ಕ್ಲಿಕ್ ಕವನ, “ನೀ ಹಿಡಿದ ಚಿತ್ರಗಳ ಸಾಲು” – ಡಾ. ಶ್ರೀವತ್ಸ ದೇಸಾಯಿ.

ಇಣುಕುವ ಕ್ಯಾಮೆರಾದ ಹಿಂದೆ ನಿಂತು ಪ್ರತಿಫಲಿಸುವ ಆ ಮನಸ್ಸು ಯಾವುದೋ?

ಕನ್ನಡದ ಅಂತರ್ ಜಾಲ ಪತ್ರಿಕೆ ‘ಅವಧಿ’ ನಡೆಸುತ್ತಿರುವ ‘ಕ್ಲಿಕ್ ಆಯ್ತು ಕವಿತೆ’ ಸರಣಿಯಲ್ಲಿ ಇತ್ತೀಚಿಗೆ ಒಂದು ಕ್ಯಾಮೆರಾದ ಛಾಯಾಚಿತ್ರವನ್ನು ಪ್ರಕಟಿಸಿ ಕವಿತೆಗಳನ್ನು ಆಹ್ವಾನಿಸಿದ್ದರು. ಆ ಫೋಟೋ ನೋಡಿ ಪ್ರಭಾವಿತರಾದ ನಮ್ಮ ‘ಅನಿವಾಸಿ’ ಬಳಗದ ಸಂಚಾಲಕ ಡಾ. ಶ್ರೀವತ್ಸ ದೇಸಾಯಿ ತಮ್ಮದೇ ಕ್ಯಾಮೆರಾ ಲೋಕಕ್ಕೆ ಜಾರಿದ್ದರು – ಕಾರಣ, ಅವರು ಛಾಯಾಗ್ರಹಣ, ಕ್ಯಾಮೆರಾ ಕಲೆ, ಲೆನ್ಸುಗಳು, ವಿಡಿಯೋಗ್ರಫಿಗಳಲ್ಲಿ ಪಳಗಿದವರು, ಅವುಗಳ ಬಗ್ಗೆ ಬಹಳಾ ಪ್ರೀತಿಯಿಟ್ಟವರು. ಅಷ್ಟೇ ಅಲ್ಲ, ಆ ಮಣ್ಣು ಮೆತ್ತಿದ ಹಳೆಯ ಕ್ಯಾಮೆರಾವನ್ನು ನೋಡಿದಾಗ ಅವರಿಗೆ ಮೊದಲು ಹೊಳೆದಿದ್ದು ಆ ಒಂದು ಕ್ಯಾಮೆರಾ ಒಬ್ಬ ವರದಿಗಾರನ ಹಚ್ಛೆಯೇನೋ ಎಂದು. ಅವರ ಬಳಿಯೂ ಹಿಂದೊಮ್ಮೆ ಎಕ್ಸಾಕ್ಟಾ ಮತ್ತು ಇತರೆ ೪೯ ಮಿಮಿ ಲೆನ್ಸ್ ಕ್ಯಾಮೆರಾಗಳು ಇದ್ದವಂತೆ. ಅಂತಹ ಆಸಕ್ತಿಯಿಂದಲೇ ಅವರು ಪತ್ರಿಕಾ ವರದಿಗಾರರ ಕೆಲ ಜಗತ್ ಪ್ರಸಿದ್ಧ ಚಿತ್ರಗಳನ್ನು ನೋಡುತ್ತಾ ಅವುಗಳ ಹಿಂದಿರುವ ಮನಸ್ಸುಗಳ ಬಗ್ಗೆ ಕೂಡ ಪರ್ಯಾಲೋಚಿಸಿದ್ದಾರೆ. “ಎಷ್ಟೋ ಬಾರಿ ಆ ಛಾಯಾಚಿತ್ರಗಾರರು, ಅಜರಾಮರ ಚಿತ್ರಗಳನ್ನು ತೆಗೆದ ಅವರ ಸೂಕ್ಮ ಒಳಗಣ್ಣು, ಕ್ಲಿಕ್ ಮಾಡಿದ ಕ್ಯಾಮೆರಾಗಳು ಏನಾದವೋ ಎಂದು ಕೂಡ ನಾನು ಆಲೋಚಿಸಿದ್ದಿದೆ”, ಅನ್ನುತ್ತಾರೆ ಶ್ರೀವತ್ಸ.

ಕ್ಯಾಮೆರಾ ಲೋಕದಲ್ಲಿದ್ದ ಡಾ. ಶ್ರೀವತ್ಸ ದೇಸಾಯಿ ಕೆಲವು ದಿನಗಳಾದ ಮೇಲೆ ಆ ಎಕ್ಸಾಕ್ಟಾದ ಬಗ್ಗೆ ಮನದಲ್ಲಿ ಮೂಡಿದ್ದ ಮಾತನ್ನ ಕಾಗದದ ಮೇಲೆ ಬಿಡಿಸಿಯೇಬಿಟ್ಟರು. ಆ ಕವನ ಮತ್ತು ಅವರ ಆಯ್ಕೆಯ ಪತ್ರಿಕಾಪ್ರಪಂಚದ ಕೆಲ ಸಾಂಕೇತಿಕ ಛಾಯಾಚಿತ್ರಗಳು ಈ ಶುಕ್ರವಾರದ ಪ್ರಕಟಣೆಯಲ್ಲಿ.

ಜೊತೆಗೆ ಇನ್ನೊಂದು ಬೋನಸ್! ‘ಅನಿವಾಸಿ’ಯ ಹಿತೈಷಿಗಳೂ, ಸಹೃದಯ ಓದುಗರೂ ಆದ ಶ್ರೀಮತಿ ಸರೋಜಿನಿ ಪಡಸಲಗಿ ಕೂಡ ಅದೇ ಎಕ್ಸಾಕ್ಟ ಕ್ಯಾಮೆರಾ ಚಿತ್ರ ನೋಡಿ ಕವನ ಬರೆದಿದ್ದಾರೆ. ಒಂದೇ ಚಿತ್ರ, ಭಿನ್ನ ಭಾವನೆ – ಅದೇ ಈ ‘ಕ್ಲಿಕ್ ಕವನ’ ದ ಕಿಕ್!  -ಸಂ.

 ಕ್ಲಿಕ್ ಕವನ “ನೀ ಹಿಡಿದ ಚಿತ್ರಗಳ ಸಾಲು”

ಅಲೆ ಅಲೆಯಾಗಿ ತೇಲಿ ಬರುತ್ತಿವೆ

ನೀ ಹಿಡಿದ ಚಿತ್ರಗಳ ಸಾಲು

ಕ್ಷಣಾರ್ಧದಲ್ಲಿ ಸೆರೆಹಿಡಿದವು

ಜಗವೆಲ್ಲ ಪ್ರದಕ್ಷಿಣೆ ಮಾಡಿದವು

ಪ್ರೇಮಿಗಳ ಕಳುವಿನ ಚುಂಬನ

ಕಳ್ಳ ಧುರೀಣರ ಹಣದ ಹಗರಣ

ಧರ್ಮಗುರುಗಳ ಅಧರ್ಮ ವರ್ತನೆ

ಧರ್ಮಾಂಧರ ಅಧಮ ಕೃತಿಗಳು

ಗಿರಿಕಂದರಗಳ ಸುಂದರ ಸ್ಮೃತಿಗಳು ಸಹ!

ಈಗೇಕೀ ನಿನ್ನವಸ್ಥೆ?

ಹಿಮಪರ್ವತದಿಂದ ಉರುಳಿದೆಯೋ?

ನಿನ್ನೊಡೆಯನ ಗುಂಡಿಕ್ಕಿ ತುಳಿದರೋ?

ಸೆರೆಮನೆಯಲ್ಲಿ ಕೊಳೆತನೋ?

ಆತನಿಗೇ ಸ್ಮಾರಕವಿಲ್ಲದಾಗ

ಮ್ಯೂಸಿಯಮ್ಮಿನಲ್ಲಿ ನಿನಗಿಲ್ಲ ಜಾಗ!

ಅಕಟಕಟ, ನನ್ನ ಪ್ರೀತಿಯ ಎಕ್ಸಾಕ್ಟಾ!

– ಶ್ರೀವತ್ಸ ದೇಸಾಯಿ

images
ಎಕ್ಸಾಕ್ಟಾ!

ಕ್ಲಿಕ್ ಕವನ “ಕಾಲಾಯ  ತಸ್ಮೈ  ನಮಃ”

ಮುಪ್ಪು ಆವರಿಸಿಯೇ  ಬಿಟ್ತಲ್ಲಓ ಚಲುವೆ!
ಕಾಲನ ದಾಳಿ  ನಿನ್ನ  ನುಜ್ಜುಗುಜ್ಜು  ಮಾಡಿಯೇ ಬಿಟ್ತಲ್ವೇ

ನಿನ್ನ ಹೊಳಪುಗಣ್ಣು  ನಾಚಿಸಿತ್ತು ಆಗ ನವ ವಧುವನ್ನು
ಅರಳುವ ಹೃದಯಗಳಲ್ಲಿ  ಹುಟ್ಟು  ಹಾಕುತಿತ್ತು  ಕನಸೊಂದನ್ನು
ಅಲ್ಲಿಇಲ್ಲಿ ಅತ್ತ ಇತ್ತ ಸುತ್ತಲಿನ ಬೆಳಕನ್ನು
ಬಿಡದೆ  ಒಂದಿನಿತೂ  ತುಂಬಿಸಿದೆ  ನಿನ್ನ ಎದೆಯನ್ನು

ಆ ಗುಡ್ಡ ಆ ಬೆಟ್ಟ  ಆ ಕಾಡು  ಆ ನಾಡು
ಆ ಸೂರ್ಯ  ಆ ಚಂದ್ರ ಚುಕ್ಕಿ ಬೆಳ್ಳಿ ಪಥದ ಜಾಡು
ಆ ನೀಲ ನಭದ  ಪಾರವಿಲ್ಲದ  ನಿಸ್ಸೀಮ ಹರವು
ತನ್ನದಾಗಿಸಿತ್ತಲ್ಲ ನಿನ್ನ  ಮಿಂಚುಗಣ್ಣಿನ  ಹೊಳವು

ಪ್ರೀತಿಯ ಹೃದಯಗಳ ಕನಸಾಗಿ ವಿರಹಿಯ ಉಸಿರಾಗಿ
ಪ್ರೀತಿ, ಮಮತೆ ವಾತ್ಸಲ್ಯಕೆ  ಕಣ್ಣಾಗಿ
ಬಾಳ ನೆನಪುಗಳ  ಆಗರವು  ನೀನಾಗಿ
ಸರಿಯಿತಲ್ಲ ನಿನ್ನ ಬಾಳು.

ಎತ್ತಿದವರ  ‌ಕೂಸಾಗಿ ಯಾಕೆ ಸುಯ್ಯುತಿಹೆ?

ಬೇಕಿಲ್ಲ  ನಿಟ್ಟುಸಿರು
ತುಂಬು ಜೀವನ ನಿನ್ನದು ಸಿಗದಲ್ಲ ಒಂದು ಕಸರು
ಭೂತ, ವರ್ತಮಾನ, ಭವಿಷ್ಯತ್ತಿನ ತುಂಬ ನಿನ್ನ  ನೆರಳು
ಕಾಲಾಯ ತಸ್ಮೈ ನಮಃ ಅನ್ನದಿರಲಾದೀತೆ ನೀ  ಹೇಳು

 ಸರೋಜಿನಿ  ಪಡಸಲಗಿ
ಆ ಹಳೆಯ ಎಕ್ಸಾಕ್ಟ ಕ್ಯಾಮೆರಾದ ರೋಚಕ ಹಿನ್ನಲೆ ಬಗ್ಗೆ ಓದಿ – http://www.oregonlive.com/geek/2016/02/watch_oregon_hikers_find_myste.html

 

ಈ ಛಾಯಾ ಚಿತ್ರಗಳ ಹಿಂದೆ ಇರುವ ನಿಜ ಘಟನೆಗಳ ವಿವರಗಳು? ನಿಮ್ಮ ಹುಡುಕಾಟಕ್ಕಾಗಿ!!

vietnamese-girl-running
ವಿಯೆತ್ನಾಮ್ ಹುಡುಗಿ – ನಿಕ್ ಉಟ್ ತೆಗೆದದ್ದು
alan-kurdi
ಸಿರಿಯನ್-ಕರ್ದಿಷ್ ಮಗು – ನಿಲುಫರ್ ಡಿಮಿರ್ ತೆಗೆದದ್ದು
250px-capa_death_of_a_loyalist_soldier
ಬೀಳುತ್ತಿರುವ ಯೋಧ – ರಾಬರ್ಟ್ ಕಾಪಾ ತೆಗೆದದ್ದು
the-vulture-and-the-little-girl
ಸುಡಾನ್ ಮಗು ಮತ್ತು ಹದ್ದು – ಕೆವಿನ್ ಕಾರ್ಟರ್ ತೆಗೆದದ್ದು
sharbat_gula
ಆಫ್ಘಾನ್ ಹುಡುಗಿ – ಸ್ಟೀವ್ ಮ್ಯಾಕ್ಕರ್ರಿ ತೆಗೆದದ್ದು
Advertisements

ನಾನು ಸ್ಕೀಯಿಂಗ್ ಕಲಿತಿದ್ದು – ವಿನತೆ ಶರ್ಮ

ski 1ಹಿಮದೇಶಗಳಲ್ಲಿ ಚಳಿ ಮುಗಿದು ಪರ್ವತಗಳ ಬಿಳಿ ನೆತ್ತಿಗಳು ಈಗ ಸ್ವಲ್ಪಸ್ವಲ್ಪವಾಗಿ ಕಂದು, ಕಪ್ಪು, ಬಿಳಿ ಬಣ್ಣಗಳ ಮಿಶ್ರಿತ ಮೋಹಕ ಟೋಪಿಗಳನ್ನ ಧರಿಸಿಕೊಳ್ಳುವ ಪಂದ್ಯ ಹೂಡಿವೆ. ನಾವು ಈಸ್ಟರ್ ಹಬ್ಬಕ್ಕೆಂದು ಬರುವ ರಜಾ ದಿನಗಳಲ್ಲಿ ಫ್ರಾನ್ಸ್ ನ ಕಡೆಯ ಆಲ್ಪ್ಸ್ ಪರ್ವತ ಶ್ರೇಣಿಗೆ ಬಂದೆವು – ಸ್ಕೀಯಿಂಗ್ ಗೋಸ್ಕರ. ಎಲ್ಲಿ ನೋಡಿದರೂ ಎಲ್ಲಾ ವಯಸ್ಸಿನ ಹೆಣ್ಣು, ಗಂಡು ಹಿಮ ಜಾರುಪಟ್ಟಿಧಾರಿಗಳು (ಸ್ಕೀಯರ್ಸ್) ಅಥವಾ ಹಿಮಹಲಗೆ (ಸ್ನೋ ಬೋರ್ಡ್ ) ಧಾರಿಗಳು. ಕುಟುಂಬದ ಬೇರೆಲ್ಲರೂ ಈ ಕ್ರೀಡೆಗಳಲ್ಲಿ ಪರಿಣಿತರು. ಎಲ್ಲರಿಗೂ ಸ್ಕೀಯಿಂಗ್ ಹುಚ್ಚು.

ನಾನು ಕಳೆದ ವರ್ಷವಷ್ಟೇ (2015) ಸ್ಕೀಯಿಂಗ್ ಕಲಿಯಲಾರಂಭಿಸಿದ್ದು. ಹಿಂದೆ ಯಾವಾಗಲೋ ನಾನು ಆಸ್ಟ್ರೇಲಿಯಾದ ಸ್ನೋಯಿ ಪರ್ವತ ಶ್ರೇಣಿಗೆ ಹೋಗಿ, ಎರಡು ಗಂಟೆಗಳ ಗುಂಪು ಸ್ಕೀಯಿಂಗ್ ಕ್ಲಾಸ್ ಗೆ ಹಾಜರಾಗಿದ್ದೆ. ಸ್ಕೀಯಿಂಗ್ ಕಲಿಯುವುದಿರಲಿ, ಸ್ಕೀಗಳ ಮೇಲೆ ನೆಟ್ಟಗೆ ನಿಲ್ಲಲೂ ಆಗಲಿಲ್ಲವೇ!! ನನ್ ಕೈಯಲ್ಲಿ ಆಗಲ್ಲಾ ಮಾರಾಯಾ ಬಿಟ್ಟು ಬಿಡು, ಗುಂಪಿನ ಮತ್ತೆಲ್ಲರನ್ನು ಕರೆದು ಕೊಂಡು ನೀ ಹೋಗು ಎಂದರೆ ಆ ಸ್ಕೀಯಿಂಗ್ ಕೋಚ್ ಕೇಳಲಿಲ್ಲವೇ!!ski 2

ಆಗ ಬಿದ್ದು ಎದ್ದು ಮಾಡಿದ ಸರ್ಕಸ್, ಅನುಭವಿಸಿದ ನೋವು, ಪಟ್ಟ ಅವಮಾನ, ಇಟ್ಟ ಕಣ್ಣೀರು ಎಲ್ಲವೂ ಮನದಾಳಕ್ಕೆ ಇಳಿದು ಈ ನನ್ನ ಜನ್ಮದಲ್ಲಿ ಮತ್ತೆ ಸ್ಕೀಯಿಂಗ್ ಕನಸು ಕಾಣುವುದಿಲ್ಲ ಎಂದು ಶಪಥ ಮಾಡಿದ್ದೆ. ಜುಮ್ಮೆಂದು ರಾಕೆಟ್ ಥರ, ಚಕ್ರದ ಥರ ಬಳುಕಿಕೊಂಡು ಸ್ಕೀಯಿಂಗ್ ಮಾಡಿ ಬಂದ ಜೇಬೀಯನ್ನ ನೋಡಿ ಹೊಟ್ಟೆ ಉರಿಸಿಕೊಂಡಿದ್ದೆ.

ski 3ನಾವು ಇಂಗ್ಲೆಂಡ್ ಗೆ ಬರುವ ಮುನ್ನ ಜೀಬೀ “ಮಕ್ಕಳಿಗೆ ಈ ಬಾರಿ ಸ್ಕೀಯಿಂಗ್ ಕಲಿಸಬೇಕು” ಎಂದಿದ್ದರು. ನಾನೋ ದುಃಸ್ವಪ್ನವನ್ನು ಕಂಡಂತೆ ಮುಖ ಮಾಡಿ ಗಪ್ ಚಿಪ್ ಆಗಿದ್ದೆ. ಮಕ್ಕಳು ಭಾಳಾ ಖುಷಿಯಲ್ಲಿದ್ದರು. “ನಾನೂ ಮಕ್ಕಳು ಸ್ಕೀಯಿಂಗ್ ಮಾಡಲು ಪರ್ವತದ ಮೇಲೆ ಹೋದಾಗ ನೀನೊಬ್ಬಳೆ ಉಳಿದು ಬಿಡುತ್ತೀಯ, ಈ ಒಂದು ಬಾರಿ ಪ್ರಯತ್ನ ಮಾಡಿ ಸ್ವಲ್ಪ ಕಲಿ, ಅಮ್ಮನಿಂದ ಮಕ್ಕಳಿಗೂ ಹೆಚ್ಚು ಸ್ಫೂರ್ತಿ ಸಿಗುತ್ತದೆ” ಎಂದೆಲ್ಲ ಜೀಬಿ ಪುಸಲಾಯಿಸಿದ್ದಕ್ಕೆ ಅರೆ ಮನಸ್ಸಿನಿಂದ ಒಪ್ಪಿಕೊಂಡೆ, ಒಳಗೊಳಗೇ ಆತಂಕ ಗೂಡು ಕಟ್ಟಿತ್ತು.

ಅದ್ಯಾಕೋ ಏನೋ, “ಸ್ಕೀಯಿಂಗ್ ಬೇಡ, ಆಗಲೇ ಅದಕ್ಕೆ ತಿಲಾಂಜಲಿ ಕೊಟ್ಟಾಗಿದೆ, ಸ್ನೋ ಬೋರ್ಡ್ ಕಲೀತೀನಿ, ಸೂರ್ಯ ನೀನು ಕೂಡ ನನ್ ಜೊತೆ ಸ್ನೋ ಬೋರ್ಡ್ ಕಲಿಯೋ” ಎಂದು ಅವನನ್ನೂ ಜೊತೆಗೆಳೆದುಕೊಂಡು ಆ ಸಾಹಸಕ್ಕಿಳಿದೆ. ಮೊದಲ ಎರಡೇ ದಿನಗಳಲ್ಲಿ ದೊಡ್ಡ ಮಗ ಸ್ನೋ ಬೋರ್ಡಿಂಗ್ ಪಟ್ಟಂತ ಕಲಿತುಬಿಟ್ಟ; ಚಿಕ್ಕ ಮಗ ಸ್ಕೀಯಿಂಗ್ ನಲ್ಲಿ ನಾನೇ ಕಿಂಗ್  ಅನ್ನುವಂತೆ ಆದ. ನಾನು ಮಾತ್ರ ಸ್ನೋ ಬೋರ್ಡ್ ಕಲಿಯಲು ಹೋಗಿ ಮೊದಲ ದಿನವೇ ಎಡಗಾಲಿಗೆ ಭಾರಿ ಪೆಟ್ಟನ್ನ ಮಾಡಿಕೊಂಡು ನಂತರ ಸ್ಕೀಯಿಂಗ್ ಕಡೆ ಕಣ್ಣು ಹಾಯಿಸಿದ್ದೆ. ಇದ್ದಷ್ಟು ದಿನವೂ ಪರ್ವತಗಳ ಮೇಲೆ ಬೋಂಡಾದಂತೆ ಊದಿಕೊಂಡಿದ್ದ ಕಾಲನ್ನೆಳೆದುಕೊಂಡೇ ಓಡಾಡಿದ್ದೆ.ski 4

ನನ್ನದೇ ಸ್ವಂತ ಪ್ರಯತ್ನದಿಂದ ಮತ್ತು ಬೇರೆಯವರನ್ನ ನೋಡಿ, ಕುಟುಂಬದವರ ಸಹಕಾರದಿಂದ ನಾನೇ ಒಂದಷ್ಟು ಸ್ಕೀಯಿಂಗ್ ಕಲಿತುಕೊಂಡು ಕಡೆಯ ದಿನ ನನ್ನ ಮೊಟ್ಟ ಮೊದಲ ಬ್ಲೂ ರನ್(ಆರಂಭಿಕರ) ಸ್ಕೀಯಿಂಗ್ ಮಾಡಿದೆ. ನಂತರ ಇಡೀ ವರ್ಷ ಆ ಫಿಸಿಯೋ ಥೆರಪಿಸ್ಟ್ ಮತ್ತು ಡಾಕ್ಟರ್ ಗಳಿಂದ ಉಗಿಸಿಕೊಂಡು ಕಾಲನ್ನ ರಿಪೇರಿ ಮಾಡಿಕೊಳ್ಳುವುದಕ್ಕೆ ಪ್ರಯತ್ನಿಸಿದ್ದೆ.

ಈ ಬಾರಿ (2016) ಮತ್ತೆ ಆಲ್ಪ್ಸ್ ಹಿಮ ಪರ್ವತಗಳಿಗೆ ಬಂದಿಳಿದಾಗ ಬೆಟ್ಟ, ಪರ್ವತಗಳನ್ನ ಇನ್ನಿಲ್ಲದಷ್ಟು ಪ್ರೀತಿಸುವ ನನ್ನ ಜೀವ ಸುಮ್ಮನಾಗಲಿಲ್ಲ. ಮತ್ತೆ ಆ ಹಿಮದ ಮೇಲೆ ಓಡಾಡಿ, ಪರ್ವತಗಳ ನೆತ್ತಿಗಳಿಗೆ ಹಾಯ್ ಹೇಳಿದೆ. ಮತ್ತೆ ಸ್ಕೀಗಳನ್ನ, ಆ ಭಾರವಾದ ಬೂಟುಗಳನ್ನ ಹಾಕಿಕೊಂಡು ಹೋದೆ – ಬ್ಲೂ ರನ್‘, ಇಗೋ ನಾ ಬಂದೆ ಎಂದು ಹೇಳಿ ಆ ಹಿಮ ಜಾರುಗಳಲ್ಲಿ ಸುಯ್ ಅನ್ನುತ್ತಾ ಜಾರಿದೆ. ಅಯ್ಯೋ ಇಷ್ಟನ್ನ ಕಲಿಯಕ್ಕೆ ಅಷ್ಟೆಲ್ಲಾ ವರ್ಷ ವ್ಯರ್ಥವಾಗಿ ಕಾದು ಸಿಕ್ಕ ಅವಕಾಶಗಳನ್ನ ಬಿಟ್ಟು ಕೂತೆನಲ್ಲಾ ಎಂದು ಬೇಸರ ಪಟ್ಟುಕೊಂಡೆ. ಅಮ್ಮ ಸ್ಕೀಯಿಂಗ್ ಮಾಡುವುದನ್ನ ನೋಡಿ ಮಕ್ಕಳು ಖುಷಿಪಟ್ಟರು. ಜೀಬೀಗೋ ಭಾರಿ ಹೆಮ್ಮೆ. ಅವರ ಕುಟುಂಬದವರು ” ಯು ಡಿಡ್ ನಾಟ್ ಗಿವ್ ಅಪ್ , ವೆಲ್ ಡನ್ ” ಎಂದರು . ಭಾರತದ ನನ್ನ ಕಡೆ ಕುಟುಂಬದಲ್ಲಿ ನಾನೇ ಮೊಟ್ಟ ಮೊದಲ ಸ್ಕೀಯಿಂಗ್ ಮಾಡುವ ಹೆಣ್ಣು ಎಂದು ನನಗೂ ಸ್ವಲ್ಪ ಸಂತೋಷವಾಯಿತು. ಕಳೆದ ವರ್ಷಕ್ಕಿಂತಲೂ ಈ ವರ್ಷ ಸ್ಕೀಯಿಂಗ್ ಮಾಡುತ್ತಿದ್ದ ಅನೇಕ ಭಾರತೀಯ ಮೂಲದವರನ್ನು ನೋಡಿ  ಮತ್ತಷ್ಟು ಸ್ಫೂರ್ತಿ ಬಂತು.

ski 5ಒಂದು ಸಂದರ್ಭದಲ್ಲಿ ಪಕ್ಕದಲ್ಲಿ ಕುಳಿತಿದ್ದ ಭಾರತೀಯ ಹೆಂಗಸೊಬ್ಬರನ್ನ ಮಾತನಾಡಿಸಿ ಅವರ ಸ್ಕೀಯಿಂಗ್ ಅನುಭವದ ಬಗ್ಗೆ ಕೇಳಿದೆ. ಅವರ ತಂದೆತಾಯಿ ದಕ್ಷಿಣ ಅಫ್ರಿಕಾದಿಂದ ವಲಸೆ ಬಂದು ಬ್ರಿಟನ್ ನಲ್ಲಿ ನೆಲಸಿದ ಪಂಜಾಬಿ ಮೂಲದವರು, ಅಪ್ಪಾಮ್ಮಂದಿರು ನಮ್ಮನ್ನೆಲ್ಲಾ ಕಷ್ಟದಿಂದ ಬೆಳೆಸಿದರು ಎಂದು ಹೇಳಿಕೊಂಡು ಆಕೆ ಅವರ ಬಾಲ್ಯದಲ್ಲಿ ಎಂದೂ ತಮ್ಮ ಕುಟುಂಬದವರೊಡನೆ ಒಟ್ಟಾಗಿ ರಜೆಯನ್ನ ಅನುಭವಿಸದೆ ಬೆಳೆದರು ಎಂದರು. “ನನ್ನ ಮಕ್ಕಳಿಗೆ ನಾನು ಅನುಭವಿಸಿದ ಒಂಟಿತನದ ಅನುಭವವಾಗಬಾರದು, ಅವರು ರಜೆಯ ಮಜೆ, ಕುಟುಂಬದೊಟ್ಟಿಗೆ ಕಳೆಯುವ ಹರ್ಷದ ಕ್ಷಣಗಳನ್ನು ಪಡೆಯಬೇಕು, ಈ ಸ್ಕೀಯಿಂಗ್ ಕೂಡ ಅವರಿಗೋಸ್ಕರವೇ, ಜೊತೆಗೆ ನಾನೂ ಅಷ್ಟಿಷ್ಟು ಕಲಿಯುತಿದ್ದೀನಿ” ಎಂದರು.

ski 6ಹೋದ ವರ್ಷ, ಈ ವರ್ಷ ಆ ಹಿಮ ಪರ್ವತಗಳ ಅಂದದ ಜೊತೆ ಅನೇಕ ಅನುಭವಗಳನ್ನ ಪಡೆದೆ. ನಾನಾ ತರಹದ ಗೋನ್ದಲಾ, ಸ್ಕೀ ಲಿಫ್ಟ್ ಗಳು ಇತ್ಯಾದಿಗಳಲ್ಲಿ ಓಡಾಡಿ ಒಂದು ಪರ್ವತದಿಂದ ಮತ್ತೊಂದು ಪರ್ವತಕ್ಕೆ ಹಾರುತ್ತ ಬಹಳ ಮೋಜನ್ನು, ವಿಶಿಷ್ಟ ಅನುಭವವನ್ನ ಪಡೆದೆ. ಪುಟ್ಟಪುಟ್ಟ ಮಕ್ಕಳು ಕಲಿಯುತ್ತಾ ಪುಸಕ್ ಎಂದು ಬಿದ್ದು ಮತ್ತೆ ಹಿಮವನ್ನ ಒರೆಸಿಕೊಂಡು ಜಾರುತ್ತಾ ಹೋಗುವುದು, ಅಪ್ಪಂದಿರು ಅಮ್ಮಂದಿರು ಪೆಂಗ್ವಿನ್ ಗಳಂತೆ ತಮ್ಮ ಕಾಲುಗಳ ಮಧ್ಯದಲ್ಲಿ ಮಕ್ಕಳನ್ನ ಅದುಮಿಕೊಂಡು ಸ್ಕೀಗಳ ಮೇಲೆ ಭಾರವೂರಿ ಹಿಮದ ಮೇಲೆ ನಡೆಯುತ್ತಾ ಹೋಗುವುದು – ಕೂತು ನೋಡುತ್ತಾ ಇದ್ದರೆ ಸಮಯ ಹೋಗುವುದೇ ತಿಳಿಯಲ್ಲ. ಸ್ಕೀಯಿಂಗ್ ಮಾಡದ ಕೆಲ ಹೆಂಗಸರು ಭಾರೀ ಬೆಲೆಯ ಉಡುಗೆಗಳನ್ನ, ಶೂ, ಬೂಟುಗಳನ್ನ , ಸನ್ ಗ್ಲಾಸಸ್ ಗಳನ್ನ ಹಾಕಿಕೊಂಡು, ಮಿರಿಗುಟ್ಟುವ ಲಿಪ್ಸ್ಟಿಕ್ ಪ್ರದರ್ಶಿಸುತ್ತಾ ಸೂರ್ಯನಿಗೆ ಮುಖವೊಡ್ಡಿ ಸನ್ ಟ್ಯಾನ್ಗೆಂದು ಆರಾಮು ಖುರ್ಚಿಗಳ ಮೇಲೆ ಒರಗಿರುವ ದೃಶ್ಯಗಳ ಬಗ್ಗೆ ಬೇಕಾದಷ್ಟು ಜೋಕ್ ಗಳು ಇವೆಯಂತೆ. ಅಂತೂ ಇಂತೂ ಎರಡೂ ವರ್ಷಗಳ ಅನುಭವಗಳನ್ನ ಆಗಾಗ ನಾವೆಲ್ಲಾ ಮೆಲಕು ಹಾಕುತ್ತಲೇ ಇದ್ದೀವಿ.