ಕನ್ನಡ ಬಳಗ ಯು ಕೆ ದೀಪಾವಳಿ ೨೦೧೮ @ ಕೇಂಬ್ರಿಜ್ ಒಂದು ಸವಿನೆನಪು:- ತಿಪ್ಪೆಸ್ವಾಮಿ ಬಿಲ್ಲಹಳ್ಳಿ

ಲೇಖಕರು: ಶ್ರೀ ತಿಪ್ಪೆಸ್ವಾಮಿ ಬಿಲ್ಲಹಳ್ಳಿ

ಶ್ರೀ ತಿಪ್ಪೇಸ್ವಾಮಿ ಬಿಲ್ಲಹಳ್ಳಿ, ಈ ವರ್ಷದ ಕನ್ನಡ ಬಳಗದ ದೀಪಾವಳಿ ಕಾರ್ಯಕ್ರಮದ ರೂವಾರಿಗಳು. ಜಗದ್ವಿಖ್ಯಾತ ಆಂಗ್ಲಭಾಷೆಯ ವಿಶ್ವವಿದ್ಯಾನಿಲಯದ ಕೇಂಬ್ರಿಜ್ಜಿನಲ್ಲಿ ಕನ್ನಡದ ಕಾರ್ಯಕ್ರಮವನ್ನು ತುಂಬ ಹಚ್ಚಿಕೊಂಡು ತಮ್ಮ ನೆರೆಹೊರೆಯ ಕನ್ನಡಿಗರ ಸಹಾಯದಿಂದ ಯಶಸ್ವಿಯಾಗಿ ನಡೆಸಿಕೊಟ್ಟಿದ್ದಾರೆ.

ಮೊಟ್ಟಮೊದಲ ಬಾರಿಗೆ ಶ್ರೀ ತಿಪ್ಪೆಸ್ವಾಮಿಯವರು `ಅನಿವಾಸಿಗೆ` ಬರೆದಿದ್ದಾರೆ. ಕನ್ನಡ ಬಳಗ ಒಬ್ಬೊಬ್ಬರಿಗೆ ಒಂದೊಂದು ಅನುಭವ ಕೊಡುತ್ತದೆ. ಈ ಸಲದ ಕನ್ನಡ ಬಳಗದ ಕಾರ್ಯಕ್ರಮದ ಬಗ್ಗೆ ಸ್ವತಃ ಕಾರ್ಯಕ್ರಮದ ಉಸ್ತುವಾರಿ ವಹಿಸಿಕೊಂಡ ಶ್ರೀತಿಪ್ಪೆಸ್ವಾಮಿಯವರೇ ಬರೆದಿದ್ದಾರೆ. ಓದಿ, ಪ್ರತ್ರಿಕ್ರಿಯಿಸಿ, ಹಂಚಿ – ಸಂ.

ಪುರುಷರು ಮೇಲೆ ಕೆಂಪು ಹಳದಿ ಬಣ್ಣದ ಬಂಡಿ ಉಟ್ಟು ಒಳಗೆ ಬಿಳಿ ವಸ್ತ್ರ ಧರಿಸಿದ್ದರೆ, ಬಣ್ಣ ಬಣ್ಣದ ಮೈಸೂರು ಸಿಲ್ಕ್ , ಇಳಕಲ್ ಸೀರೆ, ಕಾಂಚಿಪುರಂ ಸೀರೆ – ಈ ರೀತಿ ನಾನಾ ಬಗೆಯ ಸೀರೆಗಳನ್ನು ನಾನಾ ಬಗೆಯಲ್ಲಿ ಉಟ್ಟು, ನಮ್ಮ ಕನ್ನಡ ನಾರಿಯರು ತಮ್ಮ ತುಂಟ ಚಿನ್ನಾರಿಗಳೆಲ್ಲರನ್ನು ಬಗೆ ಬಗೆ ಉಡುಪುಗಳಿಂದ ಅಲಂಕರಿಸಿ ೧೦ನೆ ನವೆಂಬರ್ ೨೦೧೮ ರಂದು ಬೆಳಿಗ್ಗೆ ೮ ಘಂಟೆಗೆ ಸರಿಯಾಗಿ ನಿಂತಿದ್ದರೆ ನನಗೆ ಆಗ ಅನ್ನಿಸಿತು ಹೌದು!!! ಇಂದು ನಾವೆಲ್ಲರೂ ಮಾಸ ಮಾಸಗಳಿಂದ ಆಯೋಜಿಸಿದ ದೀಪಾವಳಿ ಹಬ್ಬದ ಆಚರಣೆಯ ಮಹತ್ತರದ ದಿನವೆಂದು.

ನಮಸ್ಕಾರ ಎಂಬ ಪದವನ್ನು ಒಂದೆರಡು ಘಂಟೆಯಲ್ಲಿ ಸಾವಿರಾರು ಬಾರಿ ಕೇಳಿದೆ ನಮ್ಮ ಕೇಂಬ್ರಿಜ್ ಕನ್ನಡಿಗರ ಬಾಯ್ತುಂಬ. ಎಲ್ಲ ಅತಿಥಿಗಳನ್ನು ಆದರದಿಂದ ಬರಮಾಡಿಕೊಂಡು ನೊಂದಣಿ ಪರಿವಾಡಿಯನ್ನು ಮುಗಿಸಿ ಎಲ್ಲರನ್ನು ಭೋಜನಾಲಯಕ್ಕೆ ತಿಂಡಿಗೆ ಹೊರಡಿ ಎಂದು ಸೂಚಿಸುವ ಮೂಲಕ ಬರಿ ತನು ಮನಕ್ಕಷ್ಟೇ ಹೆಮ್ಮೆಯಲ್ಲ, ಅವುಗಳನ್ನು ಜೀವಂತವಾಗಿರಿಸುವ ಹೊಟ್ಟೆಗೂ ಅಷ್ಟೇ ಸಂತೋಷ ಎನಿಸಿರಬಹುದು ಎಂದು ನನ್ನ ಭಾವನೆ.

ಕಾರ್ಯಕ್ರಮದ ಉದ್ಘಾಟನೆ: ಅಜಯ್ ವಾರಿಯರ್, ಸುಧಾ ಬರಗೂರ್, ಪ್ರಜ್ಯೋತಿ ಮಧುಸೂಧನ್, ತಿಪ್ಪೆಸ್ವಾಮಿ ಬಿಲ್ಲಹಳ್ಳಿ, ವಿವೇಕ್ ತೋಂಟದಾರ್ಯ

ಕೇಂಬ್ರಿಜ್ ಚಿನ್ನಾರಿಗಳಿಂದ ಪ್ರಾರ್ಥನೆಯೊಂದಿಗೆ ನಮ್ಮ ಹಬ್ಬದ ಕಾರ್ಯಕ್ರಮ ಶುಭಾರಂಭವಾದಾಗ ಅವರೊಂದಿಗೆ ನಮ್ಮ ಖ್ಯಾತ ಗಾಯಕ ಅಜಯ್ ವಾರಿಯರ್ ಅವರ ಜೊತೆಗೂಡಿ ನಾವೆಲ್ಲರೂ ನಾಡಗೀತೆಯನ್ನು ಸ್ಮರಿಸಿ, ತಾಯಿ ಭುವನೇಶ್ವರಿ ಹಾಗೂ ದೀಪಾವಳಿ ಹಬ್ಬದ ಪ್ರತೀಕವಾದ ತಾಯಿ ಲಕ್ಷ್ಮಿದೇವಿಗೆ ನಮಸ್ಕರಿಸಿ, ವಿಘ್ನಗಳ ನಿವಾರಕ ವಿಘ್ನೇಶ್ವರನಿಗೆ ಪ್ರಣಾಮಗಳನ್ನು ಅರ್ಪಿಸಿ ನಮ್ಮ ಕಾರ್ಯಕ್ರಮವನ್ನು ಮುಂದುವೆರಿಸಿದೆವು.

ಕನ್ನಡ ಬಳಗ ಯು ಕೆ ಒಂದು ಪ್ರತಿಷ್ಠಿತ ಸಂಸ್ಥೆ. ೧೯೮೦ ರ ದಶಕದಲ್ಲಿ ಸ್ಥಾಪಿತವಾಗಿ ಇದು ಅನಿವಾಸಿ ಭಾರತೀಯರು ಬಹುಷಃ ಯುರೋಪಿನಲ್ಲಿ ನೋಂದಾಯಿಸಿರುವ ಮೊಟ್ಟಮೊದಲ ಕನ್ನಡ ಸಂಸ್ಥೆ ಎಂಬುವುದು ನಮ್ಮೆಲ್ಲ ಕನ್ನಡಿಗರಿಗೆ ಗರ್ವದ ಸಂಕೇತ. ಈ ಸಂಸ್ಥೆ ಕೇವಲ ೫-೬ ಕನ್ನಡ ಕುಟುಂಬಗಳಿಂದ ಹುಟ್ಟಿ ಈಗ ೭೦೦ ಕ್ಕೂ ಹೆಚ್ಚು ಕುಟುಂಬಗಳನ್ನು ತನ್ನ ಅಜೀವ ಸದಸ್ಯರನ್ನಾಗಿ ಸೆಳೆದಿದೆ. ಇದಕ್ಕೆ ಕಾರಣ ಯು ಕೆ ಯಲ್ಲಿ ನೆಲೆಸಿರುವ ಪ್ರತಿಯೊಬ್ಬ ಕನ್ನಡಿಗನೂ ಹೆಮ್ಮೆಯಿಂದ ಹೇಳಿಕೊಳ್ಳುವಂಥ ಸಾಧನೆಗಳನ್ನು ಮಾಡುತ್ತಲೇ ಬಂದಿದೆ. ಈ ಸಂಘ ಇದುವರೆಗೂ ತನ್ನ ಸದಸ್ಯರ ಹಾಗು ಕಾರ್ಯಕಾರಿ ಸಮಿತಿಯ ಸಹಕಾರದೊಂದಿಗೆ ಸುಮಾರು ೨೭ ಬಗೆ ಬಗೆಯ ಕನ್ನಡ ಸಂಸ್ಥೆಗಳಿಗೆ ತನ್ನ ತನು, ಮನ, ಧನ ಸಹಾಯ ಮಾಡುವ ಜೊತೆಗೆ “ಕೆರೆಯ ನೀರನ್ನು ಕೆರೆಗೆ ಚೆಲ್ಲಿ” ಎಂಬ ರೀತಿಯಲ್ಲಿ “ಕನ್ನಡ ನಾಡಿಗೆ” ತನ್ನ ನಿಸ್ವಾರ್ಥ ಸೇವೆಯನ್ನು ಸಲ್ಲಿಸುತ್ತಲೇ ಬಂದಿದೆ. ಸ್ವಾಗತ ಭಾಷಣದಲ್ಲಿ ಇದನ್ನೆಲ್ಲಾ ಸ್ಮರಿಸುವುದರ ಜೊತೆಗೆ ನಮ್ಮನ್ನು ಕಳೆದ ೬ ತಿಂಗಳಲ್ಲಿ ಅಗಲಿದ ೪ ಸದಸ್ಯರುಗಳ ಆತ್ಮಕ್ಕೆ ಶಾಂತಿಯನ್ನು ಕೋರಿ ಅವರ ಕುಟುಂಬಗಳಿಗೆ ಆ ಭಗವಂತ ಚೇತರಿಸಿಕೊಳ್ಳುವ ಶಕ್ತಿಯನ್ನು ಅನುಗ್ರಹಿಸಲಿ ಎಂದು ಹಾರೈಸಿ, ಕಾರ್ಯಕ್ರಮಕ್ಕೆ ಆಗಮಿಸಿದ ಅತಿಥಿಗಳಾದ ಶ್ರೀಮತಿ ಸುಧಾ ಬರಗೂರ್ ಹಾಗು ಶ್ರೀ ಅಜಯ್ ವಾರಿಯರ್ ಅವರನ್ನು ಸ್ವಾಗತಿಸಿ, ಬಳಗದ ಅಧ್ಯಕ್ಷ ಶ್ರೀ ವಿವೇಕ್ ತೊಂಟದಾರ್ಯ ಹಾಗು ಉಪಾಧ್ಯಕ್ಷೆ ಶ್ರೀಮತಿ ಪ್ರಜ್ಯೋತಿ ಮಧುಸೂದನ್ ಇವರೆಲ್ಲರನ್ನು ಕೂಡಿ ದೀಪ ಬೆಳಗಿಸಿ ಸಮಾರಂಭಕ್ಕೆ ಸಾಂದರ್ಭಿಕವಾಗಿ ಬೆರಗು ನೀಡಿದೆವು. ನಂತರ ಶ್ರೀಮತಿ ಸುಧಾ ಬರಗೂರ್ ಅವರ ಸ್ವಾಭಾವಿಕ ರೀತಿಯಂತೆ, ಮಾತಿನ ಮಲ್ಲೆಯಂತೆ, ಮಾತೆಯರ ಮಾತೆಯಂತೆ ತಮಗಾದ ಕೆನಡಾ ವೀಸಾ ಗಂಡಾಂತರದಿಂದ ವಿವೇಕ್ ಅವರನ್ನು ಪಾರು ಮಾಡಿ ಯು ಕೆ ಸಂಭ್ರಮಕ್ಕೆ ಸರಿಯಾಗಿ ಬರಮಾಡಿಕೊಂಡಿದ್ದನ್ನು ಕೊಂಡಾಡಿ ತಮ್ಮದೇ ಶೈಲಿಯಲ್ಲಿ ಅವರ ಪ್ರಯಾಣವನ್ನು ವಿವರಿಸಿ ತಮ್ಮ ಮಧ್ಯಾಹ್ನದ ಹಾಸ್ಯಕ್ಕೆ ಈಗಲೇ ಒಂದು ಮುನ್ನೋಟವನ್ನು ಬಿಂಬಿಸಿ ಪ್ರೇಕ್ಷಕರಲ್ಲಿ ಒಂದು ಕುತೂಹಲ ಮೂಡಿಸಿದ್ದರು.

ಸುಧಾ ಬರಗೂರ್ ಅವರ ಹಾಸ್ಯಪಟಾಕಿಗಳು

ಸಾಂದರ್ಭಿಕ ಕವಿತೆ:
“ಕನ್ನಡದ ಬರಗೂರರು
ನಮ್ಮೂರಿಗೆ ಬರುವವರೇ,
ಬರಗೊಡದಿದ್ದರೆ
ಕೆನಡಾದವರಿಗೆ ಫಜೀತಿಯೇ!
ಅಲ್ಲಿಗೂ ಮುಟ್ಟಿತೇ
ಮಾತಿನಮಲ್ಲಿಯ ಕೀರುತಿ?”
(ಕವಿ: ಶ್ರೀವತ್ಸ ದೇಸಾಯಿ)

ನಂತರ ನಮ್ಮ ಭವಿಷ್ಯದ ಕನ್ನಡದ ಕಣ್ಮಣಿಗಳೆಂದೇ ಭಾವಿಸುವ ಸಾಮರ್ಥ್ಯ ಉಳ್ಳಂತಹ ನಮ್ಮ ಚಿಣ್ಣರ ಬಳಗದ ಸಾಂಸ್ಕೃತಿಕ ಕಾರ್ಯಕ್ರಮ ನೆರವೇರಿತು. ಇದರಲ್ಲಿ ಭರತನಾಟ್ಯ, ಪುಣ್ಯಕೋಟಿ ಕಥೆಯ ಅಭಿನಯ, ವಚನ, ದೇವರ ನಾಮ, ಕೇಂಬ್ರಿಜ್ ಚಿಣ್ಣರ ಸಮ್ಮಿಲನ ನೃತ್ಯಗಳು ಪ್ರೇಕ್ಷಕರ ಕಣ್ಣು ಸೆಳೆದವು.

ಇದೇ ಸಮಯ್ದಲ್ಲಿ ಪಕ್ಕದ ಕೊಠಡಿಯಲ್ಲಿ ನಮ್ಮ ಪೂರ್ವ, ವರ್ತಮಾನ ಹಾಗೂ ಭವಿಷ್ಯದ ಸಾಹಿತಿಗಳಾಗುವ ಸಾಮರ್ಥ್ಯ ಉಳ್ಳಂತಹ ಹಿರಿಯ ಹಾಗೂ ಕಿರಿಯ ಕನ್ನಡಿಗರೂ ಕೂಡಿ ಕನ್ನಡ ಸಾಹಿತ್ಯ ಮತ್ತು ಸಾಂಸ್ಕೃತಿಕ ವಿಚಾರ ವೇದಿಕೆ ಕಾರ್ಯಕ್ರಮದಲ್ಲಿ ಪಾಲ್ಗೊಂಡರು. ಇವರೆಲ್ಲರೂ ಕೂಡಿ ತಮ್ಮ ಚುಟುಕು ಸಾಹಿತ್ಯವನ್ನು ಪ್ರದರ್ಶಿಸಿ ಇತರರನ್ನು ಹುರುದುಂಬಿಸಿದರು. ಮಹಿಳಾ ಸಾಹಿತಿಗಳು ಎಂಬ ಒಂದು ವಿಶೇಷ ಕಾರ್ಯಕ್ರಮವನ್ನು ನಡೆಸಿ ತಮ್ಮ ತರ್ಕವನ್ನು ಎಲ್ಲರೊಡನೆ ಮಂಡಿಸಿದರು.

ಇದೆಲ್ಲ ನಡೆಯುತ್ತಿರುವಾಗ ನನ್ನ ಗಮನ ಮಧ್ಯಾಹ್ನದ ಊಟದ ತಯಾರಿಯಲ್ಲಿ ಇತ್ತು. ಊಟ ಲಂಡನ್ ನಿಂದ ಬರುವಾಗ ಆಗಲೇ ಸ್ವಲ್ಪ ತಡವಾಗಿತ್ತು. ಮತ್ತೆ ಮೋಡ ಕವಿದ ವಾತಾವರಣ ಹೆಚ್ಚಾಗಿ ವರುಣದೇವ ಸಣ್ಣದಾಗಿ ಇಲ್ಲೋ ಅಲ್ಲೋ ಎಂಬಂತೆ ಹನಿ ಮಳೆ ಶುರುವಾಗಿ ಮತ್ತೆ ನಮಗೋಸ್ಕರ ತಡೆ ಹಿಡಿದು ಸ್ಥಬ್ದವಾಯಿತು. ಅಂತೂ ಊಟ ಬಂತು, ನಮ್ಮೆಲ್ಲ ಕಾರ್ಯಕರ್ತ್ರರ ತಂಡ ಊಟ ಬಡಿಸಲೂ ತೊಡಗಿದರು. ಹಿರಿಯರಿಗೆ, ಚಿಣ್ಣರಿಗೆ ವಿಶೇಷ ಸಾಲು ಹಾಗು ಕುಳಿತುಕೊಳ್ಳಲು ವ್ಯವಸ್ಥೆ ಮಾಡಲಾಗಿತ್ತು. ಊಟ ನಡಿಯುತ್ತಿಯುವ ಸಮಯದಲ್ಲಿ ನನಗೆ ಊಟ ಚೆನ್ನಾಗಿದೆಯೇ? ಸಾಕಷ್ಟು ಊಟ ಎಲ್ಲರಿಗೂ ಇದೆಯೇ? ಎಂಬ ಯೋಚನೆ ಬಂದಿತ್ತು. ಬಂದ ಅತಿಥಿಗಳನ್ನು ಕೇಳಿದಾಗ, ಕೆಲವರು ಊಟವನ್ನೇನೋ ಹೊಗಳಿದರು, ಆದರೆ ಆಗ ತಾನೆ ನಮ್ಮೆಲ್ಲರಿಗೂ ಆಘಾತವಾಗಿದ್ದು ಸಾಕಷ್ಟು ಅನ್ನ ಎಲ್ಲರಿಗೂ ಇರಲಿಲ್ಲ. ಇದನ್ನು ಕೇಳಿ ತುಂಬಾ ದುಃಖವಾಯ್ತು, ಆದರೂ ಬೇರೆ ದಾರಿ ಇಲ್ಲದೆ ಬೆಳಗಿನ ಉಳಿದ ತಿಂಡಿ ಹಾಗು ಚಪಾತಿಯನ್ನೇ ಉಳಿದ ಎಲ್ಲರೂ ಹಂಚಿಕೊಂಡು ತಿಂದದ್ದು ಸಂತೋಷವಾದರೂ ನನಗೆ ಕೆಲವರನ್ನು ಅರೆಹೊಟ್ಟೆ ಮಾಡಿದ ದುಃಖ ಕಾಡುತಿತ್ತು. ಆದರೂ ವಿವೇಕ್, ಚಂದ್ರಪ್ಪ ಮತ್ತಿತರರರು ನನ್ನ ದುಃಖವನ್ನು ಹಂಚಿಕೊಂಡು ಮುಂದಿನ ಸಾಂಸ್ಕೃತಿಕ ಕಾರ್ಯಕ್ರಮವನ್ನು ಶುರುಮಾಡಲು ಆಯೋಜನೆಗೆ ಸಹಾಯ ಹಸ್ತ ನೀಡಿದರು.

ವೆಂಕಟೇಶ್, ಶಶಿ ಇವರೆಲ್ಲರ ಮುಂದಾಳತ್ವದಲ್ಲಿ ಮಧ್ಯಾಹ್ನದ ಕಾರ್ಯಕ್ರಮ ತೊಡಗಿದವು. ಪ್ರಮೋದ್ ಮತ್ತು ಶ್ರೀರಂಜನ್ ವಾಸುದೇವನ್ ರವರ ವೀಣಾ & ಗಿಟಾರ್ ಜುಗಲ್ ಬಂದಿ ಕಾರ್ಯಕ್ರಮ ಎಲ್ಲ ಹಸಿದಿದ್ದ ಪ್ರೇಕ್ಷಕರ ಮನಸ್ಸನ್ನು ತಣಿಸಿತು. ನಂತರದ ಎಲ್ಲ ಕಾರ್ಯಕ್ರಮಗಳು ಒಂದಾದ ನಂತರ ಒಂದು ಎಂಬಂತೆ ಎಲ್ಲರನ್ನು ಮನೋರಂಜಿಸಿತು.

ಸುಧಾ ಬರಗೂರ್ ಅವರ ಹಾಸ್ಯದ ಹೊನಲಿನಲ್ಲಿ ಮಿಂದ ಪ್ರೇಕ್ಷಕರು

ಚಹಾ ಸಮಯದಲ್ಲಿ ಕೆಲವರಿಗೆ ಮಾತ್ರ ಬಿಸಿ ಪಕೋಡ ಸಿಕ್ಕಿತು. ಸಮಯದ ಅಭಾವದಿಂದ ಸಾಲಿನಲ್ಲಿದ್ದ ಎಲ್ಲರನ್ನು ವಾಪಾಸು ಕರೆತಂದು ಹಾಲಿನಲ್ಲೆ ಎಲ್ಲರಿಗೂ ಪ್ರತ್ಯೇಕವಾಗಿ ಚಹಾ ಸರಬರಾಜು ಮಾಡುವ ಸಂದರ್ಭ ಬಂತು. ಅದೇ ಸಮಯದಲ್ಲಿ ನಮ್ಮ ಸುಧಾ ಬರಗೂರ್ ಅವರು ಸತತ ಒಂದೂವರೆ ಘಂಟೆ ಕಾಲ ತಮ್ಮ ವಿಶಿಷ್ಟ ಶೈಲಿಯಲ್ಲಿ ಎಲ್ಲರನ್ನು ನಕ್ಕು ನಗಿಸಿ ಹೊಟ್ಟೆ ಹುಣ್ಣಾಗುವಂತೆ ಮಾಡಿದರು. ನಾನು ಅವರಿಗೆ ನೀರು ಕೊಡಲು ವೇದಿಕೆ ಹತ್ತಿರ ಹೋದರೆ, ಏನ್ರಿ ಸ್ವಾಮಿ, ನಾವು ಎಷ್ಟೋ ಜನಕ್ಕೆ ನೀರು ಕುಡಿಸಿದಿವಿ ನೀವು ನಂಗೆ ನೀರು ಕುಡಿಸೋಕೆ ಬರ್ತಿರಾ? ಎಂದು ಹಾಸ್ಯ ಚಟಾಕಿ ಹೊಡೆದರು.

ನಂತರ ಮನೋರಂಜೆನೆ ಮುಂದುವರಿದು ನಮ್ಮ ಬಹುಭಾಷಾ ಗಾಯಕರೆಂದೇ ಹೆಸರಾದ ಶ್ರೀ ಅಜಯ್ ವಾರಿಯರ್ ಅವರು ೭೦, ೮೦, ೯೦ ದಶಕದ ಹಾಗು ಇತ್ತೀಚೆಗಿನ ಕನ್ನಡ ಹಾಡುಗಳಿಂದ ಪ್ರೇಕ್ಷಕರೆಲ್ಲರನ್ನು ಹುಚ್ಚೆದ್ದು ಕುಣಿಯುವಂತೆ ಮಾಡಿದರು. ಎಲ್ಲರೂ ನಂತರ ನಮ್ಮ ರಾತ್ರಿ ಊಟವನ್ನು ಸಿಕ್ಕಷ್ಟು ಸವಿದು ತಮ್ಮ ತಮ್ಮ ನೆಲೆಗೆ ಹಿಂತಿರುಗುವ ತಯಾರಿ ನಡೆಸಿದರು.

ಸುಮಧುರವಾಗಿ ಹಾಡಿ ರಂಜಿಸಿದ ಅಜಯ್ ವಾರಿಯರ್

ಕಾರ್ಯಕ್ರಮದ ನಂತರ ಶಶಿ ಮಠಪತಿ ಎಲ್ಲರಿಗೂ ವಂದಿಸಿದರು. ನಾನು ಮತ್ತೊಮ್ಮೆ ಎಲ್ಲ ಕೇಂಬ್ರಿಜ್ ತಂಡದ ಕನ್ನಡ ಗೆಳೆಯರ ಸಹಾಯವನ್ನು ಸ್ಮರಿಸಿ, ವೆಂಕಟೇಶ್, ಶಶಿ ಹಾಗು ಇನ್ನು ಕೆಲವು ಗೆಳೆಯರ ಕೂಡ ಹೋಟೆಲಿಗೆ ಹಿಂತಿರುಗಿದೆವು.

ವೆಂಕಟೇಶ್, ಶಶಿ, ಚಂದ್ರಪ್ಪ ಹಾಗೂ ಕೇಂಬ್ರಿಜ್ ತಂಡ ಈ ಕಾರ್ಯಕ್ರಮಕ್ಕೆ ನೀಡಿದ ಸಹಾಯಕ್ಕೆ ನಾನು ಕನ್ನಡ ಬಳಗ ಯು ಕೆ ವತಿಯಿಂದ ಎಂದೆಂದಿಗೂ ಚಿರಋಣಿಯಾಗಿರುತ್ತೆನೆ.

ಕಡೆಯದಾಗಿ ಆದರೂ ಬಹು ಮುಖ್ಯವಾಗಿ ನನ್ನ ಈ ಕಾರ್ಯಕ್ರಮದ ಆಯೋಜನೆಗೆ ನನ್ನ ಬೆನ್ನೆಲುಬು ಆಗಿ ನನಗೆ ಸಹಾಯಿಸಿದ ನನ್ನ ಮುದ್ದಿನ ಮಡದಿ ಶ್ರೀಮತಿ ಧರಿತ್ರಿ ಹೊಂಬಾರ್ಡಿ ಹಾಗೂ ನಮ್ಮ ಮಗಳು ದೀಕ್ಷಾ ಬಿಲ್ಲಹಳ್ಳಿ ಇವರಿಗೆ ನನ್ನ ಪ್ರೀತಿಯ ನಮನಗಳು

ಇಂದು ಕನ್ನಡ ಬಳಗ ನೀಲಗಿರಿಯಂತೆ ಎತ್ತರಕ್ಕೆ ಬೆಳೆದು ಕನ್ನಡಿಗರ ಮನಸ್ಸಿನಲ್ಲಿ ಅಷ್ಟೇ ಆಳವಾಗಿ ಬೇರೂರಿದೆ. ಸಿರಿಗಂಧದ ನಮ್ಮ ನಾಡಿನ ಕಂಪು ಸದಾ ಕಾಲಕ್ಕೂ ಹೀಗೆ ಚಿರವಾಗಿರಲಿ ಎಂದು ಆಶಿಸುತ್ತೇನೆ. ಬನ್ನಿ ಗೆಳೆಯರೇ ನಾವೆಲ್ಲ ಮತ್ತೆ ಮತ್ತೆ ಕೂಡೋಣ ನಮ್ಮ ಬಳಗವನ್ನ “ಆಲದ ಮರದಂತೆ” ಪ್ರಪಂಚದ ಉದ್ದಗಲಕ್ಕೂ ಬೆಳೆಸೋಣ.

ಸಾಂದರ್ಭಿಕ ಕವಿತೆ:
KB in CB last weekend
ದೀಪಾವಳಿ ಸಮಾರಂಭ
ಸು.ಬ.
ಪಾಸ್ ಪೋರ್ಟ ಕಳಕೊಂಡರೂ
ಸಪ್ಪೋರ್ ಟ ಕಳಕೊಳ್ಳಲಿಲ್ಲ!
ಎಫರ್ಟಿಗೆ ಭರ್ಜರಿ ರಿಪೋರ್ಟ
ಚಪ್ಪಾಳೆ ತಟ್ಟಿ
ಚಪ್ಪರಿಸಿ ಬೆನ್ನು!
(ಇನ್ನೂ ಬಾಗಿದೆ ದುಡಿದು!)
ಕೊಡಿ ತಂಡಕ್ಕೆ ತುರಾಯಿ
ಹಾಕಿ ನೇತಾರರಿಗೆ, ಹಾರ
ಅವರನ್ನ ಹಾಕ ಬೇಡಿ ನೇತು
(ಸ್ವಲ್ಪ ಕುಂದುಕೊರತೆ ಎಲ್ಲಿಲ್ಲ?
ಇಂದೂ ಎಂದೂ ನನ್ನಲ್ಲೂ)
Kudos! Bravo CB team!
(ಕವಿ: ಶ್ರೀವತ್ಸ ದೇಸಾಯಿ)


ಯುತ್ ಕಾರ್ಯಕ್ರಮದ ವರದಿ – ನವ್ಯಾ ಆನಂದ್

ಲೇಖಕರು: ನವ್ಯಾ ಆನಂದ್

ನವ್ಯಾ ಆನಂದ್ ಎರಡನೇ ಜನರೇಶನ್ನಿನ ಕನ್ನಡದ ಹುಡುಗಿಯಾದರೂ ಅರಳು ಹುರಿದಂತೆ ಕನ್ನಡ ಮಾತಾಡುವುದಷ್ಟೇ ಅಲ್ಲ, ಕನ್ನಡದಲ್ಲಿ ಬರೆಯುತ್ತಾರೆ, ಹಾಡುತ್ತಾರೆ ಕೂಡ. ಕನ್ನಡ ಬಳಗ ಯು ಕೆ ಯಲ್ಲಿ `ಯುತ್` ಕಾರ್ಯಕ್ರಮವನ್ನು ನಡೆಸಿಕೊಡುತ್ತಾರೆ. ಅದರದೊಂದು ಪುಟ್ಟ ವರದಿಯನ್ನೂ ಅನಿವಾಸಿಗೆ ಬರೆದು ಕೊಟ್ಟಿದ್ದಾರೆ.

ನವ್ಯಾ ಯು ಕೆ ಕನ್ನಡಿಗರ ಹೆಮ್ಮೆ. ಇತ್ತೀಚೆ ಕನ್ನಡ ಗಮಕ ಗಳನ್ನೂ ಕಲಿತು ಬಂದಿದ್ದಾರೆ. ಅವರು ಇನ್ನೂ ಹೆಚ್ಚು ಅನಿವಾಸಿಗೆ ಬರೆಯಲಿ ಎಂದು ಆಶಿಸುತ್ತೇನೆ – ಸಂ.

ಕನ್ನಡ ಬಳಗ ಯುಕೆ ದೀಪಾವಳಿ ಸಮಾರಂಭದಲ್ಲಿ, ೧೦ ರಿಂದ ೧೬ ವರ್ಷದ ಮಕ್ಕಳಿಗೆ ನಡೆಸಿದ ಕಾರ್ಯಕ್ರಮದಲ್ಲಿ, ಸುಮಾರು ೩೦ – ೩೫ ಮಕ್ಕಳು ಭಾಗವಹಿಸಿದ್ದರು. 

Pictionary ಮತ್ತು charades ಆಟಗಳನ್ನ ಕನ್ನಡದಲ್ಲಿ ಆಡಿದ ಮಕ್ಕಳಿಗೆ ಹೊಸ ಹೊಸ ಕನ್ನಡ ಪದಗಳನ್ನು ಕಲಿಯೋ ಅವಕಾಶ ಸಿಕ್ಕಿತು. ಮಕ್ಕಳು ಈ ಆಟಗಳಿಂದ ಬಹಳ ಮಜಾ ತೊಗೊಂಡ್ರು – ಅವರಿಗೆ ಆಶ್ಚರ್ಯವಾಗಿತ್ತು, ಆಂಗ್ಲಭಾಷೆಯಲ್ಲಿ ಸುಲಭವಾಗಿ ಉಪಯೋಗಿಸೋ ಪದಗಳು ಕನ್ನಡಲ್ಲಿ ಕಷ್ಟ ಪಟ್ಟು ಜ್ಞಾಪಿಸ್ಕೊಬೇಕಾಗಿತ್ತು!    

ನಮ್ಮ ದೇಶದ ಸಂಸ್ಕೃತಿಯನ್ನ  ಮಕ್ಕಳಿಗೆ ಪರಿಚಯ ಮಾಡಿಸಲು ನಮ್ಮ ಪುರಾಣ ಕಥೆಗಳಲ್ಲಿ ಒಂದಾದ, ನವಗ್ರಹ ದೇವತೆಗಳ ಕಥೆಗಳನ್ನ ಆರಿಸಿದ್ದೆ. ಪ್ರತಿ ಕಥೆಯನ್ನು ಆಂಗ್ಲಭಾಷೆಯಲ್ಲಿ ಬರೆದು, ೫ ಪದಗಳನ್ನ  ತೆಗೆದಿದ್ದೆ. ತೆಗೆದಿರೋ ಪದಗಳಿಗೆ ೫ ಕನ್ನಡ ಪದಗಳನ್ನು ಕೊಟ್ಟಿದ್ದೆ; ಮಕ್ಕಳು ಆ ೫ ಪದಗಳನ್ನು ಓದಿ, ಸರಿಯಾಗಿರೋ ಪದವನ್ನು ವಾಕ್ಯಕ್ಕೆ ಸೇರಿಸಿದ್ದರು. ಕಡೆಯಲ್ಲಿ, ಎಲ್ಲರೂ ಕೂಡಿ, ಅಷ್ಟೂ ನವಗ್ರಹ ಕಥೆಗಳನ್ನು ಗಟ್ಟಿಯಾಗಿ ಓದಿ ಹಂಚಿಕೊಂಡರು. 

ನವಗ್ರಹ ಬಗ್ಗೆ ಕಲಿಯೋ ಆಟವನ್ನು ಮಕ್ಕಳು ಮತ್ತು ನಾನು ಇಷ್ಟ ಪಟ್ಟು ಆಡಿದ್ವಿ. ಮಕ್ಕಳಿಗೆ ಎಷ್ಟೊಂದು ಕನ್ನಡ ಪದಗಳು ಗೊತ್ತಿದೆ ಅಂತ ನನಗೂ ಅರ್ಥ ಆಯಿತು – ಮಾತಾಡಕ್ಕೆ ನಾಚಿಕೆ ಪಟ್ಟರೂ, ಈ ಮಕ್ಕಳಿಗೆ ಕನ್ನಡ ಅರ್ಥ ಆಗತ್ತೆ. ಕನ್ನಡನ ಆಟದ ರೀತಿಯಲ್ಲಿ ಬಳಸಿ, ಮಜವಾಗಿ ಹೇಳಿಕೊಟ್ಟರೆ, ಮಕ್ಕಳಿಗೂ ಕನ್ನಡ ಕಲಿಯುವ ಆಸಕ್ತಿ ಇದೆ. ಈ ಆಸಕ್ತಿ ಕಂಡು, ನನಗೂ, ಮುಂದೆ ಈ ತರಹ, ಮಕ್ಕಳಿಗೋಸ್ಕರ ಕಾರ್ಯಕ್ರಮವನ್ನು ಆಯೋಜಿಸುವ ಹುರುಪು ಬೆಳಿಯತ್ತೆ.

ಇನ್ನೂ ನೂರಾರು ಚಿತ್ರಗಳನ್ನು ನೋಡಲು ಇಲ್ಲಿ ಒತ್ತಿ.

Advertisements

ಸಣ್ಣ ಶಾಲೆಯ ಸುತ್ತ ಬೆಳಗಿನ ಕೆಲ ವಿಷಯಗಳು – ಯೋಗೀಂದ್ರ ಮರವಂತೆ

ಲೇಖಕರು: ಯೋಗೀಂದ್ರ ಮರವಂತೆ

ಯೋಗೀಂದ್ರ ಮರವಂತೆಯವರು ಯು.ಕೆಯಲ್ಲಿ ನೆಲೆಸಿರುವ ಕನ್ನಡದ ಪ್ರಮುಖ ಬರಹಗಾರು ಮತ್ತು ಯಕ್ಷಗಾನ ಕಲಾವಿದರು. ಇವರು ಬರೆದ ಲೇಖನಗಳು ಮತ್ತು ಅಂಕಣಗಳು ಕನ್ನಡದ ಪ್ರಮುಖ ಪತ್ರಿಕೆಗಳಲ್ಲಿ ಪ್ರಕಟವಾಗಿವೆ. ಭಾರತ ಮತ್ತು ಇಂಗ್ಲಂಡು, ಕನ್ನಡ ಮತ್ತು ಇಂಗ್ಲೀಷು – ಇವೆರಡರ ನಡುವಿನ ಸೇತುವೆಯಂತೆ ಅಪ್ಯಾಯಮಾನವಾಗಿ ಬರೆಯುತ್ತಾರೆ. ಇಂಗ್ಲಂಡಿನ ಸಂಸ್ಕೃತಿಯ ಬಗ್ಗೆ ಕನ್ನಡದ ಅಂಕಣಗಳಲ್ಲಿ ವಿವರವಾಗಿ ಬರೆದಿದ್ದಾರೆ. ಅವರ ಬರಹಗಳೆಲ್ಲ ಸೇರಿ ಆದಷ್ಟು ಬೇಗ ಒಂದು ಪುಸ್ತಕ ಬರಲಿ ಎಂದು ಹಾರೈಸುತ್ತೇನೆ. ದಿನನಿತ್ಯ ನಡೆಯುವ ದೃಶ್ಯವನ್ನು ಕಣ್ಣಿಗೆ ಕಟ್ಟುವಂತೆ ಬರೆದು ತಲೆಯಲ್ಲಿ ಒಂದು ಸಣ್ಣ ಹುಳ ಬಿಡುತ್ತಾರೆ ಈ ಲೇಖನದಲ್ಲಿ. ಓದಿ, ಪ್ರತಿಕ್ರಿಯೆ ಬರೆಯಿರಿ – ಸಂ

ಸಣ್ಣ ಮಕ್ಕಳು ಹೋಗುವ ಒಂದು  ಸಣ್ಣ ಶಾಲೆ. ನಾಲ್ಕಾರು ಕೋಣೆಗಳು , ಎಂಟತ್ತು ಗೋಡೆಗಳು; ಒಳಗೆ ಪಟಗಳು , ಅಕ್ಷರಗಳು, ಮಕ್ಕಳು ಕೈಯಾರೆ ಮಾಡಿದ ಬಣ್ಣ ಬಣ್ಣದ ಚಿತ್ರಗಳು, ಮುದ್ದಾದ ವಿನ್ಯಾಸಗಳು, ಒಂದಿಷ್ಟು ವಿಷಯಗಳು ,ಇವಿಷ್ಟನ್ನು ತನ್ನ  ಮೈಮೇಲೆ ಹೊದ್ದು, ಖಾಲಿ ಉಳಿದ ಜಾಗದಲ್ಲಿ ಮಾತ್ರ ಕಾಣಿಸುತ್ತಿರುವ ಹಳದಿ ಬಣ್ಣದ ಗೋಡೆ, ಕೋಣೆಯೊಳಗೆ ದಿನವೂ ತುಂಬುವ ಮಕ್ಕಳ ಕೇಕೆಗಳು ಅಳು ನಗು ಜಗಳ ಮತ್ತು ಪುಟ್ಟ ಪುಟ್ಟ ಕಲಿಕೆಗಳು, ಹೊರಗೊಂದು ಮೈದಾನ ಸುತ್ತಲಿಗೆ ಆಳೆತ್ತರದ ಆವರಣ, ಆವರಣದ ಮೇಲೆ ಮಕ್ಕಳ ಶಾಲೆ ಎನ್ನುವ ಫಲಕ , ಶಾಲೆ ಎನಿಸಿಕೊಳ್ಳಲು ಇಷ್ಟು ಸಾಲದೇ? ಸಣ್ಣ ಶಾಲೆ ಎನಿಸಿಕೊಳ್ಳಲು ಖಂಡಿತ ಇಷ್ಟು ಸಾಕೋ ಏನೋ. 

ಬೆಳಿಗ್ಗೆ  ಎಂಟು ಮುಕ್ಕಾಲಕ್ಕೆ ಶಾಲೆಯ ಬಾಗಿಲಿನ ಎದುರು ಇರಬೇಕೆಂದು ಮಗಳ ಬಲ ಕೈಯನ್ನು ನನ್ನ ಎಡ ಮುಷ್ಟಿಯಲ್ಲಿ ಹಿಡಿದು ಹಜ್ಜೆ ಹಾಕಿದ್ದೇನೆ . ರಸ್ತೆಯಲ್ಲಿ ಸಿಗುವ ತನ್ನದೇ ಶಾಲೆಯ ಇತರ ಮಕ್ಕಳನ್ನು ನೋಡುತ್ತಾ , ಇವಳ ಹೆಸರು ಇದು , ಅವಳ ಮನೆ ಆ ಕಡೆ ಎನ್ನುತ್ತಿದ್ದಾಳೆ ಮಗಳು. ಕೆಲವು ಸಹಪಾಠಿಗಳನ್ನು ನೋಡಿ ನಗುತ್ತ , ಮತ್ತೆ ಕೆಲವರನ್ನು ಕಂಡು ನಿನ್ನೆ  ಜಗಳ ಆಡಿದನ್ನು ನೆನಪು ಮಾಡುತ್ತಾ ಇನ್ನೊಂದು ಖಾಲಿ ಕೈಯನ್ನು ಬೀಸುತ್ತ ,ಕಾಲನ್ನು ಹಿಂದೆ ಮುಂದೆ ಚಿಮ್ಮಿ ನೆಗೆಯುತ್ತ ನಡೆಯುತ್ತಿದ್ದಾಳೆ. ಇವಳ ಕೈ ಹಿಡಿದು ಕೊಂಡಿದ್ದಕ್ಕೆ ನೇರವಾಗಿ ನಡೆಯಲಾಗದೆ ಈಕೆ ಜಗ್ಗಿದ ಕಡೆಯೆಲ್ಲ ಹೆಜ್ಜೆ ಹಾಕುತ್ತ ತೂರಾಡಿಕೊಂಡು ನಡೆದಿದ್ದೇನೆ . ಮಧ್ಯ ಮಧ್ಯ ನನ್ನ ತಾಳ್ಮೆ ತಪ್ಪಿ ” ಏ ಸರಿ ನಡಿಯೇ” ಎನ್ನುತ್ತಾ ಅವಳನ್ನು ಎಳೆದು ನಡುದಾರಿಗೆ ತಂದ ಹೆಮ್ಮೆಯಲ್ಲಿ ನಡೆಯುತ್ತಿದ್ದೇನೆ. ನನ್ನ  ಬಲ ಕೈಯಲ್ಲಿ ಹಿಡಿಯಲ್ಪಟ್ಟ ಎರಡು ಪುಟಾಣಿ ಚೀಲಗಳು ಕೂಡ ನನ್ನ ಏರು ಧ್ವನಿಗೆ ಬೆಚ್ಚಿ ನನ್ನನು ಅಪ್ಪನನ್ನು ನೋಡುವಂತೆ ನೋಡುತ್ತಿವೆ- ಊಟದ ಡಬ್ಬಿಯ ಚೀಲ ಒಂದು, ಒಂದೇ ಒಂದು ಪುಸ್ತಕವನ್ನು ಹೊತ್ತ ಪುಸ್ತಕದ ಚೀಲ ಇನ್ನೊಂದು. ಯಾರ ಕೈಹಿಡಿದೆಯೇ ನಡೆಯುವಷ್ಟು ದೊಡ್ಡವನಾದ ಅಥವಾ ಹಾಗೆ ತಿಳಿದುಕೊಂಡ ನಾನೂ ಹೀಗೆಯೇ ಎಡವುತ್ತಾ ನಡೆಯುತ್ತಿರಬಹೊದೋ ಅಥವಾ ಎಡವಿದ್ದೇ ನನಗೆ ತಿಳಿಯುವುದಿಲ್ಲವೋ ಎಂದು ಕೂಡ ಯೋಚಿಸುತ್ತಿದ್ದೇನೆ .

ರಸ್ತೆಯ ಎರಡು ಕಡೆಯ ಕಾಲು ಹಾದಿಗಳಲ್ಲಿ ಸಮವಸ್ತ್ರಧಾರಿ ಮಕ್ಕಳ ಗೌಜು, ಅವಸರದ ನಡಿಗೆ ,ಪುಸ್ತಕದ ಚೀಲ, ಬುತ್ತಿ ಚೀಲಗಳ  ಅಲುಗಾಟ . ಕಣ್ಣು ಹಾಯಿಸಿದಷ್ಟು ದೂರ ಮಕ್ಕಳ ಹಿಂಡು ,ಬೆನ್ನಿಗೆ ಹೆತ್ತವರ ದಂಡು. ಮಕ್ಕಳನ್ನು ಶಾಲೆಗೆ ಬಿಟ್ಟು ಹೋಗುವುದೊಂದೇ ಆ ಒಂದು ಘಳಿಗೆಯ ಕಾಲದ ದೃಢ ಸಂಕಲ್ಪ . ಶಾಲೆಯ  ಬಾಗಿಲಿನ ಎದುರಿನ ರಸ್ತೆ ಬೆಳಿಗಿನ ಆ ಹೊತ್ತಿಗೆ ವಾಹನಗಳಿಂದ ಕಿಕ್ಕಿರಿದಿದೆ. ದೂರದಿಂದ ಕಾರಿನಲ್ಲಿ ಬಂದು ಮಕ್ಕಳನ್ನು ಬಿಡುವವರು , ರಸ್ತೆ ಬದಿಗೆ ಕಾರು  ನಿಲ್ಲಿಸಬಾರದ ಕಡೆಗಳಲ್ಲಿ ಮೆತ್ತಗೆ ಕಾರು ನಿಲ್ಲಿಸಿ ಇನ್ನೇನು ಪೊಲೀಸರು ಬಂದು ದಂಡ ಹಾಕುತ್ತಾರೆನೋ ಎಂದು ಹೆದರುತ್ತ ಮಕ್ಕಳ ಕೈ ಎಳೆದುಕೊಂಡು ಶಾಲೆಯ ಕಡೆಗೆ ಓಡುತ್ತಿದ್ದಾರೆ. ಮಕ್ಕಳನ್ನು ಶಾಲೆಗೆ ಬಿಡುವ ಉಸಾಬರಿ ಇಲ್ಲದವರು ಅದೇ ರಸ್ತೆಯಲ್ಲಿ ಆ ಹೊತ್ತಿಗೆ ಹಾದುಹೋಗಬೇಕಾದಾಗ ಯಾಕಾದರೂ ಈ ರಸ್ತೆಯಲ್ಲೊಂದು ಶಾಲೆ ಇದೆಯೋ ಯಾಕಾದರೂ ಮಕ್ಕಳನ್ನು ಹೆರುತ್ತಾರೋ ಎಂದು ಗೊಣಗುತ್ತ ತಮ್ಮ ತಾಳ್ಮೆಯನ್ನು ಪರೀಕ್ಷೆಗೆ ಒಡ್ಡುತ್ತಾ ಸಾಗುತ್ತಿದ್ದಾರೆ. ಆ ರಸ್ತೆಯಲ್ಲಿ ತಿರುಗುವವರ ಹೊಣೆ ಅವರವರದೇ ಆದರೂ ಅಲ್ಲಿ ಮಕ್ಕಳನ್ನು ರಸ್ತೆ ದಾಟಿಸುವ ಹೊಣೆ ಇನ್ನೊಬ್ಬರ ಮೇಲಿದೆ. ಶಾಲೆ  ಶುರು  ಆಗುವ  ಮತ್ತು  ಮುಚ್ಚುವ  ಹೊತ್ತಿನಲ್ಲಿ  ಸಿಗ್ನಲ್  ಇಲ್ಲದ  ಕಡೆ  ಸುರಕ್ಷಿತವಾಗಿ  ರಸ್ತೆ  ದಾಟಿಸಲು , ಕೈಯಲ್ಲಿ  ‘ನಿಲ್ಲಿ ‘ ಎನ್ನುವ ಫಲಕ  ಹೊತ್ತವಳು ಒಬ್ಬಾಕೆ ನಿಂತಿದ್ದಾಳೆ . ಶಾಲೆಯ  ಬಾಗಿಲಿನ  ಎದುರು  ರಸ್ತೆ  ದಾಟಲೆಂದು  ಮಕ್ಕಳು  ಒಟ್ಟಾದಾಗಲೆಲ್ಲ , ಈಕೆ  ತನ್ನ  ಕೈಯ  ‘ನಿಲ್ಲಿ ‘ ಫಲಕದೊಂದಿಗೆ  ರಸ್ತೆಗೆ  ಧುಮುಕಿ ,ಎರಡೂ  ಕಡೆಯ  ವಾಹನಗಳನ್ನು  ನಿಲ್ಲಿಸಿ , ದಾಟುವವರಿಗೆ ಅನುಕೂಲ  ಮಾಡುತ್ತಾಳೆ .ಮಕ್ಕಳು  ಇವಳನ್ನು  ‘ಲಾಲಿಪಾಪ್  ಲೇಡಿ  ‘ ಎನ್ನುತ್ತಾರೆ . ಇವಳು  ಕೈಯಲ್ಲಿ  ಹಿಡಿಯುವ  ‘ಸ್ಟಾಪ್ ‘ ಫಲಕ ದ  ಆಕಾರ  ಲಾಲಿಪಾಪಿನಂತಿದೆ . ಇವಳು   ಕಣ್ಣೆದುರು  ಬರುವ  ಎಲ್ಲ  ಮಕ್ಕಳನ್ನೂ  ಹೆಸರಿಡಿದು  ಕೂಗಿ  ‘ಸುಪ್ರಭಾತ ‘ ಹೇಳುತ್ತಾಳೆ . ಜ್ವರ  ನೆಗಡಿ  ಕೆಮ್ಮು  ಎಂದು  ಶಾಲೆಗೇ  ಹಾಜರಾಗದ  ಮಕ್ಕಳು  ಇರಲಿ ಬಿಡಲಿ,  ಲಾಲಿಪೋಪ್  ಲೇಡಿ ಸೂಟಿ  ತೆಗೆದು  ಕೊಂಡದ್ದು    ನೋಡಿಲ್ಲ  ಕೇಳಿಲ್ಲ . ಮಕ್ಕಳ ಸಣ್ಣ ಸಣ್ಣ ಹೆಜ್ಜೆಗಳು ಇವಳ ಕಣ್ಣೆದುರೇ ದೊಡ್ಡದಾಗಿವೆ, ತೊದಲು ಅಸ್ಪಷ್ಟ ನುಡಿಗಳು ಬಲಿತಿವೆ. ಲಾಲಿಪಾಪ್ ಲೇಡಿ, ದಿನ ಬೆಳಗೊಮ್ಮೆ ಅಪರಾಹ್ನ ಒಮ್ಮೆ, ದೂರದ ವಾಹನಗಳಿಗೂ ಕಣ್ಣು ಕುಕ್ಕುವ ವಸ್ತ್ರ ಧರಿಸಿ ಕೈಯಲ್ಲಿ ವಾಹನ ನಿಲ್ಲಿಸುವ ದಂಡ ಹಿಡಿದು ಹಲವು ಬಾರಿ ರಸ್ತೆಗೆ ಧುಮುಕುತ್ತಾಳೆ, ವಾಹನಗಳನ್ನು ನಿಲ್ಲಿಸುತ್ತಾಳೆ. ರಸ್ತೆ ದಾಟಿಸುತ್ತಾಳೆ.

ಶಾಲೆಯ  ಬಾಗಿಲು  ತೆರೆಯಲು  ಇನ್ನೂ   ಹೊತ್ತಿರುವುದರಿಂದ  ಶಾಲೆಯ  ಮುಚ್ಚಿದ  ಗಾಜಿನ  ಬಾಗಿಲಿನ  ಒಳಗಿಂದ  ಕೆಲವು  ಪರಿಚಯದ ‘ಮಿಸ್’ಗಳ ಕೈ  ಕಾಲು , ಅರ್ಧರ್ಧ ಮುಖಗಳು  ಕಾಣಿಸುತ್ತಿವೆ .ಆವರಣದ  ಒಳ  ಬಂದು ಕಾಯುತ್ತಿರುವ   ಅಪ್ಪ  ಅಬ್ಬೆಯಂದಿರ  ಗುಂಪು  ಅಷ್ಟರಲ್ಲೇ   ದೊಡ್ಡದಾಗಿದೆ ;ಈ  ಗುಂಪಿನಲ್ಲಿ  ನಾನೂ ,ಒಂದು ಕೈಯಲ್ಲಿ ಮಗಳನ್ನು ಮತ್ತೊಂದು ಕೈಯಲ್ಲಿ ಅವಳ ಚೀಲಗಳನ್ನು ಹಿಡಿದು ಮಹಾ ಜವಾಬ್ದಾರಿಗಳನ್ನು ಸರಿತೂಗಿಸುವವನಂತೆ ಸೇರಿಕೊಂಡಿದ್ದೇನೆ . ಹೆಸರು ಪರಿಚಯ  ಇಲ್ಲದ ಕೆಲವರು ಇವನು ಈ ಮಗುವಿನ ಅಪ್ಪ ಎಂದು ಗುರುತು ಹಾಕಿಕೊಂಡು ಒಂದು ನಗೆ ಕೊಟ್ಟಿದ್ದಾರೆ.  ಸಣ್ಣ  ಶಾಲೆಯ  ಸಣ್ಣ  ಬಾಗಿಲು  ತೆರೆಯುತ್ತಿದ್ದಂತೆ  ಶಿಸ್ತಿನ   ಪಾಠವನ್ನು ದಿನವೂ  ಕಲಿಯುವ  ಮಕ್ಕಳು  ಸಾಲಿನಲ್ಲಿ  ಒಬ್ಬರ  ಹಿಂದೆ  ಒಬ್ಬರು  ಒಳ  ಹೋಗುತ್ತಿದ್ದಾರೆ . ಹಾಗೆ  ಸಾಲಿನಲ್ಲಿ  ಸಾಗುವಾಗ  ಮೈಗೆ  ಮೈ  ತಾಗಿದ್ದಕ್ಕೆ , ಬಾಯಿಗೆ ಕೈ ಅಡ್ಡ ಹಿಡಿಯದೆ ಕೆಮ್ಮಿದ್ದಕ್ಕೆ  “ಕ್ಷಮಿಸಿ ” ಎನ್ನುತ್ತಾ , ಎರಡು  ಮಕ್ಕಳು  ಒಂದೇ  ಸಲ  ಒಳ  ಹೋಗಲಾಗದೆ  ಒಂದು  ಪಿಳ್ಳೆ  ಇನ್ನೊಂದಕ್ಕೆ  ಒಳ  ಹೋಗಲು   ಬಿಟ್ಟಿದ್ದಕ್ಕೆ  ಇನ್ನೊಂದು  “ಧನ್ಯವಾದ ” ಹೇಳುತ್ತಾ  , ಕಲಿತ  ಪಾಠಗಳನ್ನೆಲ್ಲ  ಅಲ್ಲಲ್ಲೇ  ಒಪ್ಪಿಸುತ್ತಿದ್ದಾವೆ. ಬಹಳ  ಗಡಿಬಿಡಿಯವರು ,ಮಕ್ಕಳನ್ನು  ತರಗತಿಯ  ಬಾಗಿಲಿನ  ಮೆಟ್ಟಿಲಿನ  ಮೇಲೆ  ಎತ್ತಿ  ನಿಲ್ಲಿಸಿ  ಬಾಗಿಲಿನ ಒಳಗೆ ದಬ್ಬಿ ಓಡಿದ್ದಾರೆ . ಮಕ್ಕಳು  , ಅವರ  ಚಳಿ  ಟೊಪ್ಪಿ ,ಕೋಟಿನ  ಬಣ್ಣ ,ಶಾಲಾ  ಕೊಠಡಿಯ  ಒಳಗೆ  ಕಣ್ಮರೆ  ಆಗುವ  ಕೊನೆಯ  ನೋಟಕ್ಕೆ   ಕೈ  ಎತ್ತಿ  ಟಾಟಾ ಮಾಡಿ  ಹೊರಟಿದ್ದೇವೆ- ಅಪ್ಪಂದಿರು  ಅಮ್ಮಂದಿರು. ಮನೆಯ ದಾರಿ ಹಿಡಿದು ಕೆಲವು ಹೆತ್ತವರು ಅವಸರದಲ್ಲಿ, ಮತ್ತೆ ಕೆಲವರು ಸಮಾಧಾನದಲ್ಲಿ ಈಗ ಮನೆಯ ಕಡೆ ,ಕಚೇರಿಯ ದಿಕ್ಕಿಗೆ ಹೆಜ್ಜೆ ಹಾಕಿದ್ದಾರೆ . ಇನ್ನು ಕೆಲವು ಸಿಕ್ಕಾಪಟ್ಟೆ ಪುರಸೊತ್ತಿನ ಅಪ್ಪ  ಅಮ್ಮಂದಿರು  ಶಾಲೆಯ  ಆವರಣದ  ಹೊರ  ಬರುತ್ತಿದ್ದಂತೆಯೇ  ಒಂದು  ಸಿಗರೇಟು  ಹಚ್ಚಿ  ಮಾತಿಗೆ  ನಿಂತಿದ್ದಾರೆ .ಅಂದಿನ  ಹವಾಮಾನದ  ಕುರಿತು  ಒಂದು  ಟಿಪ್ಪಣಿಯಿಂದ ಶುರುವಾದದದ್ದು , ಅಪರಾಹ್ನ ಮಕ್ಕಳನ್ನು ವಾಪಾಸು ಕರೆದುಕೊಂಡು ಹೋಗುವಾಗ ಶಾಲೆಯ ಆವರಣದ ಹೊರಗೆ ದಿನವೂ  ಕಾಯುವ ಐಸ್ ಕ್ರೀಮ್ ಗಾಡಿಯವನಿಗೆ  ಶಾಪ ಹಾಕುವುದರಲ್ಲಿ  ಮುಂದುವರಿದಿದೆ. ಘಂಟೆ ಒಂಭತ್ತು ಆಗುವಾಗ ಶಾಲೆಯ ಬಾಗಿಲು ಮತ್ತು ಆವರಣದ ಬಾಗಿಲು ಬಾಗಿಲು ಮುಚ್ಚಿದ್ದಾರೆ. ಇನ್ನು ಅಪರಾಹ್ನ ಶಾಲೆ ಮುಗಿಯುವ ತನಕವೂ   ಹೊರಗಿನವರು ಹೊರಗೆ ಒಳಗಿನವರು ಒಳಗೆ. ಶಾಲೆಯ ಎದುರಿನ ಬೀದಿ ಮತ್ತೆ ನಿರ್ಜನ ನಿಶಬ್ದ ಮೌನವಾಗಿ ಬದಲಾಗಿದೆ. ಕೈಗಳೆರಡು ಖಾಲಿಯಾದದ್ದಕ್ಕೋ ಬರಿದಾದ್ದಕ್ಕೋ ಕೈಗಳನ್ನು ಬೀಸಿ ಬೀಸಿ ನಡೆಯುತ್ತಾ ಶಾಲೆಯಿಂದ ಹೊರಬಂದಿದ್ದೇನೆ. ಇನ್ನು ಕಚೇರಿಗೆ ಹೊರಡುವ ಹೊತ್ತಾದ್ದರಿಂದ, ಬೆಳಿಗ್ಗೆ ಧರಿಸಿದ  ಅಪ್ಪನ ವೇಷ ತನ್ನಷ್ಟಕ್ಕೆ ಎಲ್ಲೋ ಕಾಣೆಯಾಗಿ ಉದ್ಯೋಗಕ್ಕೆ ಒಪ್ಪುವ ರೂಪು ಮುಖ ಮುದ್ರೆಗಳು ತಂತಾನೇ ಏರಿಸಿ ನಡೆದಿದ್ದೇನೆ.