯಿಂದ
ಕೇಳಿದ್ದಾಳಾದ್ದರಿಂದ ಮಗಳು ಇದನ್ನೆಲ್ಲ ಮಾಡೀಯಾಳೇ ಅನ್ನುವ ಸಂಶಯ ಸದಾ ಅವಳಿಗೆ)

ಅಂತೂ ಕಾರಹುಣ್ಣಿಮಿ..ಸತ್ಯನಾರಾಯಣ ಹಾಗೂ ವಟಸಾವಿತ್ರಿ ಪೂಜಾ ಸಂಪನ್ನವಾಯಿತು ಕಳೆದ ವಾರ.(ನೀರಲ ಹಣ್ಣಿನ ಬದಲು
‘ಅಕ್ಷತಾನ್ ಸಮಪ೯ಯಾಮಿ’.)
ಈ ದೇವರ ಕೆಲಸಾ ಏನ ಥೋಡೆ ತುಸು ಇರಂಗಿಲ್ರೀ. ಉಪಕಾರಣಿ ತೊಳಿ,ಎಣ್ಣಿ ನಂದಾದೀಪಕ್ಕ ಎಳಿ ಬತ್ತಿ ಪೋಣಸು, lಹೂ ಬತ್ತಿ,
ಮಂಗಳಾರತಿ ಬತ್ತಿ ತೋಯಿಸಿಡು(ಅದೂ ಗ್ಯಾಸ್ ತೊಳಕೊಂಡು ಛಲೋ ಕೈಲೇ ಬೆಣ್ಣಿ ಕಾಸಿ ತುಪ್ಪ ಮಾಡಿ), ಗೆಜ್ಜಿವಸ್ತ್ರಕ್ಕ ೧೮ , ೨೧
ಅಂತೆಲ್ಲ ಎಣಿಸಿಕೊಂಡು ಕೆಂಪು ಹಚ್ಚಬೇಕು,(ನಾಗಪ್ಪನಂಥ ಬ್ರಹ್ಮಚಾರಿ ದೇವರಿದ್ರ ಹಳದಿ ಹಚ್ಚಬೇಕ್ರಿ)
ಪಂಚಪಾಳದಾಗ ಅರಿಶಿಣ -ಕುಂಕುಮ-ಅಕ್ಷತಿ ಬೆಳಿಲಾರದ್ಹಂಗ ಆಗಾಗ ನೋಡಕೋತ, ತುಂಬಕೋತ ಇರಬೇಕ್ರಿ..ತೀಥ೯ಕ್ಕ ಪಚಕಪ೯ರ
ಅದನೋ ಇಲ್ಲೋ, ಊದಿನಕಡ್ಡಿ, ಧೂಪ, ಗಂಧ ಸ್ಟಾಕ್ ಇಟ್ಟಿರಬೇಕು. ದೇವಿಯರಿಗೆ ಉಡಿ ತುಂಬಲಿಕ್ಕೆ ಅಡಕಿ ಬೆಟ್ಟ, ಉತ್ತತ್ತಿ,
ಅರಿಶಿನ ಕೊಂಬು, ನಾಣ್ಯ ಗಳನ್ನ ತಕ್ಕೊಂಡ ಇಟಗೊಂಡಿರಬೇಕು..ಗಣಪ್ಪ , ನಾಗಪ್ಪ , ಕೃಷ್ಣ ..ಇತ್ಯಾದಿ ದೇವರುಗಳಿಗೆ ಆಯಾ ರೀತಿ
ಒಂಟೆಳಿ, ಜೋಡೆಳಿ ಜನಿವಾರ ಅವನ ಇಲ್ಲೋ ನೋಡಕೋಬೇಕ್ರಿ. ಮತ್ತ ಶುಕ್ರವಾರಕ್ಕ ಪುಠಾಣಿ ಸಕ್ರಿ, ಗುರುವಾರಕ್ಕ ಹಣ್ಣುಕಾಯಿ,
ರವಿವಾರಕ್ಕ ಸುದಾಮನ ಅವಲಕ್ಕಿ ಹೀಂಗ ಒಣಪ್ರಸಾದ..ಹಬ್ಬ ಹರಿದಿನಕ್ಕ ನಾಗಪ್ಪಗ ತಂಬಿಟ್ಟು, ಗಣಪ್ಪಗ ಕರಿಗಡಬು,
ವರಮಹಾಲಕ್ಷ್ಮಿಗೆ ಹೋಳಗಿ, ಹಣಮಪ್ಪಗ ಗೋದಿಕುಟ್ಟಿದ ಪಾಯಸ, ಶ್ರಾವಣ ಶನಿವಾರ ಗೌರಿಗೆ ಭಕ್ರಿ, ನುಚ್ಚು…ಹೀಂಗ ಈ ಪೂಜಾ
ಸಿಲ್ಯಾಬಸ್ ನೆನಪಿಟ್ಟುಕೊಳ್ಳೂದು ಭಾಳ ಕಠಿಣ ಬಿಡ್ರಿ. ಇನ್ನ ಒಬ್ಬರಿಗೆ ತುಳಸಿ, ಒಬ್ಬರಿಗೆ ಬಿಲ್ಪತ್ರಿ, ಮತ್ತೊಬ್ಬರಿಗೆ ಕ್ಯಾದಗಿ,
ಮುಗದೊಬ್ಬರಿಗೆ ಕರಕಿ , ಒಬ್ಬರಿಗೆ ಕೆಂಪು ಹೂ, ಇನ್ನೊಬ್ಬರಿಗೆ ಬಿಳಿ ಹೂ , ಮತ್ತೊಬ್ಬರಿಗೆ ಹಳದಿ ಹೂ ..ಹೀಂಗ ಇದರಾಗೂ ಕೆಟಗರಿ
ಬ್ಯಾರೆ ಬ್ಯಾರೆ.

ದೇಶ ಬಿಟ್ಟು ಪರದೇಶದಾಗಿರೂ ನಮ್ಮಂಥಾ ಪರದೇಸಿ ಪಾಡಂತೂ ಯಾರಿಗೂ ಬ್ಯಾಡ್ರಿ..ದೀಪ ಹಚ್ಚಿದ್ರ ಫೈರ್ ಅಲಾರಂ
ಹೊಡಕೋತದ್ರಿ..ಊದಿನಕಡ್ಡಿ ಹಚ್ಚಿದ್ರ ಎಲ್ಲೆ ಅದರ ಕಿಡಿ ಕೆಳಗ ಕಾಪೆ೯ಟ್ ಮ್ಯಾಲ ಬೀಳತದೋ ಅಂತ ದೇವರಕಿಂತ ಅದರದೇ ಧ್ಯಾನ
ಭಾಳ ಆಗತದ. ಕಾಯಿ ಒಡದ್ರ, ಘಂಟಿ- ಜಾಗಟಿ ಬಾರಿಸಿದ್ರ ಎಲ್ಲೆ ಬಾಜೂ ಮನಿಯವರು ತಮ್ಮ ಶಾಂತಿಗೆ ಭಂಗ ಬಂತು ಅಂತ
ಕಂಪ್ಲೇಂಟ್ ಕೊಡತಾರೋ ಅಂತ ಅಂಜಿಕಿ. ಎಲ್ಲೆ ಯಾವ ಕಿಡಿ ಸಿಡದು ನಮ್ಮ ‘ಅರಗಿನ ಮನಿ’ ಹೊತ್ತಿ ಉರದೀತೋ ಅನ್ನೋ ಹೆದ್ರಿಕಿ..
ಇನ್ನ ಮನ್ಯಾಗ ಹುಡುಗೂರಿದ್ರ ಅವರ ನಾನಾ ನಮೂನಿ ಪ್ರಶ್ನೆಗಳು ಬ್ಯಾರೇರಿ.. ‘ಯಾವಾಗಲೂ ಪಾಪ ಆ ದೇವರಿಗೆ ಬೆಂಡಿಕಾಯಿ
ಕಾರೇಸಾ, ಬಟಾಟಿ ಇಲ್ಲಾ ಸೌತಿಕಾಯಿ ಪಲ್ಯಾನೇ ಯಾಕ ಮಾಡತೀ? ಪಾಲಕ ಪನೀರ್ , ಗೋಬಿ ಮಂಚೂರಿ ಯಾಕ
ಮಾಡೂದಿಲ್ಲಾ?’..’ ಎಡಗೈಲೇ ಯಾಕ ಪ್ರಸಾದ ತಗೋಬಾರದು?’.. ‘ ಪ್ರೀತೀಲೇ ಕೊಟ್ಟ್ರ ಏನ ಬೇಕಾದರೂ ತಗೋತೀನಿ ಅಂತ ಕೃಷ್ಣ
ನೇ ಹೇಳ್ಯಾನಲಾ?'( ಸ್ಟಾರ್ ಪ್ಲಸ್ ನ ಮಹಾಭಾರತ , ರಾಧಾಕೃಷ್ಣ ಎಲ್ಲ ನೋಡಿದ್ದರ ಪ್ರಭಾವ) ಹೀಂಗ ಬಗಿಹರೀದ ಅವರ
ಪ್ರಶ್ನೆಗಳಿಗೆಲ್ಲ ಸಮಪ೯ಕ ಉತ್ತರಾ ಕೊಟ್ಟು ಕನ್ವಿನ್ಸ್ ಮಾಡಲಾಗದ ಕೆಲವೊಮ್ಮೆ ಖುದ್ದೂ ಕನ್ವಿನ್ಸ್ ಆಗದಽ..ಇತ್ತ ನಮ್ಮ ಅಮ್ಮ ಅಜ್ಜಿಯರಂತೆ ಆಳ, ಅಲ್ಲಾಡದ ನಂಬಿಗಿನೂ ಇರದೇ ಅತ್ತ ನಮ್ಮ ಮಕ್ಕಳಂತೆನೂ ಯೋಚಿಸಲಾಗದೇ ಅಡ್ಡಗ್ವಾಡಿ ಮ್ಯಾಲ ಕೂತೀವಿ
ಅನಸತದ.
ಆದ್ರೂ ಇಷ್ಟ ಮಾತ್ರ ಖರೇ..ಇಂಥ ಆಚರಣೆಗಳನ್ನೆಲ್ಲ ಮಾಡಕೋತಿದ್ರ ಒಂಥರಾ ಸಮಾಧಾನ..ಬೇರಿನೊಂದಿಗೇ
ಇದ್ದೇನೆ..ಕಳಚಿಹೋಗಿಲ್ಲ ಅನ್ನಿಸುವ ಸುಭದ್ರ ಭಾವ.

-ಗೌರಿ ಪ್ರಸನ್ನ

❈ ❈ ❈ ❈ ❈ ❈ ❈ ❈ ❈ ❈ ❈ ❈ ❈ ❈ ❈ ❈

ತೋಟಗಾರಿಕೆ

ನಮ್ಮ ತೋಟಕ್ಕೆ ನನ್ನ ಸ್ವತಃ “Intellectual input ” ಇಲ್ಲ ಅಂದರೆ ಏನೂ ತಪ್ಪಿಲ್ಲ  , ಹಾಗಿದ್ದರೆ ನನ್ನ
contribution ಏನು ಅನ್ನುವ ಪ್ರಶ್ನೆ ಬರುತ್ತೆ ಅಲ್ಲವೇ ?
ನೀವು ಮಾಲಿ ಅನ್ನುವ ಪದ ಕೇಳಿದ್ದೀರಾ ?  ಮಾಲಿ ಕೆಲಸ, ಗಿಡಕ್ಕೆ ನೀರುಹಾಕುವುದು , weeding
ಮತ್ತು cutting ಲಾನ್ ಇಂತದ್ದು, ಯಾವ ಗಿಡ ತರಬೇಕು ಮತ್ತು ಎಲ್ಲಿ ಹಾಕಬೇಕು ಮುಂತಾದ 
management decisions ಮಾಲಿದಲ್ಲ, ಇದೆಲ್ಲಾ  ಮನೆ ಯಜಮಾನಿಯ ಜವಾದ್ದಾರಿ. 

ಚಿತ್ರ ಕೃಪೆ: ರಾಮಮೂರ್ತಿ

ಆದರೆ ತೋಟಗಾರಿಕೆ ಒಂದು ತರಹದ therapeutic, ಎರಡು ತಾಸು ಇಲ್ಲಿ ಕಳೆದರೆ ಬ್ರೌನಿ ಪಾಯಿಂಟ್ಸ್
ಸಿಗೋದು ಅಲ್ಲದೆ ಮನಸ್ಸಿಗೆ ಒಂದು ಸಮಾಧಾನ ಮತ್ತು ಸಂತೋಷ. 
ನಾನು ಸ್ವಲ್ಪ exaggerate ಮಾಡಿರಬಹುದು, ತೋಟದ ಕೆಲಸಗಳು ಟೀಮ್ ವರ್ಕ್, ಈ ವರ್ಷ
ಸಸಿಗಳನ್ನು ಹಾಕುವುದು ತಡ ವಾಯಿತು . ಏಪ್ರಿಲ್ ಪೂರ್ತಿ frost ಇದರಿಂದ ಮೇ ತಿಂಗಳಿಂದ ಕೆಲಸ
ಶುರುವಾಯಿತು. ಬಾಳೆ ಗಿಡಗಳು ಸುಮಾರು ಆರು- ಏಳು ಅಡಿ ಎತ್ತರ ಬೆಳದು ಮಂಜು ಬಿದ್ದು
ನೆಲಸಮ ಆಗಿತ್ತು. ಸದ್ಯ !!! ಪುನಃ ಚಿಗುರುತ್ತಾ ಇದೆ .
ಗುಲಾಬಿ ಮತ್ತು peony ಬಹಳ ಚೆನ್ನಾಗಿ ಬಿಟ್ಟಿದೆ.

ಚಿತ್ರ ಕೃಪೆ: ರಾಮಮೂರ್ತಿ

ನಮ್ಮ ಕೆಲವು ಸ್ನೇಹಿತರಿಗೆ ತಿಳಿದಂತೆ, ಬೇಸಿಗೆಯಲ್ಲಿ  ಬೆಳೆಯುವ ತರಕಾರಿ
ನಮಗೆ ಸಾಕು, ದೇಸಾಯಿ ಅವರು  spinach ಬೆಳದಷ್ಟು ಇಲ್ಲ ಆದರೆ ಬೇರೆ
ಬೇರೆ ಸೊಪ್ಪು, ಮೆಣಸಿನ ಕಾಯಿ, ಬದನೇಕಾಯಿ,  ಸೌತೆಕಾಯಿ, ಕೋಲ್
ರಾಬಿ, ಬಟಾಣಿ ಮತ್ತು ಹುರಳಿಕಾಯಿ ಮುಂತಾದವು ಸಾಕಷ್ಷ್ಟು ಹೂವು ತರಕಾರಿ ಸಿಗತ್ತೆದೆ. 

– ರಾಮಮೂರ್ತಿ 
ಬೇಸಿಂಗ್ ಸ್ಟೋಕ್