’ಡೊವ್ ಡೇಲ್ ’ ಮತ್ತು ’ಗಂಟು-ಮೂಟೆ ’-ಅರ್ಪಿತ ರಾವ್

       ಅರ್ಪಿತ ರಾವ್ ಮಗನೊಂದಿಗೆ

ಪರಿಚಯ

ಅರ್ಪಿತ  ರಾವ್  ಹುಟ್ಟಿ ಬೆಳೆದಿದ್ದು ಸೊರಬ ತಾಲೂಕಿನ ಬರಿಗೆ ಎಂಬ ಪುಟ್ಟ ಹಳ್ಳಿಯಲ್ಲಿ. ಮೊದಲಿನಿಂದ ಹಸಿರು ತುಂಬಿದ ಕಾಡು , ಧೋ ಎಂದು ಸುರಿಯುವ ಮಳೆ ನೋಡಿ ಅದೇನೋ ಕವನ ಗೀಚುವ , ಕಥೆ ಬರೆಯುವ ಹುಮ್ಮಸ್ಸು ಇದಕ್ಕೆ ಸಾಥ್ ನೀಡಿದ್ದು ಸಾಹಿತ್ಯದಲ್ಲಿ ಆಸಕ್ತಿ ಬೆಳೆಸಿದ್ದು ಪತ್ರಕರ್ತರಾದ  ಇವರ ಅಪ್ಪ . ಕನಸನ್ನು ನನಸಾಗಿಸಿದ್ದು ಉಜಿರೆಯ ಪತ್ರಿಕೋದ್ಯಮ ವಿಭಾಗ. ಸಂಯುಕ್ತ ಕರ್ನಾಟಕದಲ್ಲಿ ಇಂಟರ್ನ್ಶಿಪ್ , ದೂರದರ್ಶನದಲ್ಲಿ ಸ್ವಲ್ಪ ದಿನಗಳ ವೃತ್ತಿ.

ಮದುವೆಯಾಗಿ ಬಂದಿದ್ದು ಲಂಡನ್ ಗೆ್. ಕಳೆದ ೮ ವರ್ಷಗಳಿಂದ ಇಂಗ್ಲೆಂಡ್ ನಲ್ಲಿ ವಾಸ. ಆಕ್ಸಫರ್ಡ್ ನ ಬ್ಯಾನ್ಬರಿಯಲ್ಲಿ  ಪ್ರಸ್ತುತ ವಾಸ.  ವಿಜಯ ನೆಕ್ಸ್ಟ್ , ವಿಜಯಕರ್ನಾಟಕ , ಸಖಿ ಪಾಕ್ಷಿಕ ,ಉದಯವಾಣಿ, ಹೊಸದಿಗಂತ ಮುಂತಾದ ಪತ್ರಿಕೆಗಳಲ್ಲಿ ಸಾಕಷ್ಟು ಲೇಖನಗಳು ಪ್ರಕಟಗೊಂಡಿವೆ. ಬೇಸರ ಕಳೆಯಲು ಗೀಚುವ,ಕೆಲವೊಮ್ಮೆ ಪ್ರಕಟಗೊಂಡ ಲೇಖನಗಳನ್ನು  ಇವರದೇ ಸ್ವಂತ ಬ್ಲಾಗ್ http://ibbani-ibbani.blogspot.co.uk/ ಇಲ್ಲಿ ಓದಬಹುದು .  ಜಾನಪದ ಗೀತೆಗಳನ್ನು ಹಾಡುವುದು , ಹೊಸ ರುಚಿ ಮಾಡುವುದು ಹವ್ಯಾಸ . ಪ್ರಸ್ತುತ ರಿಟೇಲ್ ವಿಭಾಗದಲ್ಲಿ ಉದ್ಯಮದಲ್ಲಿರುವ ಅರ್ಪಿತ ಅನಿವಾಸಿಯಲ್ಲಿ ಹಲವು ನೆನಪುಗಳನ್ನು ಈ ಹಿಂದೆ ಹಂಚಿಕೊಂಡಿದ್ದಾರೆ. ಕಳೆದವಾರ ಹಣತೆ ಎನ್ನುವ ಅರ್ಥಪೂರ್ಣ ಕವನವನ್ನು ಬರೆದಿದ್ದರು. ಈ ವಾರ ಡೊವ್ ಡೇಲ್ ಎನ್ನುವ ಸ್ಥಳಕ್ಕೆ ಕೊಟ್ಟ ಭೇಟಿಯನ್ನೂ ಜೊತೆಗೆ ತಾವು ನೋಡಿದ ಗಂಟು-ಮೂಟೆ ಎನ್ನುವ ಬಹು ಚರ್ಚಿತ ಸಿನಿಮಾ ಬಗ್ಗೆ ವಯಕ್ತಿಕ ಅನಿಸಿಕೆ್ಗಳನ್ನು  ಹಂಚಿಕೊಂಡಿದ್ದಾರೆ- –ಸಂ


ಇಂಗ್ಲೆಂಡಿನ ಬಹುತೇಕ ಭಾಗಗಳು ವರ್ಷದ ಬೇರೆಬೇರೆ ಕಾಲಮಾನಗಳಲ್ಲಿ ವಿಭಿನ್ನ ರೀತಿಯಲ್ಲಿ ಕಾಣುತ್ತವೆ ಮತ್ತು ಅದಕ್ಕೆ ತನ್ನದೇ ಆದ ವೈಶಿಷ್ಟತೆಯನ್ನು ಕೂಡ ಹೊಂದಿರುವುದು ಕಂಡುಬರುತ್ತದೆ. ಉದಾಹರಣೆಗೆ ಬೇಸಿಗೆಯಲ್ಲಿ ಒಂದು ರೀತಿಯ ಹಸಿರಾದರೆ ಚಳಿಗಾಲದಲ್ಲಿ ಬೋಳು ಮರಗಳು ಕೆಲವೊಮ್ಮೆ ಹಿಮ ತುಂಬಿದ ಶ್ವೇತವರ್ಣವನ್ನು ಮೈತುಂಬಿಸಿಕೊಂಡಿರುವ ಪ್ರಕೃತಿಯ ಅಂದವನ್ನು ನೋಡುವುದೇ ಇನ್ನೊಂದು ಸೊಬಗು. ಹಾಗೆಯೇ ಶಿಶಿರ ಋತುವಿನಲ್ಲಿ ಹೂವಿನಿಂದ ಹಾಸಿ ಹೊದ್ದಿರುವ ಪ್ರಕೃತಿಯನ್ನು ಕಣ್ಣು ತುಂಬಿಸಿಕೊಳ್ಳುವುದು ಎಲ್ಲಕ್ಕಿಂತ ಚೆಂದ.

ಹಾಗೆಯೇ ಇನ್ನೇನು ಇಲ್ಲಿನ ವಸಂತ ಕಾಲ ಮುಗಿದು ಚಳಿಗಾಲ ಪ್ರಾರಂಭವಾಗಬೇಕು ಎನ್ನುವಾಗ  ನಾವು ಈ ಭಾರಿ ಹೋಗಿದ್ದು ಪೀಕ್ ಡಿಸ್ಟ್ರಿಕ್ಟ್ . ಹೆಸರಿಗೆ ತಕ್ಕ ಹಾಗೆ ಇಲ್ಲಿ ಎಲ್ಲಿ ನೋಡಿದರೂ ಹಸಿರು ಬೆಟ್ಟಗಳು. ಮಲೆನಾಡಿನಲ್ಲಿ ಬೆಳೆದ ನನಗೆ ಹಸಿರು ಬೆಟ್ಟಗುಡ್ಡಗಳು ಹೊಸದಲ್ಲ ಅವುಗಳ ತಪ್ಪಲಿನಲ್ಲೇ ಬೆಳೆದು ಬಂದಿದ್ದರಿಂದ ಅದೊಂದು ರೀತಿಯಲ್ಲಿ ಎಷ್ಟು ಸೋಜಿಗವೋ ಅಷ್ಟೇ ರೂಢಿ ಕೂಡ ಎನ್ನಬಹುದು. ಆದರೆ  ಇಲ್ಲಿನ ಬೆಟ್ಟಗಳ  ಸೊಗಸೇ ಬೇರೆ. ಎತ್ತರದ ದಟ್ಟ ಅರಣ್ಯಗಳ ನಡುವಿನ ಬೆಟ್ಟಗಾಡುಗಳು ಇದಲ್ಲ. ಮನುಷ್ಯ ತನ್ನ ಅನುಕೂಲಕ್ಕೆ ತಕ್ಕಂತೆ ತಾನೇ ಮಾಡಿಕೊಂಡಿದ್ದಾನೇನೋ ಎಂಬಂತಿರುತ್ತದೆ ಇಲ್ಲಿನ ಬೆಟ್ಟಗಳು.ಪೀಕ್ ಡಿಸ್ಟ್ರಿಕ್ಟ್ ನ ಯಾವುದೇ ಭಾಗಗಳಿಗೆ ಹೋದರೂ ಕೂಡ ಸಾಕಷ್ಟು ನಡೆಯುವುದು ಅಥವಾ ಬೆಟ್ಟ ಹತ್ತುವುದು ಇದ್ದೇ ಇರುತ್ತದೆ ಆದ್ದರಿಂದ ರಣ ಬಿಸಿಲಿನಲ್ಲಿ ಹೋದರೆ ಬೆಟ್ಟ ಹತ್ತುವುದು ಕಷ್ಟವಾಗಬಹುದು ಆದ್ದರಿಂದ  ಸ್ಪ್ರಿಂಗ್ ಕಾಲದಲ್ಲಿ ಹೋದರೆ ಇಲ್ಲಿನ ಪ್ರವಾಸಿ ಸ್ಥಳಗಳನ್ನು ಸಾಕಷ್ಟು ಮಜಾ  ಮಾಡಬಹುದು .

ಹಾಗೆ ಈ ಬಾರಿ ನಾವು ನೋಡಹೋಗಿದ್ದು ಪೀಕ್ ಡಿಸ್ಟ್ರಿಕ್ಟ್ ನ ಡೋವ್ ಡೇಲ್

ಡೋವ್ ಡೇಲ್ :

ಡರ್ಬಿಶೇರ್ ನಲ್ಲಿರುವ ಡೋವ್ ಡೇಲ್ ಗೆ ವರ್ಷಪೂರ್ತಿ ಸಾವಿರಾರು ಪ್ರವಾಸಿಗರು ಬರುತ್ತಾರೆ. ನಾವು ಹೋಗಿದ್ದು ಸೆಪ್ಟೆಂಬರ್ ನ ಮಧ್ಯ ಭಾಗವಾದ್ದರಿಂದ ಹದವಾದ ಚಳಿ ಜೊತೆಗೆ ಸೂರ್ಯನ ಎಳೆ ಬಿಸಿಲು ಎರಡೂ ಬೆರೆತು ಮನಸ್ಸಿಗೆ ಮುದ ನೀಡುವ ವಾತಾವರಣವಾಗಿತ್ತು . ಡೋವ್ ಡೇಲ್ ಸ್ಟೆಪ್ಪಿಂಗ್ ಸ್ಟೋನ್ ಎಂದೇ ಕರೆಯಲಾಗುವ ಈ ಪ್ರವಾಸಿ ಸ್ಥಳವನ್ನು ಡೋವ್ ಡೇಲ್ ವಾಕ್ ಎಂದು ಕೂಡ ಹೇಳುತ್ತಾರೆ.  ಇದಕ್ಕೆ ಕಾರಣ ಇಲ್ಲಿ ಹರಿಯುತ್ತಿರುವ ನದಿಯ ಮದ್ಯೆ ಕಲ್ಲನ್ನು ಇಡಲಾಗಿದ್ದು ಇಲ್ಲಿನ ಬೆಟ್ಟವನ್ನು ಹತ್ತಲು ಒಂದೊಂದೇ ಕಲ್ಲುಗಳನ್ನು ದಾಟಿ ಹೋಗಬೇಕು.
ಇಲ್ಲಿ ಹದಿನೆಂಟನೇ ಶತಮಾನದಲ್ಲಿ  ಪ್ರಾರಂಭವಾದ  ಪ್ರವಾಸೋದ್ಯಮ ಇಂದು ಯುನೈಟೆಡ್ ಕಿಂಗ್ಡಮ್  ನ ಅತ್ಯಂತ  ಜನಪ್ರಿಯ ಪ್ರವಾಸಿ ತಾಣವಾಗಿ ಮಾರ್ಪಟ್ಟಿದೆ. ಇಲಾಮ್ ಎಂಬ ಹಳ್ಳಿಯಲ್ಲಿ ಸುಮಾರು ೪೫ ಮೈಲಿಯವರೆಗೆ ಹರಿಯುವ ಡೋವ್ ಎಂಬ ನದಿಯ ತಟದಲ್ಲಿ ಸುಣ್ಣದ ಕಲ್ಲಿನ ಕೊರೆತಗಳಿಂದ ನಿರ್ಮಾಣವಾದ ಬೆಟ್ಟವನ್ನು ಡೋವ್ ಡೆಲ್ ವ್ಯಾಲಿ ಎಂದೇ ಕರೆಯುತ್ತಾರೆ.

ಅದೆಲ್ಲಕ್ಕಿಂತ ಇಲ್ಲಿ ಮನಸೂರೆಗೊಳ್ಳುವುದು ಡೋವ್ ನದಿಯ ಜುಳುಜುಳು ನಾದದ ಮಧ್ಯೆ  ಸ್ಟೆಪ್ಪಿಂಗ್ ಸ್ಟೋನ್ ಗಳಲ್ಲಿ ಅತ್ತ  ದಾಟಿ ಹೋದರೆ ಸುತ್ತಲೂ ಹಸಿರು ಹಾಸಿದ ಬೆಟ್ಟಗಳು ಮತ್ತು ಅದನ್ನು ನೋಡಲೆಂದೇ ಪ್ರವಾಸಿಗರೊಂದಿಗೆ ಬಂದಂತಿರುವ ಚಿನ್ನದ ಗೆರೆ ಎಳೆದಂತೆ ಕಾಣುವ ಸೂರ್ಯನ ಹದವಾದ ಕಿರಣಗಳು . ಬೆಟ್ಟದ ತುದಿಯನ್ನು ಹತ್ತಿ ನೋಡಿದರೆ ಅಲ್ಲಿನ ಚಿತ್ರಣ ಮನಸ್ಸನ್ನು ಮುದಗೊಳಿಸುವುದು ಖಂಡಿತ.

ಡರ್ವೆಂಟ್ :

ಡೋವ್ ಡೇಲ್ ನಿಂದ ಸುಮಾರು ಒಂದು ತಾಸು ಕಾರಿನ ಪ್ರಾಯಾಣ ಡರ್ವೆಂಟ್ ಗೆ.  ಡರ್ವೆಂಟ್ ಕೂಡ ಪೀಕ್ ಡಿಸ್ಟ್ರಿಕ್ಟ್ ನ ಒಂದು ಮುಖ್ಯ ಪ್ರವಾಸಿ ತಾಣಗಲ್ಲಿ ಒಂದು . ಡೋವ್ ಡೇಲ್ ನಿಂದ ಡರ್ವೆಂಟ್ ಪ್ರಯಾಣವೇ ಸುಂದರ. ಇಕ್ಕೆಲಗಳಲ್ಲಿ ಇರುವ ಬೆಟ್ಟಗಳ ನಡುವೆ ಕಾರಿನಲ್ಲಿ ಹೋಗುವ ಅನುಭವ ಒಂದುರೀತಿಯ ಮುದ ನೀಡುತ್ತದೆ. ಹಸಿರು ಮತ್ತು ಹಳದಿ ಬಣ್ಣಗಳಿಂದ ಕುಡಿದ ಬೆಟ್ಟಗಳು ಮತ್ತು ಅಲ್ಲಲ್ಲಿ ಕುದುರೆ , ಮೇಕೆ , ಕುರಿಗಳು  ಮೇಯುತ್ತಿರುವುದನ್ನು  ಕಾಣಬಹುದು.  ಕೆಲವು ಭಾಗಗಳಲ್ಲಿ ಇಲ್ಲಿನ ಟ್ರೆಕಿಂಗ್ ಎಂದೇ ಬರುವ ಜನರು ನಡೆದು ಹೋಗುವುದು ಅಥವಾ ಸೈಕ್ಲಿಂಗ್ ಮಾಡಿಕೊಂಡು ಪ್ರವಾಸಿ ಸ್ಥಳಕ್ಕೆ ಹೋಗುತ್ತಿರುವುದು ಕಂಡುಬರುತ್ತದೆ.


ಡೋವ್ ಡೇಲ್ ಗೆ ಹೋಲಿಸಿದರೆ ಡರ್ವೆಂಟ್ ಸಂಪೂರ್ಣ ವಿಭಿನ್ನ ಎನಿಸುತ್ತದೆ. ಇದೊಂದು ನಿಸರ್ಗಧಾಮ . ಡಾರ್ವೆಂಟ್ ನಲ್ಲಿ ಹಸಿರು ಹಾಸಿ ಹೊದ್ದಂತಿರುವ ಸ್ಥಳದಲ್ಲಿ ಪ್ರವಾಸಿಗರಿಗೋಸ್ಕರವೇ ಕುಳಿತುಕೊಳ್ಳಲು ಅಲ್ಲಲ್ಲಿ ಕಲ್ಲಿನ ಬೆಂಚು. ಅಲ್ಲಿ ಕುಳಿತು ಎದುರುಗಿರುವ ಪ್ರಕೃತಿಯನ್ನು ನೋಡುತ್ತಿದ್ದರೆ ಸುತ್ತಲಿನ ಪ್ರಪಂಚವೇ ಮರೆತಂತ ಅನುಭವ.  ಇಲ್ಲಿ ಡರ್ವೆಂಟ್ ನದಿಗೆ  ಬ್ರಿಜ್ ಕಟ್ಟಲಾಗಿದೆ . ಜೊತೆಗೆ ಇದನ್ನು ಡರ್ಬಿಶೈರ್ ನ ಲೇಕ್ ಡಿಸ್ಟ್ರಿಕ್ಟ್ ಎಂದು ಕರೆಯಲಾಗುತ್ತದೆ. ಜೊತೆಗೆ ಇಲ್ಲಿ ಕಾಡುಗಳ ಮಧ್ಯೆ ನಡೆದುಕೊಂಡು ಹೋಗಿ ಪ್ರವಾಸಿ ಸ್ಥಳವನ್ನು ತಲುಪಬೇಕಾಗಿದ್ದು ಇದು ದಿನನಿತ್ಯದ ಜೀವನ ಜಂಜಾಟದಲ್ಲಿರುವವರಿಗೆ ಒಂದು ರೀತಿಯ ಪ್ರಶಾಂತ ವಾತಾವರಣವನ್ನು ನೀಡುತ್ತದೆ.

ಇಷ್ಟೇ ಅಲ್ಲದೆ ಪೀಕ್ ಡಿಸ್ಟ್ರಿಕ್ಟ್ ಗೆ ಹೋಗುವಾಗ ಆಗಾಗ ಬರುವ ಮಳೆ ಎದುರಿಸಲು ರೈನ್ ಕೋಟ್ ಅಥವಾ ಕೊಡೆ ಮತ್ತು ಬೆಟ್ಟವನ್ನು ಹತ್ತಲು ಟ್ರೆಕಿಂಗ್ ಗೆ ಸೂಕ್ತವಾದ ಶೂ  ಅನಿವಾರ್ಯ.

———————ಅರ್ಪಿತ ರಾವ್, ಬ್ಯಾನ್ಬರಿ


ಚಿತ್ರ ವಿಮರ್ಶೆ-  ’ಗಂಟು-ಮೂಟೆ ’


ಆ ಚಿತ್ರ ಪ್ರಾರಂಭವಾಗುವುದೇ ಹಾಗೆ ಚಲನಚಿತ್ರದ ಮೇಲೆ ಅತೀವ ಹುಚ್ಚನ್ನು ಹಚ್ಚಿಕೊಂಡಿರುವ ಹೆಣ್ಣು ಮಗಳು ಒಂಟಿಯಾಗಿ ಮೂವಿ ನೋಡಲು ಹೋದಾಗ ಅನಿವಾರ್ಯವಾಗಿ ಶೋಷಣೆಗೆ  ಒಳಗಾಗಿ ತತ್ತರಿಸಬೇಕಾಗುತ್ತದೆ . ಹಾಗಂತ ಇದು ಹೆಣ್ಣಿನ ಶೋಷಣೆಗೆ ಸಂಬಂಧ ಪಟ್ಟ  ಕಥೆಯಲ್ಲ. ಜೀವನದ ಪಯಣದಲ್ಲಿ ಪ್ರತಿಯೊಬ್ಬರೂ ಒಂದಲ್ಲ ಒಂದು ರೀತಿಯ ಗಂಟು ಮೂಟೆ ಕಟ್ಟಿಕೊಂಡು ಓಡಾಡುತ್ತಿರುವವರೇ .

ನಾವು ಇರುವಷ್ಟು ದಿನ ನಮ್ಮ ಜೊತೆ ಕೆಲವು ಮರೆಯಲಾರದ ನೆನಪುಗಳನ್ನು ಹೊತ್ತು ಸಾಗುವುದು ಅನಿವಾರ್ಯ ಕೂಡ.  ಅಂತಹ ಒಂದು ಪ್ರಯಾಣವನ್ನು ತಿಳಿಸುವ ಚಿತ್ರವೇ ರೂಪ ರಾವ್ ನಿರ್ದೇಶನದ ಗಂಟು ಮೂಟೆ . ಒಂದು ಮುಗ್ದ ವಯಸ್ಸಿನ ಹೆಣ್ಣು ಮಗಳು  ವಯಸ್ಸಿಗೆ ಮೀರಿ ಪ್ರೀತಿಯಲ್ಲಿ ಮುಳುಗಿ ತನ್ನ ಬದುಕನ್ನೇ ಹೇಗೆ ತಿರುಗಿಸಿಕೊಳ್ಳಬಲ್ಲಳು ಎಂಬುದನ್ನು ಈ ಚಿತ್ರ ಮನದಟ್ಟು ಮಾಡುತ್ತದೆ. ಹದಿಹರೆಯದಲ್ಲಿ ಕಾಡುವ ಪ್ರೀತಿ ಹೇಗೆ ಜೀವನ ಪರ್ಯಂತ ಮರೆಯಲಾರದೆ ಬೆನ್ನತ್ತ್ತಿ ಬಂದುಬಿಡಬಹುದು ಎಂಬುದನ್ನು ತೋರಿಸುವ ಪ್ರಯತ್ನ ಈ ಚಿತ್ರದಲ್ಲಿದೆ .ಚಿತ್ರದಲ್ಲಿ ಕಂಡು ಬರುವ ಕೆಲವು ಘಟನೆಗಳು ಬಹುತೇಕ ಜನರು ಶಾಲಾ ಕಾಲೇಜುಗಳಲ್ಲಿ ಒಂದಿಲ್ಲೊಂದು ರೀತಿಯಲ್ಲಿ ಅನುಭವಿಸಿರುವುದು ನಿಜವಾದ್ದರಿಂದ ನೋಡುಗರನ್ನು ನೆನಪಿನ ಲೋಕಕ್ಕೆ ಕರೆದುಕೊಂಡು ಹೋಗಬಹುದಾದ ಚಿತ್ರವಿದು.

ಚಲನಚಿತ್ರ ನೋಡಿ , ಪ್ರೀತಿಯ ಬರಹಗಳನ್ನು ಬರೆದು , ಚಲನಚಿತ್ರದ ಹೀರೋ ಗಳ ಮೇಲೆ ಬೆಳೆಯುವ ಪ್ರೀತಿ ಕೊನೆಗೆ ತನಗೂ ಅಂತಹದೇ ಒಂದು  ಹುಡುಗನನ್ನು ಹುಡುಕುವಲ್ಲಿ ತಲ್ಲಣಿಸುತ್ತದೆ ಎಂದು ಕೂಡ ಈ ಚಿತ್ರದಲ್ಲಿ ತೋರಿಸಲಾಗಿದೆ. ಪ್ರಬುದ್ಧವಾಗಿ ಬೆಳೆಯುವ ಮೊದಲೇ ಇಂತಹ ಆಸೆಗಳಿಗೆ ಒಳಗಾಗುವ ಹೆಣ್ಣು ಮುಂದೇನೆ್ಲ್ಲ ಅನುಭವಿಸಬೇಕಾಗಬಹುದು ಎಂಬುದನ್ನು ತೋರಿಸುವ ಪ್ರಯತ್ನ ರೂಪ ರಾವ್ ಮಾಡಿದ್ದಾರೆ .   ಚಲನ ಚಿತ್ರ ಸಂಪೂರ್ಣವಾಗಿ ೯೦ ರ ದಶಕದಲ್ಲಿ ನಡೆದಿರಬಹುದಾದ ಘಟನೆಗಳಂತೆ ಪತ್ರ ಮತ್ತು ಲ್ಯಾಂಡ್ಲೈನ್ ಫೋನ್ ಇಂತವನ್ನೆಲ್ಲ ತೋರಿಸಿದರೂ ಕೂಡ ಹೆಚ್ಚಿನ ಕಡೆ ಇದು ಇಂದಿಗೂ ಕೂಡ ಅನ್ವಯಿಸುತ್ತದೆ ಎಂದು ನನ್ನ ಅಭಿಪ್ರಾಯ. ಇಂದು ಕೂಡ ಶಾಲಾ ಕಾಲೇಜುಗಳಿಗೆ ಹೋಗುವ ಮಕ್ಕಳಲ್ಲಿ ಇಂತಹ ಆಸೆ ಆಕಾಂಕ್ಷೆಗಳು ಸಹಜ ಮತ್ತು ಅದು ಕೂಡ ಇಂತಹದೇ ಪರಿಣಾಮವನ್ನು ಬೀರಿದ ಉದಾಹರಣೆಗಳನ್ನು ನಮ್ಮ ಸುತ್ತಮುತ್ತಲೇ ಕಾಣಬಹುದು.

ಈಗಿನ ಹೈಸ್ಕೂಲ್ ಮತ್ತು ಕಾಲೇಜಿನ ಮಕ್ಕಳು ಈ ಚಿತ್ರವನ್ನು ನೋಡಿ ತಾವೂ ಹೀಗಾಗಬಾರದು ಎಂಬುದನ್ನು ಮನಗೊಳ್ಳಬೇಕು ಎಂಬ ಸಂದೇಶವನ್ನು ಸಾರ ಹೊರಟಿರುವ ಚಿತ್ರವಿದು . ಆದರೆ ಅಲ್ಲಲ್ಲಿ ಕಂಡು ಬರುವ ಅಗತ್ಯಕ್ಕಿಂತ ಹೆಚ್ಚೆನಿಸುವ ಪ್ರೇಮಕ್ಕಿಂತ ಆ ಸಮಯದಲ್ಲಿ ಕಂಡುಬರುವ ಬಯಕೆಯನ್ನು ತೋರಿಸುವ ಕಿಸ್ಸಿಂಗ್ ಸೀನ್ ಗಳು ಮುಜುಗರ ಉಂಟು ಮಾಡುವಂತೆಯೂ ಅದರ ಅವಶ್ಯಕತೆ ಇರಲಿಲ್ಲ ಎಂದು ಕೂಡ ಅನ್ನಿಸುತ್ತದೆ.  ಹದಿಹರೆಯದ ಪ್ರೀತಿ ಹೇಗೆ ಮಕ್ಕಳ ಜೀವನವನ್ನೇ ಹಾಳುಮಾಡಿಬಿಡಬಲ್ಲದು ಎಂಬುದನ್ನು ಇಲ್ಲಿ ತೋರಿಸಲಾಗಿದೆ.  ಹದಿಹರೆಯದ ಸಮಯದಲ್ಲಿ ಹುಟ್ಟುವ ಮೊದಲ ಪ್ರೀತಿ ಕೊನೆಯವರೆಗೂ ಇರುತ್ತದೆಯೋ ಇಲ್ಲವೋ ಆದರೆ ಅದರ ನೆನಪು ಮಾತ್ರ ಕಾಡುವುದು ಖಂಡಿತ ಎಂಬುದು ಈ ಚಲನಚಿತ್ರದ ಪೂರ್ಣ ಸಂದೇಶ. ಅಂತಹ ವಯಸ್ಸಿನಲ್ಲಿ ತೆಗೆದುಕೊಳ್ಳುವ ನಿರ್ಧಾರ ಇಡೀ ಇಬ್ಬರ ಜೀವನವನ್ನೇ ಹಾಳುಮಾಡಿಬಿಡಬಹುದು ಅಥವಾ ಒಂದು ವ್ಯಕ್ತಿತ್ವವನ್ನು ರೂಪಿಸಲು ಬುನಾದಿ ಆಗಿಬಿಡಬಹುದು ಎಂಬುದನ್ನು ತೋರಿಸಿರುವ ಚಿತ್ರವಿದು. ಕಥಾನಾಯಕಿಯನ್ನೇ ಮುಖ್ಯವಾಗಿ ಇಟ್ಟುಕೊಂಡು ಮಾಡಿರುವ ಈ ಚಿತ್ರದಲ್ಲಿ ತೇಜು ಬೆಳವಾಡಿಯವರ ಪಾತ್ರ ಸಹಜ ಸುಂದರವಾಗಿ ಮೂಡಿ ಬಂದಿದೆ.

      ರೂಪ ರಾವ್-ನಿರ್ದೇಶಕಿ

ಚಿತ್ರದಲ್ಲಿ ಬರುವ ಹಾಡುಗಳು ಒಳ್ಳೆಯ ಸಾಹಿತ್ಯವನ್ನು ಹೊಂದಿದ್ದು , ಕಾಲೇಜಿನ ಮಕ್ಕಳ ಮನಸ್ಥಿತಿ ಸಾರುತ್ತದೆ. ಕಥೆಗೆ ತಕ್ಕ ಪಾತ್ರವನ್ನು ಮಾಡುವಲ್ಲಿ ನಿಶ್ಚಿತ್ ಮತ್ತು ತೇಜು ಬೆಳವಾಡಿ ಇಬ್ಬರೂ ಯಶಸ್ವಿಯಾಗಿದ್ದಾರೆ. ಕಥಾ ನಾಯಕನಾದ ನಿಶ್ಚಿತ್ ಕೂಡ ಚಲನಚಿತ್ರ ಮುಗಿದ ನಂತರವೂ ಮನಸ್ಸಿನಲ್ಲಿ ಉಳಿಯುತ್ತಾರೆ . ನೀವೂ ಒಮ್ಮೆ ಈ ಚಲನಚಿತ್ರ ವೀಕ್ಷಿಸಿ ಮತ್ತು ಹಳೆಯ ದಿನಗಳ ಮೆಲುಕುಹಾಕಿ.-ಅರ್ಪಿತ ರಾವ್, ಬ್ಯಾನ್ಬರಿ

(ಮುಂದಿನ ವಾರ -ದೃಶ್ಯ ಕಾವ್ಯಗಳು)

ಸುಮನ್ ನಗರ್ಕರ್ ಅವರೊಂದಿಗೆ ಆತ್ಮೀಯ ಸಂವಾದ- ಡಾ. ಪ್ರೇಮಲತ ಬಿ.

ಯುಗಾದಿ ಹಬ್ಬ  ಈ ವರ್ಷ  ಮಾರ್ಚ್  ತಿಂಗಳಲ್ಲೇ ಬಂದು ಹೋಯ್ತು. ಆದರೆ ಯು.ಕೆ.  ಕನ್ನಡಿಗರಿಗೆ ಇಡೀ ಏಪ್ರಿಲ್ ನ ವಾರಾಂತ್ಯಗಳೆಲ್ಲ ಯುಗಾದಿಯ ಕಂಪನ್ನು ಸೂಸುವ ದಿನಗಳಾಗಿವೆ. ಕನ್ನಡದ ಕುಹೂ… ಈ ತಿಂಗಳೆಲ್ಲ ಕಿವಿಯನ್ನು ತುಂಬುವ ಹರ್ಷ!  ಸಿನಿಮಾ, ಸಂಗೀತ, ಸಾಹಿತ್ಯ ,ಸಾಂಸ್ಕೃತಿಕ ಕಾರ್ಯಕ್ರಮಗಳ  ಹಸಿರು ತೋರಣ. ಹೊಸಬೇರು , ಹಳೆ ಚಿಗುರುಗಳೆಲ್ಲ  ತಾಜಾತನದಿಂದ ಮೈ ತುಂಬಿಕೊಳ್ಳುವ ಸಮಯವಿದು.  ಸ್ವಚ್ಛ, ಶುಭ್ರ ಚೈತನ್ಯದಲ್ಲಿ ನಳ ನಳಿಸುವ ಈ ಸಮಯ ಯು.ಕೆ. ಕನ್ನಡಿಗರ ಕಣ್ಮನಗಳನ್ನು ಸಡಗರದ ಕಲರವಗಳಿಂದ ತುಂಬುವ ಸಂಭ್ರಮದ ಸಮಯ.

ಏಪ್ರಿಲ 8 ರಂದು ಡಾನ್ಕ್ಯಾಸ್ಟರಿನ ಮತ್ತು ಸುತ್ತಲ ಕನ್ನಡಿಗರಿಗೆ ಹೊಚ್ಚ, ಹೊಸ ಕನ್ನಡ ಸಿನಿಮಾವನ್ನು ವೀಕ್ಷಿಸುವ ಅವಕಾಶ. ಹೊಚ್ಚ, ಹೊಸತೆಂದರೆ ಇನ್ನೂ ಕರುನಾಡಿನಲ್ಲೇ ವಾಣಿಜ್ಯ ಮಟ್ಟದಲ್ಲಿ ಬಿಡುಗಡೆಯಾಗಿರದ, ನಾಲ್ಕು ರಾಜ್ಯ ಪ್ರಶಸ್ತಿಗಳನ್ನು ಬಾಚಿಕೊಂಡು  ಅಂತರ ರಾಷ್ಟ್ರೀಯ ಮಟ್ಟದ ಸಿನಿಮಾ ಫೆಸ್ಟಿವಲ್ ಗಳಲ್ಲಿ ಪ್ರದರ್ಶನಗೊಂಡಿರುವ ‘ಜೀರ್ಜಿಂಬೆ’ ಎನ್ನುವ ಕುತೂಹಲಕರ ಹೆಸರನ್ನು ಹೊತ್ತ ಸಿನಿಮಾ. ಹೊಸ ಭರವಸೆಗಳ  ಯುವ ಸರದಾರ ಕಾರ್ತಿಕ್ ಸರಗೂರು ಅವರ ನಿರ್ದೇಶನದ ಚಿತ್ರ.

ಕನ್ನಡ ಸಿನಿಮಾದಲ್ಲಿ ಹೊಸತನ್ನು ಬಯಸುವವರಿಗೆ, ಹೊಸತನ್ನು ಕೊಡುವ ಉತ್ಸಾಹೀ ಜನರಿದ್ದಾರೆ. ಈ ಬಾರಿ  ಅಂತಹ ಉತ್ಸಾಹದ ಮೂಟೆಯನ್ನೊತ್ತು  ಕ್ಯಾಲಿಫೋರ್ನಿಯಾದ ಫೋಲ್ಸಾಮ್ ನಿಂದ ಬಂದಿಳಿದವರು ಬೆಳದಿಂಗಳ ಬಾಲೆ ಖ್ಯಾತಿಯ ಸುಮನ್ ನಗರ್ಕರ್ ಮತ್ತು ಅವರ ಪತಿ ಗುರುದೇವ್ ನಾಗರಾಜ್.  ಏಪ್ರಿಲ್ 14 ರಂದು  ನಡೆಯುತ್ತಿರುವ ಕನ್ನಡಿಗರು ಯು.ಕೆ. (ಕೆ.ಯು.ಕೆ) ಆಯೋಜಿಸಿಕೊಂಡಿರೋ ಯುಗಾದಿ ಹಬ್ಬಕ್ಕೆ ಅತಿಥಿಗಳಾಗಿ ಬಂದಿರುವ ಅವರು ಇದೇ ಅವಕಾಶವನ್ನು ಸದುಪಯೋಗಿಸಿಕೊಂಡು ‘ಜೀರ್ಜಿಂಬೆ’ ಚಿತ್ರದ ಜೊತೆ ಯು.ಕೆ.ಯ ಹಲವೆಡೆ  ಪ್ರಯಾಣ  ಮಾಡಿ, ಈ ಸಿನಿಮಾದ ಪ್ರದರ್ಶನ ನೀಡಿ ಒಂದು ಉತ್ತಮ ಸಿನಿಮಾಕ್ಕೆ ರಾಯಭಾರಿಗಳಾಗಿ ಕೆಲಸಮಾಡುವ ಉತ್ಸಾಹ ತೋರಿದ್ದಾರೆ.

ಚಿತ್ರ ಕೃಪೆ- ಗುರುದೇವ್ ನಾಗರಾಜ್                                                 

ಸುಮನ್ ನಗರ್ಕರ್  1993-2001 ರವರೆಗೆ ನಿಷ್ಕರ್ಷ, ನಮ್ಮೂರ ಮಂದಾರ ಹೂವು, ಬೆಳದಿಂಗಳ ಬಾಲೆ, ಅಮ್ಮಾವ್ರ ಗಂಡ, ದೋಣಿಸಾಗಲಿ, ಹೂ ಮಳೆ, ಮುಂಗಾರಿನ ಮಿಂಚು, ರೆ.., ಯಕ್ಷಪ್ರಶ್ನೆ, ಪ್ರೀತ್ಸು ತಪ್ಪೇನಿಲ್ಲ ಮುಂತಾದ ಚಿತ್ರಗಳಲ್ಲಿ ನಾಯಕ ನಟಿಯ ಪಾತ್ರದಿಂದ ಹಿಡಿದು, ನಾನಾ ಬಗೆಯ ಪಾತ್ರಗಳಲ್ಲಿ ನಟಿಸಿದ ಕಲಾವಿದೆ. ಸುನಿಲ್ ಕುಮಾರ್ ದೇಸಾಯಿ, ನಾಗತಿ ಹಳ್ಳಿ ಚಂದ್ರಶೇಖರ್ ಮುಂತಾದ ನಿರ್ದೇಶಕರ ಗರಡಿಯಲ್ಲಿ ಪಳಗಿದ ಪ್ರಬುದ್ದ ನಟಿ. ಆದರೂ ಈ ಎಂಟು ವರ್ಷಗಳ ಕಾಲದಲ್ಲಿ ಈ ನಟಿಗೆ ಸವಾಲೆಸೆಯುವ ಪಾತ್ರಗಳು ದೊರಕಿದ್ದು ಕಡಿಮೆಯೇ. ರಂಗಭೂಮಿಯಲ್ಲಿ ನಟಿಸಿದ ಅನುಭವದ ಗುರುದೇವ್ ರನ್ನು ಮದುವೆಯಾಗಿ ಅಮೆರಿಕಾಗೆ ಹೋಗಿ ಈ ನಟಿ 15 ವರ್ಷಗಳ ಕಾಲ ಸುದ್ದಿಯಿಲ್ಲದೆ ಕಣ್ಮರೆಯಾಗಿದ್ದವರು. ಈ ಕಾಲದಲ್ಲಿ ಬದುಕು ಕೊಟ್ಟ ಎಲ್ಲ ಬಗೆಯ ಅನುಭವಗಳ ಮೂಸೆಯಲ್ಲಿ ಪಳಗಿದ ಮೇಲೆ ಮತ್ತೆ ಯಾಕಾಗಬಾರದು ಅಂತ ನಾಗತಿಯವರು ಕೊಟ್ಟ ಕರೆಗೆ ಓಗೊಟ್ಟು 2016 ರಲ್ಲಿ ಮರಳಿ ಬಂದದ್ದು ‘ಇಷ್ಟಕಾಮ್ಯ’ ಚಿತ್ರದ ಮೂಲಕ. ಈ ಚಿತ್ರದಲ್ಲಿ ಮದುವೆಯೆನ್ನುವ ದೇಗುಲದ ನೈಜ  ಮೌಲ್ಯಗಳನ್ನು ಪ್ರಶ್ನಿಸುವ, ಅದನ್ನು ಹೊರತುಪಡಿಸಿಯೂ ಇರಬಹುದಾದ ಗಂಡು-ಹೆಣ್ಣಿನ ಸಂಭಂದವನ್ನು ಪ್ರತಿಪಾದಿಸುವ ಪಾತ್ರ.  ಈ ಪಾತ್ರ ದೊರಕಿದ್ದು ಅಕಸ್ಮಿಕವೋ , ಮತ್ತೊಂದೋ ಒಟ್ಟಿನಲ್ಲಿ ಇವರ ಚಿತ್ರರಂಗದ ವೃತ್ತಿಯಲ್ಲಿ ಹೊಸ ತಿರುವುಗಳು ತೆರೆದುಕೊಂಡಿವೆ! ಈ ನಟಿ  ನಟನೆಯನ್ನು ಮೀರಿ ಬೆಳೆದು ನೆಟ್ವರ್ಕಿಂಗ್, ನಿರ್ದೇಶನ, ನಿರ್ಮಾಣ ಮತ್ತು ಹೊಸಬಗೆಯ ಚಿತ್ರ ನಿರ್ಮಾಣಗಳಿಗೆ ಯೋಜನೆ ಹಾಕಿದ್ದಾರೆ. ಈ ನಟಿಯ ಬೆಂಬಲಕ್ಕೆ ಗಂಡ ಗುರುದೇವ್ ಪೂರ್ಣ ಪ್ರಮಾಣದಲ್ಲಿ ನಿಂತಿದ್ದಾರೆ.

ಚಿತ್ರರಂಗದ ಬಗ್ಗೆ  ವಸ್ತುನಿಷ್ಠ ಅರಿವಿದ್ದು, ಸಿನಿಮಾದ ತಳುಕು-ಬಳುಕುಗಳಿಗೆ ಬಗ್ಗದ ಈ ಪ್ರತಿಭಾನ್ವಿತ ನಟಿ,  15 ವರ್ಷಗಳ ನಂತರ ಚಿತ್ರರಂಗಕ್ಕೆ ಮರಳಿ ಬಂದಿದ್ದಾದರೂ ಹೇಗೆ? ಯಾಕೆ? ಯಾವ ಭರವಸೆಯ ಮೇಲೆ? ಅವರ ಮುಂದಿನ ಯೋಜನೆಗಳೇನು? ಅನ್ನುವ ಕೂತೂಹಲ ನನ್ನನ್ನು ಕಾಡುತ್ತಿತ್ತು.

ಜೀರ್ಜಿಂಬೆಯ ಪ್ರದರ್ಶನವನ್ನು ಡಾನ್ಕ್ಯಾಸ್ಟರಿನಲ್ಲಿ ಆಯೋಜಿಸಿದವರು  ಸುಮನಾ  ಮತ್ತು  ಡಾ. ಗಿರೀಶ್ ವಶಿಷ್ಠ ದಂಪತಿಗಳು.  ಇವರ ಮನೆಯಲ್ಲಿಯೇ ಸುಮನ್ ನಗರ್ಕರ್ ಅವರನ್ನು ಭೇಟಿ ಮಾಡುವ ಅವಕಾಶ ಸಿಕ್ಕಿದ್ದು. ತಮ್ಮ ಮೂರು ದಿನದ ಹೊಸ ಕೂಸಾದ ಕ್ಯಾಮೆರಾವನ್ನು ಜೊತೆಗೆ ಹಳೆಯ ಕ್ಯಾಮರಾ ಮತ್ತು ಮೈಕ್ರೋಫೋನುಗಳನ್ನು ತಮ್ಮ ಎಂದಿನ ಉತ್ಸಾಹದಿಂದ ತಂದವರು  ಡಾ. ಶ್ರೀವತ್ಸ ದೇಸಾಯಿ .ಈ ಸಂದರ್ಭದಲ್ಲಿ ‘ಅನಿವಾಸಿ’ ತಂಡದ ಪರವಾಗಿ ಸುಮನ್ ನಗರ್ಕರ್ ಅವರೊಡನೆ ಭೇಟಿ ಮಾಡಿ ನನ್ನನ್ನು ಕಾಡಿದ ಪ್ರಶ್ನೆಗಳಿಗೆ ಉತ್ತರ ಹುಡುಕುತ್ತ ನಡೆಸಿದ ಸಂವಾದದ ಸಾರಾಂಶವಿದು.  ಇದೇ  ಸಂದರ್ಶನದ ತುಣುಕನ್ನು   ದೇಸಾಯಿಯವರ ವಿಡೀಯೋ ಮೂಲಕ ನೋಡಲು ಕೆಳಗಿನ ಲಿಂಕ್ ಮೇಲೆ ಕ್ಲಿಕ್ ಮಾಡಿ:  https://www.youtube.com/watch?v=xkp_uKZwqcQ

ಪ್ರ : ಯು. ಕೆ. ಕನ್ನಡಿಗರನ್ನು ಇದೇ ಮೊದಲ ಬಾರಿಗೆ  ಎಡಿನ್ಬರೋ, ಡಾನ್ಕ್ಯಾಸ್ಟರ್, ಲಂಡನ್, ಬ್ರಿಸ್ಟಲ್ ಮುಂತಾದ ನಗರಗಳಲ್ಲಿ  ಭೇಟಿ ಮಾಡ್ತಿದ್ದೀರಿ. ಈ ಬಗ್ಗೆ ಏನನ್ನಿಸ್ತಾ ಇದೆ?

ತುಂಬ ಸಂತೋಷ ಆಗ್ತಾ ಇದೆ. ನಾವು ಸ್ಕಾಟ್ಲ್ಯಾಂಡಿಗೆ ಈ ಮೊದ್ಲು ಹೋಗಿರಲಿಲ್ಲ. ಇದೇ ಮೊದಲ ಬಾರಿಗೆ ಗ್ಲಾಸ್ಗೋ, ಎಡಿನ್ಬರೋ ಕಡೆ ಹೋಗಿದ್ದು. ಅಲ್ಲಿ ಇಬ್ಬರು , ಮೂವರು ಕನ್ನಡಿಗರ ಮನೇಲಿ ಉಳಕೊಂಡಿದ್ವಿ. ಆಶ್ಚರ್ಯ ಅಂದರೆ ಹೊಸ ಪರಿಚಯ ಅಂತ ಅನ್ನಿಸ್ಲೇ ಇಲ್ಲ. ಕಾರ್ಯಕ್ರಮಾನು ಚೆನ್ನಾಗಿ ನಡೀತು. ಇವತ್ತು ಡಾನ್ಕ್ಯಾಸ್ಟರಿನ ಕನ್ನಡಿಗರನ್ನು, ನಿಮ್ಮನ್ನೆಲ್ಲ ಭೇಟಿ ಮಾಡ್ತಾ ಇದ್ದೀವಿ. ಜೀರ್ಜಿಂಬೆ ಚಿತ್ರದ ಪ್ರದರ್ಶನನೂ ನಡೀತಾ ಇದೆ. ಇದೇ ಸಿನಿಮಾ ಲಂಡನ್ ಮತ್ತೆ ಬ್ರಿಸ್ಟಲ್ ನಲ್ಲೂ ಪ್ರದರ್ಶನ  ಕಾಣುವುದಿದೆ.ಇದೆಲ್ಲ ಯು.ಕೆ ಕನ್ನಡಿಗರನ್ನು ಭೇಟಿ ಮಾಡೋ ಒಳ್ಳೇ ಅವಕಾಶ ಕೂಡ. ಇವೆಲ್ಲ ಆತ್ಮೀಯವಾದ ಭೀಟಿಗಳು ಅಂತ ಅನ್ನಿಸ್ತಾ ಇದೆ

ಪ್ರ:   ಈ ಓಡಾಟದ ಮೂಲಕ, ಯು.ಕೆ ಕನ್ನಡಿಗರನ್ನು ಭೇಟಿ ಮಾಡೋ ಮೂಲಕ ಏನನ್ನಾದರೂ ಸಾಧಿಸೋ ಉದ್ದೇಶ, ಹಂಬಲ ಇದೆಯಾ?

ಅಫ್ಕೋರ್ಸ್. ಮುಖ್ಯವಾಗಿ ನೆಟ್ವರ್ಕಿಂಗ್. ನಮ್ಮ ಪರಿಚಯಾನಾ ಇನ್ನೂ ವಿಶಾಲಗೊಳಿಸ್ಕೊಳ್ಳೋ  ಉದ್ದೇಶ ಇದೆ. ಜೊತೆಗೆ ಜೀರ್ಜಿಂಬೆ ಸಿನಿಮಾವನ್ನು ಪ್ರದರ್ಶಿಸೋ ಅವಕಾಶ ಸಿಗ್ತಾ ಇದೆ.ಇದೊಂದು ಒಳ್ಳೆ ಚಿತ್ರ. ನಾಲ್ಕು ರಾಜ್ಯ ಪ್ರಶಸ್ತಿ ಪಡೆದಿರೋ ಚಿತ್ರ. ಸಾಮಾಜಿಕ ತಿಳಿವಳಿಕೇನ ಹೆಚ್ಚಿಸೋ ಅಂತ ಚಿತ್ರ. ಅದನ್ನೇ ಈ ಭೇಟಿ ಮೂಲಕ ಮಾಡ್ತಾ ಇದ್ದೀವಿ.

ಚಿತ್ರ ಕೃಪೆ- ಗುರುದೇವ್ ನಾಗರಾಜ್

ಪ್ರ: ಎಂಟು ವರ್ಷಗಳ ನಿಮ್ಮ ಮೊದಲ ಭಾಗದ ಸಿನಿಮಾ ವೃತ್ತಿಯಲ್ಲಿ ಬಹಳ ವಿರಳವಾಗಿ ಅಭಿನಯಿಸಿದ್ರಿ. ಯಾಕೆ? ಇದು ನಿಮ್ಮ ಆಯ್ಕೆ ಆಗಿತ್ತಾ ಅಥವಾ ಚಿತ್ರ ರಂಗ ನಿಮ್ಮ ಪ್ರತಿಭೆನಾ ಸರಿಯಾಗಿ ಉಪಯೋಗಿಸ್ಕೊಳ್ಳಲಿಲ್ಲವಾ?

(ನಗ್ತಾ) ಇದು ನಿಜ. ನಾನು ಬಹಳ ವಿರಳವಾಗಿ ನಟಿಸಿದ್ದು. ಸಂಖ್ಯೆ ದೃಷ್ಟಿಯಿಂದ ನೋಡಿದ್ರೆ ಇನ್ನೂ ತುಂಬಾ ಚಿತ್ರಗಳಲ್ಲಿ ಮಾಡಬಹುದಿತ್ತು. ಆದ್ರೆ ನಾನು ಪಾತ್ರಕ್ಕೆ ಪ್ರಾದಾನ್ಯತೆ ಕೊಡ್ತಾ ಇದ್ದೆ.  ಹೀರೋಯಿನ್ನೇ ಇರಬಹುದು, ನಮ್ಮೂರ ಮಂದಾರ ಹೂವಲ್ಲಿ ತಂಗಿ ರೋಲೇ ಇರಬಹುದು, ಮುಂಗಾರಿನ ಮಿಂಚಲ್ಲಿ ಸೆಕೆಂಡ್ ಹೀರೊಯಿನ್ ರೋಲು, ಅಮ್ಮಾವ್ರ ಗಂಡದಲ್ಲಿ ವಿಲನ್ನು ಹೀಗೆ ಬೇರೆ ಬೇರೆ ಪಾತ್ರದಲ್ಲಿ ಮಾಡಿದ್ದು. ಆದ್ರೆ ಪಾತ್ರಗಳು ಮನಸ್ಸಲ್ಲಿ ನಿಲ್ಲೋ ಅಂತವು. ಹಾಗಾಗಿ ತುಂಬಾ ಚೂಸಿಯಾಗಿದ್ದೆ ಅಂತ ಹೇಳಬಹುದು. ಜೊತೆಗೆ ಆಯ್ಕೆ ಮಾಡಿಕೊಳ್ಳೋಕೆ ಅವಕಾಶಗಳು ಹೆಚ್ಚು ಸಿಗಲಿಲ್ಲ. ಹಾಗಾಗಿ ಸಂಖ್ಯೆ ಕಡಿಮೇನೆ ಅಂತ ಹೇಳಬಹುದು.

ಪ್ರ: ಇಷ್ಟಕಾಮ್ಯದ ಮೂಲಕ ಸಿನಿಮಾ ರಂಗದಲ್ಲಿ ಎರಡನೆ ಇನ್ನಿಂಗ್ಸ್ ಆರಂಭಿಸಿದ್ದೀರಿ. 15 ವರ್ಷಗಳ ಬ್ರೇಕ್ ನಂತರ ಇದು ನಡೆದದ್ದು ಹೇಗೆ?

ನಾನು ಮದುವೆ ಆಗಿ ಅಮೆರಿಕಾಗೆ ಹೋದ ಮೇಲೆ ಬ್ರೇಕ್ ತಗೋತೀನಿ ಅಂತಲೇ ಗೊತ್ತಿರಲಿಲ್ಲ. ಇಂಟೆನ್ಷನಲ್ ಆಗಿ ಬ್ರೇಕ್ ತಗೊಳ್ಳಲಿಲ್ಲ. ಬಂದು –ಹೋಗಿ ಮಾಡ್ತಾ ಅಭಿನಯಿಸೋಣ ಅಂತಲೇ ಅಂದು ಕೊಂಡಿದ್ದು. ಆದ್ರೆ ಜನ ಇವರು ಅಮೆರಿಕಾಗೆ ಹೋದ ಮೇಲೆ ಇಲ್ಲಿ ಆಕ್ಟ್ ಮಾಡಲ್ಲ ಅಂತ ಅಸ್ಯೂಮ್ ಮಾಡ್ಕೊಂಬಿಟ್ಟರು. ಹಾಗೇ ವರ್ಷಗಳು ಕಳೆದು ಹೋದವು.

2-3 ವರ್ಷಗಳ ಕೆಳಗೆ ನಾಗತಿಹಳ್ಳಿಯವರು  ಎರಡ್ಮೂರು ಬಾರಿ ಅಮೆರಿಕಾಗೆ ಬಂದು, ನಮ್ಮನೇಲೆ ಉಳಕ್ಕೊಂಡಿದ್ದರು. ಯಾಕೆ ಅವರ ಸಿನಿಮಾದಲ್ಲಿ ಮಾಡಬಾರದು ಅಂತ ಕೇಳಿದ್ರು. ಆ ಟೈಂನಲ್ಲಿ ಅವರು ‘ಇಷ್ಟಕಾಮ್ಯ’ ಸಿನಿಮಾ ಮಾಡ್ತಿದ್ರು. ಅದರಲ್ಲೊಂದು ಪಾತ್ರ ಮಾಡಿ ಅಂದ್ರು. ಚಿಕ್ಕ ಪಾತ್ರ, ಆದ್ರೂ ಉತ್ತಮ ಪಾತ್ರ . ಹಾಗಾಗಿ ಮತ್ತೆ ಎಲ್ಲ ಶುರುವಾಯ್ತು.

ಚಿತ್ರ ಕೃಪೆ-ಡಾ. ಶ್ರೀವತ್ಸ ದೇಸಾಯಿ

ಪ್ರ: ಈ ಎರಡನೇ ಇನ್ನಿಂಗ್ಸ್ನಲ್ಲಿ ನಿಮ್ಮದು ಪ್ರಬುದ್ದವಾದ, ವಿಚಾರವಾದಿ ಪಾತ್ರಗಳು. ಒಂದು ಸಂದರ್ಶನದಲ್ಲಿ ವಯಸ್ಸಾದ ನಟ –ನಟಿಯರಿಗೆ (ಹೀರೋಗಳನ್ನು ಹೊರತುಪಡಿಸಿ)  ನಮ್ಮಲ್ಲಿ ಹೆಚ್ಚಿನ ಅವಕಾಶಗಳಿಲ್ಲ ಅಂತ  ನೀವು ಹೇಳಿದ್ದೀರಿ. ಈ ಬಗ್ಗೆ ಸ್ವಲ್ಪ ವಿಸ್ತಾರವಾಗಿ ಹೇಳಿ.

ಕನ್ನಡ ಚಿತ್ರರಂಗನೇ ಅಲ್ಲ. ಇಡೀ ಭಾರತೀಯ ಚಿತ್ರರಂಗದಲ್ಲಿ  ನಟಿಗೆ 30 ರಿಂದ 40 ವರ್ಷ ಆಗಿಬಿಟ್ರೆ ಅಲ್ಲಿಗೆ ಮುಗಿದೇ ಹೋಯ್ತು.ಅವರಿಗೆ ಉತ್ತಮ ಪಾತ್ರ ಸಿಗೋದು ನಿಂತು ಹೊಗುತ್ತೆ. ಅದೇ ಇಂಗ್ಲೀಷ್ ಸಿನಿಮಾದಲ್ಲಿ ಒಳ್ಳೇ ಕಥೆ ಇದ್ರೆ,ಖಂಡಿತಾ ಪಾತ್ರ ಸಿಗತ್ತೆ. ನಮ್ಮಲ್ಲಿ ನಟಿ ಅಂದ್ರೆ ಬರೀ, ಹಾಡು,ಕುಣಿತ ,ಲವ್ ಬರೀ ಇಷ್ಟೇ ಅಗಿದೆ. ಹಾಗಾಗೇ ನಾನು ಮೊದಲಿಂದ ಪಾತ್ರಗಳ ಬಗ್ಗೆ ನಿಖರ ಆಯ್ಕೆ ಇಟ್ಕೊಂಡಿದ್ದೆ.

ಆದರೆ ಇತ್ತೀಚೆಗೆ ಕೆಲವು ಹೊಸ ನಿರ್ದೇಶಕರು ಹೊಸ ಕಾನ್ಸೆಪ್ಟುಗಳನ್ನು ಒಪ್ಕೋತಾ ಇದ್ದಾರೆ.ಹೊಸ ಹೊಸ ವಿಚಾರಧಾರೆಗಳಿವೆ. ಹೊಸ ಥರದ ಕಥೆಗಳನ್ನು ತರ್ತಾ ಇದ್ದಾರೆ.ಈ ಕಾರಣ ಬೇರೆ ಥರದ ಪಾತ್ರಗಳನ್ನು ಕನ್ನಡ ಚಿತ್ರರಂಗದಲ್ಲಿ ಮಾಡಬಹುದು ಅನ್ನೋ ಆಶಯ ಹುಟ್ಟಿದೆ.  Hope it works out!

ಪ್ರ: ನೀವು ಮತ್ತೆ ಗುರುದೇವ್ ಅವರು ಸೇರಿ ‘ಸುಮನ್ ನಗರ್ಕರ್ ಪ್ರೊಡಕ್ಷನ್ ‘ ಶುರು ಮಾಡಿದ್ರಿ. ಇದರ ಹಿನ್ನಲೆ ಏನು? ಇದಕ್ಕೆ ಏನು ಸ್ಪೂರ್ತಿ?

ಅಮೆರಿಕಾದಲ್ಲೇ ಇರೋ ಕೆಲವ್ರು ಸ್ನೇಹಿತ್ರು  ಸೇರ್ಕೋಂಡು  ‘ಬಬ್ರೂ’ ಅನ್ನೋ ಸಿನಿಮಾ ಶುರು ಮಾಡೋಣ ಅಂದ್ಕೊಂಡ್ವಿ.   ಸಮಾನ ಆಸಕ್ತಿ ಇರೋ ಹಲವರು ಸ್ನೇಹಿತರು ಸೇರಿ ಈ ನಿರ್ಧಾರ ಮಾಡಿದ್ದು. ಇದು friend’s funded cinema. ಸುಮಾರು ಹತ್ತು ಜನ ಇದ್ದೀವಿ. ಹೀಗಾಗಿ ಎಲ್ರಿಗೂ ಒಂದು ಬ್ಯಾನರ್ರಿನ  ಅಗತ್ಯ ಇತ್ತು.. ಹಾಗಾಗಿ ನಮ್ಮದೇ  ಪ್ರೊಡಕ್ಷನ್ ಶುರುಮಾಡಿದ್ವಿ.

ಪ್ರ: ಯುಗ ಪ್ರೊಡಕ್ಷನ್ ಮತ್ತು ನಿಮ್ಮದೇ ಬ್ಯಾನರಿನ ಕೆಳಗೆ ನೀವು ‘ಬಬ್ರೂ’ ಚಿತ್ರನ ನಿರ್ಮಿಸ್ತಿದ್ದೀರಿ? ಇದು ಬೇರೆ ಕನ್ನಡ ಚಿತ್ರಗಳಿಗಿಂತ ಯಾವ ರೀತಿ ಭಿನ್ನ?

ನಮಗೆ ಗೊತ್ತಿರೋ ಹಾಗೆ ಇದು ಸಂಪೂರ್ಣ ಅಮೆರಿಕಾಲ್ಲೇ ಚಿತ್ರೀಕರಣ ಆಗಿರೋ ಮೊದಲನೇ ಕನ್ನಡ ಚಿತ್ರ. ಅಂದ್ರೆ ಕೆಲವು ಕನ್ನಡ ಚಿತ್ರಗಳನ್ನು ಅರ್ಧ ಅಮೆರಿಕಾದಲ್ಲಿ  ಶೂಟ್ ಮಾಡಿರುತ್ತಾರೆ.  ಅಥವಾ ಹಾಡುಗಳ ಚಿತ್ರೀಕರಣ ಮಾತ್ರ ವಿದೇಶಗಳಲ್ಲಿ ಆಗಿರುತ್ತೆ. ಆದ್ರೆ ಬಬ್ರೂ ಕಥೆ ಪೂರ್ತಿ ಅಮೆರಿಕಾದಲ್ಲೇ ನಡೆಯುತ್ತೆ. ಹಾಗಾಗಿ ಇದು ಹೊಸತು.  ಕಥೆ ಶುರುವಾಗೋದು, ಮುಗಿಯೋದು ಎಲ್ಲ ಅಮೆರಿಕಾಲ್ಲಿನೇ.  ಕೆನಡಾ ಬಾರ್ಡರಿಂದ ಮೆಕ್ಸಿಕೋ ಬಾರ್ಡರ ವರೆಗೆ ವೆಸ್ಟರ್ನ್ ಅಮೆರಿಕಾ ಮೂಲಕ ಆಗೋ ಪ್ರಯಾಣ ಮತ್ತು ನಡುವೆ ನಡೆಯುವ ಹಲವು ಘಟನೆಗಳು ಮತ್ತು ತಿರುವುಗಳ ಕಥೆ ಇರೋ ಚಿತ್ರ.ಇದು ಪೂರ್ಣ ಪ್ರಮಾಣದ ಕನ್ನಡ ಚಲನ ಚಿತ್ರ.

First film completely made in US by people living in US.

ಸಂಗೀತ ಕೂಡ ಭಿನ್ನ. ಇದರಲ್ಲಿ ನಾವು ಹೊಸ ರೀತಿಯ ಸಂಗೀತ ಅಕಿಪಲ್ಲಿ ಮ್ಯೂಸಿಕ್ ಬಳಸ್ತಾ ಇದ್ದೀವಿ. ಜೊತೆಗೆ ಇದು cloud funded ಅಲ್ಲ .ಬದಲು   friends funded ಸಿನಿಮಾ.                                                           

ಪ್ರ: ಈ ಚಿತ್ರದ ಬಗ್ಗೆ ನಮಗೆಲ್ಲ ಭಾರೀ ನಿರೀಕ್ಷೆಯಿದೆ. ಯಾವಾಗ ಮತ್ತು ಎಲ್ಲೆಲ್ಲಿ ಈ ಚಿತ್ರವನ್ನು ರಿಲೀಸ್ ಮಾಡ್ತಾ ಇದ್ದೀರ?

ಈ ಚಿತ್ರದ ಶೂಟಿಂಗ್  ಮುಗಿದಿದೆ. ಕೊನೆಯ ಹಂತದ ಕಾರ್ಯಗಳು ನಡೀತಾ ಇವೆ. ಇದೇ ವರ್ಷ ಜುಲೈ ಅಥವಾ ಆಗಷ್ಟನಲ್ಲಿ ರಿಲೀಸ್ ಆಗ್ತಾ ಇದೆ.ಕರ್ನಾಟಕದಲ್ಲಿ ರಿಲೀಸ್ ಆಗೋಕಿನ್ನ ಮೊದಲು ಅಮೆರಿಕಾ, ಆಸ್ಟ್ರೇಲಿಯಾ, ಇಂಗ್ಲೆಂಡ್ ಎಲ್ಲ ಕಡೆ ಪ್ರೀಮಿಯರ್ ಗಳನ್ನು ನಡೆಸೋ ಉದ್ದೇಶ ಇದೆ.

ಪ್ರ: ನಮ್ಮಂತೆ ನೀವು ಕೂಡ ವಿದೇಶವಾಸಿಗಳು. ಇವತ್ತು ಕರ್ನಾಟಕದಲ್ಲೇ ಕನ್ನಡ ಕಾಣೆಯಾಗ್ತಿರೋ ಸಮಯ. ಇಷ್ಟೊಂದು ದೂರ ಇದ್ಕೊಂಡು ಜನಸಾಮಾನ್ಯರಾದ ನಮ್ಮಂತವರು ಕನ್ನಡ ಭಾಷೆಯನ್ನು ಹೇಗೆ ಉಳಿಸಬಹುದು ಅಂತ ನಿಮ್ಮ ಅಭಿಪ್ರಾಯ?

ತುಂಬಾ ನಿಜ. ಸೌತ್ ಬೆಂಗಳೂರಲ್ಲಿ ಸ್ವಲ್ಪ ಕನ್ನಡ ಇದೆ. ಆದರೆ ಅಲ್ಲೂ ಕನ್ನಡ ಇತ್ತೀಚೆಗೆ ಸಾಯ್ತಾ ಇದೆ.ಮಕ್ಕಳು  ಕೂಡ ಕನ್ನಡ ಮಾತಾಡಲ್ಲ. ನಾವು ಇಲ್ಲಿ ಬೆಳೀತಾ ಇರೋ ಮಕ್ಕಳಿಗೆ ಕನ್ನಡ ಕಲಿಸೋ ಪ್ರಯತ್ನ ಮಾಡ್ತಾ ಇದ್ದೀವಿ. ಅದ್ರೆ ಅಲ್ಲಿರೋ ಮಕ್ಕಳೇ ಇವತ್ತು ಕನ್ನಡ ಮಾತಾಡಲ್ಲ.

ಈ  ಕನ್ನಡದ ಹೋರಾಟ ಯಾವತ್ತೂ ನಡೀತಾನೆ ಇದೆ. ಇನ್ನೂ ಮುಂದುವರೆಯುತ್ತೆ ಅನ್ನಿಸುತ್ತೆ.ನಾನು ಅಂದ್ಕೊಂಡಿದ್ದೀನಿ ನಾವು ಕನ್ನಡಿಗರು ನಿರಭಿಮಾನಿಗಳು ಅಂತ. ಕೆಲವು ಭಾಷೆಯವರು ದುರಭಿಮಾನಿಗಳು ಅವ್ರು ಯಾವ ಭಾಷೆನೂ ಗೌರವಿಸಲ್ಲ, ಕಲಿಯೋದು ಇಲ್ಲ. ಬೇರೆ ಬೇರೆ ಭಾಷೆ ಕಲೀಬೇಕು ಆದ್ರೆ ನಮ್ಮ ಭಾಷೆನ ಉಳಿಸ್ಕೊಳ್ಳೋದು ಕೂಡ ತುಂಬ ಮುಖ್ಯ.

ನೀವು ನಿಮ್ಮ ಸಾಹಿತ್ಯಕ ಚಟುವಟಿಕೆಗಳ ಬಗ್ಗೆ ಹೇಳಿದ್ರಿ. ಅದನ್ನು ಕೇಳಿ ತುಂಬಾ ಸಂತೋಷ ಆಯ್ತು. ಇಂತಹ ಚಟುವಟಿಕೆಗಳು ಮುಂದುವರೀಬೇಕು. ಬೆಳೀಬೇಕು. ಎಷ್ಟೋ ಸಾರಿ ಹೊರದೇಶಗಳಲ್ಲಿನ ಕನ್ನಡಿಗರು ಮಾಡೋದನ್ನು ನಮ್ಮ ಜನ ಅನುಕರಿಸ್ತಾರೆ.ಹಾಗಾದ್ರೂ ಭಾಷೆ ಉಳಿಯುತ್ತೆ.

ಪ್ರ: ನೀವು 25 ವರ್ಷಗಳಿಂದ ನೀವು ಕನ್ನಡ ಚಿತ್ರರಂಗಾನ ಹತ್ತಿರದಿಂದ ನೋಡಿದ್ದೀರಿ.  ಪ್ರಪಂಚದ ಇತರೆ ಸಂಸ್ಕೃತಿ, ಸಮಾಜದಲ್ಲಿ ಇದ್ದು ಗೊತ್ತಿದೆ. ಇದನ್ನೆಲ್ಲ ಒತ್ತಟ್ಟಿಗಿಟ್ಟು ನಮ್ಮ ಸಿನಿಮಾರಂಗದ ಕಡೆ ಪಕ್ಷನೋಟ ಹರಿಸಿದ್ರೆ ನಿಮಗೇನಾದ್ರೂ ಬದಲಾವಣೆ ಕಾಣಿಸುತ್ತಾ?

ಇತ್ತೀಚೆ ಹೊಸ ತರದ ಚಿತ್ರಗಳು ಬರ್ತಾ ಇವೆ. ಹಿಂದೆಲ್ಲ  Art cinema and commercial cinema  ಅಂತ ಮಾತ್ರ ಇತ್ತು. ಆರ್ಟ್ ಸಿನೆಮಾ ಅಂದ್ರೆ  ಬೋರಿಂಗ್ ಅಥವಾ ಗೋಳಿನ ಚಿತ್ರ ಅಂತ ಮಾತ್ರ ಇತ್ತು. ಇವತ್ತು ಮಾಮೂಲಿ ಹಾಡು, ಫೈಟ್ ಇರೋ ಸಿನಿಮಾಗಳು ಒಂದ್ಕಡೆ ಬರ್ತಾನೆ ಇವೆ. ಜೊತೆಗೆ parallel ಆಗಿ  ಬೇರೆ ತರ ವಿಚಾರ ಇರೋ ಚಿತ್ರಗಳು ಕೂಡ ಬರ್ತಾ ಇವೆ. ಈಗಿನ ಟ್ರೆಂಡ್ ಹೇಗಿದೆ ಅಂದ್ರೆ ಸಾಫ್ಟ್ ವೇರ್ ಉದ್ಯಮಿಗಳು ಕೂಡ ಕೆಲಸ ಬಿಟ್ಟು ಚಿತ್ರ ರಂಗಕ್ಕೆ ಬರ್ತಿದ್ದಾರೆ.

ಇವತ್ತಿನ ತಲೆಮಾರಿನವರು ಹಳೇ ಫಾರ್ಮುಲಾ ಬಿಟ್ಟು ಬೇರೆ ತರ ಚಿತ್ರ ಮಾಡಬಹುದು ಅಂತ ತೋರಿಸ್ತಿದ್ದಾರೆ. ಇದು ನಿಜಕ್ಕೂ ಒಳ್ಳೇದು.

ಪ್ರ: ನಿಮ್ಮ ಹೊಸಚಿತ್ರ ‘ಬಬ್ರೂ’ ಗೆ ನಮ್ಮ ಶುಭಾಶಯಗಳು. ನಿಮ್ಮ ಮುಂದಿನ ಯೋಜನೆಗಳೇನು?

ವಿಭಿನ್ನ ರೀತಿ ಚಿತ್ರ ಮಾಡ್ಬೇಕು ಅನ್ನೋದೇ ಮುಂದಿನ ಯೋಜನೆ. ಒಂದೆರಡು  ಕಥೆಗಳ ಬಗ್ಗೆ ವಿಚಾರ ನಡೀತಾ ಇದೆ. ಈ ವರ್ಷ ಅಂತ ಒಂದೆರಡು ಪ್ರಾಜೆಕ್ಟ್ ಬರ್ತಾ ಇದೆ. ಈ ಬಗ್ಗೆ  ಈಗ್ಲೇ ಏನೂ ಹೇಳಕ್ಕಾಗಲ್ಲ.

ಸದ್ಯದಲ್ಲೇ ಈ ಬಗ್ಗೆ ತಿಳಿಸ್ತೀವಿ.

——————-

ಈ  ನಟಿಯ  ಅವಲೋಕನದಂತೆ ಕನ್ನಡ ಚಿತ್ರರಂಗದಲ್ಲಿ ಹೊಸತು ಬರುತ್ತಿದೆ. ಈ  ಹೊಸದಿಕ್ಕಿನಲ್ಲಿ ಇನ್ನಷ್ಟು ಬೆಳವಣಿಗೆ ಕಾಣಲಿ ಎಂದು ಆಶಿಸೋಣ.

ಡಾ. ಪ್ರೇಮಲತ ಬಿ.

[https://www.youtube.com/watch?v=xkp_uKZwqcQ&w=560&h=315]