ಡಾ. ನಾಗತಿಹಳ್ಳಿ ಚಂದ್ರಶೇಖರ ರೊಡನೆ ಸಂದರ್ಶನ-ಡಾ. ಪ್ರೇಮಲತ ಬಿ.

ನಾಗತಿಹಳ್ಳಿ ಚಂದ್ರಶೇಖರ್ ಅಂದರೆ ತಕ್ಷಣವೇ ಅವರ ಚಲನಚಿತ್ರಗಳು ಕನ್ನಡಿಗರ ಕಣ್ಣ ಮುಂದೆ ಬರುತ್ತವೆ. ಕನ್ನಡ ಲೋಕಕ್ಕೆ ಸದಭಿರುಚಿಯ ಚಲನಚಿತ್ರಗಳನ್ನಷ್ಟೇ ಅಲ್ಲ ಅವರು ಕೊಡುತ್ತಿರುವುದು. ಅವರ ರೆಕ್ಕೆಗಳು ಸಾಹಿತ್ಯದ ಹಲವಾರು ವೈವಿಧ್ಯತೆಗಳನ್ನು, ಅವರ ಬೇರುಗಳು ಗಾಢವಾದ ಸಾಮಾಜಿಕ ಕಳಕಳಿಯನ್ನು ಅಪ್ಪಿಕೊಂಡಿವೆ. ಡಾ. ಚಂದ್ರಶೇಖರ್ ಅನಿವಾಸಿಬಳಗದ ಮುಂದೆ ಬಂದದ್ದು ಸೆಪ್ಟೆಂಬರ್ ೨೫ರ ಭಾನುವಾರದಂದು. ಆ ವಿಶೇಷ ಸಂದರ್ಭದ ಬಗ್ಗೆ ಅನಿವಾಸಿಸದಸ್ಯರಾದ ಡಾ. ಪ್ರೇಮಲತ ಬರೆಯುತ್ತಾ, ಅವರು ಡಾ. ಚಂದ್ರಶೇಖರ್ ರ ಜೊತೆ ನಡೆಸಿದ ಸಂವಾದವನ್ನೂ ಕೂಡ ಓದುಗರೊಡನೆ ಹಂಚಿಕೊಂಡಿದ್ದಾರೆ. ಬನ್ನಿ, ಈ ಶುಕ್ರವಾರದ ಲೇಖನವನ್ನು ಓದುತ್ತಾ ನಾಗತಿಹಳ್ಳಿ ಚಂದ್ರಶೇಖರ್ ರ ಲೋಕದಲ್ಲಿ ಇಣುಕೋಣ. – ಸಂ.

ಡಾ. ನಾಗತಿಹಳ್ಳಿ ಚಂದ್ರಶೇಖರ ರೊಡನೆ ಸಂದರ್ಶನ-ಡಾ. ಪ್ರೇಮಲತ ಬಿ.

ಕನ್ನಡ ಚಿತ್ರರಂಗದಲ್ಲಿ ಈಗ ಉಳಿದಿರುವ ಕೆಲವೇ ಮಂದಿ ಪ್ರತಿಭಾವಂತ, ಸ್ರುಜನಶೀಲ ನಿರ್ದೇಶಕರಲ್ಲಿ ದೊಡ್ಡದಾದ ಹೆಸರು ಡಾ. ನಾಗತಿಹಳ್ಳಿ ಚಂದ್ರಶೇಖರದು.ಇವರು ಬರೇ ನಿರ್ದೇಶಕರಲ್ಲ. ಎಂ.ಎ. ಸ್ನಾತಕೋತ್ತರ ಪದವಿಯನ್ನು ಮೈಸೂರು ವಿಶ್ವ ವಿದ್ಯಾಲಯದಿಂದ ಚಿನ್ನದ ಪದಕಗಳೊಂದಿಗೆ ಪಡೆದವರು. ಕನ್ನಡ ಪ್ರಾಧ್ಯಾಪಕರಾಗಿ ದಶಕಕ್ಕೂ ಹೆಚ್ಚು ಕಾಲ ಕೆಲಸಮಾಡಿದವರು. ಹಾಗಂತಲೇ ಇವರನ್ನು ‘ಮೇಷ್ಟ್ರು’ ಅಂತ ಈಗಲೂ ಕರೆಯುವವರಿದ್ದಾರೆ.ಜೊತೆಗೆ ಬರಹಗಾರರು.  ಸರಳವಾಗಿ, ನೇರವಾಗಿ ಮಾತಾಡುವವರು.ಅಂಕಣಗಾರರು.

ಇಷ್ಟೆಲ್ಲ ಕಿಚ್ಚಿರುವ ಇವರು ಚಲನಚಿತ್ರ ರಂಗಕ್ಕೆ ಬಂದದ್ದು, ಇತ್ತೀಚೆಗೆ ನಿಧನರಾದ ಅಶೋಕ್ ಪೈ ಅವರ 1986 ರ  ‘ಕಾಡಿನಬೆಂಕಿ’ ಚಲನಚಿತ್ರದ ಮೂಲಕ. ಈ ಸಿನಿಮಾಕ್ಕೆ ಚಿತ್ರಕಥೆ, ಸಂಭಾಷಣೆ ಮತ್ತು ಹಾಡುಗಳನ್ನು ಇವರು ಬರೆದಿದ್ದಾರೆ. ಇದಕ್ಕೆ best regional feature film ಅನ್ನೋ ರಾಷ್ಟ್ರ ಮನ್ನಣೆಯ  ಜೊತೆಗೆ ರಾಜ್ಯ ಪ್ರಶಸ್ತಿ ಬಂತು. ಇವರದೇ ಚೊಚ್ಚಲ ನಿರ್ದೇಶನದ ’ಉಂಡೂ ಹೋದ-ಕೊಂಡೂ ಹೋದ” ಚಿತ್ರವನ್ನು ಮಾಡಿದರು. ಇದರ ಚಿತ್ರಕಥೆ-ಸಂಭಾಷಣೆಗೆ ರಾಜ್ಯ ಪ್ರಶಸ್ತಿ ಬಂತು.ಇಲ್ಲಿಂದ ಮುಂದೆ ಇವರು ಮೇಲಿನ ಎಲ್ಲ ಮಾಧ್ಯಮಗಳೊಂದಗೆ ತಮ್ಮನ್ನು ಹಂಚಿಕೊಂಡಂತವರು. ಸಿನಿಮಾ, ದೂರ ದರ್ಶನ, ಪತ್ರಿಕೆಗಳು, ಪುಸ್ತಕಗಳು,ಮತ್ತು ಸಾಮಾಜಿಕವಾಗಿ ಮತ್ತ್ತಷ್ಟು ಬೆಳೆದವರು.’ನಾಗತಿಹಳ್ಳಿ ಟೆಂಟ್ ಸಿನಿಮಾ’ ಅನ್ನೋ ಹೆಸರಲ್ಲಿ ನಟನೆ ಮತ್ತು ಸಿನಿಮಾದ ಬರಹಗಳಿಗೆ ತರಭೇತಿ ಶಾಲೆಯನ್ನು ತೆರೆದು ಮತ್ತೆ”ಮೇಷ್ಟ್ರು’  ಆದವರು! ತನ್ನ ಬದುಕಿನ ಎಲ್ಲ ಆಸಕ್ತಿಗಳನ್ನು ಬಗಲಲ್ಲಿ ಇರಿಸಿಕೊಂಡೇ ಮುಂದುವರೆದಿರುವ ಇವರ ಬದುಕಿನಲ್ಲಿ ಈಗ ಅದೆಷ್ಟು ಸಣ್ಣ ಕಥೆಗಳಿಗಾಗುವಷ್ಟು ಸರಕಿದೆಯೋ  ಗೊತ್ತಿಲ್ಲ!!

ಯಾರಾದರೂ ಮಂಡ್ಯ ಜಿಲ್ಲೆಯ ನಾಗತಿಹಳ್ಳಿಯಲ್ಲಿ ಹುಟ್ಟಿ, ಯಾವ ವಶೀಲಿಯೂ ಇಲ್ಲದೆ, ಗಾಡ್ ಫಾದರ್ ಗಳ ಅಭಯವಿಲ್ಲದೆ   ಬೆಂಗಳೂರಿನಲ್ಲಿ ಹೆಸರುಮಾಡಬೇಂಕೆಂದರೆ ಅಪ್ಪಟ ಪ್ರತಿಭೆಯಿರಬೇಕು. ತಮ್ಮ ಸ್ಥಾನವನ್ನು ಗಳಿಸಲು ಅವಿರತ ಕೆಲಸ ಮಾಡಿರಬೇಕು.ಜೀವನದಲ್ಲಿ ಶಿಸ್ತಿರಬೇಕು. ಒಂದಷ್ಟು ವಿಶಷ್ಟ ಆದರ್ಶಗಳನ್ನು ಮೈ ಗೂಡಿಸಿಕೊಂಡಿರಬೇಕು. ಅಪಾಯಕರ ಸಾಹಸಗಳನ್ನು ಉಸಿರಿಡಿದು ಮಾಡಲು ತಯಾರಿರಬೇಕು.ನೂರು ಜನರ ನಡುವೆ ಕೆಲಸಮಾಡುವ ಹೊಂದಾಣಿಕೆಯ ಸ್ವಭಾವವನ್ನು ಹೊಂದಿರಬೇಕು.ಕಾರ್ಯನೈಪುಣ್ಯತೆಯನ್ನು ಉಳಿಸಿಕೊಳ್ಳಲು ಸಮಯದ ಜೊತೆ ಗುದ್ದಾಡುವ ಛಲವಿರಬೇಕು.ಫಲಿತಾಂಶವಾಗಿ ಸಿಗುವ ಅಮ್ರುತವನ್ನೂ, ಹಾಲಾಹಲವನ್ನೂ ನುಂಗಿ ತಡೆದುಕೊಳ್ಳುವ ತಾಕತ್ತಿರಬೇಕು. ಕಾಲಿಗೆ ಚಕ್ರ, ಕಣ್ಣಿಗೆ ಎಣ್ಣೆ,ಮಿದುಳಿನ ಅವಿರತ ಕೆಲಸ, ಹತ್ತು ಕೆಲಸಗಳ ಮಧ್ಯೆ ಅಪಾರ  ತಾಳ್ಮೆ  58 ರ ಹರೆಯದಲ್ಲೂ  ಇವರಲ್ಲಿ ಬೇಕಾದಷ್ಟಿದೆ!

ಇವರ ಇದುವರೆಗಿನ ಸಾಧನೆಗಳ ಅವಲೋಕನಕ್ಕೆ, ಸಂದಿರುವ ಪ್ರಶಸ್ತಿಗಳ ಪಟ್ಟಿಗೆ ಇವರದೇ ಹೆಸರಿನ ವೆಬ್ ಸೈಟಿಗೆ ಭೇಟಿ ನೀಡುವದೇ ಉಚಿತ. http://www.nagathihalli.com/

’ಇಷ್ಟಕಾಮ್ಯ’ ಚಿತ್ರದ ಜೊತೆ ಇವರನ್ನು ಇಂಗ್ಲೆಂಡಿಗೆ ಬರಮಾಡಿಕೊಂಡವರು, ಕನ್ನಡಿಗರು, ಯು.ಕೆ.  ಅಧ್ಯಕ್ಷರಾದ ಗಣಪತಿ ಭಟ್. ಜೂನ್ ತಿಂಗಳಲ್ಲಿ ನಾಗತಿಹಳ್ಳಿಯವರನ್ನು ಬರಮಾಡಿಕೊಂಡು, London, Bristol, Cardiff, Dorset ಗಳಲ್ಲಿ ಪ್ರದರ್ಶನಕ್ಕೆ ಅನುಕೂಲ ಮಾಡಿಕೊಟ್ಟವರು.

ಈ ಕನ್ನಡ ಸಂಘ 2008 ರಲ್ಲೇ ನಾಗತಿಯವರ ’ಮಾತಾಡ್, ಮಾತಾಡ್ ಮಲ್ಲಿಗ” ಸಿನಿಮಾವನ್ನು Reading ನಲ್ಲಿ 200 ಜನರೆದುರು ಪ್ರದರ್ಶನ ಮಾಡಿತ್ತು. ಇದಕ್ಕು ಮೊದಲು ಇತರೆ 25 ಕ್ಕೂ ಹೆಚ್ಚು ಸಿನಿಮಾಗಳನ್ನು ತರಿಸಿ ಕನ್ನಡ ಸಮುದಾಯಕ್ಕೆ ಮನರಂಜನೆ ಒದಗಿಸಿದೆ.ಈಗ ಒಂದು ವರ್ಷ ದಿಂದ KUK Talkies ನ  ಬ್ಯಾನರಿನಡಿ  ಕನ್ನಡದ ಸಿನಿಮಾಗಳಿಗೆ ಮಾರುಕಟ್ಟೆ ಗಳಿಸುವಲ್ಲಿ ನಿರತರಾಗಿದ್ದಾರೆ.

ಮತ್ತೆ ಈ ಬಾರಿ ನಾಗತಿಯವರನ್ನು ಬರಮಾಡಿಕೊಂಡು, ಅವರ ಜೊತೆ  Cambridge, Doncaster ಮತ್ತು Newcastle ಗಳಿಗೆ ಓಡಾಡಿಸಿದವರು ಗಣಪತಿ ಭಟ್.’ಕನ್ನಡಿಗರು, ಯು.ಕೆ.’ ಯ  ಸಂಪರ್ಕಕ್ಕೆ ಬಂದವರು ಸುಮನ-ಗಿರೀಶ್ ದಂಪತಿಗಳು. ಸಾಂಸ್ಕ್ರಿತಿಕ ಕಾರ್ಯಕ್ರಮಗಳ ಬಗ್ಗೆ ಅಪಾರ ಆಸಕ್ತಿಯಿರುವ, ರಂಗಭೂಮಿಯ ಅನುಭವವಿರುವ ಸುಮನಾರಿಗೆ ಇಷ್ಟಕಾಮ್ಯ ಪ್ರದರ್ಶನವನ್ನು ನಡೆಸಲು ನಿರ್ಧಾರ ತೆಗೆದುಕೊಳ್ಳಲು ಅರ್ಧ ಗಂಟೆಯ ಸಮಯವಿತ್ತು! ಯಾವ ಬಳಗ-ಕೂಟಗಳ ಒತ್ತಾಸೆಯಿಲ್ಲದೆ ವಯಕ್ತಿಕವಾದ ನಿರ್ಧಾರವನ್ನು ತಗೊಂಡವರು ಸುಮನಾ. ಒತ್ತಾಸೆಯಾಗಿ ನಿಂತವರು ಪತಿ ಡಾ. ಗಿರೀಶ್ ವಸಿಷ್ಟ. Doncaster ರಿನ ಇವರ ಮನೆಗೆ ನಾಗತಿಯವರನ್ನು ಕರೆತಂದವರು ಗಣಪತಿ ಭಟ್. ರಾತ್ರಿ ಸುಮನಾರ ಆತಿಥ್ಯಕ್ಕೆ ರುಚಿ ಸೇರಿಸಿದವರು ರಂಗಭೂಮಿಯ ಅನುಭವವಿರುವ ಸುಮನಾರ ತಾಯಿ ಲೀಲ-ತಂದೆ ರಾಮಸ್ವಾಮಿ.

ರಾಮಸ್ವಾಮಿ, ಅಭಿಷೇಕ್, ನಾಗತಿಹಳ್ಳಿ ಚಂದ್ರಶೇಖರ್, ಕಾಜಲ್, ಡಾ, ಗಿರೀಶ್ ವಸಿಷ್ಟ, ಡಾನ್ಕ್ಯಸ್ಟೆರಿನ ಪ್ರದರ್ಶನಕ್ಕೆ ಕಾರಣರಾದ ಸುಮನ ಗಿರೀಶ್ ಮತ್ತು ಅವರ ತಾಯಿ ಶ್ರೀಮತಿ ಲೀಲ ರಾಮಸ್ವಾಮಿ. (ಚಿತ್ರ-ಸಂದರ್ಶಕಿಯದು)

ಬೆಳಗಿನ ತಿಂಡಿಯ ನಂತರ ಒಂದು ಸಣ್ಣ ಸಂದರ್ಶನಕ್ಕೆ ಅವಕಾಶ ಕೇಳಲಾಗಿತ್ತು. ಅದೇ ಊರಿನ ಹಿರಿಯ ವೈದ್ಯರಾದ ಡಾ, ಶ್ರೀವತ್ಸ ದೇಸಾಯಿಯವರು ಈ ಸಂದರ್ಶನದ ರೆಕಾರ್ಡಿಂಗ್ ಗೆ ಸಜ್ಜಾಗಿ ಬಂದರು. ಈ ರೆಕಾರ್ಡಿಂಗ್ ನ ಸಣ್ಣ ತುಣುಕನ್ನು ಯು-ಟ್ಯೂಬಿನಲ್ಲಿ ನೋಡಬಹುದು.

ಮೊದಲಿಗೆ ದಾ.ದೇಸಾಯಿಯವರು ತಮ್ಮ ಹಸ್ತಾಕ್ಷರ ವನ್ನು ಸೇರಿಸಿ  ’ಅನಿವಾಸಿಗಳ ಅಂಗಳದಿಂದ’ ಪುಸ್ತಕವನ್ನು ನಾಗತಿಯವರಿಗೆನೀಡಿದರು. ನಂತರವೇ ಸಂದರ್ಶನ ಶುರುವಾದದ್ದು!

ಸಂದರ್ಶಕಿ ಡಾ. ಪ್ರೇಮಲತ ಮತ್ತು ಅನಿವಾಸಿಗಳ ಚೊಚ್ಚಲ ಪುಸ್ತಕದ ಅವಲೋಕನದಲ್ಲಿರುವ ನಾಗತಿಹಳ್ಳಿಯವರು ಚಿತ್ರಕ್ರುಪೆ-ಗಣಪತಿ ಭಟ್

೧) ಸ್ರುಜನಾತ್ಮಕವಾದ ಚಲನಚಿತ್ರಗಳ ಮೂಲಕ ನೀವಿವತ್ತು ಮನೆ ಮನೆ ಮಾತಾಗಿದ್ದೀರ. ನಿಮಗೆ ಸಂತ್ರುಪ್ತಿಯನ್ನು ತಂದೊಕೊಟ್ಟಿರುವ ಚಿತ್ರ/ಚಿತ್ರಗಳು ಯಾವುವು?

ನನ್ನ ಚಿತ್ರ ಗಳ ಪಟ್ಟಿಯನ್ನು ಅವಲೋಕಿಸಿದಾಗ ಯವುದೂ ಇಲ್ಲ. ಯಾಕಂದ್ರೆ, ಪ್ರತಿ ಸಿನಿಮಾನ ಮತ್ತೆ ಮತ್ತೆ ನೋಡಿದಾಗ ಇನ್ನೂ ಉತ್ತಮವಾಗಿ ಮಾಡಬಹುದಿತ್ತು ಅಂತ ಹಲವಾರು ಸಂದರ್ಭದಲ್ಲಿ ಅನ್ನಿಸಿದೆ. ಜನ ’ಅಮೆರಿಕಾ ಅಮೆರಿಕಾ’ ವನ್ನು, ’ಅಮ್ರುತಧಾರೆ”ಯನ್ನು ಉಲ್ಲೇಖಿಸ್ತಾರೆ.ಆದ್ರೆ ಇನ್ನೂ ಚೆನ್ನಾಗಿ ಮಾಡಬಹುದಿತ್ತು ಅನ್ನೋ ಹೊಳಹುಗಳು ಬರ್ತಾ  ಇರುತ್ತವೆ, ಅತ್ರುಪ್ತಿ, ಸ್ರುಜನಶೀಲ ಮನಸ್ಸಿನ ಒಂದು ಭಾಗ.

೨) ನೀವು ಮೂಲತಃ ಬರಹಗಾರರು. ಕಥೆಗಳಲ್ಲಿನ ಪಾತ್ರ ಗಳಿಗೆ ಜೀವ ಕೊಟ್ಟು ನಡೆಸುವಾಗ ಇರೋ ತ್ರುಪ್ತಿ,ಚಲನಚಿತ್ರಗಳ ಪಾತ್ರಗಳನ್ನು ನಿರ್ದೇಶಿಸುವಾಗ ಸಿಗುತ್ತಾ?

ಇದು ಮೂಲಭೂತವಾಗಿ ಕಾವ್ಯ ಮೀಮಾಂಸೆಗೆ ಸಂಬಂಧ ಪಟ್ಟ ಪ್ರಶ್ನೆ. ನಾನು ಎಲ್ಲ ಅರ್ಥಗಳಲ್ಲಿ ಅಲೆಮಾರಿ. ಜಾಗದಿಂದ ಜಾಗಕ್ಕೆ ,ಮಾಧ್ಯಮದಿಂದ ಮಾಧ್ಯಮಕ್ಕೆ ಸುತ್ತುತಾ ಇರ್ತೀನಿ. ಆಯಾ ಮಾಧ್ಯಮಕ್ಕೆ ಹೋದಾಗ ಅಲ್ಲಿನ ವ್ಯಾಕರಣವನ್ನು ಗ್ರಹಿಸಿ ನಿರ್ವಹಿಸಬೇಕಾಗುತ್ತೆ. ಎಲ್ಲಿ ಹೋದಾಗ ನಾನೇನು ಮಾಡಬಲ್ಲೆ ಅನ್ನೋ ಪ್ರಶ್ನೆ ಮಾತ್ರ ಉಳಿಯುತ್ತೆ. ವ್ಯಾವಹಾರಿಕವಾಗಿ ಚಿತ್ರರಂಗ ಹೆಚ್ಚು, ಸಾಹಿತ್ಯ ಕಡಿಮೆ ಅನ್ನೂ ಅರ್ಥ ನನ್ನ ವ್ಯಾಪ್ತಿಯಲ್ಲಿ ಬರೋಲ್ಲ. ಎರಡೂ ಕಡೆ ಪಾತ್ರಗಳನ್ನು ನಡೆಸೋ ಚಾಲೆಂಜ್, ಅದರ ಗುದ್ದಾಟ ನನ್ನಗೆ ಇಷ್ಟ.

೩) ಬರಹ-ಚಲನ ಚಿತ್ರ ನಿರ್ದೇಶನ ಎರಡನ್ನೂ ನಿಮ್ಮ ಮುಂದಿಟ್ಟು ಒಂದನ್ನು ಮಾತ್ರ ಆರಿಸಿಕೊಳ್ಳಿ ಅಂದ್ರೆ ನಿಮ್ಮ ವಯಕ್ತಿಕ ಆಯ್ಕೆ ಯಾವುದು? ಯಾಕೆ?

ನಿಸ್ಸಂಶಯವಾಗಿ ಸಾಹಿತ್ಯ.

ಕಾರಣ, ಸಾಹಿತ್ಯದಲ್ಲಿನ ಸ್ವಯಂಭು. ಇಲ್ಲಿ ನಾನು ಮತ್ತು ಓದುಗ ಅಷ್ಟೇ. ಸಿನಿಮಾದಲ್ಲಿ, ಹಲವು ಪರಿಣತರ ಪ್ರತಿಭೆಯನ್ನು ಹೊರ ಬರಿಸಿ ಅದರಿಂದ ಒಂದು ಪಾಕ ಸಿದ್ದಪಡಿಸಿ ಕ್ರುತಿಯನ್ನು ಸ್ರುಷ್ಟಿಸಬೇಕಾಗುತ್ತೆ. ಇದರಲ್ಲಿ ಸಂಮೋಹನ ಇದೆ.  ಸಂಕೀರ್ಣವಾದ ಮ್ಯಾನೇಜ್ ಮೆಂಟ್ ವಿಚಾರಗಳು, ಸೈಕಾಲೊಜಿ, ಈಗೋಸ್ ಎಲ್ಲ ಇರುತ್ತೆ. ಜೊತೆಗೆ ಕೋಟ್ಯಂತರ ರೂಪಾಯಿ ಬಂಡವಾಳ ಹೆಗಲ ಮೇಲಿರೋದರಿಂದ ನನ್ನಂತ ಸೂಕ್ಶ್ಮ ಮನಸ್ಸಿನ ವ್ಯಕ್ತಿಗೆ ಯಾರ ಬಂಡವಾಳಕ್ಕೆ ಎಲ್ಲಿ ದಕ್ಕೆ ಆಗುತ್ತೋ ಅನ್ನೋ ಆತಂಕ ಸಹಜವಾಗಿರುತ್ತೆ.

ಇದು ಸಾಹಿತ್ಯದಲ್ಲಿಲ್ಲ. ಅಲ್ಲದೇ ನಾನು ಹೊರಟು ಬಂದ ಬಿಂದು, ತವರುಮನೆ ಸಾಹಿತ್ಯವೇ ಆದ್ದರಿಂದ ಸಾಹಿತ್ಯಕ್ಕೇ ನನ್ನ ಮೊದಲ ಆದ್ಯತೆ. ಸಿನಿಮಾದಲ್ಲೂ ನನ್ನಗೆ ಅಪಾರ ಅನುಭವ, ಪ್ರತಿಫಲಗಳು ದೊರೆತಿವೆ. ಅದರ ಬಗ್ಗೆ ನನ್ನಲ್ಲಿ ಕ್ರುತಘ್ನತೆ  ಖಂಡಿತಾ ಇದೆ.

ಸಾಹಿತ್ಯಕ್ಕೂ-ಸಿನಿಮಾಕ್ಕೂ ಇರೋ ಕಲಾತ್ಮಕತೆ ಮತ್ತು ಗಲ್ಲಾಪೆತ್ಟ್ಟಿಗೆಯ ಸೇತುವೆಯನ್ನು ಹಾದವರು ಇದ್ದಾರೆ. ಆದರೆ ಉಳಿದಿರುವ ಏಕಾಂಗಿ ನಾನು. ಆದ್ಯತೆಯ ಪ್ರಶ್ನೆ ಬಂದಾಗ ಸಾಹಿತ್ಯಕ್ಕೆ ಸದಾ ಮೊದಲ ಸ್ಥಾನ.

೪) ಇತ್ತೀಚೆಗೆ ಕನ್ನಡ ಚಲನ ಚಿತ್ರಗಳ ಗುಣ ಮಟ್ಟ ಕುಸಿತಾ ಇದೆ.ಇದಕ್ಕೆ ಕಾರಣ ಒಳ್ಳೆ ಚಿತ್ರಕ್ಕೆ ಇವತ್ತು ಮಾರುಕಟ್ಟೆ ಇಲ್ಲ ಇಲ್ದೇ ಇರೋದು.ಇದು  ಎಲ್ರಿಗೂ ಗೊತ್ತು.ಹಿಂದೆ ಇದ್ದಂತ ಮಾರುಕಟ್ಟೆ ಈಗ ತಟ್ಟಂತ ಕಣ್ಮರೆ ಆಗೋಕೆ ಏನು ಕಾರಣ?

ವೇಗದ ಮನೋಧರ್ಮ.ಕಾಲಕ್ಕೆ ಬಂದಿರೋ ವೇಗ. ಕಲೆಗೆ ತಗುಲಿರೋ ಶಾಪ!

ತಕ್ಷಣ ರೋಮಾಂಚನ ಬೇಕು ಅನ್ನೋ ಧಾವಂತ ಪ್ರೇಕ್ಷಕನಿಗೆ, ಅಹೋ ರಾತ್ರಿ ಕೋಟಿಗಟ್ಟಲೆ ಹಣ ಮಾಡಬೇಕು ಅನ್ನೋದು ಉದ್ಯಮದವರಿಗೆ . ಹಿಂದೆ ಚಲನಚಿತ್ರಗಳು   ವರ್ಷಗಟ್ಟಲೆ ಓಡ್ತಾ ಇದ್ದವು. ನೆನಪಿನಲ್ಲಿ ಉಳೀತಿದ್ದವು. ಈಗಿನ ಚಿತ್ರಗಳು ವಾರ  ಮಾತ್ರ ಓಡಿ, ತಟ್ಟಂತ  ಕಣ್ಮರೆಯಾಗಿ ಬಿಡ್ತಾವೆ. ಉಳಿಸಿ ಹೋಗೋದು ಏನೂ ಇಲ್ಲ. ಜೊತೆಗೆ ಸಿದ್ದ ಕತೆಗಳನ್ನು, ರೀಮೇಕ್ ಗಳನ್ನು ತಂದು ಸಿನಿಮಾ ಮಾಡ್ತಾರೆ. ವರ್ಶಕ್ಕೆ 200 ಸಿನಿಮಾ, ವಾರಕ್ಕೆ 6 ಸಿನಿಮ ಬಿಡುಗಡೆ ಆಗ್ತಿವೆ. ಇದರ ಬಗ್ಗೆ  ಯಾವ ನಿಯಂತ್ರಣವೂ ಇಲ್ಲ. ಕನ್ನಡದ ಅಸಲೀ ಚಿತ್ರ, ಅಸಲೀ ಪ್ರತಿಭೆಗಳ ಚಿತ್ರ ಮಾಡೋ ನಮ್ಮಂತವರು ಏಕಾಂಗಿಗಳು. ಆದರೆ ’ಆ ’ ಕಡೆಯವರಿಗೆ ಹೇಳುವಷ್ಟು ದೊಡ್ಡವನಲ್ಲ ನಾನು.

 ’ಇಷ್ಟಕಾಮ್ಯ  ಚಿತ್ರವನ್ನು ನೋಡಿ.ಪ್ರತಿಯೊಂದು ಸಂಭಾಷಣೆಯಲ್ಲಿ, ದ್ರುಶ್ಯಗಳಲ್ಲಿ ಆಳವಾದ ಚಿಂತನೆಗಳಿವೆ. ವರ್ಷಗಟ್ಟಲೆ ಚರ್ಚೆ ಮಾಡಿದ ವಿಚಾರಗಳಿವೆ. ಅದನ್ನು ನೋಡಿ ಅರ್ಥ ಮಾಡಿಕೊಳ್ಳೋಕೆ ವ್ಯವಧಾನ ಇರಬೇಕಷ್ಟೆ.

೫)ನೀವು ಒಬ್ಬ ಸಾಹಿತಿ. ಬರಹಗಾರರು. ಕನ್ನಡ ಭಾಷೆ ಮತ್ತು ಕನ್ನಡ ಚಿತ್ರೋದ್ಯಮವನ್ನು ಅರಿತಿರೋವ್ರು. ಅದಕ್ಕೇ ಈ ಪ್ರಶ್ನೆ.ಇತ್ತೀಚೆಗಿನ ಸಿನಿಮದಲ್ಲಿ ಉಪಯೋಗ್ಸೋ ಭಾಷೆ ಕೇಳೋಕೆ ಬೇಜಾರಾಗುತ್ತೆ.ಸಾಹಿತ್ಯಕ ಕನ್ನಡವಲ್ದಿದ್ದ್ರೂ ಸಾಧಾರಣ ಆಡು ಭಾಷೆಯನ್ನು ಉಪಯೋಗಿಸಿದ್ರೆ ಸಿನಿಮಾ ಮಾಧ್ಯಮ ಜನರಿಗೆ ತಲುಪಲ್ವಾ?

’ಇಷ್ಟಕಾಮ್ಯ’ ದ ಉದಾಹರಣೆ ಮತ್ತೆ ಕೊಡ್ತಿದ್ದೀನಿ ಅಂತ ಮುಖಸ್ತುತಿ ಅಂದುಕೋ ಬೇಡಿ.ಅದರಲ್ಲಿನ ಸಂಭಾಷಣೆಯನ್ನು ಗಮನಿಸಿ.

ಸರಳ ಕನ್ನಡವನ್ನು ಬಯಸೋ ಜನ ಖಂಡಿತಾ ಇದ್ದಾರೆ.ಆದರೆ ಅವರ ಅಭಿರುಚಿಯನ್ನು ಸಂಪೂರ್ಣ ನಾಶಮಾಡಲಾಗಿದೆ. ಅದಕ್ಕೆ ಕಾರಣ ಚಿತ್ರರಂಗ ’ಅಕ್ಷರ ದ್ವೇಷಿ” ಗಳಾಗ್ತಿರೋದು. ಹಾಗಾಗಿ ಅಕ್ಷರ ದಾರಿದ್ರ್ಯ, ಸಾಂಸ್ಕ್ರುತಿಕ ದಾರಿದ್ರ್ಯ ಎದ್ದು ಕಾಣಿಸುತ್ತೆ. ಉದಾಹರಣೆಗೆ, ಒಂದು ಇಡೀ ತಲೆಮಾರಿನ  Icon, ರಾಜ್ ಕುಮಾರರನ್ನು ತಗೊಳ್ಳಿ. ಇವರಿಗೆ ರಂಗ ಭೂಮಿ ಅನುಭವ ಇತ್ತು. ಹಾಡು, ಉಚ್ಚಾರಣೆಗಳ ತರಭೇತಿ ಇತ್ತು. ಒಬ್ಬ ರಾಜಕುಮಾರನ ಹಿಂದೆ ಒಬ್ಬ ಚಿ. ಉದಯಶಂಕರ ಇದ್ರು. ಉತ್ತಮ ವಚನ, ಕೀರ್ತನೆ ಭಾವಗೀತೆಗಳನ್ನು ಉಣ ಬಡಿಸ್ತಿದ್ರು. ಈ ಹಿನ್ನೆಲೆ ಇವತ್ತು ತಪ್ಪಿ ಹೋಗಿದೆ.

ಇವತ್ತಿನ ನಟರು ಒಳ್ಳೆಯವರು, ಕನ್ನಡದ ಬಗ್ಗೆ ದೊಡ್ಡ ಮಾತಾಡ್ತಾರೆ. ಇವರಿಗೆ ಒಳ್ಳೇ ಸಿನಿಮ ಬೇಕು. ಜನರ ಪ್ರೀತಿ ಬೇಕು. ವಿವಾದ ಬಂದ್ರೆ ಕನ್ನಡಕ್ಕಾಗಿ ಬೀದಿಗಿಳೀತಾರೆ. ಆದರೆ ಅವರಿಗೆ ಸಾಂಸ್ಕ್ರುತಿಕ ಸ್ಪರ್ಶವೇ ಇಲ್ಲ. ಹೀಗೆ ಹೇಳಿದ್ರೆ Typical ಕನ್ನಡ ಮೇಷ್ಟ್ರು ಹೀಗೆ ಮಾತಾಡ್ತಾರೆ’ ಅಂತಾರೆ.ಅದಕ್ಕೂ- ಇದಕ್ಕು ಯಾವ ಸಂಭಂಧವೂ ಇಲ್ಲ. ಜನಜೀವನದಲ್ಲಿರೋ, ಸರಳ,ಸಾಧಾರಣ ನುಡಿಗಟ್ಟುಗಳನ್ನು ಸಮಯೊಚಿತವಾಗಿ ಬಳಸೋದು ಸಂಭಾಷಣೆ. ಸಿನಿಮಾ ಪ್ರಬಲ ಮಾಧ್ಯಮ. ಕನ್ನಡವನ್ನು ಸರಿಯಾಗಿ ಬಳಸದೇ ಇದ್ರೆ ಮುಂದೆ ಈಗಿನ ಕನ್ನಡವೇ ನಿಜವೇನೋ ಅನ್ನೋ ಅಪಾಯ ಖಂಡಿತ.

೬) ಚಲನಚಿತ್ರಗಳು ಭಾಷೆ ಜೊತೆ, ಸಂಸ್ಕ್ಕ್ರುತಿಯನ್ನು ಕೂಡ  ಪ್ರತಿಪಾದಿಸುತ್ತವೆ. ಇವತ್ತಿನ ಚಿತ್ರಗಳಲ್ಲಿ ನಾಯಕನೇ ಹಿಂಬಾಲಕರ ಕೆನ್ನೆಗೆ ಕಾರಣ ಇಲ್ಲದೇ ಹೊಡೆಯೋದು, ಪದೇ ಪದೇ ಪುನರಾವರ್ತಿಸಿ ಹೊಡೆಯೋದನ್ನು  ಹಾಸ್ಯದ ಹೆಸರಲ್ಲಿ ತೋರಿಸ್ತಿದ್ದಾರೆ. ಇದು ಇವತ್ತಿನ ಪೀಳಿಗೆಗೆ ನೀಡೋ ಸಂದೇಶವನ್ನು ಏನಂತ ಹೇಳ್ತೀರಿ?

ಇದು ಅಭಿರುಚಿಯ ಪ್ರಶ್ನೆ.ಅಭಿರುಚಿಯನ್ನು ಮಾಧ್ಯಮಗಳು ಯಾವಾಗ ಕಡೆಗಣಿಸ್ತಾವೋ ಆಗ ಅದು ಅತ್ಯಂತ ಅಪಾಯದ ಸ್ಥಿತಿಯನ್ನು ತಲುಪುತ್ತವೆ.ಪ್ರಬಲ ಮಾದ್ಯಮ ಸಿನಿಮಾಕ್ಕೆ ಒಳ್ಳೆಯ ಅಭಿರುಚಿಯನ್ನು ಉಳಿಸೋ ಗುರುತರ ಹೊಣೆ ಇದೆ. ಜಗತ್ತಿನಲ್ಲಿ ಇಲ್ದೇ ಇರೋ ಹಿಂಸೆ,  ಕೆಟ್ಟ ಸಂಭಾಷಣೆಯನ್ನು ಇವತ್ತು ಸಿನಿಮಾದಲ್ಲಿ ನೋಡ್ತೀವಿ.

ಕಲೆ ಅಂದಾಗ ಒಂದಿಷ್ಟು ವೈಭವೀಕರಣ,  ಉತ್ಪ್ರೇಕ್ಷೆ ಸಹಜ . ಆದರೆ ಅದನ್ನು ಕಲಾತ್ಮಕವಾಗಿ ಮುಂದಿಡಬೇಕು. ಆತಂಕದ ವಿಚಾರ ಅಂದ್ರೆ ಕೆಟ್ಟ ಸಿನಿಮಾ ಬಂದಾಗ ಜನ ಅದನ್ನು ತಿರಸ್ಕರಿಸ್ತಾ ಇಲ್ಲ. “ಅವರು ನೋಡ್ತಾರ್ರಿ ಅದಕ್ಕೆ ಮಾಡ್ತೀವಿ ಅಂತ ಇವರು, ಇವರು ಕೊಡ್ತಾರ್ರೀ ಅದಕ್ಕೆ ನೋಡ್ತೀವಿ” ಅಂತ ಅವರು ಹೇಳ್ತಾರೆ.

ಕೊನೆಗೆ ಇದು ಸಮಾಜದಲ್ಲಿನ ಜನರ ಹೊಣೆಗಾರಿಕೆಯ ಪ್ರಶ್ನೆ. ರಾಜಕಾರಣಿಗಳು, ಸಾಂಸ್ಕ್ರುತಿಕ ನಾಯಕರ ಸಾಕ್ಷಿ ಪ್ರಶ್ನೆ ವಿಚಾರ.

೭) ಭಾಷೆ ಸತ್ರೆ, ಅದಕ್ಕೆ ಸಂಭಂಧಿಸಿದ ಸಾಹಿತ್ಯ, ಚಿತ್ರೋದ್ಯಮ ಮತ್ತೆ ಇವೆರಡಕ್ಕೂ ಪೂರಕವಾಗಿರೋ ಉದ್ಯಮಗಳ ಅವನತಿ ಕಟ್ಟಿಟ್ಟ ಬುತ್ತಿ. ಹಾಗಾಗಿ ಕನ್ನಡ ಉಳಿಸೋಕೆ ಈ ಉದ್ಯಮಗಳು ಮಾಡ್ತಿರೋ ಕೆಲಸಗಳೇನು? ಮಾಡ ಬಹುದಾದ ಕೆಲಸಗಳೇನು?

ಕನ್ನದ ಕಟ್ಟೊ ವಿಚಾರ ಬಹಳ ಇದೆ. ಓದು, ಬರಹ, ನಾಟಕ, ಸಿನಿಮ , ಸಂಘ , ಸಂಸ್ಥೆಗಳು ಇವೆಲ್ಲ ಭಾಷೆ ಜೊತೆ ತಳುಕು ಹಾಕಿಕೊಂಡ ವಿಚಾರಗಳು. ಇವನ್ನೆಲ್ಲ ಮಾಡೋ ಅಂತ ಜನರಿದ್ದಾರೆ ಆದ್ರೆ ಅವರನ್ನು ಅನುಸರಿಸೋ ರಣ ಪಡೆಯಿಲ್ಲ.

ಬೇರೆ ಭಾಷೆಗಳಿಗೂ , ಕನ್ನಡಕ್ಕು ಇದೇ ವ್ಯತ್ಯಾಸ. ಕನ್ನಡಿಗ ಇವತ್ತು intellectual arrogance ಬೆಳೆಸಿಕೊಂಡು ಸಿನಿಮಾಕ್ಕೆ ಬರ್ತಾನೆ. ಆತನಲ್ಲಿ ಸಿನಿಕತೆ ಎದ್ದು ಕಾಣುತ್ತೆ. ’ಕನ್ನಡ ಸಿನಿಮಾ” ಅನ್ನೋ ಧೋರಣೆಯಿಂದ ಸಿನಿಮಾಕ್ಕೆ ಬರ್ತಾನೆ. ಬೇರೆ ಭಾಷೆಯ ಜನ ಭಾಷೆಗೆ ತಮ್ಮನ್ನು ತಾವು ಒಪ್ಪಿಸಿಕೊಂಡಿದ್ದಾರೆ. ಇದು ಇಲ್ದೇ ಇರೋದ್ರಿಂದ  ಕನ್ನಡದಲ್ಲಿ ಕೊಡುವವನ ಮತ್ತು ನೋಡುವವನ ನಡುವಿನ ಕಂದಕ ದೊಡ್ಡದಾಗಿದೆ.

೮) ಹೊರದೇಶದಲ್ಲಿರೋ ಕನ್ನಡಿಗರು ಇದಕ್ಕೆ ಯಾವ ರೀತಿ ಬೆಂಬಲ ಕೊಡಬಹುದು?

ಹೆಚ್ಚೇನೂ ನಿರೀಕ್ಷಿಸಲಾಗಲ್ಲ. ಭಾಷೆ- ಸಂಸ್ಕ್ರುತಿ ಎಲ್ಲ ಬಿಟ್ಟು ಬಂದ ಕಾರಣಕ್ಕೆ ಅನಿವಾಸಿಗಳಲ್ಲಿ ಒಂದು ಬಗೆಯ nostalgia ಇರುತ್ತೆ . ಅಲ್ಲಿಗೆ ಮರಳಿ ಹೋಗಲು ಆಗಲ್ಲ ಅನ್ನೋ ಕಾರಣಕ್ಕೆ ಕನ್ನಡ ಮಹತ್ವದ್ದು ಅನ್ನೋ ಭಾವನೆ ಇರುತ್ತೆ ಹಾಗಾಗಿ  ಒಳನಾಡಿನ ತುಡಿತಕ್ಕಿಂತ ಹೊರನಾಡಿನ ತುಡಿತ ತೀವ್ರವಾಗಿದೆ.

ನಾನು ನನ್ನ ಹಳ್ಳಿಯ, ನಾನು ಓದಿದ ಕನ್ನಡ  ಶಾಲೆಯನ್ನು ದತ್ತು ತಗೊಂಡಿದ್ದೀನೆ, ಕೈಲಾದ್ದು ಮಾಡ್ತಿದ್ದೀನಿ. ಆತಂಕದ ವಿಚಾರ ಅಂದ್ರೆ 200 ಇದ್ದ ವಿದ್ಯಾ ರ್ಥಿಗಳ ಸಂಖ್ಯೆ 30 ಕ್ಕೆ ಇಳಿದಿರೋದು!!! ಅನಿವಾಸಿಗಳಾಗಲೀ, ನಿವಾಸಿಗಳೇ ಆಗಲಿ , ಕನ್ನಡವನ್ನು ಏಕ ಪ್ರಕಾರವಾಗಿ ಪ್ರೀತಿಸ್ಬೇಕು. ಅದು ನಮ್ಮೆಲ್ಲರ ಹೊಣೆಗಾರಿಕೆ.

೯)  England  ಪ್ರವಾಸದ  high lights ಏನು?”

ಮಾತಾಡ್ ಮಾತಾಡ್ ಮಲ್ಲಿಗೆ’ ಪ್ರದರ್ಶನಕ್ಕೆ ಹಿಂದೆ ಬಂದಿದ್ದೆ.  ಆದರೆ ಈ ಬಾರಿ, ಕನ್ನಡಿಗರು, ಯು.ಕೆ.ಯ ಮಿತ್ರತ್ವದಿಂದ ಇಂಗ್ಲೆಂಡಿನ ನಾನ ಊರುಗಳಿಗೆ ಹೋಗಿ ಚಿತ್ರ ತೋರಿಸಿ, ಮಾತಾಡೋ ಸಂದರ್ಭ ಬಂದಿದೆ.ಇದು ದೊಡ್ಡ ವ್ಯವಹಾರವೇನಲ್ಲ. ಆದರೆ, ವ್ಯವಹಾರದ ಆಚೆಗಿನ ಪ್ರೀತಿ, ವಿಶ್ವಾಸದ ಅನುಭವ ಆಯ್ತು. ಬಸವಣ್ಣನ ಪ್ರತಿಮೆ ನೋಡಿದೆ.ಭಾರತೀಯ ವಿದ್ಯಾ ಭವನಕ್ಕೆ ಹೋಗಿದ್ದೆ. ನಂದ ಕುಮಾರ್ ಅವರು ಮಾಡ್ತಿರೋ ಕನ್ನಡ ಚಟುವಟಿಕೆಗಳನ್ನು  ನೋಡಿ ತುಂಬ ಸಂತೋಷವಾಗಿದೆ. ಕನ್ನಡದ  ಬಗ್ಗೆ ತುಡಿಯೋ ನೀವೆಲ್ಲ ಕನ್ನಡದ  ಆಶಾ ಕಿರಣಗಳೇ.

ಎಡ ತುದಿ-ವಿಡೀಯೋ ಮಾಡಿದ ಡಾ, ಶ್ರೀವತ್ಸ ದೇಸಾಯಿ, ಬಲತುದಿ- ಕನ್ನಡಿಗರು ಯುಕೆ ಯ ಅಧ್ಯಕ್ಷ ಶ್ರೀ ಗಣಪತಿ ಭಟ್

೧೧) ಕನ್ನಡ  ಚಿತ್ರ ರಂಗದ ಮುಂದಿನ ಭವಿಷ್ಯ ನಿಮ್ಮ ಊಹೆನಲ್ಲಿ ಏನು?

ನಾನು ಪ್ರವಾದಿ ತರ ಮಾತಾಡೊಲ್ಲ.

ಸದ್ಯಕ್ಕೆ ಸಂಖ್ಯೆ ಜಾಸ್ತಿ ಆಗಿದೆ. ಗುಣ ಮಟ್ಟ ಕಡಿಮೆ ಆಗಿದೆ. ನಿಧಾನವಾಗಿ ವಿಶ್ವ ಮಾರುಕಟ್ಟೆ ತೆರೆದು ಕೊಳ್ತಾ ಇದೆ.ಕನ್ನಡ ಮಾರಿಕಟ್ಟೆ  ಸೀಮಿತ ಮಾರುಕಟ್ಟೆ.  ವಿದೇಶಿ ಪ್ರದರ್ಶನಗಳು ಶೈಶವಾಸ್ಥೆ ಯಲ್ಲಿದೆ. ಇದಕ್ಕೊಂದು ಕ್ರಮ ಮತ್ತು ಗುಣ ಮಟ್ಟದ ಅಗತ್ಯವಿದೆ.

ಇವತ್ತಿನ ಕನ್ನಡ ಸಿನಿಮಾದಲ್ಲಿರೋ ಸಾಂಸ್ಕ್ರುತಿಕ ಶೂನ್ಯತೆ ಭಯ ತರೊ ಅಂತದ್ದು. ಆದ್ದರಿಂದ ಕಾಲ ಈ ಪ್ರಶ್ನೆಗೆ ಏನು ಉತ್ತರ ಕೊಡುತ್ತೆ ಅಂತ  ಕಾದು ನೋಡಬೇಕು.

೧೨)ಸಿನಿಮಾ, ಟಿ. ವಿ.,ನಿಮ್ಮ ತರಭೇತಿ ಶಾಲೆ, ಈ ರೀತಿಯ ಓಡಾಟದ ನಡುವೆ ನಿಮ್ಮಲ್ಲಿರೋ ಬರಹಗಾರನ ಆರೋಗ್ಯ ಹೇಗಿದೆ?

ಅದರ ಬಗ್ಗೆ ಆತಂಕ ಇದೆ. ಪ್ರಜಾವಾಣಿಗೆ ’ರೆಕ್ಕೆ ಬೇರು” ಅನ್ನೋ ಕಾಲಂ ಬರೀತಿದ್ದೆ.  ’ಇಷ್ಟಕಾಮ್ಯ’ ದ ಕಾರಣ ನಿಲ್ಲಿಸಿದೆ. ಈಗ ಈ ಕೆಲಸ ಮುಗಿದಿದೆ. ಸಿನಿಮಾ ದೈಹಿಕವಾಗಿ  ಹಿಂಡಿ ಹಿಪ್ಪೆ ಮಾಡೋ ಕಾರಣ ಬರಹಕ್ಕೆ ಬೇಕಾದ ಶಕ್ತಿ ಕಡಿಮೆಯಾಗಿದೆ. ಬರವಣಿಗೆಯನ್ನು ಮತ್ತೆ  ಶುರುಮಾಡಿ ನನ್ನ ನೆಚ್ಚಿನ ಸಣ್ಣಕಥೆ ಗಳ ಬರಹವನ್ನು ಮುಂದುವರಿಸಬೇಕು.

ನಿಮ್ಮ ಮಾಧ್ಯಮದ ಮೂಲಕ ಎಲ್ಲ ಕನ್ನಡದ ಮನಸ್ಸುಗಳಿಗೆ ಶರಣು ಶರಣಾರ್ಥಿ. ಸಾಹಿತ್ಯ, ಪ್ರಕಟನೆ, ಸಿನಿಮಾ ಈ ಯಾವುದರ ಬಗ್ಗೆ ಏನೇ ಸಹಾಯ ಬೇಕೆಂದರೂ ಕೇಳಿ. ನಿಮಗೆ ಸ್ಪಂದಿಸಲು ನಾನು ಯಾವಗಲೂ ತಯಾರಿದ್ದೇನೆ. ಕನ್ನಡ ಕಟ್ಟೋ ಕೆಲಸ ನಿರಂತರವಾಗಿ ನಡೆಯಲಿ. ಧನ್ಯವಾದ.

ಡಾ. ಪ್ರೇಮಲತ ಬಿ

ಈ ಸಂದರ್ಶನವನ್ನು ಕೆಳಗಿನ ಲಿಂಕ್ ಒತ್ತುವುದರ ಮೂಲಕ ನೋಡಬಹುದು.ಕ್ರುಪೆ-ಡಾ. ಶ್ರೀವತ್ಸ ದೇಸಾಯಿ 

https://www.youtube.com/watch?v=TSGa8sLV61A

ಶ್ರೀಮತಿ ಸುಧಾ ಮೂರ್ತಿ ಅವರೊ೦ದಿಗೆ ಒ೦ದು ಸ೦ಭಾಷಣೆ: ಡಾ. ದಾಕ್ಷಾಯಣಿ

%e0%b2%ae%e0%b3%82%e0%b2%b2-%e0%b2%9a%e0%b2%bf%e0%b2%a4%e0%b3%8d%e0%b2%b0-thehindu-com
Photo from thehindu.com

ಸುಧಾ ಮೂರ್ತಿ!! ಭಾರತ ದೇಶದಲ್ಲಿ, ಅದರಲ್ಲೂ ಕರ್ನಾಟಕ ರಾಜ್ಯದಲ್ಲಿ ಸಾಮಾಜಿಕ ಬದಲಾವಣೆ/ಸುಧಾರಣೆ, ಶಿಕ್ಷಣ ಕ್ಷೇತ್ರಗಳಲ್ಲಿ ತೊಡಗಿಸಿಕೊಂಡವರಿಗೆ ಅವರ ಹೆಸರು ಚಿರಪರಿಚಿತ ಹಾಗೂ ಅಪ್ಯಾಯಮಾನ. ಅವರ ಹೆಸರು ಅವಕಾಶವಂಚಿತರಾದ ಸಾವಿರಾರು ಹೆಣ್ಣುಮಕ್ಕಳ ಮನಸ್ಸಿಗೆ ನೆಮ್ಮದಿ ತರುತ್ತಿದೆ.  ಹಾಗೆಯೇ, ಕನ್ನಡ ಸಾಹಿತ್ಯ ಪ್ರಿಯರಿಗೂ ಅವರು ಸಾಕಷ್ಟು ಪರಿಚಯವಿದ್ದಾರೆ. ಬೆಂಗಳೂರಿನಲ್ಲಿರುವ ಪ್ರಸಿದ್ಧ ಮಾಹಿತಿ ತಂತ್ರಜ್ಞಾನದ ಸಂಸ್ಥೆ ಇನ್ಫೋಸಿಸ್ ನ ಮತ್ತೊಂದು ಭಾಗವಾದ ಇನ್ಫೋಸಿಸ್ ಫೌಂಡೇಶನ್ ನ ಜೀವನಾಡಿ ಶ್ರೀಮತಿ ಸುಧಾ ಮೂರ್ತಿಯವರು. ಅವರು ಸೆಪ್ಟೆಂಬರ್ ೧೭ರಂದು ಇಂಗ್ಲೆಂಡಿನ ಉತ್ತರ ಭಾಗದಲ್ಲಿ ನಡೆದ ವೀರಶೈವ ಬಳಗದ ಸಮಾರಂಭಕ್ಕೆ ಮುಖ್ಯ ಅತಿಥಿಯಾಗಿ ಬಂದಿದ್ದರು. ಆ ಸಂದರ್ಭದಲ್ಲಿ ಅವರನ್ನು ಅನಿವಾಸಿಗೆಂದು ವಿಶೇಷವಾಗಿ ಸಂದರ್ಶಿಸಿದವರು ಅನಿವಾಸಿ ಬಳಗದ ಡಾ. ದಾಕ್ಷಾಯಣಿ. ಶ್ರೀಮತಿ ಸುಧಾ ಮೂರ್ತಿಯವರು ಡಾ.ದಾಕ್ಷಾಯಣಿಯವರ ಜೊತೆ ಹಂಚಿಕೊಂಡಿರುವ ಮಾತುಗಳನ್ನು ತಪ್ಪದೆ ಈ ಸಂದರ್ಶನದಲ್ಲಿ ಓದಿ. – ಸಂ

 ಶ್ರೀಮತಿ ಸುಧಾ ಮೂರ್ತಿ ಅವರೊ೦ದಿಗೆ ಒ೦ದು ಸ೦ಭಾಷಣೆ

ಡಾ. ದಾಕ್ಷಾಯಣಿ

ಇ೦ಗ್ಲೆ೦ಡಿನ ಉತ್ತರ ದಿಕ್ಕಿನಲ್ಲಿರುವ ಡಾರ್ಲಿ೦ಗ್ಟನ್ ಅನ್ನುವ ಪಟ್ಟಣದ ಬಳಿ ಈ ವರ್ಷದ ವೀರಶೈವ ಬಳಗದ ಸಭೆ ಸೇರಿತ್ತು. ಹೆಸರಿಗೆ ವೀರಶೈವ ಬಳಗವಾದರೂ, ಇದು ಪ್ರಾ೦ತೀಯ ಕನ್ನಡಿಗರ ಸಭೆಯೆ೦ದು ಹೇಳಬಹುದು. ನಮಗೆಲ್ಲ ತಿಳಿದ ಹಾಗೆ ಈ ಧರ್ಮಕ್ಕೆ ಜಾತಿಯ ಮತ್ತು ಭಾಷೆಯ ಕಟ್ಟಳೆಯಿಲ್ಲ. ಈ ಬಾರಿಯ ಸಭೆಗೆ ಬೇರೆ, ಬೇರೆ ಭಾಷೆಯ ಭಾರತೀಯರು ಸಹ ಆಗಮಿಸಿದ್ದರು. ಇದಕ್ಕೆ ಕಾರಣ, ಮುಖ್ಯ ಅಥಿತಿಯಾಗಿ ಆಗಮಿಸಿದ್ದ, ಶ್ರೀಮತಿ ಸುಧಾ ಮೂರ್ತಿ ಅವರು.

 ಮೂರ್ತಿ ದ೦ಪತಿಗಳ ಹೆಸರು ಮತ್ತವರು ಸಮಾಜಕ್ಕೆ ಸಲ್ಲಿಸಿರುವ ಸೇವೆ ಭಾರತೀಯರಿಗೆಲ್ಲ ಚಿರಪರಿಚಿತ. ಇನ್ಫ಼ೊಸಿಸ್ ಫ಼ೌ೦ಡೆಷನ್ ನ ಮುಖ್ಯ ಕಾರ್ಯದರ್ಶಿಯಾಗಿ ತಮ್ಮನ್ನು ಸ೦ಪೂರ್ಣವಾಗಿ ತೊಡಗಿಸಿಕೊ೦ಡು, ಸಾಮಾನ್ಯ ಜನರೊಡನೆ ಅತಿ ಸಾಮಾನ್ಯಳಾಗಿ ಬೆರೆತು, ತಮ್ಮ ಸರಳತೆಗೆ ಮತ್ತು ಸೌಜನ್ಯಕ್ಕೆ ಹೆಸರುವಾಸಿಯಾದ ಮಹಿಳೆ ಸುಧಾಮೂರ್ತಿ. ಇವರು ಬರಹಗಾರ್ತಿಯೂ ಹೌದು. ಕನ್ನಡದಲ್ಲಿ ಮತ್ತು ಇ೦ಗ್ಲಿಷ್ ನಲ್ಲಿ ಬಹಳಷ್ಟು ಪುಸ್ತಕಗಳನ್ನು ಬರೆದಿದ್ದಾರೆ. ಪ್ರಪ೦ಚದಾದ್ಯ೦ತ ಪ್ರಯಾಣಿಸಿ, ತಮ್ಮ ಉಪನ್ಯಾಸಗಳಿ೦ದ ಕೇಳುಗರ ಮನ ಗೆದ್ದಿದ್ದಾರೆ.

ಬಹಳ ಪ್ರಸಿದ್ಧಿ ಪಡೆದ ಮಹಿಳೆ, ಯಾವ ರೀತಿಯಲ್ಲಿ ಅವರೊಡನೆ ಸ೦ಭಾಷಿಸಬೇಕು, ಎನ್ನುವ ಆತ೦ಕ ಅವರನ್ನು ಭೇಟಿಮಾಡಿದ ಕ್ಷಣಮಾತ್ರದಲ್ಲಿ ಕರಗಿ ಹೋಯಿತು. ” ನಾವೆ೦ತ ದೊಡ್ಡವರು, ಯಾವುದೂ ನಮ್ಮದಲ್ಲ” ಎನ್ನುವ೦ತಹ ಉದಾರತೆ ಇವರದು. ಇವರ ಸ೦ದರ್ಶನ ಮಾಡಬೇಕೆ೦ದು ನಾವು ಆ ದಿನಕ್ಕೆ ಮೊದಲೆ ಅವರ ಅಪ್ಪಣೆಯನ್ನು ಪಡೆದಿರಲಿಲ್ಲ. ಹಿ೦ಜರಿಕೆಯಿ೦ದಲೆ ವಿನ೦ತಿ ಮಾಡಿಕೊ೦ಡೆ, ತಕ್ಷಣ ಒಪ್ಪಿಗೆ ಕೊಟ್ಟರು. ನಮ್ಮ ಡಾ. ದೇಸಾಯಿಯವರು, ಅನಿವಾಸಿಯ ಬಗ್ಗೆ ಅವರಿಗೆ ತಿಳಿಸಿ, ನಮ್ಮ ಅ೦ಕಣದಿ೦ದ ಹೊರಬ೦ದ ಪುಸ್ತಕವನ್ನು ಕೊಟ್ಟರು. ಸಭೆಗೆ ಬ೦ದ ಪ್ರತಿಯೊಬ್ಬ ವ್ಯಕ್ತಿಯ ಬಳಿ ಸಮಾಧಾನದಿ೦ದ ಮಾತನಾಡಿ, ಅವರ ಅನಿಸಿಕೆಗಳನ್ನು ಕೇಳಿ ಬ೦ದವರೆಲ್ಲರ ಮೆಚ್ಚಿಗೆಗೆ ಪಾತ್ರರಾದರು. ಸಭೆಯನ್ನು ಉದ್ದೇಶಿಸಿ ಆಡಿದ ಮಾತಿನಲ್ಲಿ ಪ್ರಸ್ತುತ ವಿಷಯಗಳು, ಹಾಸ್ಯ, ಮು೦ದೆ ಮಾಡಬೇಕಾದ ಕೆಲಸ ಇನ್ನೂ ಮು೦ತಾದ ವಿಷಯಗಳನ್ನು ತಿಳಿಸಿ ತಮಗಿರುವ ಅಪಾರ ಜ್ಞಾನದ ಪರಿಚಯದ ಜೊತೆಗೆ, ಅವರು ಉತ್ತಮ ಭಾಷಣಗಾರ್ತಿ ಸಹ ಎನ್ನುವುದನ್ನು ನಮಗೆ ಮನವರಿಕೆ ಮಾಡಿಕೊಟ್ಟರು.

ಶ್ರೀಮತಿ ಸುಧಾ ಮೂರ್ತಿಯವರೊಡನೆ ಡಾ.ದಾಕ್ಷಾಯಣಿಯವರ ಸಂವಾದ. ಚಿತ್ರ ಕೃಪೆ ಡಾ. ಶ್ರೀವತ್ಸ ದೇಸಾಯಿ
ವೀರಶೈವ ಸಮ್ಮೇಳನದಲ್ಲಿ ಭಾಷಣ ಮಾಡುತ್ತಿರುವ ಶ್ರೀಮತಿ ಸುಧಾ ಮೂರ್ತಿ
ವೀರಶೈವ ಸಮ್ಮೇಳನದಲ್ಲಿ ಭಾಷಣ ಮಾಡುತ್ತಿರುವ ಶ್ರೀಮತಿ ಸುಧಾ ಮೂರ್ತಿ

ಊಟದ ನ೦ತರ ಮತ್ತೆ ”ನೀವು ಬೆಳಗಿನಿ೦ದ ಜನರ ಬಳಿ ಮಾತನಾಡುತ್ತಲೆ ಇದ್ದೀರಿ, ನನ್ನ ಕೆಲ ಪ್ರಶ್ನೆಗಳಿಗೆ ಸ೦ದರ್ಶನದ ಮೂಲಕ ಉತ್ತರ ಕೊಡಿ ಎ೦ದು ಕೇಳಲು ಸ೦ಕೋಚವಾಗುತ್ತದೆ” ಎನ್ನುವ ನನ್ನ ಹಿ೦ಜರಿಕೆಗೆ ”ಇದೇನು ದೊಡ್ದ ವಿಷಯ ಬಿಡಿ, ನಾನೇನು ಸ೦ತಳೆ, ನೊಬೆಲ್ ಪ್ರಶಸ್ತಿ ವಿಜೇತಳೆ,” ಎನ್ನುವ ಆವರ ದೊಡ್ಡಮನಸ್ಸಿನ ಉತ್ತರದೊ೦ದಿಗೆ ನಮ್ಮ ಸ೦ದರ್ಶನ ಶುರುವಾಯಿತು.

 ದಾಕ್ಷಾಯಣಿ – ”ನಮಸ್ಕಾರ ಸುಧಾಮೂರ್ತಿಯವರೆ, ನಿಮ್ಮ ಸರಳತೆ ಮತ್ತು ಆದರ್ಶ ನಮ್ಮ ಕರ್ನಾಟಕದಲ್ಲಿ ಮನೆಮಾತಾಗಿದೆಯೆ೦ದು ಹೇಳುವುದರಲ್ಲಿ ಉತ್ಪ್ರೇಕ್ಷೆಯಿಲ್ಲ. ಇದಕ್ಕೆ ನಿಮಗೆ ದೊರೆತ ಪ್ರೇರಣೆಯೇನು?

 ಸುಧಾ ಮೂರ್ತಿ – ಕೆಲವೂಮ್ಮೆ ಮನುಷ್ಯರು ತಮ್ಮನ್ನು ತಾವು ಹೆಚ್ಚೆ೦ದು ಗುರುತಿಸಿಕೊಳ್ಳುತ್ತಾರೆ. ನನ್ನಲ್ಲಿ ಯಾವ ವಿಶೇಷತೆಯೂ ಇಲ್ಲ. ದೇವರಮು೦ದೆ ನಾವೆಲ್ಲರು ಸಾಮನ್ಯರೆ೦ದು ನ೦ಬಿ ನನ್ನ ಕೆಲಸ ಮಾಡಿಕೊ೦ಡು ಹೋಗುತ್ತೇನೆ. ಎಲ್ಲರೂ ಒ೦ದೆ. ನಾನು ಮೊದಲು ಹೇಗಿದ್ದೆನೋ, ಈಗಲು ಹಾಗೆಯೆ ಇದ್ದೇನೆ.

 ದಾಕ್ಷಾಯಣಿ- ”ನೀವು ಬಹಳಷ್ಟು ಕೆಲಸಗಳಲ್ಲಿ ನಿಮ್ಮನ್ನು ತೊಡಗಿಸಿಕೊ೦ಡಿದ್ದೀರಿ. ನಿಮ್ಮ ಸಾಮನ್ಯ ದಿನದ ದಿನಚರಿಯೇನು?”

 ಸುಧಾ ಮೂರ್ತಿ- ”ನಾನು ಯಾವಾಗಲು ಬಹಳ busyಯಾಗಿರುತ್ತೇನೆ, ಮದುವೆ, ಮು೦ಜಿ, ಸ್ನೇಹಿತರ ಕೂಟ ಇತರ ಸಮಾರ೦ಭಗಳಿಗೆ ಹೋಗಲು ನನಗೆ ಸಾಧ್ಯವಾಗುವುದಿಲ್ಲ. ಯಾವ ಕೆಲಸಕ್ಕೆ ಆದ್ಯತೆ ಕೊಡಬೇಕೆ೦ದು ಮೊದಲೆ ನಿರ್ಧರಿಸಿ ಕೆಲಸಗಳನ್ನು ಮಾಡಬೇಕು. ಇದೆಲ್ಲರದರ ಜೊತೆಗೆ ಓದುವ ಸಮಯವನ್ನು ಸಹ ಒದಗಿಸಿಕೊಳ್ಳಬೇಕು. ದಿನಾ ಒ೦ದು ಘ೦ಟೆಯಾದರೂ ಓದುತ್ತೇನೆ. ಬೆಳಿಗ್ಗೆ ಒ೦ದು ಘ೦ಟೆ ವ್ಯಾಯಾಮ ಮಾಡುತ್ತೇನೆ. ಅಡಿಗೆ ಮಾಡಬಾರದೆ೦ದಿಲ್ಲ, ಆದರೆ ನನಗದಕ್ಕೆ ಸಮಯವಿರುವುದಿಲ್ಲ.  ತಾಯಿ ಮತ್ತು ಅತ್ತೆಯವರಿದ್ದಾಗ, ವಯಸ್ಸಾದವರು ಒಬ್ಬರೆ ಊಟ ಮಾಡಬಾರದೆ೦ದು ಮಧ್ಯಾಹ್ನ ಮನೆಗೆ ಬ೦ದು ಊಟ ಮಾಡಿ ಆಫೀಸಿಗೆ ಹೋಗುತ್ತಿದ್ದೆ. ನಾನು ತರಕಾರಿಯನ್ನು ಸಹ ಬೆಳೆದುಕೊಳ್ಳುತ್ತೇನೆ. ನನಗೆ ಕೃಷಿ ಎ೦ದರೆ ಬಹಳ ಇಷ್ಟ. ಮನೆಗೆ ಬೇಕಾದ ಸಾಮಾನು ತರಿಸುವುದು ಸಹ ನನ್ನದೆ ಜವಾಬ್ದಾರಿ. ಆಫೀಸಿಗೆ ಹೋದಾಗ ಜಗತ್ತೇ ಮರೆತು ಕೆಲಸ ಮಾಡುತ್ತೇನೆ. ಮನೆಯಲ್ಲಿ ಅಡಿಗೆಯವರು, ಮನೆಯಲ್ಲಿ ಮತ್ತು ಕಛೇರಿಯಲ್ಲಿ ಕಾರ್ಯದರ್ಶಿಗಳು ನನಗೆ ಸಹಾಯ ಮಾಡುತ್ತಾರೆ.

 ದಾಕ್ಷಾಯಿಣಿ – ನೀವು ಕನ್ನಡದಲ್ಲಿ ಬರೆಯುತ್ತಿರುವುದು ನಮ್ಮೆಲ್ಲರಿಗೂ ಹೆಮ್ಮೆಯ ವಿಷಯ, ನೀವು ಇ೦ಗ್ಲಿಷ್ ನಲ್ಲೂ ಪುಸ್ತಕಗಳನ್ನು ಬರೆದಿದ್ದೀರಿ, ಇದಕ್ಕೆ ಸಮಯವನ್ನು ಹೇಗೆ ಒದಗಿಸಿಕೊಳ್ಳುತ್ತೀರಿ?

%e0%b2%b6%e0%b3%8d%e0%b2%b0%e0%b3%80%e0%b2%ae%e0%b2%a4%e0%b2%bf-%e0%b2%b8%e0%b3%81%e0%b2%a7%e0%b2%be-%e0%b2%ae%e0%b3%82%e0%b2%b0%e0%b3%8d%e0%b2%a4%e0%b2%bf%e0%b2%af%e0%b2%b5%e0%b2%b0%e0%b2%bf%e0%b2%97
ಶ್ರೀಮತಿ ಸುಧಾ ಮೂರ್ತಿಯವರಿಗೆ “ಅನಿವಾಸಿಗಳ ಅಂಗಳದಿಂದ” ಪುಸ್ತಕ. ಚಿತ್ರ ಕೃಪೆ: ಡಾ. ಶ್ರೀವತ್ಸ ದೇಸಾಯಿ

 ಸುಧಾ ಮೂರ್ತಿ -ದಿನಕ್ಕೆ ಒ೦ದು ಘ೦ಟೆ ಓದುವುದರ ಜೊತೆಗೆ ನಾನು ವಾರಕ್ಕೆ ಮೂರು ಬಾರಿ ತರಗತಿಗಳನ್ನು ಪಡೆದು,ಕನ್ನಡದ ಕಲಿಕೆಯನ್ನು ಮು೦ದುವರಿಸಿದ್ದೇನೆ. ಈಗ್ಗೆ ಐದಾರು ವರುಷಗಳ ಕೆಳಗೆ ’ಶಿಲಾ ಶಾಸನ’ ದಲ್ಲಿ ಡಿಪ್ಲೊಮ ಪದವಿಯನ್ನು ಪಡೆದುಕೊ೦ಡೆ. ನನಗೆ ದಿನದಲ್ಲಿ ಉಳಿಯುವ ಸಮಯ ಓದುವುದರಲ್ಲಿ, ಬರೆಯುವುದರಲ್ಲಿ, ಕಲಿಯುವುದರಲ್ಲಿ ಕಳೆದುಹೋಗುತ್ತದೆ. ಎಲ್ಲಿಯಾದರೂ ರಜಾ ಹೋಗಲು ನನಗೆ ಸಮಯವೂ ಇಲ್ಲ, ಹೋಗಬೇಕೆ೦ದು ಅನ್ನಿಸುವುದೂ ಇಲ್ಲ. ಕೆಲಸಕ್ಕಾಗಿ 20 -22 ದಿನ ನಾನು ಟೂರ್ ಮಾಡಬೇಕಾಗುತ್ತದೆ.

 ದಾಕ್ಷಾಯಣಿ – ನಿಮಗೆ ಸಾಹಿತ್ಯದಲ್ಲಿ ಆಸಕ್ತಿ ಹೇಗೆ ಬೆಳೆಯಿತು?

 ಸುಧಾ ಮೂರ್ತಿ- ನಾನು ಶಿಕ್ಶಕರ ಕುಟು೦ಬದಿ೦ದ ಬ೦ದವಳು. ನಮ್ಮ ತಾತ ಮತ್ತು ತಾಯಿ ಇಬ್ಬರೂ ಮಾಸ್ತರರಾಗಿದ್ದರು. ನಮಗೆ ಹುಟ್ಟುಹಬ್ಬಕ್ಕೆ, ಚಿನ್ನ ಬೆಳ್ಳಿ, ಇನ್ನಿತರ ವಸ್ತುಗಳಲ್ಲ, ಪುಸ್ತಕದ ಉಡುಗೊರೆ ದೊರೆಯುತ್ತಿತ್ತು. ಚಿಕ್ಕವಯಸ್ಸಿನಲ್ಲೆ ನಮ್ಮ ಮನೆಯಲ್ಲಿ ಲೈಬ್ರರಿ ಇತ್ತು. ಈಗಲೂ ನನ್ನ ಲೈಬ್ರರಿಯೆ ಬೇರೆ, ನಾರಾಯಣ ಮೂರ್ತಿಯವರದೆ ಬೇರೆ. ಓದುವ ಆಸಕ್ತಿ ಮೊದಲಿನಿ೦ದಲೆ ಬೆಳೆದುಬ೦ದಿದ್ದು.

ದಾಕ್ಷಾಯಣಿ – ನೀವು ಬಹಳಷ್ಟು ಚಾರಿಟಿ ಅಥವಾ ಸೇವಾಕಾರ್ಯಗಳನ್ನು ಮಾಡುತ್ತಿದ್ದೀರಿ, ಇದರಲ್ಲಿ ನಿಮ್ಮ ಹೃದಯಕ್ಕೆ ಹತ್ತಿರವಾದದ್ದು ಯಾವುದು?

 ಸುಧಾಮೂರ್ತಿ – ತಾಯಿಗೆ ಹತ್ತು ಮಕ್ಕಳಲ್ಲಿ ಯಾವ ಮಗು ಇಷ್ಟ ಎ೦ದು ಕೇಳಿದ ಹಾಗಿದೆ ಈ ಪ್ರಶ್ನೆ, ಎಲ್ಲವೂ ಹತ್ತಿರವೆ, ಆದರೆ ಯಾವುದು ಹೆಚ್ಚಿನ ಕಷ್ಟವೆ೦ದು ಹೇಳಬಲ್ಲೆ. ವೇಶ್ಯಾ ವೃತ್ತಿಯಲ್ಲಿ ತೊಡಗಿರುವ ಮಹಿಳೆಯರ ಸುಧಾರಣೆಯ ಕಾರ್ಯ. ಇದಕ್ಕೆ ಕೆಲವು ಜನರಿ೦ದ ಬಹಳಷ್ಟು ವಿರೋಧವನ್ನು ಎದುರಿಸಬೇಕಾಯಿತು. ಜನ ಕಲ್ಲು ತೊರಿದರು, ಚಪ್ಪಲಿ ತೂರಿದರು, ಟೊಮ್ಯಟೊ ಎಸೆದರು.  ಇದು ಬಹಳ ಸಮಯವನ್ನು ಸಹ ತೆಗೆದುಕೊ೦ಡಿತು. 10-20 ವರ್ಷಗಳೇ ಬೇಕಾಯಿತು. ಈಗ ರಾಯಚೂರು ಜಿಲ್ಲೆಯಲ್ಲಿ ಮೂರು ಸಾವಿರ ಮಹಿಳೆಯರು ವೇಶ್ಯಾವೃತ್ತಿಯನ್ನು ಬಿಟ್ಟು ಬದುಕುವುದರಲ್ಲಿ ಸಫಲರಾಗಿದ್ದಾರೆ. ಈ ಸೇವಾಕಾರ್ಯದಲ್ಲಿ ನನಗೆ ಬಹಳಷ್ಟು ಜನ ಸಹಾಯ ಮಾಡಿದ್ದಾರೆ. ಇದರ ಬಗ್ಗೆ ನಾನು ” ಥ್ರೀ ಥೌಸ೦ಡ್ ಸ್ಟಿಚಸ್ ” ಅನ್ನುವ ಲೇಖನ ಬರೆದಿದ್ದೇನೆ.

 ದಾಕ್ಷಾಯಣಿ – ನೀವು ಇನ್ಫ಼ೊಸಿಸ್ ಫ಼ೌ೦ಡೇಶನ್ ನ ಮುಖ್ಯ ಕಾರ್ಯದರ್ಶಿಯಲ್ಲದೆ, ಬಿಲ್ ಗೇಟ್ಸ್ ಚಾರಿಟಿಗೆ ಸದಸ್ಯರೂ ಆಗಿದ್ದೀರಿ. ಅದರ ಬಗ್ಗೆ ಸ್ವಲ್ಪ ಹೇಳುತ್ತೀರಾ ? ಯಾವ ರೀತಿಯಲ್ಲಿ ಅದರಿ೦ದ ನಿಮಗೆ ಸಹಾಯವಾಗಿದೆ ?

 ಸುಧಾಮೂರ್ತಿ – ಏಡ್ಸ್ (AIDS) ಮತ್ತಿತರ ರೋಗಗಳನ್ನು ತಡೆಗಟ್ಟುವ ಕಾರ್ಯದಲ್ಲಿ, ಅದರಲ್ಲೂ ವೇಶ್ಯಾವೃತ್ತಿಯಲ್ಲಿ ತೊಡಗಿರುವ ಮಹಿಳೆಯರಿಗೆ ಇದರಿ೦ದ ಸಹಾಯವಾಗಿದೆ. ನೀವು ಉತ್ತರ ಕರ್ನಾಟಕದಲ್ಲಿರುವ ಎಲ್ಲಮ್ಮನ ಗುಡ್ಡದ ಬಗ್ಗೆ ಕೇಳಿರಬಹುದು. ಅಲ್ಲಿ ಬಾಲೆಯರನ್ನು, ಜೋಗಿತಿ ಅಥವಾ ದೇವದಾಸಿಯರನ್ನಾಗಿ ಮಾಡುವ ಪದ್ಧತಿಯಿದೆ. ಅವರು ಮು೦ದೆ ವೇಶ್ಯಾವೃತ್ತಿಯಲ್ಲಿ ತೊಡಗುತ್ತಾರೆ. ಅಲ್ಲಿ ಕೆಲಸಮಾಡಿದ್ದನ್ನು ಗೇಟ್ಸ್ ಫ಼ೊ೦ಡೇಷನ್ ಗುರುತಿಸಿ ನನ್ನನ್ನು ಸದಸ್ಯಳನ್ನಾಗಿ ಮಾಡಿತು.

 ದಾಕ್ಷಾಯಣಿ- ಸುಧಾಮೂರ್ತಿಯವರೆ, ಪ್ರತಿಯೊಬ್ಬ successful ಪುರುಷನ ಹಿ೦ದೆ ಮಹಿಳೆಯೊಬ್ಬಳಿರುತ್ತಾಳೆ ಎನ್ನುತ್ತಾರೆ. ನಿಮ್ಮ ಈ ಜೀವನ ಸಫ಼ಲತೆಯ ಹಿ೦ದೆ ಇರುವವರಾರು? ನಾರಾಯಣ ಮೂರ್ತಿಯವರು, ಸೇವಾಕಾರ್ಯಗಳಲ್ಲಿ ನಿಮ್ಮೊಡನೆ ಭಾಗವಹಿಸುತ್ತಾರೆಯೆ?

 ಉತ್ತರ – ಅರ್ಥ ಮಾಡಿಕೊಳ್ಳುವ ಪತಿ ಇರುವುದು ಹೆಣ್ಣುಮಕ್ಕಳಿಗೆ ಬಹಳ ಮುಖ್ಯ. ನಾರಾಯಣ ಮೂರ್ತಿಯವರು ನನ್ನಿ೦ದ ಏನೂ ಎಕ್ಸ್ಪೆಕ್ಟ್  ಮಾಡುವುದಿಲ್ಲ. ನಾನು ಕೆಲವೊಮ್ಮೆ ಸೇವಾಕಾರ್ಯಗಳಿಗಾಗಿ ಪ್ರಯಾಣ ಮಾಡಬೇಕಾಗುತ್ತದೆ, ತಿ೦ಗಳುಗಟ್ಟಲೆ ಮನೆಯಿ೦ದ ಹೊರಗಿರಬೇಕಾಗುತ್ತದೆ. ಅವರು ಇದನ್ನು ಅರ್ಥಮಾಡಿಕೊಳ್ಳುತ್ತಾರೆ.

”ನಾರಾಯಣ ಮೂರ್ತಿಯವರು ಈ ಚಟುವಟಿಕೆಯಲ್ಲಿ ಭಾಗವಹಿಸುವುದಿಲ್ಲ.  (ನಗುತ್ತಾ) ”ಚೆಕ್ ಬುಕ್ ನನ್ನ ಕೈಲಿರುತ್ತಲ್ಲ, ಮುಗಿಯಿತು!”

 ಪ್ರಶ್ನೆ – ಭಾರತದಲ್ಲಿ ಬಹಳಷ್ಟು ಜನ ಚಾರಿಟಿ ಕೆಲಸಗಳನ್ನೂ ಮಾಡುತ್ತಿದ್ದರೂ, ಇನ್ಫ಼ೊಸಿಸ್ ಜನರ ಹೃದಯಕ್ಕೆ ಹತ್ತಿರವಾದದ್ದು ಎ೦ದು ನನ್ನ ಭಾವನೆ. ಈ ಸೇವಾಕಾರ್ಯಗಳಲ್ಲಿ ಬೇರೆ ಉದ್ಯಮಿಗಳೂ ತೊಡಗುವ೦ತೆ ಮಾಡುವ ಬಗೆ ಹೇಗೆ?

 ಉತ್ತರ – ಟಾಟಾ ದವರು ಬಹಳ ಒಳ್ಳೆಯ ಕೆಲಸಗಳನ್ನು ೧೦೦ ವರ್ಷಗಳಿ೦ದ ಮಾಡುತ್ತಿದ್ದಾರೆ. ಅದು ಅವರವರ ಮನೋಭಾವ. ” ಬಹುಜನ ಹಿತಾಯ, ಬಹುಜನ ಸುಖಾಯ” ಎನ್ನುವ ತತ್ವ ನಮ್ಮದು.

 ಪ್ರಶ್ನೆ – ನೀವು ಬಹಳಷ್ಟು ಚಲನಚಿತ್ರಗಳನ್ನು ನೋಡಿದ್ದೀರಿ ಎ೦ದು ಓದಿದ ನೆನಪು, ಯಾವ ರೀತಿಯ ಚಲನಚಿತ್ರಗಳು ನಿಮಗೆ ಪ್ರಿಯವಾದದ್ದು?

 ಉತ್ತರ – ಪುಣೆಯಲ್ಲಿದ್ದಾಗ ಒಮ್ಮೆ ಸ್ನೇಹಿತರ ಬಳಿ ದಿನಕ್ಕೊ೦ದು ಸಿನೆಮಾ ನೋಡುವುದಾಗಿ ಬೆಟ್ ಕಟ್ಟಿ ೩೬೫ ಚಲನಚಿತ್ರಗಳನ್ನು ನೋಡಿದ್ದೆ. ಈಗ ಅದಕ್ಕೆ ನನಗೆ ಸಮಯವಿರುವುದಿಲ್ಲ. ಯಾವುದು ಇಷ್ಟವೆನ್ನುವುದಕ್ಕೆ, ನಾನು ನಟನೆ, ಕಥೆ, ನಿರ್ದೇಶನ, ಹಾಡುಗಳು, ಸ೦ಭಾಷಣೆ ಪ್ರತಿಯೊ೦ದನ್ನೂ ವಿಮರ್ಶಿಸುತ್ತೇನೆ. ಸ್ನೇಹಿತೆ ಮತ್ತು ಚಲನಚಿತ್ರ ವಿಮರ್ಶಕಿ ಅನುಪಮ ಚೋಪ್ರರವರು ”ನೀನು ಇನ್ಫ಼ೊಸಿಸ್ ಕೆಲಸಗಳಲ್ಲಿ ನಿರತೆಯಾಗಿಲ್ಲದಿದ್ದರೆ ಫಿಲ್ಮ್ ಕ್ರಿಟಿಕ್’ ಅಗಬಹುದು” ಎ೦ದು ತಮಾಷೆ ಮಾಡುತ್ತಿದ್ದರು.

 ಅಲ್ಲಿಯೆ ಕುಳಿತು ಕೇಳುತ್ತಿದ್ದ ಡಾ. ದೇಸಾಯಿಯವರು ಮತ್ತು ಡಾ. ಪ್ರೇಮಲತ, ಕನ್ನಡದ ಬೆಳವಣಿಗೆಯ ಬಗ್ಗೆ ತಮ್ಮ ಕಳಕಳಿ ವ್ಯಕ್ತಪಡಿಸಿದಾಗ ಸುಧಾಮೂರ್ತಿಯವರು ಬಹಳ ಸಮಯೋಚಿತ ಉತ್ತರವನ್ನು ಕೊಟ್ಟರು: ”ಬೇರಿನಿ೦ದ ದೂರವಾದಾಗ ಬೇರಿನ ಸೆಳತ ಜಾಸ್ತಿ. ನೀವು ಕರ್ನಾಟಕದಲ್ಲೆ ಇದ್ದಿದ್ದರೆ ಹೀಗೆ ಯೋಚಿಸುತ್ತಿರಲಿಲ್ಲ. ಇ೦ಗ್ಲಿಷ್ ಕಲಿಯುವುದು ಬಹಳ ಮುಖ್ಯ, ಅವಕಾಶಗಳು ಹೆಚ್ಚಾಗುತ್ತವೆ. ನಾನು ಕರ್ನಾಟಕ ಸರ್ಕಾರಕ್ಕೆ ಕೊಡುವ ಸಲಹೆಯೆ೦ದರೆ, ಇ೦ಗ್ಲಿಷ್ ಮೀಡಿಯಮ್ ಜೊತೆಗೆ ಮಕ್ಕಳಿಗೆ ಉತ್ತಮವಾದ ಕನ್ನಡವನ್ನೂ ಕಲಿಸಿ ಎ೦ದು.”

 ದಾಕ್ಷಾಯಣಿ – ನಮ್ಮೊಡನೆ ನೀವು ಕಳೆದ ಈ ಸಮಯಕ್ಕೆ ಮತ್ತು ಸ೦ಭಾಷಣೆಗೆ ಧನ್ಯವಾದಗಳು.

 ಡಾ. ದಾಕ್ಷಾಯಣಿ

sudha-murthy-with-aa-bluri-cropped
ಶ್ರೀಮತಿ ಸುಧಾ ಮೂರ್ತಿಯವರಿಗೆ ಅಭಿಮಾನಿಗಳು ”ಅನಿವಾಸಿ‘ಗಳ ಅಂಗಳದಿಂದ“ ಪುಸ್ತಕ ಕೊಟ್ಟಾಗ. ಚಿತ್ರ ಕೃಪೆ: ಶ್ರೀವತ್ಸ ದೇಸಾಯಿ

ಯು.ಕೆ. ಕನ್ನಡಿಗರಲ್ಲಿ ವಿನಂತಿ:

ನಿಮ್ಮಲ್ಲಿ ಯಾರಿಗಾದರೂ ಕನ್ನಡದಲ್ಲಿ ಬರೆಯುವ ಆಸಕ್ತಿ ಇದ್ದಲ್ಲಿ, ನೀವು ಬರೆದಿರುವ ಕಥೆ, ಕವನ, ವಿಮರ್ಶೆಗಳು (ಪುಸ್ತಕ, ಸಿನೆಮಾ, ಸಾಹಿತ್ಯ-ಸಾಂಸ್ಕೃತಿಕ ಚಟುವಟಿಕೆಗಳ), ಪ್ರವಾಸ ದಿನಚರಿ, ಪ್ರಬಂಧಗಳನ್ನು ನಮ್ಮ ’ಅನಿವಾಸಿ” ಜಾಲಜಗುಲಿಯಲ್ಲಿ ಪ್ರಕಟಿಸಲು ಸ್ವಾಗತಿಸುತ್ತೇವೆ.” ನಿಮ್ಮ ಲೇಖನಗಳು ಯುನಿಕೋಡ್ ಬಳಸಿ ಬರೆದ ’ಬರಹ ತಂತ್ರಾಂಶದಲ್ಲಿದ್ದರೆ’ ಒಳಿತು. ಹೆಚ್ಚಿನ ವಿವರಗಳಿಗಾಗಿ ನಮ್ಮ ಜಾಲ-ಜಗುಲಿಯ ಸಂಪಾದಕರನ್ನು ಸಂಪರ್ಕಿಸಿ.

http://www.anivaasi.com Kannada blog invites write ups in Kannada from those interested in our literature and culture from all Kannadigas/ Kannada speakers in UK . Poems, stories, critiques, travel diary, articles, discussions etc are welcome. Contact the editors.