ವೃತ್ತಿಯಲ್ಲಿ ಹೃದಯ ತಜ್ಞರಾಗಿರುವ ಡಾ. ಸುರೇಶ ಸಗರದ ಅವರಿಗೆ ಸಾಹಿತ್ಯದಲ್ಲೂ ಅಷ್ಟೇ ಅಭಿರುಚಿ. ಅವರ ಕವನಗಳು
ಹಲವಾರು ಕವನ ಸಂಕಲನಗಳಾಗಿ ಪ್ರಕಟವಾಗಿವೆ. ಬಸವಣ್ಣನವರನ್ನು ಕುರಿತು ಬರೆದ ಅವರ ಕವನಗಳು ಉತ್ತಮ
ರಾಗಸಂಯೋಜನೆಯ ಜೊತೆಗೆ, ‘ಧ್ವನಿ ಸುರಳಿ’ ಗಳಾಗಿ ಕೇಳುವವರಿಗೆ ಲಭ್ಯವಾಗಿವೆ. ಹೃದಯ ಆರೋಗ್ಯ ಕುರಿತು ಸಾಮಾನ್ಯ
ಜನತೆಗೆ ಅರ್ಥವಾಗುವ ರೀತಿಯಲ್ಲಿ ಹಲವಾರು ಪುಸ್ತಕಗಳನ್ನೂ ಮತ್ತು ಲೇಖನಗಳನ್ನೂ ಪ್ರಕಟಿಸಿದ್ದಾರೆ. ಪ್ರಸ್ತುತ ‘ವೈದ್ಯ
ಸಂಪದ’ ದ ಪ್ರಧಾನ ಸಂಪಾದಕರಾಗಿದ್ದಾರೆ. ಅವರ ಕವನ ಸಂಕಲನದಿಂದ ಆಯ್ದ ಈ ಮೂರು ಕವನಗಳನ್ನು ನಿಮ್ಮ ಮುಂದೆ
ಇಟ್ಟಿರುವೆ. ಓದಿ ಪ್ರತಿಕ್ರಿಯಿಸುತ್ತೀರಿ ಎಂದು ನಂಬಿರುವೆ.
– —– ಇಂತಿ ಸಂಪಾದಕ

1) "ನಾನು"
ಎಲ್ಲಿ ಅಡಗಿತ್ತೋ, ಹೇಗೆ ಬಂತೋ
ಒಳ ಬಂದು ಗೂಡ ಕಟ್ಟಿತ್ತು
ಒಳಗಿದ್ದರೂ ಯಾವಾಗಲೂ
ಹೊರ ತೋರುವ ಆಸೆ ಹೊತ್ತು
ಪ್ರತಿ ಕ್ಷಣವೂ ಜಗಳ
ಕೊನೆಗೆ ಗೆಲ್ಲುವುದು ಅದೇ
ಆದಿಯಿಂದಲೂ ನಡೆದಿದೆ
ಈ ಕದನ, ಹೊಸ ಕವನ
ಅದೇ ಆತ್ಮಾವಲೋಕನ!
ಇಲ್ಲಿ ಕೆಲವರೇ ಗೆದ್ದರು
ಉಳಿದವರು ಇಲ್ಲೇ ಉಳಿದರು
ನಾನು ಹೋದರೆ ಹೋಗಬಹುದು
ಎಂದವರಂತು ಹೋದರು
ಇದು ಇರುವಿಕೆಯ ಸಂಕೇತ
ಇದ್ದೂ ಇಲ್ಲದಿರುವ ಸಂಕೇತವೇನು ?

2) “ಖಾಲಿ ಖಯಾಲಿ“
ಖಾಲಿ ಮಾಡುತ ನಡೆದಿರುವೆ
ಕಾಲ ತುಂಬಿದ ಚೀಲವ
ಖಾಲಿತನದ ಖಯಾಲಿಯಲ್ಲ
ಸಾಲ ತೀರಿಸಲು ಇದೆಲ್ಲಾ!
ತಳಕೆ ಕಲ್ಲು ಬಿಟ್ಟು
ಕಾಗೆ ನೀರ ಕುಡಿಯತಂತೆ
ಎಲ್ಲಿಂದ ಹೆಕ್ಕಿ ತರಲಿ ಕತೆಯ ಕಲ್ಲುಗಳ
ತುಂಬಿದ ಕೊಡ ಹುಟ್ಟಿ
ತುಳುಕುವುದು ನೋಡಿದಿರಾ?
ಇದು ಬದುಕು
ತುಂಬಾ ಥಳಕು ಬೆಳಕು
ಯಾವಾಗ ಕೊಡ ಖಾಲಿ
ಯಾರಿಗೆ ಏನೆಂದು ಕೊಡಲಿ
ಕೊಟ್ಟವನು ಪುನಃ ಪುನಃ
ಕೊಡಲಿ ಕೊಡಲಿ
ಮತ್ತೆ ಕೊಡ ತುಂಬಲಿ!

3) “ನಾನೋ ನೀನೋ ?“
ಬದುಕನ್ನೇ ಹುಡುಕುತ್ತಿದ್ದೆ
ತಡವರಿಸುತ್ತಾ ಬದುಕಿನಲ್ಲಿ
ಅವರಿಗಾಗಿ ಇವರಿಗಾಗಿ
ಎನ್ನುವ ನಾಟಕದಲ್ಲಿ
ನನ್ನೊಳಗೆ ಆವರಿಸಿಕೊಂಡ
ನಿನ್ನನ್ನೂ ಹುಡುಕುತ್ತಿದ್ದೆ
ಕೂಡಿ ಕಳೆದ ದಾರಿಯಲ್ಲಿ
ನಾನು ನಿನಗಾಗಿ
ನೀನು ನನಗಾಗಿ
ಎನ್ನುವ ಮರೀಚಿಕೆ
ತೀರದ ಅತಿ ದಾಹ
ಪಂಚ ಭೂತಗಳ
ಈ ಪಂಚಾಯಿತಿ
ಆ ನಿರ್ದೇಶಕನ
ದೂಷಿಸಿದೆ ಮತ್ತೆ ಮತ್ತೆ