ಅಡುಗೆ – ಅಡುಗೆಮನೆ ಸರಣಿ: ಮುರಳಿ ಹತ್ವಾರ್ ಮತ್ತು ವೀರೇಶ ಪಾಟೀಲ್

ಬರ್ರಿ ಬರ್ರಿ, ಬೆಳ್ ಬೆಳಿಗ್ಗೆ ಫ಼್ರೆಶ್ ಆದ್ರಿ ಅಲ್ಲ. ಅಡುಗೆಮನೆಗೆ ಹೋಗಿ ನೋಡೊಣಾ, ಇವತ್ತೇನು ತಿಂಡಿಗೆ ಅಂತ? ಬರೇ ಗದ್ಯ ಸಾಕಾಯ್ತು ಅಂತ ಮುರಳಿ ಹತ್ವಾರ್ ಅವರು ಬಿಸಿ ಬಿಸಿ ಹಬೆಯಾಡೋ ಪದ್ಯ ಬಡಿಸಿದರ, ವೀರೇಶ ಪಾಟೀಲರು ತಮ್ಮ ಗೌಡತಿ ಸಲುವಾಗಿ ತಮ್ಮ ಕೈಯಾರೆ ಮಾಡಿದ ಪೇಶಲ್ ಉಂಡಿ ಹಂಚಲಿಕ್ಕೆ ತಂದಾರ! ಬರ್ರಿ, ಇಲ್ಲೇ ಥಣ್ಣಗ ಕೂತು ಸವಿದು, ಒಂದ್ ಹನಿ ಬಿಸಿ ಕಾಫಿ ಗುಟುಕು ಹಾಕ್ಕೊಂಡು ಹೋಗೋಣಂತ. ಆಮ್ಯಾಲೆ ನಿಮ್ಮ ನಿಮ್ಮ ಪೆನ್ನು-ಪೇಪರು ತೊಗೊಂಡು ನಿಮ್ಮ ಮನ್ಯಾಗಿನ ಅಡಿಗಿಮನಿ ವಿಶೇಷಗಳ ಪಟ್ಣ ಕಟ್ಟಿ ನಮಗ ಕಳಸವಂತ್ರ್ಯಂತ! ಸರೇನಾ? ಹುಂ ಅನ್ನರಿ ಮತ್ತ! – ಎಲ್ಲೆನ್ ಗುಡೂರ್ (ಸಂ.)

ತಿನುಗವನಗಳು ಅರ್ಥಾತ್ ದಿ ಡೆಲೆಕ್ಟಬಲ್ ಪೋಯೆಮ್ಸ್ಮುರಳಿ ಹತ್ವಾರ್

 1. ಇಡ್ಲಿಗೆ ಸೋತ ಮನ........ 
 
ಚಟ್ನಿ-ಸಾಂಬಾರು ಮೇಳದಲ್ಲಿ 
ಹರಿಯುವ ಬೆಣ್ಣೆಯ ರಾಗದಲ್ಲಿ 
ಮರೆತ ನಿನ್ನೆಗಳ ಮತ್ತೆ ಹಾಡಿಸಿತು 
ಭಾನುವಾರದ ಬೆಳಗಿನ ಬಿಸಿ ಇಡ್ಲಿ!
 
ಬೆಳೆದೂರಿನ ಬೀದಿ-ಬೀದಿಗಳಲ್ಲಿ 
ಹೋಟೆಲು, ಕ್ಯಾಂಟೀನು, ಗಾಡಿಗಳಲಿ
ನಿತ್ಯ ಉಣಿಸಿದ ಕೈಗಳ ನೆನಪಿಸಿತು 
ಭಾನುವಾರದ ಬೆಳಗಿನ ಬಿಸಿ ಇಡ್ಲಿ!
 
ಹಣ್ಣೆಲೆಗಳ ನೆಲಕೊಪ್ಪಿಸಿದ ಬೋಳು
ಮರಗಳ, ಕೊರೆಕೊರೆವ ಚಳಿಯೂರಿನ
ಮನೆಯೊಳಗೆ ಮನವ ಬೆಚ್ಚಗಾಗಿಸಿತು
ಭಾನುವಾರದ ಬೆಳಗಿನ ಬಿಸಿ ಇಡ್ಲಿ!
 
ಕೆಲಸಗಳ ಬಿಸಿಯೇರಿ ಬೆವೆತು
ಮೌನದಾಳಕೆ ಇಳಿದ ಮನವನೆತ್ತಿ 
ತಣಿ-ತಣಿಸಿ ಮತ್ತೆ ಕುಣಿಕುಣಿಸಿತು 
ಭಾನುವಾರದ ಬೆಳಗಿನ ಬಿಸಿ ಇಡ್ಲಿ!
 
ಬಿಸಿ ತುಪ್ಪದೊಂದಿಗೆ ಬೆರೆತು 
ಹಾಲುಹಲ್ಲಿನ ಬಾಯಿ ತುಂಬುತ 
ನಗುನಗುವ ನಾಳೆಯ ಇಣುಕಿಸಿತು 
ಭಾನುವಾರದ ಬೆಳಗಿನ ಬಿಸಿ ಇಡ್ಲಿ!

******

 2. ಹೀಗೊಂದು ಭೋಜನ
 
ಅನುಭವದ ತಟ್ಟೆಗಳಲಿ
ಅಕ್ಷರಗಳ ಅನ್ನವರಳಿ
ವಿಚಾರಗಳ ಬಿಸಿ ಸಾರು
ನಯದ ತುಪ್ಪದೆ ಬೆರೆಯೆ, 
ಮಾತದು ಒಗ್ಗರಣೆಯ ಪಲ್ಯ!
 
ರಸವ ಕೆರಳಿಸುವ ಹುಳಿಯ
ಹೋಳುಗಳೊಂದು ಕಡೆ
ಮಣಿಸಿ ತಣಿಸುವ ತಂಬುಳಿಯ
ಹರಿವಿನ್ನೊಂದು ಕಡೆ
ಸುರಿಸುರಿಯೆ ಸಾಮರಸ್ಯದ ಸರಸ!
 
ಮನದಡಿಯ ಕಾಯಿ-ಬೆಲ್ಲ
ತುಟಿ ತಲುಪೆ, ಚಿರೋಟಿ-ಪೇಣಿ!
ಕೇಳುವ ಮನಸುಗಳಿಗೆ
ಸಿಹಿಹಾಲಲದ್ದಿದ ಮಂಡಿಗೆ;
ಉಂಡೆ, ಪಾಯಸ, ಹೋಳಿಗೆ! 
 
ಕಡೆಗುಳಿವುದು ಕಡೆಕಡೆದ
ಮಜ್ಜಿಗೆಯ ಒಳಗಿಳಿದ ಶುಂಠಿ
ಎಳೆ-ಎಳೆದ ಉದರ ವೀಣೆಯ
ಮಾತಿನಾಚೆಯ ಮಧುರ ರಾಗ.
ಏರಿಳಿವ ರಾಗದೊಳೆಲ್ಲ ಸರಾಗ! 

******

 3. Haiku 
ಬಿಸಿ ಕಾಫಿ:
ಗುಟುಕು ಗುಟುಕಲಿ
ತಂಗಾಳಿ!

- ಮುರಳಿ ಹತ್ವಾರ್

**********************************************************************

ತೀರದಿದ್ದರೂ ಮರೆಯದ ಬೈಕೆಯ ಉಂಡಿ – ವೀರೇಶ ಪಾಟೀಲ

ಅವತ್ತು ಮುಂಜಾನೆ ವಾರದ ಕೊನೀ ನೈಟ್ ಶಿಫ್ಟ್ ಮುಗಿಸಿಕೊಂಡು ಮನೆಗೆ ಬಂದಾಗ ಮೂರು ದಿನ ರಜೆ ಇರೋದನ್ನ ನೆನಸಿಕೊಂಡೂ ಏನೋ? ನಿದ್ದಿಗಿ  ಅಡ್ಡಾಗದೆ ಏನಾದರು ಅಡುಗೆ ಮಾಡೊ ಯೋಚನೆ ಮಾಡಿದೆ. ಶೇಂಗಾ ಉಂಡಿ ಮಾಡೋನು ಅಂತ ತಯಾರಾದೆ. ಹನ್ನೆರಡು ತಾಸು ಶಿಫ್ಟಿನಿಂದ ದಣಿದ ದೇಹ ಬೆಲ್ಲದ ಆಣ ತೆಗೆದು ವಿಧಿವತ್ತಾಗಿ ಉಂಡಿ ಮಾಡೋ ಗೊಂದಲಕ್ಕೆ ಹೋಗದೆ ಒಂದು ಶಾರ್ಟ್ ಕಟ್ ಯೋಚನೆ ಮಾಡತು .

ಇದು ಫಾಸ್ಟ್ ಫುಡ್ ಶೇಂಗಾ ಉಂಡಿ ಆಕ್ಕತಿ ಅಂತ ನನಗ ನಾನ ಶಭಾಷಗಿರಿ ಹೇಳಕೊಂಡು ಉಂಡಿ ಮಾಡಾಕ ಹತ್ತಿದ್ಯ.  ಭಡಾ ಭಡಾ ಬೆಲ್ಲದ ಕಣ್ಣಿ ವಡದು, ಶೇಂಗಾ ಹುಡಿಕಿ, ಎರಡುನೂ ಮಿಕ್ಸರ್ ಜಾರಿಗೆ ಹಾಕಿ, ಒಂದಿಷ್ಟು ತುಪ್ಪ ಸುರಿದು ಬರ್ರನೆ  ಮಿಕ್ಸರ್ ತಿರ್ಗಿಸಿದೆ.  ಜಾರಿನಿಂದ ಬೆಲ್ಲ ಮತ್ತ ತುಪ್ಪದ ಅಂಟನ ಮೆತ್ತಗೊಂಡ ಸಣ್ಣ ಬ್ಯಾಳ್ಯಾಗಿದ್ದ  ಶೇಂಗಾ ಮಿಶ್ರಣ ತಗದು ಎರಡೂ ಅಂಗೈಯ್ಯಾಗ ದುಂಡಗ ಮಾಡಿ ತಾಟನ್ಯಾಗ ಇಟ್ಟೆ, ಒಂದಿಷ್ಟು ದುಂಡಗ ಆದ್ವು,  ಆದ್ರ ಬಹುತೇಕ ಸೊಟ್ಟ-ಡೊಂಕ ಆಗಿದ್ವು. ಏನಾದ್ರೇನಂತ  ಫಾಸ್ಟ್ ಫುಡ್ ಸ್ಟೈಲ್ನ್ಯಾಗ ಉಂಡಿ ಮಾಡೇನಿ ಅನ್ನೋ ವಣ ಅಹಂಕಾರದಾಗ ಆಕಾರದ ಕೊರತೆ ಏನು ದೊಡ್ಡದ ಅನ್ನಿಸಲಿಲ್ಲ.

ಆ ಹುಸಿ ಧೀಮಾಕಿಗೆ ಕಾರಣ ಏನಂದ್ರ? ನಾನೇನು ಅಡುಗೆ ಪ್ರವೀಣನಲ್ಲ. ಮನೆ ಮತ್ತು ಊರಿಂದ ದೂರದ ಪರದೇಶದಲ್ಲಿ ಕೆಲವು ವರ್ಷಾ ಒಬ್ಬಂಟಿಯಾಗಿದ್ದಿದ್ದರಿಂದ ಬ್ಯಾರೆ ದಾರಿ ಇಲ್ಲದ ಚೂರು-ಪಾರು ಅಡುಗಿ  ಕಲ್ತಿದ್ದೆ;  ಶಾವಗಿ ಉಪ್ಪಿಟ್ಟು, ಒಗ್ಗರಿಣಿ ಮಂಡಕ್ಕಿ, ಅವಲಕ್ಕಿ, ಅನ್ನಾ, ಸಾರು, ದ್ವಾಸಿ, ಇಡ್ಲಿ, ಚಟ್ನಿ ಮಾಡೋದು ಒಂದ್ಚೂರು ಅಭ್ಯಾಸಾಗಿತ್ತು.  ಜೊತಿಗೆ ನನ್ನ ನಾಲಿಗೆ ಚಟಕ್ಕೆ ಬಗ್ಗಿ ಮಿರ್ಚಿ ಮತ್ತ ಹತ್ತಿಕಾಯಿ ಬಜಿ ಮಾಡಾಕ ಅವ್ವನ ಹತ್ರ ಸಣ್ಣವಿದ್ದಾಗ ಕಲ್ತಿದ್ದೆ. ಆದ್ರ ಸಿಹಿ ಅಡಗಿಗೂ ನಮಗೂ ಅಷ್ಟಕ್ಕ ಅಷ್ಟರಿ, ನಾ ಸಿಹಿ ಅಡಿಗೀ ಮಾಡಿದವನ ಅಲ್ರಿ. ಏನೋ ಹಬ್ಬ ಗಿಬ್ಬ ಇದ್ದಾಗ ಅವ್ವ ಫೋನ್ನ್ಯಾಗ ಜೋರ್ ಮಾಡಿ ಹೇಳಿದ್ರ ರೆಡಿಮೇಡ್ ಶಾವಗಿ ಹುಗ್ಗಿ ಮಿಕ್ಸ್ ಹಾಕಿ ಎರಡ ತುತ್ತು ಮಾಡಿದ್ದ ಐತಿ, ಇಲ್ಲಂದ್ರ ಸೀ-ಗೀ ನಮಗ ಆಗೇ ಬರದಿಲ್ರಿ.

ಹಂಗಂದ್ರ ಅವತ್ತ್ಯಾಕ ಉಂಡಿ ಮಾಡಿದ್ಯಾ ಅಂತೀರೇನು? ನನ್ನ ಹೆಂಡತಿ ಹೊಟ್ಟಿಲೆ ಇದ್ಲು, ಎರಡ ದಿನದಹಿಂದ ಶೇಂಗಾ ಉಂಡಿ ತಿನ್ನಂಗಾಗೇತಿ ಅಂತ ಹಂಗ ಮಾತ್ನ್ಯಾಗ  ಅಂದಿದ್ಲ. ನನ್ನ ಕಟ್ಟಗೊಂಡು ಹೊರದೇಶಕ್ಕ ಬಂದು ಆಗಿನ್ನೂ ಮೊದಲನೇ ಕೆಲಸ ಶುರು ಮಾಡಿದ್ಲು ಮ್ಯಾಲೆ ಮನೆವರೆಲ್ಲರಿಂದ ದೂರ ಇದ್ದ ಆಕಿ ಹೇಳಿದ ಬೈಕೆನಾ ನಾನs ಹೆಂಗರ ತೀರಿಸಬೇಕಲ್ಲ ಅಂತ ಶೇಂಗಾ ಉಂಡಿ ಮಾಡೋ ಸಾಹಸಕ್ಕ ಕೈ ಹಾಕಿದ್ರೀ.

ನಾ ಮುಂಜಾನೆ ಮನಿಗೆ ಬರೋದ್ರಾಗ ಅಕಿ ಡೇ ಶಿಫ್ಟ್ ಗೆ  ಹೋಗಿದ್ಲು. ಇದ ಛೋಲೋ ಅವಕಾಶ, ಅಕಿಗೆ ಸರಪ್ರೈಸ್ ಕೊಡೋಣಾಂತ ಈ ಕಸರತ್ತು ನಡಿದಿತ್ತು. ಸಂಜಿಕ ನನ್ನ ಗೌಡಶಾನಿ ಮನಿಗೆ ಬಂದ್ಲು. ನಾನು ಸುಸ್ತಾಗಿ ಸೋತಿದ್ದ ಮೊಕಾದಾಗ ನಕ್ಕೊಂತ ಕೆಲಸ ಹೆಂಗಿತ್ತು ಅಂತ ವಿಚಾರಸ್ಕೊಂತ ಅಕಿ ಕೈಕಾಲು ಮುಖ ತೊಕ್ಕೊಂಡು ಬಂದಕೂಡಲೇ ತಾಟಿನ್ಯಾಗ ನಾಕ  ಉಂಡಿ ಇಟ್ಟು ಕೊಟ್ರೀ.  ನನ್ನ ಸೊಟ್ಟಾ- ಡೊಂಕ ಉಂಡಿ ನೋಡಿ ಇನ್ನೇನು ಕೂಸು ಹೊರಗ ಬರಾಕ ದಿನ ಎಣಸತಿದ್ದ ನನ್ನ ಗೌಡಶಾನಿ ಕೆಲಸದ ಸುಸ್ತನ್ನೆಲ್ಲಾ ಮರತು ಸಣ್ಣದೊಂದು ನಗೆ ಬೀರಿ  “ಅಯ್ಯೋ ರೀ ನಾ ಸುಮ್ನ ಅಂದಿದ್ದು, ನೀವ್ ಉಂಡಿ ಮಾಡಾಕ ಟ್ರೈ ಮಾಡಿದ್ರೇನು?” ಅಂದ್ಲು. ನಾ ಅಗ್ದಿ ಖುಶಿಲೆ “ತಿಂದರ ತಿನ್ನ ನೀನು” ಅಂದೇ. ಗೌಡಶಾನಿ ಒಂದು ತುತ್ತು  ತಿಂದಕಿನ ಏನು ಹೇಳ್ಬಕು ಅಂತ ತಿಳಿದನ  ಮುಖದಾಗ ನಗು ಆಶ್ಚರ್ಯ ಎಲ್ಲಾ ಒಮ್ಮಿಗೇ ತುಂಬಕೊಂಡು ಎದ್ದು, ಬಂದಿದ್ದ ಭಾವನೆ ತಡ್ಕೊಂಡು  “ಶೇಂಗಾ ಎಲ್ಲಿವು ಹಾಕಿದ್ರಿ?” ಅಂತ ಕೇಳಿದ್ಲು.  ನಾ ತಡಾ ಮಾಡದ, ಕೆಂಪು ಮುಚ್ಚಳದ ಬಾಟಲ್ಯನವು ಅಂದ್ಯ.  “ರೀ, ಅವು ಉಪ್ಪು ಹಾಕಿ ಹುರಿದಿರೋ  ಶೇಂಗಾ ಬ್ಯಾಳಿ!” ಅಂತ ಜೋರಾಗಿ ನಕ್ಕಳು… ಹಂಗ ನಕ್ಕೋತನ ಕೈಯಾಗಿದ್ದ ತನ್ನ ಗೌಡಪ್ಪ ಮಾಡಿದ್ದ ಶೇಂಗಾ ಉಂಡಿನ ತಿಂದು ಮುಗ್ಸಿದ್ಲು. ಇಬ್ರು ನನ್ನ ನಿದ್ದಿ ಗುಂಗನ್ಯಾಗ ಮಾಡಿದ್ದ ಎಡವಟ್ಟು ಉಂಡಿ ಕೆಲ್ಸಕ್ಕ ಬಿದ್ದು ಬಿದ್ದು ನಕ್ವಿ. ಈ ಪ್ರಸಂಗಾನ ಮಾರನೇದಿನ ಭಾರತದಾಗಿದ್ದ ನನ್ನ ಅವ್ವಗ ಫೋನ್ ಮಾಡಿ ವಿವರಿಸಿ ಹೇಳಿದೆ; ಅಕಿನೂ ಪುಸುಕ್ಕನ ನಕ್ಕಿದ್ಲು.

ಏನಿದು ಉಂಡಿ ಮಾಡಿದ್ಮ್ಯಾಲೆ ತಿಂದು ನೋಡಲಿಲ್ಲನು ಅಂತ ಯೋಚನಿ ಮಾಡಿದ್ರೇನು?  ನಂಗ ಅಡುಗೆ ಮಾಡುವಾಗ ರುಚಿ ನೋಡೋ ರೂಢಿನ ಇಲ್ರಿ.  ಈಗೂ ನಾ ಅಡುಗಿ ಮಾಡಿದ್ರ ಗೌಡಶಾನಿ ಇದ್ರ ರುಚಿ ನೋಡು ಅಂತ ಹೇಳ್ತಿನಿ , ಯಾವಾಗ್ಲೂ ನನ್ನ ಅಡಿಗಿಗೆ ಉಪ್ಪು ಕಡಿಮಿ ಅಂತ ಅಕಿನ ಮತ್ತ ಉಪ್ಪು ಹಾಕ್ತಾಳ ಆದ್ರ ಅವತ್ತ ಉಪ್ಪು ಎಷ್ಟು ಇರಬಾರದ  ಉಂಡ್ಯಾಗ ಉಪ್ಪ ಹೆಚ್ಚಾಗಿತ್ರಿ. ಮರದಿನ ನಮ್ಮ ಹತ್ತಿರದ ಬೀಗರೆಲ್ಲ ಫೋನ ಮಾಡಿ ಕೇಳಿ ನಗುವಂಗ ಆತ್ರಿ ಕಥಿ.

ಹಿಂಗ ನನ್ನ ಫಾಸ್ಟ್ ಫುಡ್ ಶೇಂಗಾ ಉಂಡಿ ಸಾಹಸ ಮನ್ಯಾಗ ನಗೆಪಾಟಲಾತು, ಆದ್ರ ಆ ನಗು ಭಾವಪೂರ್ಣವಾಗಿತ್ರಿ. ಅವ್ವನ ನಗುವಿನ ನಡುವೆ ದೂರ ಇರದಕ  ಸೋಸಿ ಕೇಳಿದ್ದ ಸಣ್ಣ ಉಂಡಿ ನಮಗ ಮಾಡಕಾಗವಲ್ದು ಅನ್ನೋ ಸಂಕಟ ಮತ್ತ ಮಗ ಸೋಸಿ ನಡವಿನ ಅನ್ಯೂನ್ಯತೆಗೆ ಖುಷಿ ಇತ್ತು. ಗೌಡಶಾನಿ ಮತ್ತು ನನ್ನ ನಗುವಿನಲ್ಲಿ ಪ್ರೀತಿ ತುಂಬಿತ್ತು. ಹಂಗ ಮನೆಯಿಂದ ದೂರ ಅದಿವಿ ಅನ್ನೋ ಸಂಗತಿನು ನೆನಪಾತು. ಅದೇ ನಗುವಿನಲ್ಲೇ ಹೊಟ್ಟೇಲಿದ್ದ ಕೂಸು ಮಿಸುಕಾಡಿದ್ದ ಮುಟ್ಟಿ ಅನುಭವಿಸಿ ಇಬ್ಬರ ಖುಷಿ ಖುಷಿಯ ಹನಿ ಕಣ್ಣಿಂದ ಜಾರಿದ್ವು. ಈಗೂ ಮನ್ಯಾಗ ನನ್ನ ಮಗಳಿಗೆ ಆ ಕಥಿ ಹೇಳಿ ಹೇಳಿ ಗೌಡಶಾನಿ ನಗೋದು ನಡೀತಾನ ಇರತೈತ್ರಿ. ಅಂದು ಬೈಕೆನಾ ತಿರ್ಸತೋ ಇಲ್ವೋ ಆದ್ರೆ ಅದರ  ಆ ಫಾಸ್ಟ್-ಫುಡ್ ರುಚಿನಾ ಇವತ್ತಿಗೂ ಇದಕ್ಕೆಲ್ಲ ಕಾರಣ ಆದ ಮಗಳೊಂದಿಗೆ ಇವತ್ತಿಗೂ ಸವಿತಿದ್ದಿವ್ರಿ.

 “ನೀ ತಿಂದಿದ್ದಿ ಪೇಡೆ, ಜಿಲೇಬಿ, ಕರ್ಚಿಕಾಯಿ ಇನ್ನು ನಾನಾ ತಿಂಡಿ  
ಆದ್ರ ಬೈಕ್ಯಾಗಿ ಕಾಡಿದ್ದು ಊರ ಶೇಂಗಾ ಉಂಡಿ.
ನಾ ಆ ಬೈಕೆನಾ ತೀರ್ಸೋ ಸಾಹಸಕ್ಕಿಳಿದ ಭೂಪ
ಅರ್ಧ ನಿದ್ದ್ಯಾಗ ಮರ್ತಾ ಬಿಟ್ಟ್ಯಾ ಶೇಂಗಾದಾಗಿನ ಉಪ್ಪ
ಎಂತ ನಗೆಪಾಟಲು, ಈ ಉಪ್ಪಿನ ಶೇಂಗಾದುಂಡಿ ಸಾಹಸ
ಉಪ್ಪಿನ ರುಚಿ ಸರಿದ್ಮ್ಯಾಲೆ  ಉಳಿದಿದ್ದು ....
ಆ ನಗೆಯ ಮೀರಿ ಮನದ ಭಾವನೆಗಳ ನೆನಪಿಸೋ ಸಣ್ಣ ಮಂದಹಾಸ.
ಅದನ್ನ ಇದಕ್ಕೆಲ್ಲ ಕಾರಣ ಆದ  ಮಗಳೊಂದಿಗೆ ಇವತ್ತಿಗೂ ಸವಿತಿದ್ದಿವ್ರಿ….”

– ವೀರೇಶ್ ಕೆ ಪಾಟೀಲ್

***************************************************************************

ಅಡುಗೆ – ಅಡುಗೆಮನೆ ಸರಣಿ: ವತ್ಸಲಾ ರಾಮಮೂರ್ತಿ ಮತ್ತು ಶ್ರೀವತ್ಸ ದೇಸಾಯಿಯವರ ಬರಹಗಳು

“Cooking is like snow skiing: If you don’t fall at least 10 times, then you’re not skiing hard enough. ಅಡುಗೆ ಮಾಡುವುದೆಂದರೆ ಸ್ಕೀಯಿಂಗ್ ಮಾಡಿದಂತೆ; ಒಂದು ೧೦ ಬಾರಿಯಾದರೂ ಬಿದ್ದಿಲ್ಲವೆಂದಾದರೆ, ನೀವು ಸ್ಕೀಯಿಂಗ್ ಸರಿಯಾಗಿ ಮಾಡುತ್ತಿಲ್ಲವೆಂದೇ!”

ನಮಸ್ಕಾರ. ಅಡುಗೆ ಅನ್ನೋ ಕೆಲಸ ಒಂದು ದೊಡ್ಡ equalizer ಅನ್ನಬಹುದು, ನೋಡಿ. ಪೂರ್ವ-ಪಶ್ಚಿಮಗಳ, ಬಡವ-ಬಲ್ಲಿದರ ಜಾತಿ-ಪಾತಿಗಳ ಭೇದವಿಲ್ಲದೇ ಎಲ್ಲರನ್ನೂ ಒದ್ದಾಡಿಸುವುದು ಅಡುಗೆ! ಇಷ್ಟಪಟ್ಟು ಮಾಡುವುದಾದರೆ ಸರಿ … ಆದರೆ ಬಾಯಿರುಚಿಯ ಚಪಲಕ್ಕೋ, ನಿರ್ವಾಹವಿಲ್ಲದೆಯೋ ಅಡುಗೆಮನೆಗೆ ಹೋದಿರೋ, ಕಾದಿದೆ ನೂರಾರು ತೊಂದರೆಗಳ ಹರ್ಡಲ್ಸ್ ಓಟ. ನಮ್ಮ ಅಡುಗೆ – ಅಡುಗೆಮನೆ ಸರಣಿಯ ಮುಂದಿನ ಲೇಖಕರು, ಅನಿವಾಸಿಯ ಹಿರಿಯ ಸದಸ್ಯರಾದ ವತ್ಸಲಾ ರಾಮಮೂರ್ತಿ ಮತ್ತು ಶ್ರೀವತ್ಸ ದೇಸಾಯಿ ತಮ್ಮ ಅಡುಗೆಯ ಅವಾಂತರಗಳನ್ನು ನಮ್ಮೊಂದಿಗೆ ಹಂಚಿಕೊಂಡಿದ್ದಾರೆ. ನೀವೂ ಬರೆದು ಕಳಿಸಿ, ಎಲ್ಲರನ್ನು ನಗಿಸಿ! – ಎಲ್ಲೆನ್ ಗುಡೂರ್ (ಸಂ.)

ಒಂದು ಲಾಸಾನ್ಯದ (Lasagne) ಕಥೆ! – ವತ್ಸಲಾ ರಾಮಮೂರ್ತಿ

ನನಗೂ ನನ್ನ ಚಿಕ್ಕಮ್ಮನಿಗೂ ತುಂಬ ಸಲಿಗೆ.  ಅವಳೇ ನಮ್ಮನೆಲ್ಲ ಚಿಕ್ಕರವರಾಗಿದ್ದಾಗ ಜಡೆ ಹಾಕಿ ಹೂವು ಮುಡಿಸಿ, ಸಮವಸ್ತ್ರ ಹಾಕಿ ಸ್ಕೂಲ್ಗೆ ಕಳಿಸುತಿದ್ದಳು.  ಪಾಪ! ಅವಳು ಬಾಲವಿಧವೆ.  ಶಾಲೆಗೆ ಹೋಗಿಲ್ಲ.  ಹಾಗೂ ಹೀಗೂ ಮಾಡಿ ನಮ್ಮ ಹತ್ತಿರ ಕನ್ನಡ ಓದಲು ಬರೆಯಲು ಕಲಿತಿದ್ದಳು. ಆಂಗ್ಲಭಾಷೆ ಗೊತ್ತಿಲ್ಲ.  ನಾನು ಯುಕೆಗೆ ಬಂದಮೇಲೆ ವಾರಕ್ಕೊಮ್ಮೆ ಮಾತನಾಡುತ್ತೇನೆ. 

ಒಂದು ದಿನ ಹೀಗೆ ಮಾತನಾಡುತ್ತಿರುವಾಗ “ಇವತ್ತು ಏನು ಅಡುಗೆ?” ಅಂತ ಕೇಳಿದಳು.  ನಾನು “ಲಾಸಾನ್ಯ ಮಾಡುತ್ತೇನೆ” ಅಂತ ಹೇಳಿದೆ .

“ಹಾಗೆ ಅಂದರೆ ‘ಅಪಹಾಸ್ಯ’ನಾ?” ಅಂದಳು.  

“ಅಲ್ಲ ಕಣೆ ಅದು ಒಂದು ತರಹದ ತಿಂಡಿ” ಅಂದೆ.  

“ಹಾಗಾದರೆ ನನಗೂ ತೋರಿಸು” ಅಂತ ಕೇಳಿದಳು.

ನಾನು, “ಹೋಗೇ, ನಿನಗೆ ಅರ್ಥವಾಗುವುದಿಲ್ಲ” ಎಂದು ಜಂಬ ಹೊಡೆದೆ.

“ಇಲ್ಲ ಕಣೆ, ಅರ್ಥ ಮಾಡಿಕೂಳ್ಳುತ್ತೇನೆ” ಅಂತ ಗೋಗರೆದಳು.

ಸರಿ ಅಂದು ನನ್ನ ತಮ್ಮನಿಗೆ ಹೇಳಿ ಲೈವ್ ವಿಡಿಯೋ setup ಮಾಡಿಸಿದೆ.

ಮುಂದಿನದೇ ನಾಟಕ.

ನಾನು: “ನೋಡೇ ಲಾಸ್ಯಾನ್ಯ ಹಾಳೆಗಳನ್ನು ಕುದಿಸಬೇಕು”

ಚಿಕ್ಕಮ್ಮ: “ಯಾಕೆ ರಟ್ಟಿನ ತರ ಇದೆ? ಹಲಸಿನ ಹಪ್ಪಳನಾ?” 

ನಾನು: “ಇಲ್ಲ ಕಣೆ ಇದನ್ನ ಲಸಾನ್ಯಾ ಹಾಳೆ ಅಂತಾರೆ.  ಇದನ್ನ ಕುದಿಸಿ ಮೆತ್ತಗೆ ಮಾಡಬೇಕು.”

ಹಾಳೆಗಳು ಬೆಂದ ಮೇಲೆ ತೆಗೆಯಲು ನೋಡಿದೆ.  ಎಲ್ಲ ಅಂಟಿಗೊಂಡುಬಿಟ್ಟಿವೆ.

ಚಿಕ್ಕಮ್ಮ: “ಮಹಾತಾಯಿ ಎಲ್ಲ ಮುದುಡಿದೆ, ಏನು ಮಾಡುವೆ ಈಗ?” ನನಗೆ ಕೋಪ ಬಂತು.

ನಾನು: “ಹೋಗೆ, ಅದನ್ನ ಬಿಡಿಸಬೇಕು” ಅಂತ ಹೇಳಿ ಕಿತ್ತಿದೆ.  ಚೂರುಚೂರಾಗಿ ಬಂತು.

ನನ್ನ ತಮ್ಮ ತಲೆ ಹಾಕಿ, “ಅಕ್ಕ, ಲಾಸ್ಯಾನ್ಯನ ಹಾಗೆಲ್ಲ ಹರಿಯಬಾರದು ಕಣೆ.  ಒಂದೊಂದೇ ಹಾಳೆ ಸಮವಾಗಿ ಬಿಡಿಸಬೇಕು.” ಇನ್ನೂ ರೇಗಿಸಿದ.

ಅದು ಗೋಂದಿನಂತೆ ಅಂಟಿಬಿಟ್ಟಿತ್ತು . ನನಗೆ ಬಿಡಿಸಲು ಆಗಲೇ ಇಲ್ಲ.  ಏನೋ ಮಾಡಿ ೪ ಚೂರು ಮಾಡಿದೆ.

ನಾನು: “ಚಿಕ್ಕಮ್ಮ ನೋಡು, ಈಗ ತಟ್ಟೆ ಮೇಲೆ ಹರಡಬೇಕು ಗೊತ್ತಾ? ಆಮೇಲೆ ಪಲ್ಯನ್ನ ಅದರ ಮೇಲೆ ಹರಡಬೇಕು.  ಹೀಗೆ ಒಂದರ ಮೇಲೆ ಒಂದು ಜೋಡಿಸಬೇಕು.  ಕಡೆಯಲ್ಲಿ ಚೀಸ್, ಮೈದಾ ಹಿಟ್ಟಿನ ಗಂಜಿ ಸುರಿಬೇಕು.”

ಅವಳು, “ಅಯ್ಯೋ ಭಗವಂತ! ಈ ಪಾಟಿ ಯಾಕೆ ಕಷ್ಟಪಡಬೇಕಾ? ನಂತರ ಹಂಚಿನ ಮೇಲೆ ಸುಡಬೇಕಾ?” ಅಂದಳು.

“ದಡ್ಡಿ, ಓವೆನ್ನಲ್ಲಿ ಇಡಬೇಕು” ಎಂದೆ.

ಅವಳು “ಹೋಗೆ, ನಾನಾಗಿದ್ದರೆ ನಾಲಕ್ಕು ದೋಸೆ, ಬಿಸಿ ಬಿಸಿ ಆಲೂಗಡ್ಡೆ-ಈರುಳ್ಳಿ ಪಲ್ಯ ಹಾಕಿ, ಒಂದರ ಮೇಲೆ ಒಂದು ಹೇರಿಸಿ, ಮೇಲೆ ಬೆಣ್ಣೆ ಹಚ್ಚಿ ಮಜವಾಗಿ ತಿಂತ ಇದ್ದೆ. ಹೋಗೆ, ನಿನ್ನ ಅಪಹಾಸ್ಯ ನೀನೇ ತಿನ್ನು” ಅನ್ನ ಬೇಕೇ?

ನನ್ನ ತಮ್ಮ ಮುಸಿಮುಸಿ ನಗುತ್ತಾ ಇದ್ದಾಗ ಚಿಕ್ಕಮ್ಮ ಹೊರಟುಹೋದಳು!

  • ವತ್ಸಲಾ ರಾಮಮೂರ್ತಿ.

******************************************************************************************

ಅಡುಗೆ ಮನೆಯಲ್ಲಿ ಅವಾಂತರಗಳು – ಶ್ರೀವತ್ಸ ದೇಸಾಯಿ

‘ಅನಿವಾಸಿ‘ ವಾಟ್ಸಪ್ಪಿನಲ್ಲಿ ಕಂಪ್ಲೇಂಟು: ‘ನಳ ಮಹಾಶಯರಿಂದ ಲೇಖನ ಬಂದಿಲ್ಲ’ ಅಂದರೆ ಗಂಡಸರಿಂದ ಅಂತ. ಅಡುಗೆಯಲ್ಲಿ ನಾನೇನೂ ನಳನಲ್ಲ, ಬರೀ ‘ಕಾಮಾ ಪೂರ್ತೇ’, ಎಷ್ಟು ಬೇಕೋ ಅಷ್ಟೇ ಅಡುಗೆ ಮಾಡಿಕೊಳ್ಳುವವ. ‘ರಸೋಯಿಘರ್ ಕಾ ರಾಜ’ ಅಲ್ಲ. ಈ ರಾಜ್ಯದ ಮಾತು ಬಂದದ್ದೇಕೆಂದರೆ ಈ ಅಡುಗೆ ಮನೆಯೆಂಬ ರಾಜ್ಯದ ಬಗ್ಗೆ ಒಂದೆರಡು ಮಾತು ಹೇಳೋಣ ಅಂತ.

’ಪ್ರಾದೇಶಕೀಕರಣ”

ಅಡುಗೆ ಮನೆ ನನ್ನಾಕೆಯ ’ಡೊಮೇನ್’ ಆಗಿತ್ತು! ಯಾವಾಗಲಾದರೂ ನಾನು ಅಲ್ಲಿ ಹಣಿಕಿ ಹಾಕಿದರೆ ’ಇಲ್ಲಿ ಒಳಗs ಬಂದು ಅಡ್ಡಗೈ ಹಾಕಬೇಡ’ ಅಂತಿದ್ದಳು. ವರ್ತನ ಸಿದ್ಧಾಂತಿಗಳು (Behaviourists) ಹೇಳುವ ಮಾತೆಂದರೆ ಪ್ರಾಣಿಗಳು ಅಂದರೆ ಮನುಷ್ಯ ಸಹಿತ, ತಮ್ಮ ’ಪ್ರದೇಶವನ್ನು’ ಕಾಯುತ್ತವೆ, ಕಾಯಲು ಹೊಡೆದಾಡುತ್ತವೆ ಅಂತ. ಪ್ರಶ್ನೆ: ’Does man (or woman), like animal, also territorialize?’ ಆ ಪ್ರವೃತ್ತಿ ಪ್ರಾಣಿಗಳಲ್ಲಿ ’ಅಲಲಾ’ದಿಂದ ಹಿಡಿದು ಝಿಬ್ರಾದವರೆಗೆ ಕಾಣುತ್ತೇವೆ. ಮಾನವನಲ್ಲಿಯೂ ಆ ಪ್ರವೃತ್ತಿ ಇರಬಹುದು. ಇಲ್ಲಿ ನಾನು ವೈಜ್ಞಾನಿಕವಾಗಿ ಹೇಳುತ್ತಿಲ್ಲ. ನನ್ನ ಅನುಭವವನ್ನೇ ಲಘುವಾಗಿ ಹೇಳಿದ್ದೇನೆ. ನಾವು ಇಬ್ಬರೂ ವೈದ್ಯರು, ಕೆಲಸಮಾಡುತ್ತ ಮಕ್ಕಳ ಪಾಲನೆಯನ್ನೂ ಮಾಡುವಾಗ ಗಂಡನಿಗೆ ಪಾಕ ಶಾಸ್ತ್ರಜ್ಞಾನವಿರದಿದ್ದರೂ ಸ್ವಲ್ಪವಾದರೂ ಅನ್ನ-ಸಾರು-ಪಲ್ಯ ಮಾಡಲು ಕಲಿತರೆ ಸಹಾಯವಾಗದಿರದೇ?  ಅದೂ ಭಾರತದಲ್ಲಿದ್ದಂತೆ ಅವಿಭಕ್ತ ಕುಟುಂಬಗಳ ಸೌಲಭ್ಯ ಅನಿವಾಸಿಗಳಿಗೆ ಇಲ್ಲದಿರುವಾಗ ಈ ಪರಿಣತಿ ಆವಶ್ಯಕವೇ (ಟಿಪ್ಪಣಿ: ಈಗ ಅಲ್ಲೂ ಅವಿಭಕ್ತ ಕುಟುಂಬಗಳು ಕಡಿಮೆಯೇ, ಅದರಲ್ಲೂ ನಗರಗಳಲ್ಲಿ – ಸಂ.). ಹಿಂದೊಮ್ಮೆ ನಮ್ಮವರೇ ಪ್ರೇಮಾ ಸಾಗರ್ ಹೇಳಿದಂತೆ ಪತಿ ಕಾಫಿ ಮಾಡಲು ಕಲಿತರೂ ಸಾಕು. ಡಾಕ್ಟರಾಗಿದ್ದ ನನ್ನವಳು ಹಾಗೆ ಹೇಳಿದ್ದನ್ನು ಆಕೆಯೂ ಸೀರಿಯಸ್ಸಾಗಿ ತೊಗೊಳ್ಳಲಿಲ್ಲ, ನಾನು ಸಹ. ಅದಾದಮೇಲೆ ಕಿಚನ್ ಅಪ್ರೆಂಟಿಸ್ ಆಗಿ ಸ್ವಲ್ಪ ಸ್ವಲ್ಪ ’ಕಲಿನರಿ ಸ್ಕಿಲ್ಸ್’ ಕಲಿತೆ. ನಮ್ಮ ಸಂಸಾರ ನೌಕೆ ಸಾಗಲು ಸ್ವಲ್ಪ ಸಹಾಯವಾಯಿತು ಅನ್ನಿ. ಆದರೆ ನಮ್ಮ ಮನೆಯ ದೋಸೆ ಹೆಂಚುಗಳ, ಅಥವಾ ದೋಸೆ ಹಿಟ್ಟಿನ ’ಬಿಹೇವಿಯರ್’ ಮಾತ್ರ ನಮಗೆ ಕೊನೆಯವರೆಗೂ ಬಿಡಿಸಲಾಗದ ಗಂಟಾಗಿಯೇ ಉಳಿಯಿತು.

ಎಲ್ಲರ ಮನೆಯ ದೋಸೆಗೂ …

ದೋಸೆಯೆಂದರೆ ಯಾವ ಭಾರತೀಯ, ಅದರಲ್ಲೂ ದಕ್ಷಿಣದವ ಬಾಯಿಬಿಡೊಲ್ಲ? ಊರಿಂದ ಈ ದೇಶಕ್ಕೆ ಬಂದು ವರ್ಷಗಳು ಕಳೆದಂತೆ ದೋಸೆ ತಿನ್ನುವ ಬಯಕೆ ಹೆಚ್ಚಾಗುತ್ತಲೇ ಹೋಗುತ್ತದೆ. ಆದರೆ ನಮ್ಮ ಮನೆಯಲ್ಲಿ ಮಾತ್ರ ಎಂದೂ ದೋಸೆ ಏಳಲಿಲ್ಲ. ಬರೀ ಮುದ್ದೆ, ಮುದ್ದೆ! ಅಕಸ್ಮಾತ್ ಸ್ವಲ್ಪ ಎದ್ದರೆ, ಮಗುಚುವ ಕೈಯಲ್ಲೆತ್ತಿದ ಅರೆಬೆಂದ ದೋಸೆ ಒಂದೊಂದು ಸಲ ಒಂದೊಂದು ದೇಶದ ನಕಾಶೆಯಂತೆ ತೋರುವುದು! ಚಿಕಿತ್ಸೆಯಿರದ ರೋಗಕ್ಕೆ ಎಡತಾಕುವ ರೋಗಿಯಂತೆ ಮನೆ ಮನೆ ಅಲೆದಾಡಿ ದೋಸೆ ಹುಯ್ಯುವ ಪಟುಗಳ ಅಡ್ವೈಸ್ ಕೇಳಿದ್ದಕ್ಕೆ ಲೆಕ್ಕ ಇಲ್ಲ. ಆಕೆಯ ಹೆತ್ತ ತಾಯಿಯಿಂದ ಶುರುವಾಗಿ, ಎಲ್ಲ ಹಿರಿಯರು, ಸಂಬಂಧಿಕರು, (ಕೆಲಸದಾಕೆ ಸಹ!) ಮಿತ್ರರು, ಯಾರ್ಯಾರ ಮನೆಯಲ್ಲಿ ನಾಚಿಕೆಯಿಲ್ಲದೆ ಒಂದರಮೇಲೊಂದು ದೋಸೆ ಇನ್ನಷ್ಟು ಹಾಕಿಸಿಕೊಂಡು ತಿಂದ ಮೇಲೆ ನಿಮ್ಮ ರೆಸಿಪಿಯ ಗುಟ್ಟೇನು, ಯಾವ ಪ್ರಮಾಣದಲ್ಲಿ ಅಕ್ಕಿ- ಉದ್ದು ಹಾಕುತ್ತೀರಿ, ಎಷ್ಟು ಹೊತ್ತು, ಮತ್ತು ಎಲ್ಲಿ ಫರ್ಮೆಂಟಾಗಲು ಇಡುತ್ತೀರಿ, ಏರಿಂಗ್ ಕಬ್ಬರ್ಡ್ ನಲ್ಲಿಟ್ಟು ಮನೆಯವರಿಂದ ಬಟ್ಟೆಯೆಲ್ಲಾ ಏಕೆ ಗಬ್ಬು ವಾಸನೆ ಅಂತ ಅನಿಸಿಕೊಳ್ಳಲಿಲ್ಲವಾ? ಎಂಥ ಹೆಂಚು, ಊರಿಂದ ಯಾವ  ಅಂಗಡಿಯಿಂದ ತಂದದ್ದು, ಇತ್ಯಾದಿ ಇತ್ಯಾದಿ ಪ್ರಶ್ನೆಗಳ ಸುರಿಮಳೆ, ವಿಚಾರಣೆ, ಅನ್ವೇಷಣೆ, ಎಲ್ಲವನ್ನೂ ಮಾಡಿದ್ದೇವೆ. ಇನ್ನು ದೋಸೆ ಹೆಂಚಿನ ವಿಷಯಕ್ಕೆ ಬಂದರೆ ಟೆಫ್ಲಾನ್, ಆಂಟಿ-ಸ್ಟಿಕ್ ಕೋಟಿಂಗ್ ಒಂದೇ ಎರಡೇ? ನಮ್ಮ ಪ್ಯಾಂಟ್ರಿ ತುಂಬ ಹೆಂಚುಗಳು, ಬೇರೆ ಬೇರೆ ಮಿಕ್ಸಿಗಳು, ರುಬ್ಬುವ ಕಲ್ಲಿನ ಮೆಶಿನ್, ಎಲ್ಲವನ್ನೂ ಪ್ರಯೋಗಿಸಿಯಾಯಿತು.  “ನಿಮ್ಮಲ್ಲಿ ಗ್ಯಾಸಿಲ್ಲ, ಇಲೆಕ್ಟ್ರಿಕ್ ಕುಕರ್ ಅದಕ್ಕ” ಅಂತ ಯಾರೋ ಡಯಗ್ನೋಸಿಸ್ ಕೊಟ್ಟರು ಒಬ್ಬರು. ಅಮೇರಿಕೆಯಿಂದ ಹೊತ್ತು ಕೊಂಡು ಬಂದ ಗ್ರಿಡಲ್ ಸಹ ಸೋತು ವಿಫಲವಾಗಿ ಇನ್ನೂ ಧೂಳು ಕುಡಿಯುತ್ತಾ ಪಾಂಟ್ರಿಯಲ್ಲೆಲ್ಲೋ ಸುದೀರ್ಘ ನಿದ್ರೆಯಲ್ಲಿದೆ. ನಮಗೇಕೆ ಈ ಶಾಪ ಎಂದು ನಾವು ಅಳುವುದೊಂದೇ ಉಳಿದಿತ್ತು.  ಎಲ್ಲ ತರದ ದೋಸೆಗಳ ಟ್ರಾಯಲ್ ಆಯಿತು. ಒಮ್ಮೊಮ್ಮೆ ರವೆ ದೋಸೆ ಮಾತ್ರ ಏಳುತ್ತಿತ್ತು. ಆಗಷ್ಟೇ ನನಗೆ ಕಿಚನ್ ಪ್ರವೇಶ ಸಿಕ್ಕು ಆಕೆಯನ್ನು ಕೂಡ್ರಿಸಿ ವರ್ಷಕ್ಕೊಮ್ಮೆ ಎರಡು ಸಲ ಒಂದೋ ಅಥವಾ ಎರಡೂವರೆ ರವೆ ದೋಸೆ ಮಾಡಿ ಹಾಕಿದಾಗ ತಿಂದು ಸಮಾಧಾನ ಪಟ್ಟುಕೊಳ್ಳುತ್ತಿದ್ದಳು. ಆಗ ರೆಡಿಮೇಡ್ ಹಿಟ್ಟು (batter) ಪ್ಲಾಸ್ಟಿಕ್ ಚೀಲಗಳಲ್ಲಿ ಬರುತ್ತಿರಲಿಲ್ಲ.  ಆಕೆಗೆ ಕೊನೆಯ ವರೆಗೆ ಶಾಪ ವಿಮೋಚನೆಯಾಗಿರಲಿಲ್ಲ. ಆಗ ದೋಸೆಗೆ ತೂತು ಇದ್ದರೆ ನಮ್ಮ ಅಭ್ಯಂತರವಿರಲಿಲ್ಲ, ಎಷ್ಟು ಬೇಕಾದರೂ ಇರಲಿ, ದೋಸೆ ಎದ್ದರೆ ಸಾಕು ಅಂತ ಬೇಡಿಕೊಳ್ಳುತ್ತಿದ್ದೆವು! ಈಗ ರೆಡಿಮೇಡ್ ಹಿಟ್ಟು ಬಂದ ಮೇಲೆ ಹೊಸ ಜಗತ್ತಿಗೇ ಬಂದಂತೆ ಆಗಿದೆ! ಎಷ್ಟು ಸುಲಭವಾಗಿ ದೋಸೆ ಏಳುತ್ತದೆ, ನನ್ನ ಮನೆಯಲ್ಲೂ!

ಅರ್ಕಿಮಿಡಿಸ್ ತತ್ತ್ವಕ್ಕೂ ಒಗ್ಗರಣೆಗೂ ಏನು ಸಂಬಂಧ?

 ಈ ಸರಣಿಯಲ್ಲಿ ಇನ್ನೊಬ್ಬರು ಬರೆದಂತೆ ಒಗ್ಗರಣೆ ಮಾಡೋದು ಅದೆಂಥ ಕಷ್ಟ? ಇಂಗು ಸಾಸಿವೆ, ಬೇಳೆ, ಕರಿಬೇವು ಜೀರಿಗೆ, ಎಲ್ಲ ಒಂದೊಂದಾಗಿ ಹಾಕಿದರೆ ಆಯಿತು ಅನ್ನುವವರು ಹಿಂದೊಮ್ಮೆ ಎಣ್ಣೆ ಹೊತ್ತಿಸಿದ್ದನ್ನು ಮರೆತಿದ್ದಾರೆ ಅಥವಾ ಸುಳ್ಳು ಹೇಳುತ್ತಿದ್ದಾರೆ ಅಂತ ಅರ್ಥ. ಹಾಗೂ ಹೀಗೂ ನಾನು ಅದನ್ನು ಕಲಿತೆ. ಮೊಟ್ಟಮೊದಲು ಅದೆಷ್ಟೋ ಸಲ ಎಣ್ಣೆ ಕಾದಿದ್ದೂ ಗೊತ್ತಾಗದೆ, ಇನ್ನೊಮ್ಮೆ ಎಲ್ಲ ಹೊತ್ತಿ ಹೋಗಿ ’ಬಿನ್ನಿಗೆ’ ಒಗ್ಗರಣೆ ಸಂತರ್ಪಣೆ ಮಾಡುತ್ತ ಕಲಿತೆ.  ಇತ್ತೀಚಿನ ವರ್ಷಗಳಲ್ಲಿ ನಮ್ಮ ಕನ್ನಡ ಬಳಗದ ಪದಾಧಿಕಾರಿಯಾಗಿದ್ದ ಸುಧಾ ಅವರ ಪರಿಚಯ. ಮೇಲಿಂದ ಮೇಲೆ ಮೀಟಿಂಗ್, ಕಾರ್ಯಕ್ರಮಗಳ ವ್ಯವಸ್ಥೆ ಸಂಬಂಧದಲ್ಲಿ ಫೋನು ಮಾಡುತ್ತಿರುತ್ತಾರೆ. ಆಗ ಹೇಗೋ ನಾನು ಸಾಯಂಕಾಲದ ಅಡುಗೆಯ ಸಮಯದಲ್ಲಿ ಒಗ್ಗರಣೆ ಮಾಡುವ ಹಂತದಲ್ಲಿರುವುದು ಅವರಿಗೆ ಗೊತ್ತಾಗಿ ಬಿಟ್ಟಂತೆ ಅದೇ ಕಾಲಕ್ಕೆ ಅವರ ಫೋನು ಬರುತ್ತದೆ. ಒಮ್ಮೊಮ್ಮೆ ಬೇಗನೆಯೇ ಅಡುಗೆ ಶುರು ಮಾಡಿರಲಿ, ಅಥವಾ ತಡವಾಗಿಯೇ ಅಡುಗೆ ಪ್ರಾಂಭ ಮಾಡಿರಲಿ, ಸರಿಯಾಗಿ ಒಗ್ಗರಣೆ ಹಾಕುವಾಗಲೇ ಅವರ ಫೋನು. ಎಲ್ಲ ಸಮಾಚಾರ ಮಾತಾಡುತ್ತ ಮತ್ತೆ ಒಗ್ಗರಣೆ ಹೊತ್ತಿಸುವದು ಪ್ರಾರಂಭವಾಗಿದೆ.  ಬಹಳ ವರ್ಷಗಳ ಕೆಳಗೆ ನನ್ನ ಮಗ ಶಾಲೆಯಲ್ಲಿ  ಆರ್ಕಿಮಿಡಿಸ್ ತತ್ತ್ವ ಕಲಿತ ದಿನ ಫಿಸಿಕ್ಸ್ ಕ್ಲಾಸಿನಿಂದ ಮನೆಗೆ ಬಂದು ಹೇಳಿದ ಜೋಕು ನೆನಪಾಗುತ್ತದೆ: What happens when a body is immersed in water? ಉತ್ತರ? The phone rings! ಅದೇ ತರಹ ಸಧ್ಯದಲ್ಲಿ “ಸುಧಾ ತತ್ತ್ವ” ನನ್ನ ಒಗ್ಗರಣೆಗೆ ಬಹಳಷ್ಟು ಸಲ ಅಡ್ಡ ಬಂದಿದೆ! ಇನ್ನುಮುಂದೆ ಅವರಿಗೆ ಫೋನು ಮಾಡಿಯೇ ಒಗ್ಗರಣೆ ಹಾಕುವ ಶಪಥ ಕಟ್ಟಿದ್ದೇನೆ!

ಮೊನ್ನೆ ಯಾರ್ಕ್ ಶೈರ್ ಕನ್ನಡ ಬಳಗದ ಹರಟೆ ಕಟ್ಟೆಯಲ್ಲಿ ಇತ್ತಿತ್ತಲಾಗಿ ಕೊರೋನಾ ಮಾರಿಯಿಂದ ಮನೆಯಲ್ಲೇ ಬಂದಿಯಾಗಿ ತಿಂಗಳುಗಟ್ಟಲೆ ಕಳೆದ ಎಷ್ಟೋ ಗಂಡಸರು ’ನಳಪಾಕ’ ಸಾಧಿಸಿದ್ದಾರೆ ಅಂತ ಕೇಳಿರುವೆ. ಇದನ್ನು ಮನೆ ಹೆಂಗಸರೂ ಸ್ವಾಗತಿಸುವದರಲ್ಲಿ ಸಂದೇಹವಿಲ್ಲ!

– ಶ್ರೀವತ್ಸ ದೇಸಾಯಿ

*********************************************************************

ವ್ಯಂಗ್ಯಚಿತ್ರ: ಲಕ್ಷ್ಮೀನಾರಾಯಣ ಗುಡೂರ್