ಯು ಕೆ ಕನ್ನಡ ಬಳಗದ  2016 ಯುಗಾದಿ ಉತ್ಸವದ ಸಮಯದಲ್ಲಿ ನಡೆದ ಕಾವ್ಯ ಗೋಷ್ಠಿಯಲ್ಲಿ ಶಿವಪ್ರಸಾದ್ ಅವರು ತಾವೇ ಓದಿದ ಕವಿತೆ ಇದು.

ಸ್ಕಾಚ್ ವಿಸ್ಕಿ

ಸ್ಕಾಚ್ ವಿಸ್ಕಿ ಎಂದರೆ

ನನಗಿಲ್ಲ ತೊಂದರೆ

ಸ್ನೇಹಿತರು ಸೇರಿ ಒಂದಾದರೆ

ನಾವೆಲ್ಲಾ ವಿಸ್ಕಿಯಾಸೆರೆ

 

ಜಾನಿವಾಕರ್, ಗ್ಲೆನ್ ಫಿಡಿಕ್ ನನ್ನ ಒಲವು

ವಿಸ್ಕಿ ಒಂದೆ ನಾಮ ಹಲವು

ಎರಡು ಪೆಗ್ ಇಳಿಸಿದಾಗ

ಕಂಡದ್ದೆಲ್ಲಾ ಚೆಲುವು !

 

ಒಂದು ಪೆಗ್ ವಿಸ್ಕಿ

ಅದಕೊಂದಿಷ್ಟು ಸೋಡ

ಕುರುಕಲು ಬೇಕು

ಬಿಸಿ ಬಜ್ಜಿ ಪಕೋಡ

 

ವಿಸ್ಕಿ ಕುಡಿದಾಗ ನಾನೊಬ್ಬ ದಿಲ್ದಾರ್ ರಾಜ

ಹೇಗೆ ವಿವರಿಸಲಿ ಇದರ ಮಜ

ಮಿತಿ ಮೀರಿದರೆ  ಅನಾರೋಗ್ಯ ನಿಜ

ಮಲಗೆದ್ದ ಮೇಲೆ ಹ್ಯಾಂಗ್ ಓವರ್ ಸಹಜ!

 

ವಾರಾಂತ್ಯದಲಿ ವಿಸ್ಕಿಯ ಆರಾಧನೆ

ಇನ್ನಿಲ್ಲ ಬೇಸರ ಮನೋವೇದನೆ

ಮೈ ಮನಸ್ಸುಗಳಾಗಿವೆ ಹಗುರ

ಚಿಂತೆಗಳು ಸದ್ಯಕ್ಕೆ ದೂರ

ಡಾ. ಜಿಎಸ್ ಶಿವಪ್ರಸಾದ್  

ಈ ವಸಂತ ಋತುವಿನ ಕೊಡುಗೆ ಇದು. ಬಿ ಎಂ ಶ್ರೀ ಅವರ ಒಂದು ‘ಇಂಗ್ಲಿಷ್ ಗೀತ‘* ದ ಅನುವಾದ ಹೀಗೆ ಪ್ರಾರಂಭವಾಗುತ್ತದೆ: ‘’ವಸಂತ ಬಂದ, ಋತುಗಳ ರಾಜ ತಾ ಬಂದ,/ ಚಿಗುರನುತಂದ, ಹೆಣ್ಗಳ ಕುಣಿಸುತ ನಿಂದ”, ಎಂದು. ಇಲ್ಲಿ ವಸಂತಾಗಮನ ನೋಡಿ ಕುಣಿದು ಸರೋಜಿನಿಯವರು ಬರೆದ ಕವನವನ್ನು ಇನ್ನು ಓದಿ.

                   ವಸಂತಾಗಮನ

ಮಲ್ಲಿಗೆ ಯ ಮುಗುಳು ಹೊಯ್ದಾಡಿ ರೆಂಬೆ ಕೊಂಬೆಯ ಚಿಗುರು ತುಯ್ದಾಡಿ

ವಸಂತೋತ್ಸವದ ಸಂಭ್ರಮವ ಸಾರುತಿದೆ ಬನದರಳು ಚಲ್ಲಾಡಿ

 

ಹೂತ  ಮಾಮರದ  ಒಡಲಿಂದ  ಕೋಗಿಲೆಯ  ಕೂಜನ

ಪಂಚಮದಿಂಚರದ  ಸುಂದರ ಸುಮಧುರ  ಗಾಯನ

ಸೃಷ್ಟಿಯ  ಕಣಕಣದಿ ಕಾಣುತಿದೆ ವೈಭವದ ಚೈತ್ರಾಗಮನ

ಅಲ್ಲಿ ಹುಚ್ಚಾಗಿ ಮೈಮರೆತ ಮನದ ಮಯೂರ ನರ್ತನ ॥೧॥

 

ಹಸಿರು ಮಕಮಲ್ಲಿನ    ಮೆತ್ತನೆಯ ಹಾಸಿನಲ್ಲಿ

ಸುಳಿಗಾಳಿ  ಬಿಡಿಸುತಿದೆ ಬಣ್ಣ ಬಣ್ಣದ ಚಿತ್ತಾರ ವಲ್ಲಿ

ಅಲ್ಲೊಂದು ಕೆಂಪು ಇಲ್ಲೊಂದು ಹಳದಿ, ನೀಲ, ಗುಲಾಬಿ ನೋಡಲ್ಲಿ

ಬಾನ ಬಿಟ್ಟು ಇಂದ್ರಧನುಷ ಬಂದಿಳಿದಿದೆ ಧರೆಗೆ ಇಂದಿಲ್ಲಿ ॥೨॥

 

ಚಂದ್ರಮನ  ಚಂದ್ರಿಕೆಗೆ  ತಾರಕೆಯ ಮಿಸುನಿ ಬೆಳಕಿಗೆ

ಮಬ್ಬುಕವಿಸುತಿದೆ ಆಗಸದಿ ಸುಳಿವ ಕೋಲ್ಮಿಂಚು ಆಗಾಗ

ಅಂಬರದಿ ಮೆರೆವ ಆರ್ಭಟಕೆ, ರಮಣೀಯ ಭೀಭತ್ಸತೆಗೆ

ಕಂಪಿಸಿದ ಚದುರೆ ಅರಸಿದಳು ನಲ್ಲನೊಲುಮೆಯ ತೋಳಾಸರೆಗೆ ॥೩॥

 

ಬಳಲಿ ಬೆಂಡಾದ ಭೂ ರಮೆಗೆ ಮೃದು ಮಧುರ ಸಿಂಚನ

ಹೆಜ್ಜೆ ಹೆಜ್ಜೆಗೆ  ಇಣುಕುತಿದೆ ಹೊಸ ಹೊಸತು ಈ ಚೇತನ

ಎಲ್ಲೆಲ್ಲೂ  ನವೋಲ್ಲಾಸ  ಶುರುವಾಗಿದೆ ಹೊಸ ಆವರ್ತನ

ಇದಲ್ಲವೇ  ಜೀವನದಿ  ಸಂಭ್ರಮದ  ವಸಂತಾಗಮನ ॥೪॥

 

ಸರೋಜಿನಿ  ಪಡಸಲಗಿ

ಲೇಖಕಿ ’ಅನಿವಾಸಿ”ಯನ್ನು ತಪ್ಪದೆ ಓದಿ ಇತ್ತೀಚೆಗೆ ಕಮೆಂಟ್ಸ್ ಮಾಡುತ್ತಿರುತ್ತಾರೆ. ಸರೋಜಿನಿಯವರು ಬೆಂಗಳೂರಿನಲ್ಲಿದ್ದರೂ ಒಬ್ಬ ಅನಿವಾಸಿ ಮಗನ ತುಡಿತವನ್ನರಿತಿರುವವರು.

*  “Spring”, by Thomas Nashe

(ಚಿತ್ರ ಕೃಪೆ: ಶ್ರೀವತ್ಸ ದೇಸಾಯಿ)