ಬಾಂಬೆ ಬೇಗಂ; ಅಪೂರ್ಣ ಭಿತ್ತಿಗಳು. ಧಾರಾವಾಹಿಯ ವಿಮರ್ಶೆ – ಡಾ ಜಿ. ಎಸ್. ಶಿವಪ್ರಸಾದ್

ನಮ್ಮ ಸಮಾಜದಲ್ಲಿ ಹೆಣ್ಣಿಗೆ ತನ್ನದೇ ರೀತಿಯ ಪಾರಂಪರಿಕ ಮುಖ್ಯ ಸ್ಥಾನವಿದೆ. ಪ್ರಪಂಚದೆಲ್ಲೆಡೆಯಲ್ಲಿ ಮಹಿಳೆ ತನ್ನ ಮನೆಯಲ್ಲಿ, ಹೊರಜಗತ್ತಿನಲ್ಲಿ, ಕೆಲಸ ಮಾಡುವ ಸ್ಥಳದಲ್ಲಿ ಸಮಾನ ಸ್ಥಾನಕ್ಕಾಗಿ, ಹಕ್ಕುಗಳಿಗಾಗಿ ಇಂದಿಗೂ ಹೋರಾಡುತ್ತಲೇ ಇದ್ದಾಳೆ. ಪರಂಪರೆಯ ಚೌಕಟ್ಟಿನಿಂದ ಹೊರಬರಲು ಪ್ರಯತ್ನಿಸುವ ಆಕೆಯ ಹೋರಾಟ, ಪುರುಷ ಪ್ರಧಾನ ಸಮಾಜದಲ್ಲಿ ಸುಲಭದ ಕೆಲಸವಲ್ಲ. ಶತಮಾನಗಳಿಂದ ತನ್ನ ಆಸೆಗಳನ್ನು,ಮಾನಸಿಕ ಮತ್ತು ದೈಹಿಕ ಬಯಕೆಗಳನ್ನು, ವಿಜಯಗಳನ್ನು, ಸೋಲನ್ನು ಹತ್ತಿಕ್ಕಿ ಬದುಕಿದ ಹೆಣ್ಣು, ಈ ಕೆಲ ದಶಕಗಳಲ್ಲಿ ತನ್ನ ಹಕ್ಕುಗಳಿಗಾಗಿ ಮಾಡಿರುವ ಪ್ರಯತ್ನ, ಹೋರಾಟ ಅಗಾಧವಾದದ್ದು. ಈ ಇಂಟರ್ ನೆಟ್ ಯುಗದಲ್ಲಿ ವಿವಿಧ ರೀತಿಯ ಬದುಕು, ಬವಣೆ, ಭಾಗ್ಯ ಎಲ್ಲದರ ಬಗ್ಗೆ ಸಮಾಲೋಚನೆ, ಚರ್ಚೆ, ವಿಮರ್ಶೆಗಳನ್ನು ಹಂಚಿಕೊಳ್ಳುವುದು ಬಹು ಸುಲಭ. ಇದು ಕೆಲವರಿಗೆ ಕಬ್ಬಿಣದ ಕಡಲೆಯೆಂದಿನಿಸಿದರೂ ಆನ್ ಲೈನ್ ಜಗತ್ತಿನಿಂದ ದೂರವಿರುವುದು ಇಂದಿನ ಬದುಕಿನ ಪರಿಯಲ್ಲ. ವಿಶ್ವದೆಲ್ಲೆಡೆಯಲ್ಲಿ ಈಗಿನ ಸಮಾಜದಲ್ಲಿ ಆಗುತ್ತಿರುವ ಎಲ್ಲಾ ರೀತಿಯ ಬದಲಾವಣೆಗಳನ್ನು ಗುರುತಿಸುವ, ಒಪ್ಪಿಕೊಳ್ಳುವ ಪ್ರಯತ್ನಗಳು ನಡೆಯುತ್ತಲೇ ಇವೆ, ಇದರ ಜೊತೆಗೇ ಅದನ್ನು ಗುರುತಿಸದಿದ್ದರೆ ತಾನಾಗೆ ಅವು ಮಾಯವಾಗಬಹುದೆನ್ನುವ ಪಲಾಯನವಾದಗಳ ಚರ್ಚೆಯೂ ನಡೆಯುತ್ತಿರುತ್ತದೆ.
ಬಾಂಬೆ ಬೇಗಂ ಎನ್ನುವ ನೆಟ್ ಫ಼್ಲಿಕ್ಸ್ ನ ಈ ಸರಣಿಯಲ್ಲಿ ಮುಂಬೈ ಮಹಾನಗರದಲ್ಲಿ ವಾಸಿಸುವ ೫ ಜನ ಆಧುನಿಕ ಮಹಿಳೆಯರು ತಮ್ಮ ಮಾನಸಿಕ, ಸಾಮಾಜಿಕ, ದೈಹಿಕ ಬಯಕೆಗಳನ್ನು ಗುರುತಿಸುವ, ಅದಕ್ಕಾಗಿ ಹೋರಾಡುವ, ಅದರಿಂದ ಸಮಾಜದಲ್ಲಿ ಆಕೆ ಎದುರಿಸುವ ಬದಲಾವಣೆಗಳ, ಸಮಸ್ಯೆಗಳ, ಶೋಷಣೆಗಳ ಚಿತ್ರಣವಿದೆ. ಈ ಮಹಿಳೆಯರ ಬದುಕು, ವಯಸ್ಸು, ಜೀವನಶೈಲಿ, ಆರ್ಥಿಕ ಪರಿಸ್ಥಿತಿ, ವಿಧ್ಯಾಭ್ಯಾಸ, ಮಾಡುವ ಕೆಲಸ ಬೇರೆ, ಬೇರೆ. ಅಂತೆಯೇ ಅವರ ಹೋರಾಟವೂ ವಿವಿಧ ಬಗೆಯದು. ಈ ಸರಣಿ ಮಹಿಳೆಯ ಈ ಹೊಸರೀತಿಯ ಬದುಕುಗಳನ್ನು, ಜೀವನ ಶೈಲಿಯನ್ನು ಗುರುತಿಸಿ, ಒಪ್ಪಿಕೊಂಡು, ಮಡಿವಂತಿಕೆಯ ಚಿಪ್ಪನ್ನೊಡೆದು ಚಿತ್ರಿಸಿರುವುದರಿಂದ ಇದು ವಾದ ವಿವಾದಗಳಿಗೆ ಪಾತ್ರವಾಗಿರುವುದರಲ್ಲಿ ಆಶ್ಚರ್ಯವೇನಿಲ್ಲ. ಇಂತಹ ಕ್ಲಿಷ್ಟವಾದ ವಿಷಯವನ್ನು ಹೊಂದಿರುವ ಸರಣಿಯನ್ನು ವಿಮರ್ಶಿಸುವುದು ಸುಲಭದ ಕೆಲಸವಲ್ಲ. ಡಾ. ಪ್ರಸಾದ್ ರವರು ಮೂಲಪಾತ್ರಗಳಿಗೆ ಧಕ್ಕೆ ಬರದ ಹಾಗೆ, ವೈಯುಕ್ತಿಕ ಅಭಿಪ್ರಾಯಗಳಿಂದ ದೂರನಿಂತು ಬಹು ಚಾತುರ್ಯದಿಂದ ಈ ಸರಣಿಯನ್ನು ವಿಮರ್ಶಿಸಿ ಈ ಲೇಖನವನ್ನು ಬರೆದಿದ್ದಾರೆ. ಓದಿ ಪ್ರತಿಕ್ರಿಯಿಸಿ – ಸಂ.

ಧಾರಾವಾಹಿಯ ವಿಮರ್ಶೆ – ಡಾ ಜಿ. ಎಸ್. ಶಿವಪ್ರಸಾದ್

ಬಾಂಬೆ ಬೇಗಂ‘ ಎಂಬ ನೆಟ್ ಫ್ಲಿಕ್ಸ್ ಧಾರಾವಾಹಿಯು ಕಳೆದ ಕೆಲವು ವಾರಗಳ ಹಿಂದೆ ಬಿಡುಗಡೆಯಾಗಿದೆ. ಈ ಧಾರಾವಾಹಿಯ ನಿರ್ದೇಶಕಿ ಅಲಂಕೃತ ಶ್ರೀವಾತ್ಸವ. ಕತೆಯ ಮೂಲ ಪರಿಕಲ್ಪನೆಯೂ ಕೂಡ ಅಲಂಕೃತ ಅವರದ್ದೇ. ಕೆಲವು ಎಪಿಸೋಡ್ಗಳನ್ನು ಬೋರ್ನಿಲಾ ಚಟರ್ಜೀ ಅವರು ನಿರ್ದೇಶಿಸಿದ್ದಾರೆ. ಈ ಧಾರಾವಾಹಿಯನ್ನು ಅಮೇರಿಕಾದ ಲಾಸ್ ಏಂಜಲೀಸ್ಸಿನ ಚೆರಿನ್ ಎಂಟರ್ ಟೈನ್ಮೆಂಟ್ ಮತ್ತು ಎಂಡಿಮಾಲ್ ಶೈನ್ ಗ್ರೂಪ್ ಗಳು ನಿರ್ಮಾಣಮಾಡಿವೆ. ಈ ಧಾರಾವಾಹಿಯಲ್ಲಿನ ಭಾಷೆ ಇಂಗ್ಲಿಷ್ ಮತ್ತು ಹಿಂದಿಯಿಂದ ಕೂಡಿದ್ದು ಇಂಗ್ಲಿಷ್ ಸಬ್ ಟೈಟಲ್ಸ್ ಗಳಿವೆ.

ಬಾಂಬೆ ಬೇಗಂ‘ ಮುಂಬೈಯಿನ ಬ್ಯಾಂಕಿಂಗ್ ಮತ್ತು ಕಾರ್ಪೊರೇಟ್ ಪ್ರಪಂಚದಲ್ಲಿ ಉನ್ನತ ಸ್ಥಾನಕ್ಕೇರಿದ ಮತ್ತು ಏರ ಬಯಸುತ್ತಿರುವ ಮಹಿಳೆಯರ ಮತ್ತು ಅವರ ಸುತ್ತ ಇರುವ ಇತರ ಮಹಿಳೆಯರ ಕತೆ. ಪುರುಷ ಪ್ರಧಾನವಾಗಿರುವ ಈ ಒಂದು ಉದ್ಯೋಗದಲ್ಲಿ ಮಹಿಳೆಯರು ಉನ್ನತ ಸ್ಥಾನಕ್ಕೆ ಏರುವಾಗ ಅಲ್ಲಿ ಅವರು ಒಳಗಾಗುವ ಲೈಂಗಿಕ ಶೋಷಣೆ, ಕಿರುಕುಳ, ಲಿಂಗ ಭೇದ, ವೈಯುಕ್ತಿಕ ಹಿನ್ನೆಲೆಗಳು, ವ್ಯಕ್ತಿ ವಿಲಕ್ಷಣಗಳು, ಅವರ ಸ್ವಾಭಿಮಾನ, ಛಲ, ಮತ್ತು ಸಮಾಜದ ನಿರೀಕ್ಷೆ ಹೇಗೆ ಅವರ ಕನಸುಗಳನ್ನು ರೂಪಿಸುತ್ತಾ ವೃತ್ತಿಜೀವನದಲ್ಲಿ ಏರು ಪೇರುಗಳನ್ನು ಒಡ್ಡುತ್ತವೆ ಎಂಬ ವಿಚಾರ ಬಹಳ ಪರಿಣಾಮಕಾರಿಯಾಗಿ ಮೂಡಿ ಬಂದಿದೆ. ಎಲ್ಲಕ್ಕಿಂತ ಮಿಗಿಲಾಗಿ ಈ ಧಾರಾವಾಹಿಯಲ್ಲಿ ಎದ್ದು ನಿಲ್ಲುವ ವಿಚಾರ “ನಾನೂ ಕೂಡ ಲೈಂಗಿಕ ಶೋಷಣೆಗೆ ಒಳಪಟ್ಟಿದ್ದೇನೆ” (“ಮೀಟೂ”) ಎಂಬ ಕೂಗು. ಲೈಂಗಿಕ ಶೋಷಣೆಗೆ ಒಳಗಾದ ಅದೆಷ್ಟೋ ಮಹಿಳೆಯರು ಸಮಾಜಕ್ಕೆ ಹೆದರಿ ಅಥವಾ ಅದು ತಮ್ಮ ವೃತ್ತಿಗೆ ಅಡ್ಡಿಯಾಗಬಹುದೆಂಬ ಕಾರಣದಿಂದ ಅಥವಾ ನಾಚಿ ತಲೆತಗ್ಗಿಸುವ ವಿಚಾರವೆಂದು ಅದನ್ನು ಗುಟ್ಟಾಗಿರಿಸಿಕೊಂಡು ಸಂಕಟವನ್ನು ಇತರರೊಡನೆ ಹಂಚಿಕೊಳ್ಳದೇ ಆಂತರಿಕ ಹಿಂಸೆಯನ್ನು ಅನುಭವಿಸಿ ಕೊನೆಗೊಮ್ಮೆ ಸೂಕ್ತ ಕಾಲಾವಕಾಶ ಬಂದಾಗ ಕೆಲವು ಧೀಮಂತ ಮಹಿಳೆಯರು ಈ ವಿಚಾರವನ್ನು ಬಹಿರಂಗ ಪಡಿಸಿ ಇಲ್ಲಿ ಒಂದು ನೆಮ್ಮದಿಯನ್ನು ಪಡೆದುಕೊಳ್ಳುತ್ತಾರೆ. ತಮ್ಮನ್ನು ಈ ಹಿಂಸೆಗೆ ಗುರಿಪಡಿಸಿದ ಗಂಡಸಿಗೆ ಶಿಕ್ಷೆಯಾಗಿ ತಮಗೆ ನ್ಯಾಯ ದೊರಕುವುದಷ್ಟೇ ಅಲ್ಲದೆ ಈ ಒಂದು ವಿಚಾರದಲ್ಲಿ ತಾನು ಒಬ್ಬಳೇ ಅಲ್ಲ ತನ್ನಂತೆ ಇನ್ನೂ ಅನೇಕರು ಈ ಶೋಷಣೆಗೆ ಒಳಪಟ್ಟಿದ್ದಾರೆ ಎಂಬ ಅರಿವು ಮಹಿಳೆಗೆ ಸಾಂತ್ವನ ನೀಡಬಹುದು. ಈ “ಮೀಟೂ” ಚಲನೆಯು (ಆಂದೋಲನ ಎಂದು ಕೂಡ ಕರೆಯಬಹುದು) ಮಹಿಳೆಯರಿಗೆ ಆತ್ಮವಿಶ್ವಾಸವನ್ನು ತಂದುಕೊಟ್ಟಿದೆ. ಈ “ಮೀಟೂ” ಚಲನೆಯಿಂದ ಲೈಂಗಿಕ ಶೋಷಣೆಯ ಬಗ್ಗೆ ನಮ್ಮ ಸಮಾಜದಲ್ಲಿ ಹೆಚ್ಚಿನ ಅರಿವು ಮೂಡಿದೆ. ಈ ಲೈಂಗಿಕ ಶೋಷಣೆ ಎಂಬ ಪಿಡುಗು ವಿಶ್ವವ್ಯಾಪ್ತಿಯಾದದ್ದು. ನಮಗೆ ಗೋಚರಿಸುತ್ತಿರುವುದು ತೇಲುತ್ತಿರುವ ನೀರ್ಗಲ್ಲು ಬಂಡೆಯ ತುದಿ ಅಷ್ಟೇ. ಈ “ಮೀಟೂ” ಚಲನೆ ಬರಿ ಮಹಿಳೆಯರಿಗಲ್ಲದೆ ಸಮಾಜದ ಇತರ ದುರ್ಬಲ ವರ್ಗದವರಿಗೂ ಅನ್ವಯಿಸುವ ವಿಷಯ. ನಮಗೆ ತಿಳಿದಂತೆ ಕಳೆದ ನೂರು ವರ್ಷದಿಂದ ಇಂಗ್ಲೆಂಡಿನ ಕ್ರೈಸ್ತ ಧಾರ್ಮಿಕ ಸಂಸ್ಥೆಗಳಲ್ಲಿ, ಫುಟ್ಬಾಲ್ ಕ್ಲಬ್ ಗಳಲ್ಲಿ ವ್ಯವಸ್ಥಿತವಾದ ಲೈಂಗಿಕ ಶೋಷಣೆ ನಡೆಯುತ್ತಾ ಬಂದಿದ್ದು ಹಲವಾರು ಪ್ರಸಂಗಗಳು ಈಗ ಬೆಳಕಿಗೆ ಬರುತ್ತಿವೆ. ಈ ವಿಚಾರಗಳು ‘ಬಾಂಬೆ ಬೇಗಂ’ ಧಾರಾವಾಹಿ ಕತೆಯ ಹಿನ್ನೆಲೆಯಲ್ಲಿ ಪ್ರಸ್ತುತವಾಗುತ್ತವೆ.

ಹಲವಾರು ಓದುಗರು ಈ ಧಾರಾವಾಹಿಯನ್ನು ನೋಡಿಲ್ಲವೆಂದು ಭಾವಿಸಿ ಅವರ ಆಸಕ್ತಿಗೆ ಕುಂದು ತರದಂತೆ ಕತೆಯನ್ನು ಸಂಪೂರ್ಣವಾಗಿ ಬಿತ್ತರಿಸದೆ ಕತೆಯಲ್ಲಿರುವ ಪ್ರಧಾನ ಪಾತ್ರಗಳನ್ನು ಪರಿಚಯಿಸುವ ಪ್ರಯತ್ನ ನನ್ನದಾಗಿದೆ. ಕತೆಯ ಮುಖ್ಯ ಪಾತ್ರ ರಾಣಿಯದು. ಈ ಕತೆಯಲ್ಲಿ ಐದು ಬೇಗಂಗಳಿದ್ದು ರಾಣಿ ಮೊದಲನೇ ಬೇಗಂ. ಇಲ್ಲಿ ಬೇಗಂ ಎಂದರೆ ಮುಸ್ಲಿಂ ಮನೆಯ ಹಿರಿಯಳು ಎನ್ನುವ ಅರ್ಥದಲ್ಲಿ ಪರಿಗಣಿಸದೆ ಒಬ್ಬ ಅಸಮಾನ್ಯ ಮಹಿಳೆ ಎಂದು ಭಾವಿಸಬೇಕು. ಮುಂಬೈಯಿನ ಪ್ರತಿಷ್ಠಿತ ಬ್ಯಾಂಕ್ ಸಂಸ್ಥೆಯಲ್ಲಿ ರಾಣಿ ಕಾರ್ಯ ನಿರ್ವಾಹಕಿ. (ಸಿ.ಇ. ಓ) ಬ್ಯಾಂಕಿನ ಪುರುಷ ಪ್ರಧಾನವಾದ ಬೋರ್ಡ್ ಅವಳ ಮೇಲೆ ನಿಗಾ ಇಟ್ಟು ಅವಳನ್ನು ನಿಯಂತ್ರಿಸುತ್ತದೆ. ರಾಣಿ ತನ್ನ ಐವತ್ತರಲ್ಲಿದ್ದು ಹೆಂಡತಿ ಕಳೆದುಕೊಂಡಿರುವ ನೌಷಾದನ ಎರಡನೇ ಹೆಂಡತಿಯಾಗಿ ಅವನ ಎರಡು ಮಕ್ಕಳಿಗೆ ಮಲತಾಯಿಯಾಗಿ ಕತೆಯನ್ನು ಪ್ರವೇಶಮಾಡುತ್ತಾಳೆ. ಬಹಳ ಉನ್ನತಿಗೆ ಏರುವ ಮಹಿಳೆಯರು ಮದುವೆಯನ್ನು ಮುಂದೂಡಿ ಕೊನೆಗೆ ಬೇರೊಬ್ಬನ ಎರಡನೇ ಹೆಂಡತಿಯಾಗುವ ಪ್ರಮೇಯ ಇಲ್ಲಿ ತರಲಾಗಿದೆ. ಅದು ಕಾಕತಾಳೀಯವೂ ಇರಬಹುದು. ಮದುವೆ, ಸಂಸಾರ ಮತ್ತು ವೃತ್ತಿಪರ ಜೀವನದಲ್ಲಿ ಬಡ್ತಿ ಉನ್ನತಿ ಇವೆರಡೂ ಎಲ್ಲ ಮಹಿಳೆಯರಿಗೆ ದಕ್ಕುವುದಿಲ್ಲ, ವೃತ್ತಿ ಜೀವನದಲ್ಲಿ ಮುನ್ನಡೆಯ ಬೇಕಾಗಿದ್ದಲ್ಲಿ ಇವೆರಡರಲ್ಲಿ ಒಂದನ್ನು ಮಹಿಳೆ ಆಯ್ಕೆಮಾಡಿ ಕೊಳ್ಳಬೇಕು ಎಂಬುದು ಒಂದು ಸಾರ್ವತ್ರಿಕ ಅಭಿಪ್ರಾಯ. (ಇದಕ್ಕೆ ಹಲವಾರು ಹೊರತುಗಳ ನಿದರ್ಶನವಿದೆ). ವೃತ್ತಿ ಜೀವನದಲ್ಲಿ ಮೇಲಕ್ಕೇರ ಬಯಸುವ ಹೆಂಗಸರು ತಮ್ಮ ವೈವಾಹಿಕ ಜೀವನದಲ್ಲಿ ಹಲವಾರು ಹೊಂದಾಣಿಕೆಗಳನ್ನು ಗಂಡನ ಸಹಕಾರದಿಂದ ಮಾಡಬೇಕಾಗಬಹುದು. ಈ ಒಂದು ಹಿನ್ನೆಲೆಯಲ್ಲಿ ವೃತ್ತಿಪರ ಮಹಿಳೆಯರು ಮದುವೆಯ ಪ್ರಸ್ತಾಪವನ್ನು ಮುಂದೂಡುವುದು ಸಾಮಾನ್ಯ. ಉದ್ಯೋಗಸ್ಥ ಯುವತಿಯರು ಈ ನಡುವೆ ೩೦ ವರ್ಷದ ಆಸುಪಾಸಿನಲ್ಲಿ ವಿವಾಹಿತರಾಗುತ್ತಿದ್ದಾರೆ. ಇದು ನಮ್ಮ ಸಮಾಜದಲ್ಲಿ ಇತ್ತೀಚಿಗೆ ಕಂಡುಬರುವ ಗಮನಾರ್ಹ ಬದಲಾವಣೆ.

ರಾಣಿಗೆ ತನ್ನ ಮುಟ್ಟು ನಿಲ್ಲುವ ಶಾರೀರಿಕ ಮತ್ತು ಮಾನಸಿಕ ಕ್ರಿಯೆಯಲ್ಲಿ ಅವಳಿಗೆ ಒದಗಿ ಬರುವ ಮುಜುಗುರ ಮತ್ತು ದೇಹದೊಂದಿಗೆ ಅವಳ ಸೆಣಸಾಟ ಬಹಳ ಪರಿಣಾಮಕಾರಿಯಾಗಿದೆ. ರಾಣಿ ತನಗೆ ಸರಿಸಾಟಿಯಲ್ಲದೆ ಗಂಡ ನೌಷಾದನಲ್ಲಿ ಅಡಗಿರುವ ಪ್ರೀತಿಯನ್ನು ಮೊದಲು ಗುರುತಿಸುವಲ್ಲಿ ವಿಫಲವಾಗುತ್ತಾಳೆ. ಅವನ ಜೊತೆ ಲೈಂಗಿಕ ಪರಿಪೂರ್ಣತೆಯನ್ನು ಕಾಣದೆ ತನ್ನ ಪ್ರತಿಸ್ಪರ್ದ್ಧಿ ಬ್ಯಾಂಕ್ ಸಂಸ್ಥೆಯ ವಿವಾಹಿತ ಹಿರಿಯ ಎಕ್ಸಿಕ್ಯೂಟಿವ್ ಜೊತೆ ಪ್ರೇಮಾಂಕುರವಾಗಿ ದೈಹಿಕ ಸಂಬಂಧಕ್ಕೆ ತೊಡಗುತ್ತಾಳೆ. ರಾಣಿ, ನೌಷಾದನ ಮಗಳಾದ ಶೇಗೆ ತಾಯ್ತನವನ್ನು ನೀಡ ಬಯಸಲು ಬಂದಾಗ ಶೇ ರಾಣಿಯನ್ನು ಮಲತಾಯಿ ಎಂಬ ನಿಲುವಿನಲ್ಲಿ ತಿರಸ್ಕರಿಸುತ್ತಾಳೆ. ಇವರಿಬ್ಬರ ನಡುವೆ ಹಲವಾರು ವಿಚಾರಗಳಲ್ಲಿ ಸಂಘರ್ಷಣೆಗಳು ನಡೆಯುತ್ತಲೇ ಇರುತ್ತವೆ. ರಾಣಿ ತನ್ನ ತಾಳ್ಮೆಯನ್ನು ಎಲ್ಲೂ ಕಳೆದುಕೊಳ್ಳುವುದಿಲ್ಲ. ಮಲಮಗಳು ಎಂಬ ಭೇದವನ್ನು ತರುವುದಿಲ್ಲ. ಎಷ್ಟಾದರೂ ರಾಣಿ ವಿದ್ಯಾವಂತೆ ಅನುಭವಸ್ಥೆ.

ರಾಣಿ ವೈಯುಕ್ತಿಕ ಜೀವನದಲ್ಲಿ ಸಂಕಷ್ಟಗಳನ್ನು ನುಂಗಿಕೊಳ್ಳಬೇಕಾದ ಪರಿಸ್ಥಿಯ ಜೊತೆ ವೃತ್ತಿ ಜೀವನದಲ್ಲಿ ಕಾರ್ಪೊರೇಟ್ ಪ್ರಪಂಚದ ರಾಜಕೀಯವನ್ನೂ ಎದುರಿಸಬೇಕಾಗುತ್ತದೆ. ಉಳಿವಿಗಾಗಿ ನಿರಂತರ ಹೋರಾಟ ನಡೆಸುತ್ತ ಸಾಗುತ್ತಾಳೆ. ರಾಣಿ ತನ್ನ ಬ್ಯಾಂಕಿನಲ್ಲೇ ತನ್ನ ಕೈಕೆಳಗೆ ನಡೆಯುತ್ತಿರುವ ಸ್ತ್ರೀಯರ ಶೋಷಣೆಯನ್ನು ಕಂಡೂ ಕಾಣದಂತಿದ್ದು ಪರಿತಪಿಸಿ ಕೊನೆಗೆ ಒಂದು ನಿರ್ಧಾರಕ್ಕೆ ಬರುತ್ತಾಳೆ. ಅವಳು ಹಿರಿಯ ತಾಯಿಯ ಸ್ಥಾನದಲ್ಲಿ ನಿಲ್ಲುತ್ತಾಳೆ. ರಾಣಿಯ ವ್ಯಕ್ತಿತ್ವದಲ್ಲಿ ಸಾಕಷ್ಟು ದ್ವಂದಗಳು ಗೊಂದಲಗಳೂ ಇವೆ. ರಾಣಿಯ ಪಾತ್ರವನ್ನು ಬಾಲಿವುಡ್ಡಿನ ಹಿರಿಯ ನಟಿ ಪೂಜಾಭಟ್ ಅವರು ಬಹಳ ಯಶಸ್ವಿಯಾಗಿ ನಿರ್ವಹಿಸಿದ್ದಾರೆ.

ಕತೆಯಲ್ಲಿನ ಎರಡನೇ ಬೇಗಂ ಫಾತಿಮಾ ಅದೇ ಬ್ಯಾಂಕಿನಲ್ಲಿ ಬಡ್ತಿ ಪಡೆದು ರಾಣಿಯ ಅಸಿಸ್ಟೆಂಟ್ ಆಫೀಸರ್ ಆಗಿ ಕೆಲಸ ಮಾಡುತ್ತಾಳೆ. ಫಾತಿಮಾ ಗಂಡ ಅರೀಜೆ ಇದೆ ಬ್ಯಾಂಕಿನಲ್ಲಿ ಅವಳ ಸಹೋದ್ಯೋಗಿ. ಅವನು ಬಡ್ತಿಗೆ ಅರ್ಹನಾಗದೇ ಹೆಂಡತಿಯ ಕೈಕೆಳಗೆ ದುಡಿಯವ ಪ್ರಮೇಯ ಒದಗಿಬರುತ್ತದೆ. ಆಗ ಗಂಡ ಹೆಂಡಿರ ನಡುವೆ ಬಿಕ್ಕಟ್ಟುಗಳು ತೆರೆದು ಕೊಳ್ಳುತ್ತವೆ. ಫಾತಿಮಾ ಅನುಸರಿಸಿಕೊಂಡು ಹೋದರು ಅರೀಜೆಗೆ ತನ್ನ ಸ್ವಾಭಿಮಾನ ಕೆಣಕಲು ಮೊದಲಾಗುತ್ತದೆ. ಫಾತಿಮಾಗೆ ಗರ್ಭಧರಿಸಲು ಸಾಧ್ಯವಾಗುವುದಿಲ್ಲ, ಕೊನೆಗೊಮ್ಮೆ ಗರ್ಭ ಕಟ್ಟಿದ್ದಾಗ ಕೆಲವೇ ವಾರಗಳಲ್ಲಿ ಗರ್ಭಪಾತವಾಗುತ್ತದೆ. ಅರೀಜೆ ಕಾಲ ಕ್ರಮಣೆ ಪರಿವರ್ತನೆ ಹೊಂದಿ “ಮನೆ ಗಂಡನಾಗಿ” ವಿವಾಹ ಉಳ್ಳಿಸಿಕೊಳ್ಳುವ ಪ್ರಯತ್ನ ಮಾಡುತ್ತಾನೆ. ಫಾತಿಮಾಗೆ ಕೃತಕ ಗರ್ಭಧಾರಣೆ (ಸರೊಗೆಸಿ) ಮೂಲಕ ಮಕ್ಕಳ ಪಡೆಯುವ ಅವಕಾಶ ಬಂದಾಗ ಅವಳು ಸಮ್ಮತಿಯನ್ನು ನೀಡಲು ಒಪ್ಪುವುದಿಲ್ಲ. ಇಲ್ಲಿ ಹುಟ್ಟುವ ಮಗುವಿಗೆ ತಂದೆ ಅರೀಜೆಯಾಗಿದ್ದರೂ ಜೈವಿಕ ತಾಯಿ ಬೇರೊಬ್ಬಳು ಅನ್ನುವ ಕಾರಣಗಳು ಮತ್ತು ನೈತಿಕ ಪ್ರಶ್ನೆಗಳು ಈ ದಂಪತಿಗಳ ಅಭಿಲಾಷೆಯನ್ನು ಅಲ್ಲಾಡಿಸುತ್ತದೆ. ವೃತ್ತಿ ಜೀವನದಲ್ಲಿ ವಿಜೇತಳಾದ ಫಾತಿಮಾಗೆ ವೈಯುಕ್ತಿಕ ಜೀವನದಲ್ಲಿ ತಾಯಿಯಾಗಲಾರದ ಸೋಲು ಅವಳನ್ನು ಕಾಡುತ್ತದೆ. ಅರೀಜೆ ಫಾತಿಮಾಳ ನಿರಾಕರಣೆಯನ್ನು ಅರಿತ್ತಿದ್ದರೂ ಅವಳನ್ನು ಎಮೋಷನಲ್ ಬ್ಲಾಕ್ ಮೇಲ್ ಮಾಡಲು ಪ್ರಯತ್ನಿಸುತ್ತಾನೆ. ಇದರ ನಡುವೆ ಲಂಡನ್ನಿನಿಂದ ತಾತ್ಕಾಲಿಕವಾಗಿ ಬಂದ ಆಂಗ್ಲ ಫೈನ್ಯಾನ್ಸ್ ಆಫೀಸರ್ ಜಫ್ರಿಯ ಪರಿಚಯವಾಗಿ ಫಾತಿಮಾ ಅವನೊಡನೆ ದೈಹಿಕ ಸಂಬಂಧ ಬೆಳಸುತ್ತಾಳೆ. ಜಫ್ರಿ ತನ್ನ ದೇಶಕ್ಕೆ ಹಿಂತಿರುಗಬೇಕಾಗಿದ್ದು ಅವಳ ಮತ್ತು ಜಫ್ರಿಯ ಸಂಬಂಧ ಅಲ್ಲಿಗೆ ಮುಗಿಯುತ್ತದೆ. ಯಾವುದೊ ಒಂದು ಸಿಟ್ಟಿನ ಘಳಿಗೆಯಲ್ಲಿ ಫಾತಿಮಾ ತಾನು ಜಫ್ರಿಯೊಡನೆ ಮಲಗಿದ್ದ ವಿಚಾರವನ್ನು ಅರೀಜೆಗೆ ತಿಳಿಸಿ ಅವನ ಮೇಲೆ ತನಗಿದ್ದ ಸಿಟ್ಟನ್ನು ತೀರಿಸಿಕೊಳ್ಳುತ್ತಾಳೆ. ಅವಳ ಮತ್ತು ಆರೀಜೆಯ ವಿವಾಹ ಮುರಿದು ಬೀಳುತ್ತದೆ.

ಕತೆಯ ಮೂರನೆ ಬೇಗಂ ಐಶಾ ಇಪ್ಪತೈದು ದಾಟಿದ ಯುವಕಿ. ಇದೇ ಬ್ಯಾಂಕಿನಲ್ಲಿ ಅವಳು ಕಿರಿಯ ಉದ್ಯೋಗಿ. ತಾನೂ ಮುಂದಕ್ಕೆ ರಾಣಿ ರೀತಿಯಲ್ಲಿ ಸಿ. ಇ. ಒ ಆಗಬೇಕೆಂಬ ಕನಸ್ಸಿನಲ್ಲಿ ಬದುಕಿರುತ್ತಾಳೆ. ಅವಳಿಗೆ ಆ ಉತ್ಸಾಹ ಛಲ ಎರಡೂ ಇರುತ್ತದೆ. ಆದರೆ ಐಶಾಗೆ ತನ್ನ ವೈಯುಕ್ತಿಕ ಬದುಕಿನಲ್ಲಿ ತನ್ನ ಲೈಂಗಿಕ ನಿಲುವುಗಳ ಬಗ್ಗೆ ಸಂಶಯಗಳಿರುತ್ತದೆ. ಅವಳು ಬೈ ಸೆಕ್ಷುಯಲ್ ಆಗಿ ಎರಡೂ ಮಾರ್ಗಗಳನ್ನು ಅನುಸರಿಸಿ ಹಲವಾರು ಅವಕಾಶಗಳಲ್ಲಿ ಪ್ರಯತ್ನಿಸಿದರೂ ಅವಳಿಗೆ ತನ್ನ ಲೈಂಗಿಕ ಬದುಕಿನ ಬಗ್ಗೆ ಖಚಿತತೆ ಮೂಡುವುದಿಲ್ಲ. ಅದನ್ನು ಗುಟ್ಟಾಗಿಟ್ಟುಕೊಂಡು ಕೊನೆಗೊಮ್ಮೆ ಅದನ್ನು ಬಹಿರಂಗಪಡಿಸುವ ಅನಿವಾರ್ಯ ಸನ್ನಿವೇಶ ಬಂದಾಗ ಅವಳು ಪಡುವ ಸಂಕಟ ಮತ್ತು ಹಿಂಜರಿಕೆ ಬಹಳ ಸೂಕ್ಷ್ಮವಾಗಿ ನಿರೂಪಣೆಯಾಗಿದೆ. ಐಶಾ ಬ್ಯಾಂಕಿನ ಹಿರಿಯ ಅಧಿಕಾರಿ ಮಹೇಶ್ ಅವರನ್ನು ಆದರ್ಶಪ್ರಾಯರಾಗಿ ಕಂಡು ಅವರೊಡನೆ ಕೆಲಸ ಕಲಿಯಲು ಕಾತುರರಾಗಿರುತ್ತಾಳೆ. ಇದೇ ಮಹೇಶ್ ಒಂದು ರಾತ್ರಿ ಪಾರ್ಟಿ ಮುಗಿದ ಮೇಲೆ ಅವಳನ್ನು ಲೈಂಗಿಕ ಶೋಷಣೆಗೆ ಒಳಪಡಿಸುತ್ತಾನೆ. ಐಶಾ ಈ ಒಂದು ಪ್ರಕರಣವನ್ನು ಬಹಿರಂಗ ಪಡಿಸಲು ಮೊದಲಿಗೆ ಅಂಜುತ್ತಾಳೆ. ನಂತರದಲ್ಲಿ ಅವಳು ಒಂದು ಮೀಟಿಂಗಿನಲ್ಲಿ ಬಹಿರಂಗ ಪಡಿಸಿದಾಗ ಸಂಸ್ಥೆಯ ಹಿತದೃಷ್ಟಿಯಿಂದ ರಾಣಿ ಮತ್ತು ಫಾತಿಮಾರೆ ಅವಳ ಬಾಯಿ ಮುಚ್ಚಿಸಲು ಪ್ರಯತ್ನಿಸುವ ಸನ್ನಿವೇಶ ಲೈಂಗಿಕ ಶೋಷಣೆಯ ಬಗ್ಗೆ ನಮ್ಮ ಸಮಾಜ ಮತ್ತು ವ್ಯವಸ್ಥೆಯು ಎಷ್ಟು ಸಡಿಲ ನಿಲುವಿನಲ್ಲಿ ನಿಂತಿದೆ ಎಂಬುದಕ್ಕೆ ಪ್ರತೀಕವಾಗಿದೆ. ಇದಲ್ಲದೇ ಮುಂಬೈಯಿಯಲ್ಲಿ ಐಶಾ ಬಾಡಿಗೆ ಮನೆ ಹುಡುಕಾಟದಲ್ಲಿ ತೊಡಗಿದಾಗ ಉದ್ಭವಿಸುವ ಪರದಾಟಗಳು ದೊಡ್ಡ ಶಹರಿನ ಬಾಡಿಗೆ ನಿವಾಸ ಸಮಸ್ಯೆಗಳ ಬಗ್ಗೆ ಬೆಳಕನ್ನು ಚೆಲ್ಲಿದೆ.

ಕತೆಯ ನಾಲ್ಕನೇ ಬೇಗಂ ಲಿಲ್ಲಿ, ಇದು ಅವಳ ಅಡ್ಡ ಹೆಸರು. ಲಿಲ್ಲಿಯ ಮೂಲ ಹೆಸರು ಲಕ್ಷ್ಮಿ. ಅವಳು ವೇಶ್ಯಾವಾಟಿಕೆಯಲ್ಲಿ ತೊಡಗಿದ್ದು ಕತೆಯ ಒಂದು ತಿರುವಿನಿಂದ ರಾಣಿಯ ಸಂಪರ್ಕ ಒದಗಿ ಅವಳ ಬ್ಯಾಂಕಿನಿಂದ ಸಾಲ ಪಡೆದು ವೇಶ್ಯಾವೃತ್ತಿಯನ್ನು ಬಿಟ್ಟು ಹೊರಬಂದು ಒಂದು ಮೆಟಲ್ ಫ್ಯಾಕ್ಟರಿ ತೆರೆಯುವ ಸುವರ್ಣ ಅವಕಾಶ ತೆರೆದುಕೊಳ್ಳುತ್ತದೆ. ಸಾಲ ಮಂಜೂರಾದರೂ ಸ್ಥಳೀಯ ರಾಜಕೀಯ, ಮಾಫಿಯಾ ದಾದಾಗಳ ಕಾಟದಿಂದ ಸಾಕಷ್ಟು ಅಡಚಣೆಗಳನ್ನು ಅವಳು ಎದುರಿಸಬೇಕಾಗುತ್ತದೆ. ಲಿಲ್ಲಿಗೆ ತಾನು ಲಕ್ಷ್ಮಿಯಾಗಿ ಮತ್ತೆ ತಲೆಯೆತ್ತಿ ಸ್ವಾಭಾಮಾನದಿಂದ ಮತ್ತು ಗೌರವದಿಂದ ಬದುಕುವ ಹಂಬಲ. ಆದರೆ ಸಮಾಜ ಅವಳ ಪ್ರಯತ್ನಕ್ಕೆ ಅಡ್ಡ ಬಂದು ಅವಳು ಸವಾಲುಗಳನ್ನು ಎದುರಿಸಬೇಕಾಗುತ್ತದೆ. ಅವಳು ವೇಶ್ಯಾವೃತ್ತಿಯ ಜಾಲದಿಂದ ಹೊರಬರಲು ಹೆಣಗುತ್ತಾಳೆ. ಲಿಲ್ಲಿಗೆ ಒಬ್ಬ ಮಗನನ್ನು ಕೊಟ್ಟ ಅವಳ ಹಿಂದಿನ ಪ್ರಿಯಕರ ಮತ್ತೆ ಕತೆಯಲ್ಲಿ ಕಾಣಿಸಿಕೊಂಡು ಲಿಲ್ಲಿಯನ್ನು ದುಬೈಗೆ ಕರೆದುಕೊಂಡು ಹೋಗುವ ಸುಳ್ಳು ಆಶ್ವಾಸನೆ ನೀಡಿ, ಆಸೆಯನ್ನು ತೋರಿಸಿ ಮಧ್ಯದಲ್ಲೇ ಅವಳನ್ನು, ಮಗನನ್ನು ಕೈ ಬಿಡುತ್ತಾನೆ.

ಕತೆಯ ಐದನೇ ಬೇಗಂ ರಾಣಿಯ ಮಲಮಗಳಾದ ಶೇ. ಇವಳು ಹದಿಮೂರು ವರ್ಷದ ಬಾಲಕಿ. ಅವಳ ಶಾಲೆಯಲ್ಲಿ ಸಹಪಾಠಿಗಳಿಗೆ ಹೋಲಿಸಿದರೆ ಶೇ ದೈಹಿಕವಾಗಿ ಎಳಸು ಆದರೆ ಮಾನಸಿಕವಾಗಿ ಬಹಳ ಚುರುಕು. ಅವಳಿಗೆ ಬ್ರಾ ಹಾಕಿಕೊಂಡು, ಋತುಮತಿಯಾಗಿ, ಇತರ ಬೆಳೆದ ಹುಡುಗಿಯರಂತಾಗಬೇಕೆಂಬ ಹಂಬಲ. ಬಾಲ್ಯಾವಸ್ಥೆಯಿಂದ ಹೆಣ್ಣಾಗಿ ಮಾರ್ಪಾಡಾಗುವ ತೀವ್ರ ಆಸೆ ಮತ್ತು ಅವಳ ಮುಗ್ಧತೆಯನ್ನು ತೋರುವ ಸನ್ನಿವೇಶಗಳು ಲಘು ಹಾಸ್ಯದಿಂದ ತುಂಬಿದೆ. ಎಳೆಯರಿಗೆ ಬೇಗ ಬೆಳೆದು ದೊಡ್ಡವರಾಗುವ ಆಸೆ ಹಾಗೆ ವಯಸ್ಸಾದವರಿಗೆ ಕಿರಿಯರಾಗುವ ಆಸೆ! ಪ್ರಕೃತಿಯ ನಿಯಮವನ್ನು ತ್ವರಿತಗೊಳ್ಳಿಸುವ ಅಥವಾ ಸ್ಥಬ್ದ ಗೊಳಿಸುವ ಪ್ರಯತ್ನ ನಾವು ನಾಗರೀಕತೆಯಿಂದ ಗಳಿಸಿಕೊಂಡ ವಿಚಿತ್ರ ಆಧುನಿಕ ಮನೋಪ್ರವೃತ್ತಿ ಇರಬಹುದು. ಅದು ಬದುಕೆಂಬ ಸ್ಪರ್ಧೆಯಲ್ಲಿ ಆತ್ಮವಿಶ್ವಾಸವನ್ನು ಹೆಚ್ಚಿಸುವ ಒಂದು ಅಗತ್ಯವೂ ಆಗಿರಬಹುದು. ಐಶಾಳಿಗೆ ಲೈಂಗಿಕ ಐಡೆಂಟಿಟಿ ಕ್ರೈಸಿಸ್ ಆಗಿದ್ದರೆ ಶೇಗೆ ತನ್ನ ವ್ಯಕ್ತಿತ್ವದ ಶಾರೀರಿಕ ಐಡೆಂಟಿಟಿ ಕ್ರೈಸಿಸ್ ಎನ್ನಬಹುದು. ಅಂದ ಹಾಗೆ ಶೇ ಇಡೀ ಕತೆಯ ನಿರೂಪಕಿ. ತನ್ನ ಮುಗ್ಧ ಮನಸ್ಸಿನಿಂದ ಅವಳು ತನ್ನ ಸುತ್ತ ಪ್ರಪಂಚದ ಆಗು-ಹೋಗುಗಳನ್ನು, ಜನರ ಭಾವನೆಗಳನ್ನು ಅಳೆಯಲು ಪ್ರಯತ್ನಿಸುತ್ತಾಳೆ. ಶೇ ಮತ್ತು ರಾಣಿ ಈ ಇಬ್ಬರ “ಮಲತಾಯಿ-ಮಗಳು” ಸಂಬಂಧದ ಹಲವಾರು ಘರ್ಷಣೆಗಳು ಭಾವುಕ ಪ್ರಸಂಗಗಳಾಗದೆ ಬಹಳ ಸಹಜವಾಗಿ ಮೂಡಿಬಂದಿದೆ.

ಸ್ತ್ರೀ ಪ್ರಧಾನವಾದ ಕತೆಯಲ್ಲಿ ಗಂಡಸರ ಪಾತ್ರಬೆಳೆಸುವ ಗೋಜಿಗೆ ನಿರ್ದೇಶಕರು ಹೋಗಿಲ್ಲ. ಹಾಗೆ ನೋಡಿದರೆ ಅದರ ಅವಶ್ಯಕತೆಯೂ ಇಲ್ಲ. ಧಾರಾವಾಹಿಯಲ್ಲಿ ಹಲವಾರು ಚುಂಬನ ಮತ್ತು ಸೆಕ್ಸ್ ದೃಶ್ಯಗಳು ಯೆಥೇಚ್ಛವಾಗಿದೆ. ಅವುಗಳು ಅಶ್ಲೀಲವೆನಿಸುವುದಿಲ್ಲ ಮತ್ತು ಕತೆಗೆ ಪೂರಕವಾಗಿ ಬಳಸಲಾಗಿದೆ. ಕೌಟುಂಬಿಕವಾಗಿ ಮನೆಮಂದಿಯೆಲ್ಲಾ ಕೂತು ನೋಡಲು ಸೂಕ್ತವಾಗಿಲ್ಲ ಎನ್ನಬಹುದು. ಈ ಧಾರಾವಾಹಿಗೆ ‘ವಯಸ್ಕರಿಗೆ ಮಾತ್ರ’ ಎಂಬ ೧೮ರ ಸರ್ಟಿಫಿಕೇಟ್ ದೊರೆತಿದೆ. ಸಮಾಜದಲ್ಲಿ ಹೆಣ್ಣು ಮಕ್ಕಳು ಆದರ್ಶಪ್ರಾಯರಾಗಿ ಭಾರತೀಯತೆಯ ಸಾಂಸ್ಕೃತಿಕ ಪ್ರತಿನಿಧಿಗಳಾಗಿರಬೇಕು ಎಂಬ ನಿರೀಕ್ಷೆ ಉಳ್ಳ ಸಂಪ್ರದಾಯಸ್ಥರಿಗೆ ‘ಬಾಂಬೆ ಬೇಗಂ’ ಸ್ವಲ್ಪಮಟ್ಟಿಗೆ ಸಾಂಸ್ಕೃತಿಕ ಆಘಾತವನ್ನು (ಕಲ್ಚರಲ್ ಶಾಕ್) ನೀಡಬಹುದು. ಧಾರಾವಾಹಿಯ ರಾಣಿ ಮತ್ತು ಇತರ ನಾರಿಯರು ಯಾರೂ ಆದರ್ಶ ಪ್ರಾಯರಲ್ಲ. ಎಲ್ಲರಿಗೂ ತಮ್ಮ ತಮ್ಮ ಅಪೂರ್ಣತೆ ಮತ್ತು ಕುಂದು ಕೊರತೆಗಳಿರುತ್ತವೆ. ಮಹಿಳೆಯರ ಬದುಕಿನಲ್ಲಿ ಖಾಸಗಿ ಮತ್ತು ಬಹಿರಂಗ ಎನ್ನುವ ಗಡಿ ರೇಖೆಗಳಿಲ್ಲ. ಅವರ ವ್ಯಕ್ತಿತ್ವದ ಖಾಸಗಿ ಎನ್ನುವ ವಿಚಾರ ಬಹಿರಂಗವಾಗಿ, ಬಹಿರಂಗ ಎನ್ನುವ ವಿಚಾರ ಖಾಸಗಿಯಾಗಿ ಪ್ರಸ್ತುತವಾಗುತ್ತದೆ. ಈ ಮಹಿಳೆಯರ ವ್ಯಕ್ತಿತ್ವವನ್ನು ಪರಿಶೀಲಿಸಿದಾಗ ಸರಿ ತಪ್ಪುಗಳು ಅಥವಾ ಕಪ್ಪು ಬಿಳುಪು ಎಂಬ ಪರಿಕಲ್ಪನೆಗಳ ನಡುವಿನ ಸೀಮಾರೇಖೆ ಮಬ್ಬಾಗುತ್ತದೆ. ಸರಿ- ತಪ್ಪುಗಳನ್ನು ಪರಿಸ್ಥಿಯ ಹಿನ್ನೆಲೆಯು ನಿರ್ಧರಿಸುತ್ತದೆ.

ಪೂಜಾ ಭಟ್ ಮತ್ತು ಅಲಂಕೃತ ಅವರು ಹಿಂದೆ ನಿರ್ದೇಶಿಸಿದ ಚಿತ್ರಗಳು ವಿವಾದಗಳಿಗೆ ಒಳಪಟ್ಟಿವೆ. ಈ ನಿಟ್ಟಿನಲ್ಲಿ ‘ಬಾಂಬೆ ಬೇಗಂ’ ಹೊರತೇನಲ್ಲ. ಮಕ್ಕಳ ಹಕ್ಕುಗಳನ್ನು ಕಾಯ್ದಿರಿಸುವ ರಾಷ್ಟೀಯ ಭಾರತ ಸಂಸ್ಥೆ ‘ಬಾಂಬೆ ಬೇಗಂ’ ಪ್ರದರ್ಶನವನ್ನು ನಿಲ್ಲಿಸುವಂತೆ ನೆಟ್ ಫ್ಲಿಕ್ಸ್ ಕಂಪನಿಗೆ ಆದೇಶ ನೀಡಿದೆ. ಇದಕ್ಕೆ ಕಾರಣ ಧಾರಾವಾಹಿಯಲ್ಲಿನ ಶೇ, ತನ್ನ ಸಹಪಾಠಿ ಇಮ್ರಾನನ್ನು ಪ್ರೀತಿಸಿ ಅವನು ತಿರಸ್ಕರಿಸಿದಾಗ ಉಂಟಾಗುವ ಮಾನಸಿಕ ಆಘಾತವನ್ನು ಹತ್ತಿಕ್ಕಲು ಅಂದಿನ ಪಾರ್ಟಿಯಲ್ಲಿ ಇತರರೊಡನೆ ಮದ್ಯಪಾನ ಮಾಡಿ ಕೊಕೇನ್ ಮಾದಕವಸ್ತುಗಳನ್ನು ಉಪಯೋಗಿಸಿ ಮತ್ತಳಾಗಿ ಆಸ್ಪತ್ರೆಸೇರಿ ಪ್ರಾಣಾಪಾಯದಿಂದ ಬಚಾವಾಗುತ್ತಾಳೆ. ಅವಳ ಶಾಲೆಯಲ್ಲಿ ಬೆಳೆದ ಹೆಣ್ಣು ಮಕ್ಕಳು ತಮ್ಮ ಎದೆಯ ಉಬ್ಬುಗಳ ಚಿತ್ರವನ್ನು (ನಗ್ನವಲ್ಲದ) ತಮ್ಮ ಪ್ರೀತಿಯ ಹುಡುಗರೊಂದಿಗೆ ಮೊಬೈಲಿನಲ್ಲಿ ಹಂಚಿಕೊಳ್ಳುವ ದೃಶ್ಯವಿದೆ. ಈ ರೀತಿಯ ಸನ್ನಿವೇಶಗಳು ಅಸಹಜ ಮತ್ತು ನಮ್ಮ ಮಕ್ಕಳ ಮೇಲೆ ದುಷ್ಪರಿಣಾಮಗಳನ್ನು ಉಂಟುಮಾಡಬಹುದು ಎಂಬ ಕಾರಣಕ್ಕಾಗಿ ಈ ಧಾರಾವಾಹಿಯನ್ನು ಬ್ಯಾನ್ ಮಾಡಲು ಕರೆ ನೀಡಲಾಗಿದೆ. ನೆಟ್ ಫ್ಲಿಕ್ಸ್ ನಿರ್ದಿಷ್ಟವಾದ ಉತ್ತರ ಕೊಟ್ಟಿಲ್ಲವಾದರೂ ಧಾರಾವಾಹಿಗೆ ೧೮ ವಯಸ್ಸು ಮಿತಿ ನೀಡಿರುವುದರಿಂದ ಮಕ್ಕಳು ಈ ಧಾರಾವಾಹಿಯನ್ನು ನೋಡುವ ಪ್ರಮೇಯವಿಲ್ಲವೆಂದು ಹೇಳಿಕೆ ನೀಡಿದೆ. ನಮ್ಮ ಭಾರತದಲ್ಲಿ ಮಕ್ಕಳಿಗೆ ಈ ಮೊಬೈಲ್ ಯುಗದಲ್ಲಿ, ಏಡ್ಸ್ ಮತ್ತು ಇತರ ಗುಪ್ತ ರೋಗಗಳ ಹಿನ್ನೆಲೆಯಲ್ಲಿ, ಸಲಿಂಗಕಾಮವನ್ನು ಒಪ್ಪಿಕೊಳ್ಳುತ್ತಿರುವ ಕಾಲಘಟ್ಟದಲ್ಲಿ ಲೈಂಗಿಕ ಶಿಕ್ಷಣದ ಅಗತ್ಯವಿದೆ. ಪಾಶ್ಚಿಮಾತ್ಯ ರಾಷ್ಟ್ರಗಳಿಗೆ ಹೋಲಿಸಿದರೆ ನಮ್ಮ ಶಿಕ್ಷಣ ನೀತಿಯಲ್ಲಿ ಈ ವಿಚಾರದ ಬಗ್ಗೆ ಮಡಿವಂತಿಕೆ ಇದೆ. ಪಾಶ್ಚಿಮಾತ್ಯ ದೇಶಗಳಲ್ಲಿರುವ ಲೈಂಗಿಕ ಸ್ವಚ್ಛಂದ ಈಗ ನಮ್ಮಲ್ಲಿ ಇಲ್ಲವಾದರೂ ಪಾಶ್ಚಿಮಾತ್ಯ ಸಂಸ್ಕೃತಿಯನ್ನು ಅನುಸರಿಸುತ್ತಿರುವ ಹಿನ್ನೆಲೆಯಲ್ಲಿ ನಮ್ಮ ಯುವ ಪೀಳಿಗೆಗೆ ಈ ಶಿಕ್ಷಣ ಪ್ರಸ್ತುತವಾಗಬಹುದು.

ಒಟ್ಟಾರೆ ‘ಬಾಂಬೆ ಬೇಗಂ’ ಹಲವಾರು ಸಾಮಾಜಿಕ ವಿಷಯಗಳ ಬಗ್ಗೆ ಚಿಂತನೆ ಮಾಡಲು ಅನುವು ಮಾಡಿಕೊಡುತ್ತದೆ. ಬದಲಾಗುತ್ತಿರುವ ಭಾರತೀಯ ಸಾಮಾಜಿಕ ಮೌಲ್ಯಗಳನ್ನು, ಬದುಕಿನ ರೀತಿಯನ್ನು, ಹಿಂದೆ ನಿಷಿದ್ಧವೆಂದು ಮಾತನಾಡದೆ ಹೋದ ಹಲವಾರು ವಿಚಾರಗಳನ್ನು ಬಹಿರಂಗಕ್ಕೆ ತಂದು ವಿಮರ್ಶೆಗೆ ಒಳಪಡಿಸಿದೆ.

ಡಾ ಜಿ. ಎಸ್. ಶಿವಪ್ರಸಾದ್

“ಅವನೇ ಶ್ರೀಮನ್ನಾರಾಯಣ” ವಿಮರ್ಶೆ  ಹಾಗೂ  ಕವಿತೆ  ” ಅನಂತ ಸತ್ಯ”

ಎಲ್ಲರಿಗೂ ಮಕರ ಸಂಕ್ರಾಂತಿ ಹಬ್ಬದ  ಶುಭಾಷಯಗಳು. ಮಧ್ಯ ಕರ್ನಾಟಕದ ದಾವಣಗೆರೆ ಜಿಲ್ಲೆಯಲ್ಲಿ ಸಂಕ್ರಾಂತಿ ಹಬ್ಬದಂದು ಹೊಳೆದಂಡೆ ಊಟದ ಸಂಭ್ರಮವನ್ನು ನಾವು ಎಲ್ಲೆಲ್ಲೂ ಕಾಣಬಹುದು. ಅದರಲ್ಲೂ ನನ್ನ ಹುಟ್ಟೂರಾದ ಹರಿಹರದ ತುಂಗಭಾದ್ರಾ  ನದಿಯ ದಂಡೆಯಲ್ಲಂತೂ  ಸಂಕ್ರಾಂತಿಯ ದಿನ ಜನಜಾತ್ರೆ. ಕಡಕ್ ಜೋಳದ ರೊಟ್ಟಿ, ಬುತ್ತಿ, ಮತ್ತು ಸುಮಾರು ಹತ್ತರಿಂದ ಹದಿನೈದು ತರಕಾರಿ ಪಲ್ಯಗಳನ್ನು ನೀವು ಎಲ್ಲರ ತಟ್ಟೆಯಲ್ಲೂ ನೋಡಬಹುದು. ಗಮ್ಮತ್ತಿನ ಊಟ ಮಾಡಿ, ನದಿಯಲ್ಲಿ ಈಜಿ, ಕರಗಿಸಿಕೊಂಡು ಮತ್ತೊಂದು ಸುತ್ತು ಬ್ಯಾಟಿಂಗ್ ಮಾಡಲು ಸಜ್ಜಾಗುತ್ತಿದ್ದ ದಿನಗಳವು. ಆ ದಿನಗಳನ್ನು  ಸವಿಸ್ತಾರವಾಗಿ  ಮತ್ತೊಂದು ಕಂತಿನಲ್ಲಿ ನೆನೆಸಿಕೊಳ್ಳೋಣ.

ಈ ವಾರ ಸಂಕ್ರಾಂತಿಯ ಪ್ರಯುಕ್ತ ನಾವು ನಿಮಗೆ ತರಾವರಿಯಾಗಿ  ಸಿನೆಮಾ ವಿಮರ್ಶೆ, ಹಾಡು, ಅನುವಾದ, ಕವಿತೆ ಎಲ್ಲವನ್ನೂ  ಒಂದೇ ಕಂತಿನಲ್ಲಿ ಪ್ರಕಟಿಸುವ ಪ್ರಯತ್ನವನ್ನು ಮಾಡಿದ್ದೇವೆ. ಕೇಶವ ಕುಲ್ಕರ್ಣಿ ರವರು ಮತ್ತು ರಾಮಶರಣ್ ಲಕ್ಷ್ಮೀನಾರಾಯಣ್ ರವರು ಬರೆದಿರುವ ‘ಅವನೇ ಶ್ರೀಮನ್ನಾರಾಯಣ’ ಚಿತ್ರ ವಿಮರ್ಶೆ, ಮುರಳಿ ಹತ್ವಾರ್ ರವರು ಅನುವಾದಿಸಿರುವ ‘ಅನಂತ ಸತ್ಯ’ ಕವಿತೆ ಮತ್ತು ಈ ಕವಿತೆಗೆ ಅಮಿತಾ ರವಿಕಿರಣ್ ರವರ ರಾಗ ಸಂಯೋಜನೆ, ಇವೆಲ್ಲವನ್ನೂ ನಿಮ್ಮ ತಟ್ಟೆಗೆ ಬಡಿಸಲಾಗಿದೆ. ಈ ಪ್ರಯತ್ನವು ನಿಮಗೆ ಸಂಕ್ರಾಂತಿ ಹಬ್ಬದ  ಊಟದಂತೆಯೇ ಖುಷಿತರುತ್ತದೆ ಎಂದು ನಂಬಿದ್ದೇನೆ. – ಶ್ರೀನಿವಾಸ ಮಹೇಂದ್ರಕರ್  

ಬುದ್ಧಿವಂತಿಕೆಗೆ ಮಿತಿ ಇದೆ, ಆದರೆ ದಡ್ಡತನಕ್ಕೆ ಮಿತಿಯೇ ಇಲ್ಲವೇ, ಶ್ರೀಮನ್ನಾರಾಯಣ!

ಕೇಶವ ಕುಲ್ಕರ್ಣಿ

‘Two things are infinite: the universe and human stupidity; and I am not sure about the Universe,’ ಎಂದು ಐನ್‍ಸ್ಟೀನ್ ಹೇಳಿದ್ದಾನೆ. ಮನುಷ್ಯನಲ್ಲಿ ಬುದ್ಧಿವಂತಿಕೆಯ ಜೊತೆ ಈ ಸ್ಟುಪಿಡಿಟಿ ಇಲ್ಲದಿದ್ದರೆ ಅಂಥಾ ಭಾರಿ ಗಾತ್ರದ ವಿಮಾನವನ್ನು ಹಗುರವಾದ ಗಾಳಿಯಲ್ಲಿ ಹಾರಿಸುವ ಸಾಹಸ ಮಾಡುತ್ತಿದ್ದನೇ, ಅಗಾಧ ಸಮುದ್ರದಲ್ಲಿ ತಿಮಿಂಗಿಲಿಗಿಂತಲೂ ದೊಡ್ಡದಾದ ಹಡುಗಿನಲ್ಲಿ ಇನ್ನೊಂದು ಖಂಡಕ್ಕೆ ದಾಟುವ ಧೈರ್ಯ ಮಾಡುತ್ತಿದ್ದನೇ? ಬುದ್ಧಿವಂತ ಜನರ ನಡುವೆ ಇಂಥಹ ಕೆಲವು ಸ್ಟುಪಿಡ್ ಜನರಿರುವುದರಿಂದಲೇ,  ಅವರ ಸ್ಟುಪಿಡಿಟಿಗೆ ಯಾವ ಮೇರೆ ಇಲ್ಲದಿರುವುದರಿಂದಲೇ, ನಾವಿವತ್ತು ಸ್ಮಾರ್ಟ್ ಫೋನುಗಳನ್ನು ಕೈಯಲ್ಲಿ ಹಿಡಿದುಕೊಂಡು ಪ್ರಪಂಚವನ್ನೇ ಸ್ಕ್ರೋಲ್ ಮಾಡುತ್ತಿದ್ದೇವೆ, ಹಾಲಿಡೇಗಾಗಿ ಬಾಹ್ಯಾಕಾಶಕ್ಕೆ ಹೋಗಲು ವೇಟಿಂಗ್ ಲಿಸ್ಟಿನಲ್ಲಿ ಸಾಲು ಹಚ್ಚಿದ್ದೇವೆ.

ಹದಿನೆಂಟನೇ ಶತಮಾನದಿಂದ ಇಪ್ಪತ್ತೊಂದನೇ ಶತಮಾನವನ್ನು ಒಂದೇ ಕಾಲದಲ್ಲಿ ತಂದಿಟ್ಟರೆ ಹೇಗಿಬಹುದು? ಬಿಜಾಪುರದಂಥ ಬರಡು ನೆಲದಲ್ಲಿ ಕೌಬಾಯ್‍ಗಳಿದ್ದರೆ ಏನಾಗಬಹುದು? ಪ್ರಜಾಪ್ರಭುತ್ವ ಇರುವ ದೇಶದಲ್ಲಿ ಪಾಳಯಗಾರರ ರಾಜ್ಯ ನಡೆಯುತ್ತಿದ್ದರೆ ಜನರ ಗತಿ  ಏನಾಗಬಹುದು? ಇಂಥ ಸ್ಟುಪಿಡ್ ಪ್ರಶ್ನೆಗಳು ಬುದ್ಧಿವಂತರಿಗೆ ಬರಲು ಸಾಧ್ಯವೇ ಇಲ್ಲ, ಮಿತಿಯಿಲ್ಲದ ಸ್ಟುಪಿಡಿಟಿಯಿಂದ ಮಾತ್ರ ಸಾಧ್ಯ. ಇಂಥ ವಾತಾವರಣವನ್ನು ಸೃಷ್ಟಿಸಿಕೊಂಡು, ಪೌರಾಣಿಕ-ಇಂಡೀ-ಬಾಲಿವುಡ್-ಹಾಲಿವುಡ್‍ಗಳನ್ನು ಸೇರಿಸಿ, ಮನರಂಜನೆಯನ್ನೇ ಧ್ಯೇಯವಾಗಿಟ್ಟುಕೊಂಡು ಸಿನೆಮಾ ಮಾಡಿದರೆ ಹೇಗಿರಬಹುದು? ಇದಕ್ಕೆಲ್ಲ ಉತ್ತರ, ‘ಅವನೇ ಶ್ರೀಮನ್ನಾರಾಯಣ‘.

ಅಕಿರಾ ಕುರಸೋವಾ ಅವರ ‘ರೋಶೋಮಾನ್‘ದಿಂದ ಪ್ರೇರಿತರಾಗಿ, ತಮ್ಮ ಮೊದಲ ‘ಉಳಿದವರು ಕಂಡಂತೆ’ ಸಿನೆಮಾದಿಂದಲೇ ಅದಮ್ಯ ಪ್ರತಿಭೆಯನ್ನು ತೋರಿಸಿದ ರಕ್ಷಿತ್, ‘ಲೂಸಿಯಾ’ದ ಪವನ್ ಕುಮಾರ್ ತರಹ ಪ್ರಾಯೋಗಿಕ ಚಪಲತೆಯ ನಿರ್ದೇಶಕನಾಗಿ ಉಳಿದುಬಿಡಲಿಲ್ಲ. ಸಿನೆಮಾಗಳಲ್ಲಿ ನಟಿಸಿದರು. ತಮ್ಮ ಮೊದಲ ಸಿನೆಮಾದ ಪ್ರತಿಭಾವಂತ ಜನರನ್ನು ಸೇರಿಸಿ ಮುಖ್ಯವಾಹಿನಿ ಸಿನೆಮಾಕ್ಕೇ ಕೈಹಾಕಿದರು. ’ಉಳಿದವರು ಕಂಡಂತೆ’ ಬಾಕ್ಸ್ ಆಫೀಸಿನಲ್ಲಿ ಮಖಾಡೆ ಮಲಗಿದರೆ, ’ಕಿರಿಕ್ ಪಾರ್ಟಿ’ ಮನೆ ಮಾತಾಯಿತು. ’ಕಿರಿಕ್ ಪಾರ್ಟಿ’ ಮುಖ್ಯವಾಹಿನಿಯ ಸಿನೆಮಾ ಆದರೂ ಹೊಸತನವಿತ್ತು, ಹೊಸ ಸಂಗೀತವಿತ್ತು, ಹರೆಯದ ಪ್ರೇಮದ ಕತೆಯಾದರೂ, ಹಿಂದೆ ಬಂದ ಮುಖ್ಯವಾಹಿನಿಯ ಸಿನೆಮಾಗಳಿಂದ ಬೇರೆ ತರಹದ ಸಿನೆಮಾ ಮಾಡಿ ಗೆದ್ದಿತ್ತು. ’ಕಿರಿಕ್ ಪಾರ್ಟಿ’ ಮಾಡಿ ಮೂರು ವರ್ಷದ ನಂತರ, ದೊಡ್ಡ ಬಜೆಟ್ಟಿನಲ್ಲಿ ’ಶ್ರೀಮನ್ನಾರಾಯಣ’ ಬಿಡುಗಡೆ ಮಾಡಿದಾಗ ಕುತೂಹಲ ಮೂಡಿದ್ದು ಸಹಜವೇ.

ಈ ಸಿನೆಮಾವನ್ನು ಕಿಡಿಗೇಡಿ ಪೋಲಿಸ್ ಶ್ರೀಮನ್ನಾರಾಯಣನ ಆವಾಂತರಗಳು ಎಂದಾದರೂ ನೋಡಬಹುದು. ಫಜೀತಿಯಲ್ಲಿ ಸಿಕ್ಕಿಬಿದ್ದು ಇನ್ನೇನು ಕತೆ ಮುಗಿಯಿತು ಎನ್ನುವಾಗ ಅದೇನೋ ಉಪಾಯ ಮಾಡಿ ಪಾರಾಗುವ ಶ್ರೀಮನ್ನಾರಾಯಣನ ಸಾಹಸಗಳು ಎಂದಾದರೂ ನೋಡಬಹುದು, ಸಾಮಾನ್ಯ ಮನುಷ್ಯನೊಬ್ಬ ಹೇಗೆ ’ಶ್ರೀಮನ್ನಾರಾಯಣ’ನಾದ ಎಂತಲೂ ನೋಡಬಹುದು.

ಒಂದಾನೊಂದು ಕಾಲ್ಪನಿಕ ಕಾಲದಲ್ಲಿ ’ಅಮರಾವತಿ’ ಎಂಬ ಕಾಲ್ಪನಿಕ ಊರು… ಎಂದು ಶುರುವಾಗುವ ಸಿನೆಮಾ ಚಂದಾಮಾಮಾ ಕತೆಯಂತೆಯೇ ಇದೆ. ಲೂಟಿ ಮಾಡಿದ ನಿಧಿ ಹುಡುಕುವ ಅದೇ ಪುರಾತನ ಕತೆಯನ್ನು ಹೇಳಿರುವ ರೀತಿ ಮಾತ್ರ ಹೊಸದು. ಹೀಗೂ ಸಿನೆಮಾ ಮಾಡಲು ಸಾಧ್ಯವೇ ಎಂದು ಸಿನೆಮಾ ಮಾಡುವ ಮಂದಿಯೂ ಆಶ್ಚರ್ಯ ಪಡುವಂತೆ ಸಿನೆಮಾ ಮಾಡಿದ್ದಾರೆ. ಹಲವಾರು ಉಪಕತೆಗಳನ್ನು ಸೇರಿಸುತ್ತ, ಕೂರ್ಮಾವತಾರದ ಪುರಾಣ ಕತೆಯನ್ನೂ ತೋರಿಸುತ್ತ ನಿಜ ಮನುಷ್ಯರ ಫ್ಯಾಂಟಸಿ ಲೋಕವನ್ನು ಸೃಷ್ಟಿ ಮಾಡಿದ್ದಾರೆ. ಲಘುಹಾಸ್ಯವನ್ನು ಚಿತ್ರದುದ್ದಕ್ಕೂ ಲೀಲಾಜಾಲವಾಗಿ ತೋರಿಸಿದ್ದಾರೆ (ಎಲ್ಲಿಯೂ ಹಾಸ್ಯವನ್ನು ತುರುಕಿದಂತೆ ಅನಿಸುವುದೇ ಇಲ್ಲ) ಒಂದೇ ಸಿನೆಮಾದಲ್ಲಿ ಭಕ್ತ ಪ್ರಹ್ಲಾದ, Pirates of the Caribbean, No Country for Old Man, ಕೆಜಿಎಫ್‍ಗಳನ್ನು ಕಲಿಸಿ ಬಡಿಸಿದ್ದಾರೆ. ಕೆಲವರಿಗೆ ಅದು ರುಚಿರುಚಿಯಾದ ಚಿತ್ರಾನ್ನ, ಇನ್ನು ಕೆಲವರಿಗೆ ವಿಚಿತ್ರಾನ್ನ.

ಚಿತ್ರಾನ್ನವೇ ಆಗಲಿ, ವಿಚಿತ್ರಾನ್ನವೇ ಆಗಲಿ, ಅದು ಅವರವರ ಬಾಯ್‍ರುಚಿ. ಒಂದೇ ಸಿನೆಮಾದಲ್ಲಿ ನಾಟಕ, ಕೋಟೆ, ರಾಜವಂಶ, ರೇಬಾನ್ ಕನ್ನಡಕ, ಮೋಟರ್ ಬೈಕು (ರಾತ್ರಿ ಕಗ್ಗತ್ತಿನಲ್ಲಿ ಕಪ್ಪು ಕನ್ನಡಕ ಹಾಕಿಕೊಂಡು ಶ್ರೀಮನ್ನಾರಾಯಣನ ಸವಾರಿ ಹೋಗುತ್ತದೆ!), ಹಳ್ಳಿಯವರ ಬಾಯಿಂದ ಪುಂಖಾನುಪುಂಖವಾಗಿ ಇಂಗ್ಲೀಷ್ ಸೇರಿಸಿದ ಕನ್ನಡ ಮಾತುಗಳು ಜನರಿಗೆ ಗೊಂದಲವಾದರೆ ಅಚ್ಚರಿಯಿಲ್ಲ, ಅಬ್ಸರ್ಡ್ ಅನ್ನಿಸಿ ಸಿನೆಮಾ ಇಷ್ಟವಾಗದಿದ್ದರೆ ಅಚ್ಚರಿಯಿಲ್ಲ. ಸಿನೆಮಾದಲ್ಲೇ ಹೇಳಿರುವಂತೆ, ’ಬುದ್ಧಿವಂತಿಕೆಗೆ ಮಿತಿ ಇದೆ, ಆದರೆ ದಡ್ಡತನಕ್ಕೆ ಮಿತಿಯೇ ಇಲ್ಲ.’ 

ಏನೇ ಆದರೂ ಚಿತ್ರತಂಡದ ಪರಿಶ್ರಮ ಮಾತ್ರ ಶ್ಲಾಘನೀಯ. ಕಮರ್ಶಿಯಲ್ ಸಿನೆಮಾದ ಅಂಶಗಳನ್ನು ಮತ್ತೊಮ್ಮೆ ಧಿಕ್ಕರಿಸಿ ಪ್ರೇಮಕತೆಯಲ್ಲದ ಸಿನೆಮಾ ಮಾಡಿದ್ದಾರೆ, ಅದೂ ಕನ್ನಡದಲ್ಲಿ. ಕನ್ನಡ ಸಿನೆಮಾದಲ್ಲಿ ಒಂದು ಕಲ್ಟ್ ಕ್ಲಾಸಿಕ್ ಆಗುವ ಎಲ್ಲ ಲಕ್ಷಣಗಳೂ ಈ ಚಿತ್ರಕ್ಕಿದೆ. ಸಿನೆಮಾ ಗೆದ್ದಿದೆಯಂತೆ (ಹಾಗಾಗಿ ಕನ್ನಡಿಗರು ಕನ್ನಡ ಸಿನೆಮಾವನ್ನು ನೋಡುವುದಿಲ್ಲ ಎನ್ನುವ ಗಾದೆ ಸ್ವಲ್ಪವಾದರೂ ಸುಳ್ಳಾಗಿದೆ), ಹಾಗಾಗಿ ರಕ್ಶಿತ್ ಶೆಟ್ಟಿ ತಂಡದಿಂದ ಇನ್ನೂ ಚಂದದ ಹೊಸ ಪರಿಭಾಶೆಯ ಸಿನೆಮಾಗಳನ್ನು ನಿರೀಕ್ಷಿಸಬಹುದು. ಅವರೇ ಒಂದು ಸಂದರ್ಶನದಲ್ಲಿ ಹೇಳಿರುವಂತೆ ’ಪುಣ್ಯಕೋಟಿ’ಯ ಕತೆಯನ್ನು ಆಧರಿಸಿ ಸಿನೆಮಾ ಮಾಡುವ ಆಸೆಯಿದೆಯಂತೆ, ಚಿತ್ರಕಥೆಯೂ ಸಿದ್ಧವಾಗಿದೆಯಂತೆ. ’ಪುಣ್ಯಕೋಟಿ’ ಬೇಗ ಬರಲಿ ಎಂದು ಆಶಿಸುತ್ತೇನೆ.

ಮಜಾ ನೋಡೋ ಮನೋಭಾವ

ರಾಮಶರಣ್ ಲಕ್ಷ್ಮೀನಾರಾಯಣ್

‘ಟಗರು’, ‘ಹೆಬ್ಬುಲಿ’, ‘ಪೈಲವಾನ್’ ಹೀಗೆ ನಾಯಕನನ್ನೇ ವೈಭವೀಕರಿಸುವ ಚಿತ್ರಗಳನ್ನು ಹೊರತರುತ್ತಿರುವ ಕನ್ನಡ ಚಿತ್ರರಂಗದಿಂದ ಡಿಸೆಂಬರ್ ತಿಂಗಳಿನಲ್ಲಿ ಬಿಡುಗಡೆಯಾದ ಚಿತ್ರ ‘ಅವನೇ ಶ್ರೀಮನ್ನಾರಾಯಣ(ಅಶ್ರೀಮ/ASM). ಇದೂ ಅದೇ ಕೆಟಗರಿ ಅನ್ನಿಸಿದರೆ ಆಶ್ಚರ್ಯವಿಲ್ಲ; ನನಗನಿಸಿದ್ದು ಹಾಗೇ. ರಕ್ಷಿತ್ ಶೆಟ್ಟಿ ಹೆಸರು ನೋಡದಿದ್ದರೆ ಡೇಲಿ ಹಂಟ್ ನಲ್ಲಿ ಕಂಡ ಚಿತ್ರ ವಿಮರ್ಶೆಯನ್ನೂ ಓದುತ್ತಿರಲಿಲ್ಲ. “ಚೆನ್ನಾಗಿದೆ, ಮಾಮೂಲಿ ದರೋಡೆ ಕಥೆಗೊಂದು ಹೊಸ ರೂಪ ಕೊಟ್ಟಿದ್ದಾರೆ”, ಎಂದು ಬರೆದಿದ್ದರು ವಿಮರ್ಶಕ ಮಹಾಶಯರು. ಓಕೆ; ಎಂತೂಸನ್ನೋ, ಪ್ರೈಮಲ್ಲೋ ಬಂದಾಗ ನೋಡೋದು ಅಂಥ ಲಿಸ್ಟಿಗೆ ಹಾಕಿದ್ದೆ. ಆದರೆ ಎರಡೇ ವಾರದಲ್ಲಿ ಡಾರ್ಬಿಯಲ್ಲೇ ತೋರಿಸ್ತಾರೆ ಎಂದು ವಾಟ್ಸಾಪ್ ಸಂದೇಶ ಬಂತು, ಸಮಾನ ಮನಸಿಗರಾದ ಕೇಶವ್, ಲೋಕೇಶ್, ಹರೀಶ್ ಅವರ ಜೊತೆಯೂ ಸಿಕ್ಕಿದಾಗ ಅದೇ ಮಂಗಳ ಮುಹೂರ್ತವಾಯ್ತು.

ದಾರಿಯಲ್ಲಿ ದಂತಕಥೆ ಕಟ್ಟಿದವರು ಲೋಕೇಶ್. “೧೦೦ ಕೋಟಿ  ಹುಡಿ ಹಾರಿಸಿದ್ದರಂತೆ ಸಿನಿಮಾಕ್ಕೆ, ಎಷ್ಟು ಟ್ವಿಸ್ಟ್ ಇದೆ ಅಂದರೆ ಮೂರೂ ತಾಸಿನ ಚಿತ್ರ ಮುಗಿಯೋವರೆಗೂ ನನ್ನ ಗೆಳೆಯ ಮೂತ್ರ ಕಟ್ಟಿಕೊಂಡು ಕೂತಿದ್ನಂತೆ”, ಹೀಗೆ ಲೊಟ್ಟೆ-ಲೊಸಕು ಹೇಳಿ ಇನ್ನೂ ಕುತೂಹಲ ಜಾಸ್ತಿ ಮಾಡಿಬಿಟ್ರು. ಲೋಕೇಶ್ ಕುಂದಾಪುರದವ್ರು. ಶೆಟ್ರು ಅವರಿಗೆ ಪಕ್ಕದ ಮನೆಯವರಂತೆ. ಜೊತೆಗೇ ಕಳೆದೈದು ವರ್ಷಗಳಲ್ಲಿ ರಕ್ಷಿತ್-ರಿಷಬ್ ಜೋಡಿ ಕೆಲವು ಸದಭಿರುಚಿಯ ಚಿತ್ರಗಳನ್ನು ತಂದಿದ್ದಾರೆ. ದಕ್ಷಿಣ  ಕನ್ನಡ ಅಂದರೆ ತುಳು, “ಮಂಡೆ ಬಿಸಿ…. ಬಿಸಿ ಮಾರಾಯ” ಎಂಬ ಡೈಲಾಗ್ ಅನ್ನುವ ಹಳೇ ಚಿತ್ರಣವನ್ನು ಬದಿಗೆ ಸರಿಸುವಲ್ಲಿ ಸಫಲರಾಗಿದ್ದಾರೆ. ಹಾಗಾಗಿ ಇವರ ಬಗ್ಗೆ ಸ್ವಲ್ಪ ಉತ್ತರಕ್ಕಿದ್ದರೂ ಕರಾವಳಿಯ ನನ್ನಂತವನಿಗೂ ಏನೋ ಮಧುರ ಭಾವನೆ. ಇಂಥ ನಮ್ಮವರ ಚಿತ್ರದಿಂದ ಒಂದು ಪ್ರಮಾಣ ನಿರೀಕ್ಷಿಸಿದರೆ ಅದು ಪ್ರೇಕ್ಷಕರ ತಪ್ಪಲ್ಲ, ಅವರದ್ದೇ.

ಈ ಸಿನಿಮಾ ನೋಡಿದಾಗ, ಅಲ್ಲಿಂದ-ಇಲ್ಲಿಂದ ಕೆಲವು ಕಲ್ಪನೆಗಳನ್ನು ತಂದು, ಕಲಸಿ ಮಾಡಿದ ಗಿರ್ಮಿಟ್ ಅನ್ನಿಸಿದರೂ, ಇದಕ್ಕೆ ತನ್ನದೇ ಆದ ವಿಭಿನ್ನತೆ ಇದೆ. ಎಲ್ಲ ಗಾಡಿ ಅಂಗಡಿ ಗಿರ್ಮಿಟ್ ಒಂದೇ ಥರ ಇರೋದಿಲ್ಲ ನೋಡಿ. ಫೇಮಸ್ ಗಾಡಿ ಗಿರ್ಮಿಟ್ ಗೆ ಇರೋ ರುಚಿ ಸ್ವಲ್ಪ ಭಿನ್ನ, ಅದಕ್ಕೇ ಜನ ಆ ಅಂಗಡಿಗೆ ಮುತ್ತೋದು. ಅಶ್ರೀಮದ ನಟರು ಈ ತಂಡದ ಮಾಮೂಲಿ ಬಂಟರು. ದ.ಕ. ದ ನಾಟಕ ಹಿನ್ನಲೆಯ ನಟರು ಕುಟುಂಬದ ಜನರಂತೆ ಅನಿಸುತ್ತಾರೆ, ಹತ್ತಿರವೆನಿಸುತ್ತಾರೆ. ಪಕ್ಕದಲ್ಲಿದ್ದ ಲೋಕೇಶ್, “ಕೆ.ಜಿ.ಎಫ್ ನ ಹಾಗೆ ಕತ್ತಲು, ಎತ್ತಲೂ” ಎಂದು ಉದ್ಗರಿಸಿದರೂ; ಅದರಲ್ಲಿಲ್ಲದ ಸಂಭಾಷಣೆಯ ಹರಿವು-ತೀಕ್ಷ್ಣತೆ ಇಲ್ಲಿದೆ. ನವಿರು ಹಾಸ್ಯ, ವ್ಯಂಗ್ಯ ಹಾಗೂ ಸ್ವಾಭಾವಿಕತೆ ಮನಸ್ಸಿಗೆ ಮುದಕೊಡುತ್ತದೆ. ಅಲ್ಲಲ್ಲಿ ಆಗಾಗ ಬರುವ ಹಾಸ್ಯ ಪ್ರಸಂಗಗಳು ತುರುಕಿದಂತಿರದೇ ಸುಲಲಿತವಾಗಿ ಕಥಾ ಹಂದರದಲ್ಲಿ ಹಾಸು ಹೊಕ್ಕಾಗಿ ಹರಿಯುತ್ತವೆ.

ಚಿತ್ರಕ್ಕೆ ಮೂರು ತಾಸು ನೋಡಿಸಿಕೊಂಡು ಹೋಗುವ ತಾಕತ್ತಿದೆ. ರಾಮರಾಮನ ಕೊರಗು, ಜಯರಾಮನ ಕ್ರೌರ್ಯ, ತುಕಾರಾಮನ ಕುಹಕತನ, ಲಕ್ಷ್ಮಿಯ ಸೇಡು-ರೊಚ್ಚು. ರಕ್ಷಿತ್ ನ ರಜನಿಕಾಂತ್ ಪರಿಯ ರೇಬಾನ್ ಸ್ಟೈಲ್ಗಾರಿಕೆ ಹೀಗೆ ನವರಸಗಳು ಮೇಳೈಸಿದರೂ, ಹಾಸ್ಯ ರಸದ್ದೇ ಒಂದು ಕೈ ಮೇಲೆ.  ಸಂಗೀತ ಚಿತ್ರದ ವೀಕ್ ಲಿಂಕ್. ಹಣಹರಿಸಿ ಮೆಸಡೋನಿಯಾದ ಮೇಳದಿಂದ ಟೈಟಲ್ ಸಂಗೀತ ಸಂಯೋಜಿಸಿದರೂ ಹೊರಬಂದಾಗ ಒಂದೂ ಹಾಡೂ ನೆನಪಿರದಷ್ಟು ಮಕಾಡೆ ಮಲಗಿಬಿಟ್ಟಿದೆ.

ಅಚ್ಯುತಣ್ಣ ಸೈಡ್ ಕಿಕ್ ಆದ್ರೂ ಸ್ವಾಭಾವಿಕ ನಟನೆಯಿಂದ ಎಂದಿನಂತೆ ಸಿನಿಮಾದ ಆಸ್ತಿಯಾಗಿದ್ದಾರೆ. ಮೀಸೆಯಂಚಿನಿಂದ ಹುಸಿನಗುತ್ತ, ಚಿರೂಟಿನ ಹೊಗೆಯ ಪರದೆಯೆಡೆಯಿಂದ ತನ್ನದೇ ಶೈಲಿಯಲ್ಲಿ ಡೈಲಾಗ್ ಡೆಲಿವರಿ ಮಾಡುವ ರಕ್ಷಿತ್ ಮೋಡಿ ಮಾಡುತ್ತಾರೆ. ಚಿತ್ರಕ್ಕೆ ಬೆನ್ನೆಲುಬಾಗಿ  ತೀಕ್ಷ್ಣವಾದ ಸಂಭಾಷಣೆಗಳಿಂದ ಚತುರ ಸಂಭಾಷಣಾಕಾರ ನಿಲ್ಲುತ್ತಾರೆ. ಇಂಥಾ ಸಿನಿಮಾ ನೋಡಲು ಬೇಕಾದದ್ದು ಬುದ್ಧಿವಂತ ಮೆದುಳಲ್ಲ, ಮಜಾ ಮಾಡುವ ಮನೋಭಾವ.

ಸಿನಿಮಾ ನೋಡಿ ಹೊರ ಬಂದಾಗ ಮುಖದಲ್ಲಿದ್ದದ್ದು ಮುಗುಳ್ನಗೆ, ಕಲಸುಮೇಲೋಗರವಾಗದ ತಲೆ, ಒಳ್ಳೇ ಸಾಥ್ ಕೊಟ್ಟ ಗೆಳೆಯರು ಹಾಗೂ ಮನೆಗೆ ಹೋಗಿ ಮನದನ್ನೆಯೊಂದಿಗೆ ಕಥೆ ಹಂಚಿಕೊಳ್ಳಬೇಕೆಂಬ ತುಡಿತ.

ಕವಿತೆ – “ಅನಂತ ಸತ್ಯ”  

ಅನಂತ ಸತ್ಯ!

ನನ್ನ ಸತ್ಯದ ಬೂದಿ
ಅದೋ ಹರಡಿದೆ ರಾಡಿ
ನನ್ನ ಕಣ್ಕಟ್ಟಿನ ಸಾಕ್ಷಿ
ಮುರುಟಿ ಬಾಡಿದೆ ಕಾಲಡಿ

ಹಗಲುಗನಸಲಿ ಕಟ್ಟಿದ
ಪ್ರೀತಿ, ಬಾಳಿನ ಗೋಪುರ
ನಿಜದೆ ಕಾಣಲು ಬಯಸುತ
ದುಡಿದೆ ದಣಿಯದೆ ನಾನಾತರ

ಹೆಜ್ಜೆ-ಹೆಜ್ಜೆಗೂ ಸುರಿದ ಸೋಲು
ಉತ್ಸಾಹದ ನಡೆಯೂ ನೀರುಪಾಲು
ಕನಸ ನನಸಾಗಿಸುವ ಮಜಲು:
ಕತ್ತಲ ದಾರಿ ಹುಡುಕುವ ಸವಾಲು

ಮತ್ತೆ ನಡೆದೆ ಹುಡುಕುತ ಕನಸ ಬಟ್ಟಲು
ಹೊಸ ಮನೆಯನೊಂದು ಅದರಲಿ ಕಟ್ಟಲು
ನನಸಿನ ಹಗಲಲಿ ಆ ಮನೆ ಹೊಕ್ಕಲು
ಎಂಥಾ ವಿರೋಧಾಭಾಸ; ನನ್ನ ತಿಕ್ಕಲು!

ಇಂದು ನಡೆದ ಕಾಲಡಿ ಅದೇ ಬೂದಿ
ಬಿಸಿಯೇರಿದ ಮನ; ಉರಿವ ಕಣ್ಣೀರು
ಮೂಡಿಸಿ ಉಳಿಸಿದೆ ಪ್ರತಿ ಹಾದಿ
ಉರಿದು ಉದುರಿದ ಕನಸುಗಳ ಚೂರು

ಆ ಸುಟ್ಟ ಗಾಯದ ಕಲೆಗಳು
ಜಗದ ಜಾಣ್ಮೆಯ ಬಲೆಗಳು,
ಒತ್ತಿ ತುರುಕಿದ ನಿಯಮಗಳು,
ಸಮಾಜ ಸಾಕಿದ ಸಲಾಕೆಗಳು!

ಆ ಮಾಯೆಯ ಬಲೆಯಲಿ ನಾ ಬಿದ್ದೆ
ಭ್ರಮೆಯ ಬದುಕನು ನಾ ಹೊದ್ದೆ
ನನ್ನತನವ ನಂಬದಲೆ ನಾ ಒದ್ದೆ
ಆ ಸುಳ್ಳೇ ನನ್ನ ನಿಜವೆಂದುಕೊಂಡಿದ್ದೆ!

ಸತ್ತ ಕಣ್ಕಟ್ಟಿನ ಬೂದಿಯ ಬೆಳಕಲಿ
ಕಂಡೆ ನನ್ನೊಳ ಇಳೆಯ ನಿಜ ನೆಲೆ
ಮಿಂದೆ ಆ ಒಳ ಬೆಳಕಿನ ಪ್ರಭೆಯಲಿ.
ಯಾನವಿದು ಸತ್-ಚಿತ್ತದ ಅನಂತದಲೆ!

Grappling Truth

There lie the ashes
The ashes of my truth
The witness to my illusion
That crumbled to my feet
 
I built a mansion
With illusionary stories
Of life and love
And lugged on to make them come true 
 
I failed every time
At every attempt made with gusto
To turn illusion into reality
Every time going through the darkness 
 
It felt like giving another chance
Chance at building another illusion?
At turning that illusion into reality?
What a paradox!
 
Today I walk on those ashes
Shedding tears
And burning at the remnants
Printing my crumbled illusion 
 
Those are the marks
That came from the world
Injected into the veins by the culture
Nurtured by the society 
 
They separated me from myself
I believed the illusion was me
And overruled my essence
Deceiving myself from me
 
Through the illusion now burnt and lifeless
I see the space for my being
To look within and see my presence
A journey it is with grappling truth

ಕನ್ನಡ ಭಾವಾನುವಾದ : ಮುರಳಿ ಹತ್ವಾರ್

(English version was received as a whats app forward)

ಇಂಗ್ಲೀಷ್ ನಲ್ಲಿ ಬರೆದವರು : ಡಾ|| ಭಾರ್ಗವಿ

ಹಾಡಿರುವವರು : ಅಮಿತಾ ರವಿಕಿರಣ್