♥ ∗ಅನಿವಾಸಿಗೆ ಐದು ವರ್ಷದ ಹರ್ಷ ∗♥

(ಭಾರತೀಯರಿಗೆ ತಮ್ಮನ್ನು ಎರಡು ಶತಮಾನ ಆಳಿದ ಬ್ರಿಟಿಷರು ಠಕ್ಕ ನರಿಗಳಂತೇ ಕಂಡಿದ್ದರೆ ಅಚ್ಚರಿಯಿಲ್ಲ. ಆದರೆ 53 ವರ್ಷಗಳ ಕಾಲ ಇಂಗ್ಲೆಂಡಿನಲ್ಲೇ ನೆಲಸಿರುವ ಸುಶೀಲೇಂದ್ರ ರಾವ್ ರ ಗಾಳಕ್ಕೆ ಬ್ರಿಟಿಷರ ಹಲವು ’ನರಿ ’ಗಳು  ಪದಗಳ ’ಮೀನಿಂ’ಗುಗಳಾಗಿ ಸಿಕ್ಕಿ ಬಿದ್ದು ಪದ್ಯರೂಪದಲ್ಲಿ ಮಿದುಳಿನಲ್ಲಿ ಮಿಂಚು ಹರಿಸುತ್ತವೆ.

ಇದೇ ಬಗೆಯ  ಒಂದು ಪ್ರಯತ್ನ ವಾಟ್ಸಾಪ್ ನಲ್ಲಿ ಹರಿದಾಡಿದ ನೆನಪಿದೆ. ಆದರೆ, ಅದರ ಜೊತೆಗೆ  ಒಂದಷ್ಟು ಕಥೆ, ಮಜಾ ಮತ್ತು ಮೋಜನ್ನು ಹರಿಸಿರುವ ಕವಿಗಳು ತಮ್ಮ ಬದುಕಿನುದ್ದಕ್ಕೂ  ಉಳಿಸಿಕೊಂಡ ಮಾತೃ ಭಾಷೆ ಮತ್ತು ಸಂಸ್ಕೃತಿಯ ಬೆಳಕಲ್ಲಿ ಇಲ್ಲಿನವರ  ಭಾಷೆಯ ಒಂದು ಸಾಮಾನ್ಯ  ಅಂತ್ಯಪ್ರತ್ಯಯವನ್ನು ಕನ್ನಡದ ಕನ್ನಡಕ ಹಾಕಿಕೊಂಡು ಅವಲೋಕಿಸಿದ್ದಾರೆ.

ಇಂಗ್ಲೀಷು ಭಾಷೆಯಲ್ಲಿ 26 ಅಕ್ಷರಗಳಿದ್ದರೆ ಅದರ ಜೊತೆಯಲ್ಲಿ 26 ಸಾಮಾನ್ಯ ಅಂತ್ಯ ಪ್ರತ್ಯಯಗಳಿವೆ. ಅದರ ಜೊತೆಯಲ್ಲಿ ಒಂದೇ ರೀತಿಯಲ್ಲಿ ಕೇಳಿಸುವ ಆದರೆ ಬೇರೆ ಬೇರೆ ಅರ್ಥಗಳಿರುವ ಶಬ್ದಗಳಿವೆ  ( HOMONYMS) ಅದರಂತೆ ಒಂದೇರೀತಿ ಕೇಳಿಸುವ ಆದರೆ ಬೇರೆ ಬೇರೆ  ಅಕ್ಷರ ಜೋಡಣೆಯ ಪದಗಳಿವೆ (HOMOPHONES).ಇವೆಲ್ಲದರ ಜೊತೆ  ಒಂದೇ ಅಕ್ಷರ ಜೋಡನೆಯಿದ್ದು ಬೇರೆ ಬೇರೆ ಅರ್ಥಕೊಡುವ ಪದಗಳೂ ಇವೆ (HOMOGRAPHS) ಇವೆಲ್ಲ ಯಾವುದೇ ಇತರೆ ಭಾಷಿಗರಿಗೆ ಕೆಲವೊಮ್ಮೆ ಅಚ್ಚರಿಯ ಜೊತೆ ತಲೆನೋವಾಗುವುದು ಕೂಡ ನಿಜ. ಈ ಗ-ಪದ್ಯ ದಲ್ಲಿ ಕವಿಗಳು  ’ನರಿ ’ಯಿಂದ ಕೊನೆಯಾಗುವ ಪದಗಳ ಬೇಟೆಯಾಡಿ ಅನಿವಾಸಿಯ ಓದುಗರಿಗೆ  ಕನ್ನಡದಲ್ಲಿ ಅರ್ಥಗಳ ಊಟ ಬಡಿಸಿದ್ದಾರ.- ಸಂ)

  ಪರಿಚಯ

(  ಸಿ. ಹೆಚ್. ಸುಶೀಲೇಂದ್ರ ರಾವ್ ಅನಿವಾಸಿಯ ಪರಿಚಿತ  ಬರಹಗಾರರು. ದಾವಣಗೆರೆಯಲ್ಲಿ ಇ೦ಜನೀಯರಿ೦ಗ್ ಪದವಿಯವರೆಗೆ ವಿದ್ಯಾಭ್ಯಾಸ  ಮಾಡಿದ ಇವರು  4 ವಷ೯ ಕರ್ನಾಟಕ ಪಿ.ಡಬ್ಲು.ಡಿಯಲ್ಲಿ ಕೆಲಸ ಮಾಡಿದರು. ನಮ್ಮಲ್ಲಿ ಕೆಲವರು ಹುಟ್ಟುವ ಮುನ್ನವೇ  ಅಂದರೆ 1966 ರಲ್ಲಿ  ಇಂಗ್ಲೆಂಡಿಗೆ ಪ್ರಯಾಣ  ಬೆಳೆಸಿದ ಇವರು ಸಿವಿಲ್ ಇಂಜಿನಿಯರ್ ಆಗಿ ಕೆಲಸ ಮಾಡಿದವರು. ಮ್ಯಾಕಲ್ಸ ಫೀಲ್ಡ್   ಕೌನ್ಸಿಲ್ ಮತ್ತು ಮ್ಯಾಂಚೆಸ್ಟರ್ ಕೌನ್ಸಿಲ್ ಗಳಲ್ಲಿ ಬಹುಕಾಲ ಸೇವೆ ಸಲ್ಲಿಸಿ ನಿವೃತ್ತಿ  ಪಡೆದರು.

ಕನ್ನಡ ಮತ್ತು ಇಂಗ್ಲಿಷ್ ಎರಡೂ ಭಾಷೆಯಲ್ಲಿ ಅಭಿರುಚಿಯಿರುವ ಇವರ ಹೃದಯ ಮಾತ್ರ ಮಾತೃಭಾಷೆ ಮತ್ತು ಸ್ವದೇಶೀ ಸ್ಪರ್ಷ ಭಾವನೆಗೆಗಳಿಗೆ ಯಾವತ್ತೂ ಆತುಕೊಂಡಿದೆ. ಆಗಾಗ ಮನಸ್ಸಿಗೆ ತೋರಿದ್ದನ್ನು ಬರೆಯುವ ಹವ್ಯಾಸವಿರುವ ಇವರು ನಿವೃತ್ತಿಯ ನಂತರ ಶಾಸ್ತ್ರೀಯ ಸಂಗೀತಾಭ್ಯಾಸಗಳಿಗೂ ತೆರೆದುಕೊಂಡವರು.

ಯು.ಕೆ. ಯ ಹಿರಿಯ ಕನ್ನಡ ಸಂಸ್ಥೆ ಕನ್ನಡ ಬಳಗದ ಮೊಟ್ಟ ಮೊದಲ ಕಾರ್ಯಕಾರೀ ಸಮಿತಿಯ ಸದಸ್ಯರೂ ಮತ್ತು  ಸಂಸ್ಥಾಪಕ ಸದಸ್ಯರೂ ಆಗಿ ಕನ್ನಡ ಸೇವೆಗೆ ನಿಂತ ಇವರು 1986 ರಲ್ಲಿ ಕನ್ನಡ ಬಳಗದ ಸಂವಿಧಾನ ರಚನೆಗೆ ಸಹಕರಿಸಿದರು. ನಂತರ ಕನ್ನಡ ಬಳಗದ ಅಧ್ಯಕ್ಷರಾಗಿ ಎರಡು ವರ್ಷ ಸೇವೆ ಸಲ್ಲಿಸಿದರು. ಅನಿವಾಸಿ ಜಾಲ ಜಗುಲಿಯಲ್ಲಿ ಇವರ ಹಲವು ಕವನಗಳು ಪ್ರಕಟವಾಗಿವೆ.  ‘ರಾಜಕೀಯ ‘,  ‘ಕವಿ ಆಗಬೇಕೆ? ‘  ‘ಗ್ರೆನ್ಫಲ್ ಟವರ್ ದುರಂತ’  ಮತ್ತು ‘ದೊಂಬರಾಟವಯ್ಯ ‘ ಇವರ ಪ್ರಕಟಿತ ಕವನಗಳು-ಸಂ )

ಆ೦ಗ್ಲ ನರಿಗಳು 

ಕನ್ನಡದ ಜೊತೆಗೆ ಇ೦ಗ್ಲೀಷ ಓದಿದೆವು
ಆ೦ಗ್ಲ ನಾಡಿಗೆ ಬ೦ದು ನೆಲೆಸಿದೆವು ಅ೦ದು

ಆ೦ಗ್ಲನಾಡು ಆ೦ಗ್ಲ ಭಾಷೆ, ನಡೆ ನುಡಿಗಳ
ಹೇಗೋ ಹೊ೦ದಿಕೊ೦ಡು ಬಾಳಿದೆವು

ಕಳೆದೆವು  ವಷ೯ಗಳು ಬೆಳೆದವು ಮಕ್ಕಳು
ಬಹು ಬೇಗ ಸಾಗಿತು ಅರ್ಧ ಶತಮಾನ

ಇ೦ಗ್ಲೀಷರು ಆಳಿದರುನಮ್ಮನು ೨ ಶತಮಾನ
ಇದ್ದಿರಬೇಕು ಬುದ್ದಿಯಲಿ ನರಿಗಳ೦ತೆ ಅವರು

ಅವರು ಬುದ್ದಿವ೦ತರೋ ,ಗುಳ್ಳೆನರಿಗಳೋ
ಕುತೂಹಲ ಅವರ ಭಾಷೆ ಇಣಿಕುವ ಆಸೆ

ಹಾಗಾದರೆ ನೋಡೋಣ ಬನ್ನಿ ಇ೦ಗ್ಲೀಷ ಭಾಷೆಯಲಿ
ಎಷ್ಟು ನರಿಗಳನ್ನು ನಾವು ಹುಡುಕಬಹುದೆ೦ದು

ಇದು ಹುಚ್ಚತನ ಅನಿಸ ಬಹುದು ಅವರ ಭಾಷೆಯಲಿ
೨ಬಗೆಯ ನರಿಗಳಿವೆ ೧ nary  ೨ nery.

ಈಗ ನಾವು ಸಾಧಾರಣ ನರಿಯಿ೦ದ
ಪ್ರಾರ೦ಬಿಸಿದರೆ ಸಿಗುವುದು ordinary
ನಿಶ್ಚಲ/ಲೇಖನ ಸಾಮಗ್ರಿ ನರಿ ಬೇಕಿದ್ದರೆ
ಆಗ ನಮಗೆ ಕಾಣುವುದುStationary

ಅತ್ಯ೦ತ ಸುಧಾರಿತ/ವಿಶೇಷ ನರಿ
ನೋಡಬೇಕೆ೦ದರೆ Extraordinary
ಮತ್ತೆಕೆಲವರು ಇನ್ನೂ ತರಬೇತಿಯಲ್ಲಿರುವ
ನರಿ ನೋಡ ಬಯಸಿದರೆ Probationary

ಸುಮ್ಮನೆ ಸದ್ಯಮಟ್ಟಿಗೆ ಒ೦ದು ನರಿ
ನೋಡೋಣ ಎ೦ದರೆ Provisionary
ಒಮ್ಮೆ ಎರಡು ನರಿಗಳು ಇರುವುದನ್ನು
ಹುಡುಕ ಬೇಕಿದ್ದರೆ Bianary

ನಮಗೆ ವಿವೇಚನೆ ಇರೋ ನರಿ ತೋರಿಸಿ
ಎ೦ದು ಕೇಳಿದರೆ Discretionary
ಪೂವ೯ಸಿದ್ದತೆ/ಪೀಟಿಕೆ  ನರಿ ಹುಡುಕಲು
ಸಿಗುವುದು Preliminary

ಸುಪ್ರಸಿದ್ದ, ಪ್ರತಿಭಾಶಾಲಿ/ತೇಜಶ್ವಿ ನರಿ
ಉ೦ಟು ಅದು Luminery
ಕ್ರಾ೦ತಿಕಾರ/ಧೈರ್ಯ ನರಿ ಕಾಣಲು
ವೀಕ್ಷಿಸಿ  Revolutionary

ರಕ್ತಪಾತ/ಕೊಲೆ ಭಯಾನಕ ನರಿ
ಇರುವ ಜಾಗ Sanguinary
ಯ೦ತ್ರಗಳು/ಆಡಳಿತ ವ್ಯವಸ್ತೆನರಿ
ಇರುವ ಸ್ಥಳ  Machinary

ಧಮ೯/ಮತ ಪ್ರಚಾರಕ ನರಿಗಳು
ಅಲೆಯುವ ಜಾಗ Missinory
ಕ್ರೈಸ್ತ ಸನ್ಯಾಸಿನಿಯರ ನಿವಾಸದಲ್ಲಿ
ಸುತ್ತಾಡುವ ನರಿ Nunnery

ಪಶು ವೈದ್ಯ ಕೀಯ ನರಿಗಳು
ಸುಳಿದಾಡುವುದು Veternary
ಸ್ವಾಶಕೋಶ ವಿವರಣೆಗಳ ನರಿ
ನೋಡಲು ಹುಡುಕಿ Pulmanary

ನೂರನೇ ವಷ೯ದ ಉತ್ಸವದ ನರಿ
ನಲಿದಾಡುವಿಕೆಗೆ ನೋಡಿ Centinary
ಪ೦ಚ ವಾಷಿ೯ಕ ಆಚರಿಪ ನರಿ ಮೆರೆವ
ಜಾಗ  Quincentenary

ಪ್ರಕ್ರುತಿ ದ್ರುಶ್ಯ/ರ೦ಗ ದ್ರುಶ್ಯಗಳಲ್ಲಿ
ಚಿತ್ರಿಪ ನರಿ ಇರುವುದು Scenery
ಭವಿಷ್ಯದ ಕನಸು ಕಾಣಲು ಕಾತರೆವ
ನರಿ ರಮಿಸುವ ಸ್ಥಳ Visionary

ಆಕಸ್ಮಿಕವಾಗಿ ಕೆಲವು ನರಿಗಳು
ಕಾಣದೆ ನುಸುಳಿದ್ದರೆ ಕ್ಷಮಿಸಿ
ಎ೦ದು ಹೇಳುವ ನರಿ ಹೆದರದಿರಿ
ಆದರೆಹ್ರುದಯ ಘಾತ Coronary

ದಯವಿಟ್ಟು ಕ್ಷಮಿಸಿ ಸಾಕಾಯ್ತು
ಈ ಎಲ್ಲಾ ನರಿಗಳ ಹುಡುಕುವ ಆಟ
ಅ೦ದರೆ ಚಿ೦ತಿಸದಿರಿ  ಇದೆ ಒ೦ದು
ದೊಡ್ಡ ನರಿ ನಿಗ೦ಟು Dictionary.

————————————— ಸಿ. ಹೆಚ್. ಸುಶೀಲೇಂದ್ರ ರಾವ್

                                    (ಮುಂದಿನ ವಾರ- ಸಕ್ಕರೆ ಸವಿಯ ಜಾನಕಿ ಅಮ್ಮ)

♥ ಅನಿವಾಸಿಗೆ ಐದು ವರ್ಷದ ಹರ್ಷ ♥

(ಅನಿವಾಸಿಗೆ ಕೆಲವು ಮಧುರವಾದ ಕವನಗಳನ್ನು ಬರೆದು ಅನಿವಾಸಿಯ ಅನಧಿಕೃತ ಕೆ.ಎಸ್.ಎನ್ ಎಂತಲೇ ಹೆಸರು ಪಡೆದವರು ವಿಜಯ ನರಸಿಂಹ. ಇತ್ತೀಚೆಗೆ ತಾನೇ ಬೆಂಗಳೂರಿನಲ್ಲಿ ಚಂದದ ಹೊಸ ಮನೆಯನ್ನು ಕಟ್ಟಿಸಿ ವಿನೂತನ ಎಂದು ನಾಮಕರಣ ಮಾಡಿದ್ದಾರೆ. ಇಲ್ಲಿ  ಹಳೇ ಮನೆಗಳ ಮಾರಾಟ- ಕೊಳ್ಳುವಿಕೆ ಮತ್ತು ಕಟ್ಟಿಸಿದ ಮನೆಗಳೇ ಜಾಸ್ತಿಯಾದ್ದರಿಂದ  ನಮ್ಮಿಷ್ಟದಂತೆ  ಮನೆ ಕಟ್ಟಿಸಿ ನೋಡುವ ಭಾಗ್ಯವನ್ನು ಪಡೆಯಲು  ಬಹಳಷ್ಟು ಜನ ಭಾರತಕ್ಕೇ ಹೋಗಬೇಕೇನೋ. ಆದರೆ ಕವನಗಳನ್ನು ಕಟ್ಟಲು ಯಾವ ನೆಲವಾದರೇನು?   ಮಲ್ಲಿಗೆಗಳಂತೆ ಅರಳಿ ಘಮ ಘಮಿಸಲು ಯಾರ ಹಂಗೇನು? ಅನಿವಾಸಿಯ ಕವಿಗಳ ನಿಲುವೇ ಅದು.

ಇದೀಗ ತಾನೇ “ಮನೆ ಕಟ್ಟಿಸಿ ನೋಡಿ…”  ಮರಳಿ ಬಂದಿರುವ ಕವಿ ಮನ ಮಾತ್ರ ಆ ಇಟ್ಟಿಗೆ, ಸಿಮೆಂಟುಗಳ ನಡುವೆಯೂ ನವಿರಾದ ಪದಗಳ ಮೋಡಿಯಲ್ಲೇ ಸುತ್ತುತ್ತಿತ್ತೇನೋ? ಅಲ್ಲಿಂದಲೇ ಅನಿವಾಸಿಗೆ ಕಳಿಸಿದ  ಅವರ ಈ ಕವನಗಳಲ್ಲಿ  ಮಲ್ಲಿಗೆಯ ನವಿರು ಮತ್ತು ಘಮಲಿದೆ. ಸೂಕ್ಷ್ಮವಾದ್ದೊಂದು  ಆಶಯ ಮತ್ತು ಅರಳಿ ಬಾಡುವ ನಿರಾಶೆಯೂ ಇದೆ. ಹಾಸ್ಯವೂ ಸೇರಿದೆ. ಅನಿವಾಸಿಗಾಗಿಯೇ ಕಟ್ಟಿಕೊಟ್ಟ  ಅಳತೆಯ ಮಿತಿಯಿರದ ಎರಡು ಮೊಳ ಮಲ್ಲಿಗೆಯಂತ ಕವನಗಳು ಈ ವಾರದ ಅನಿವಾಸಿ ಓದುಗರಿಗಾಗಿ-ಸಂ )

ಪರಿಚಯ

ವಿಜಯ ನರಸಿಂಹ ಅವರು ಮೂಲತಃ ತುಮಕೂರಿನವರು.B.E Mechanical Engineering ನಲ್ಲಿ ಪದವಿ ಪಡೆದಿರುವ ಇವರು QUEST ಸಂಸ್ಥೆಯಲ್ಲಿ Technical Manager ಆಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಹವ್ಯಾಸಗಳಲ್ಲಿ ಸಾಹಿತ್ಯ ರಚನೆಯೂ ಒಂದು. ಸಾಹಿತ್ಯದಲ್ಲಿ  ಕಾವ್ಯ ಪ್ರಾಕಾರ ತುಂಬಾ ಇಷ್ಟ  ಎನ್ನುವ ಇವರು ಹಲವು ಕವನಗಳನ್ನು ಬರೆದ್ದಿದ್ದಾರೆ.

ಮೈಸೂರಿನ ಗ್ರಾಮಾಂತರ ಬುದ್ಧಿಜೀವಿಗಳ ಸಂಘದ ಅನಿವಾಸಿ ವಿಭಾಗದಲ್ಲಿ ಎರಡು ಬಾರಿ  ಇವರ ಆಯ್ದ ಕವನಗಳಿಗೆ ಮನ್ನಣೆ ದೊರೆತಿದೆ.  ರಾಷ್ತ್ರಕವಿ ಕುವೆಂಪು ಮತ್ತು ಮೈಸೂರು ಅನಂತ ಸ್ವಾಮಿ ಪ್ರಶಸ್ತಿಗಳು ದೊರೆತಿವೆ. ಕಾವ್ಯದ ಒರೆಯ ಸೆಲೆತ ಜೋರಾಗಿದ್ದರೆ ಅದನ್ನು ತಡೆಯಲು ಸಮಯಾಭಾವದ ಸೋಗು ಸಾಲದು ಎನ್ನುವ ಇವರು ಕನ್ನಡ ಚಟುವಟಿಕೆಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡವರು. ಡಾರ್ಬಿಯಲ್ಲಿ ಸನ್ಮಿತ್ರರೊಡನೆ ಸೇರಿ 2014 ರಲ್ಲಿ ಶುರುಮಾಡಿದ ಜೈ ಕರ್ನಾಟಕ ಬಳಗದ ಸ್ಥಾಪನೆಯಲ್ಲಿ ಇವರ ಪಾತ್ರವಿದೆ. ಯು.ಕೆ.ಯ ಮ್ಯಾಂಚೆಸ್ಟರಿನ ಬಳಿ ಇವರ  ಪ್ರಸ್ತುತ ನಿವಾಸ .◊

ನಗೆ ಮಲ್ಲಿಗೆ

                                                                   ಸುಮಾರು ದಿನಗಳಾಗಿದ್ದವು

ಹೂ ಮಾರುವವಳ ಕಂಡು

ನಾನೂ ಹೋಗಿರಲಿಲ್ಲ

ಅವಳೂ ಈ ಕಡೆ ಸುಳಿದಿರಲಿಲ್ಲ

ಮಾರುಕಟ್ಟೆಯಲ್ಲಿ ಮಲ್ಲಿಗೆ ಸರಬರಾಜು ಕಡಿಮೆ ಎಂಬ ಸುದ್ದಿ

ಏನಾಯಿತೋ ಕಾಣೆ,

 ಅತಿಯಾದ ಮಳೆಯೊ?

ಇಳುವರಿ ಕಡಿಮೆಯೊ?

ಮಧ್ಯವರ್ತಿಗಳ ಕುತಂತ್ರವೊ?

ಸಾಲು ಸಾಲು ಹಬ್ಬಗಳು

ಬೆಲೆ ಏರೋದು ಸಹಜ

ಆದರೆ ಅವಳು ಗಟ್ಟಿಗಿತ್ತಿ

ತನ್ನ ಮನೆಗೆ ಊರುಗೋಲು

ಆ ಕಸುಬು ಬಿಟ್ಟರೆ ಬೇರೆ ಯಾವುದೂ ಗೊತ್ತಿಲ್ಲ

ಯಾವಾಗಲೂ ಮಲ್ಲಿಗೆಯನ್ನೇ ಕೊಂಡರೆ

ಅದು ಎಷ್ಟು ಸಮಂಜಸ ?

ದೇವರ ಪೂಜೆಯ ಹೆಸರಿನಲ್ಲಿ

ಅವಳಿಗೊಂದು ವ್ಯಾಪಾರ

ಕೊಟ್ಟರೆ ಅವಳಿಗೂ ಒಂದು ಖುಷಿಯಲ್ಲವೇ,

ಬೆಲೆಯ ಮಾತು ಇದ್ದದ್ದೇ ಸ್ವಲ್ಪ ಹೆಚ್ಚಾದರಾಗಲಿ ಎಂದು

ಮಾರುಕಟ್ಟೆಯಲ್ಲಿ ಅವಳ ಕಂಡೆ

‘ಸೇವಂತಿ ಎರಡು ಮೊಳ

ಬಟ್ಟಾನ್ಸು ಎರಡು ಮೊಳ

ಬಿಡಿ ಪತ್ರೆ ತಾರವ್ವ, ಬೆಲೆ ಎಷ್ಟು ಹೇಳು’ ಎಂದೆ

ಅದಕ್ಕವಳು ‘ಮನೆಯಲ್ಲಿ

ಜಗಳವೊ ಸ್ವಾಮಿ? ಇತ್ತೀಚೆಗೆ

ಇಲ್ಲಿ ಸುಳಿವಿಲ್ಲ, ಇಂದು ಮಲ್ಲಿಗೆಯ ಕೊಳ್ಳಲಿಲ್ಲ’ ಎಂದಳು

‘ಅಯ್ಯೊ ಹಾಗೇನೂ ಇಲ್ಲವ್ವ

ಸರಬರಾಜು ಕಡಿಮೆ ಮಲ್ಲಿಗೆ ಸಿಗುವುದು ಕಷ್ಟವೆಂದು

ಜನರ ಮಾತು ಹಾಗಾಗಿ ಬರಲಿಲ್ಲ’ ಎಂದೆ

‘ಅದು ಸರಿ ಸ್ವಾಮಿ ಹಾಗಂತ

ನಾನೇನು ಸುಮ್ಮನಿರೋ ಆಕಿ ಅಲ್ಲ ನಮ್ಮ ಮನೇಲ್ಲೆ ಎರಡು ಬಳ್ಳಿ

ಅಂದಿನಿಂದಲೂ ಬೆಳದೀನಿ ಅದರ ಹೂ ನಿಮಗಂತಲೇ ಇಟ್ಟೀನಿ’

ಅಂದಳು

‘ಓ ಹಾಗಾದರೆ ಎರಡು ಮೊಳ ಕಟ್ಟಿಬಿಡು ‘ ಎಂದಾಗ ಅವಳ ಬದುಕು

ಕಟ್ಟುವಂತೆ ಕಟ್ಟಿದ್ದ ಮಲ್ಲಿಗೆಯ ದಿಂಡು ನನ್ನ ಕೈಸೇರಿತ್ತು

ನನ್ನ ಹೆಂಡತಿ ರಜೆಯೆಂದು ಗೊತ್ತಿದ್ದರೂ ಮಲ್ಲಿಗೆ ಕೊಂಡದ್ದು

ಗಟ್ಟಿಗಿತ್ತಿಯ ಬಾಳ ಮಲ್ಲಿಗೆ  ನಗಲೆಂದು…

                                                                                                                  ✍ವಿಜಯನರಸಿಂಹ

 

 ಮಲ್ಲಿಗೆಯ ಮಾತುಗಳು..

 

 

‘ಸ್ನಾನವಾಯಿತು ತಿಂಡಿ ಆಯಿತಾ?’ ಎಂದು ನಾನು 

‘ಕುಕ್ಕರ್ ಕೂಗಿದೆ, ನೀವೂ ಮತ್ತು ಅದು ಎರಡೂ ತಣ್ಣಗಾಗಬೇಕು’ ಎಂದು ಅವಳು 

‘ಪಾಪೂ, ಸ್ಕೂಲ್ ಡೈರಿ ಇಟ್ಟುಕೊಂಡೆಯಾ?’ ಎಂದು ಮಗಳಿಗೆ ಅವಳು 

‘ಹೂಂ’ ಎಂದುದು ಪುಟ್ಟ ಬಾಯಿ 

‘ಮಗೂ ಟಾಟಾ’, 

‘ನಾನು ಬರ್ತೀನಿ ಕಣೇ ಆಫೀಸಿಗೆ ಟೈಮ್ ಆಯ್ತು

ಏನಾದರೂ ತರುವುದಿದ್ದರೆ 

ಫೋನಾಯಿಸು’ ಎಂದು ನಾನು 

ಸಂಜೆ ವೇಳೆಗೆ ಚಲನವಾಣಿ

‘ಬರ್ತಾ ಮಕ್ಕಳಿಗೆ ಹಣ್ಣು ತನ್ನಿ,

ಸಕ್ಕರೆ ಖಾಲಿಯಾಗಿದೆ ಅದನ್ನೂ ತನ್ನಿ’ ಎಂದುದು ಆಜ್ಞಾವಾಣಿ 

‘ಪುಟಾಣಿಗಳ ಊಟ ಆಯ್ತಾ?’

ಎನ್ನುವುದು ನನ್ನ ರೂಢಿವಾಣಿ

‘ಆಗಲೇ ಹೋಂವರ್ಕ್ ಕೂಡ ಆಯ್ತು’ ಎಂದುದು  ದೊಡ್ಡ ಮಗಳ  ಜವಾಬ್ದಾರಿ ವಾಣಿ

‘ಊಟ  ಆಯ್ತಲ್ಲ ಮಕ್ಕಳನ್ನು  ವಾಕಿಂಗ್  ಕರೆದುಕೊಂಡು ಹೋಗಿ’ ಎಂದುದು ಧಾರಾವಾಹಿಯತ್ತ ನೆಟ್ಟ ಕಣ್ಣುಗಳ, ಬುರುಡೆಗೆ ಹುಳ ಬಿಟ್ಕೊಂಡ ಖಾಲಿ ವಾಣಿ

ಸಣ್ಣ ವಾಕಿಂಗ್ ಮುಗಿಸಿ ಬಂದ ಮೇಲೆ

‘ಪಪ್ಪಾ ಇವತ್ತು two ಕತೆ ಹೇಳು’  ಎಂದು ದೊಡ್ಡವಳು,

‘ಹೂಂ ಹೂಂ’ ಎಂದು ಚಿಕ್ಕವಳು 

ಕತೆಗಳೆಲ್ಲಾ ಮುಗಿದಮೇಲೆ 

‘ಮಕ್ಕಳು ಮಲಗಿದ್ವು ಕಣೇ’ ಎಂದು ನನ್ನ  ಮೆಲು-ವಾಣಿ 

‘ಇನ್ನು ಮೂರ್-ನಾಲ್ಕು ದಿನ ರಜಾ’ ಎಂದುದು

ನನ್ನ ಕಿವಿ ಮೇಲೆ ಬಿದ್ದ ಘೋರವಾಣಿ…….

                                            ✍ವಿಜಯನರಸಿಂಹ

(ಮುಂದಿನ ವಾರ- ಸ್ಥಿತ್ಯಂತರ )