‘ಕ್ರೈಸ್ಟ್ ದಿ ರಿಡೀಮರ್ : ಆಧುನಿಕ ಜಗತ್ತಿನ ವಿಸ್ಮಯ’ -ಡಾ. ಶಿವಪ್ರಸಾದ್ ಅವರ ಪ್ರವಾಸ ಬರಹ

ಪೀಠಿಕೆ : ಜಗತ್ತಿನ ಏಳು ಅದ್ಭುತಗಳನ್ನು ಪಠ್ಯಪುಸ್ತಕಗಳಲ್ಲಿ ಅಥವಾ ಅಂತರ್ಜಾಲದಲ್ಲಿ ಓದಿ ತಿಳಿದವರಿಗೆ ಅವುಗಳನ್ನು ಸದೃಶ ನೋಡುವ ಆಸೆ ಮೂಡುವುದು ಸಹಜ. ಒಂದು ವೇಳೆ ಅವುಗಳನ್ನು ನೋಡುವ ಅವಕಾಶ ಸಿಕ್ಕರೆ ಆ ಖುಷಿಗೆ ಪಾರವೇ ಇರುವುದಿಲ್ಲ.  ಆ ರೋಮಾಂಚನ ಅನುಭವಗಳನ್ನು ತಾವೂ ಸವಿದು ನೋಡವುವ ಅವಕಾಶ ಸಿಗದ ಎಷ್ಟೋ ಆಕಾಂಕ್ಷಿಗಳಿಗೆ ಬರಹಗಳ, ಛಾಯಾಚಿತ್ರಗಳ ಮೂಲಕ ತಲುಪಿಸುವ ಮನೋವೃತ್ತಿ ಬಹಳ ಉತ್ಕೃಷ್ಟವಾದದ್ದು.
ಇಂಥದೇ ಒಂದು ಅದ್ಭುತವನ್ನು ನೋಡಿದ ಅನುಭವವನ್ನು ನಮ್ಮ ಅನಿವಾಸಿ ಬಳಗದ ಶಫೀಲ್ಡ್ ನಿವಾಸಿಯಾದ ಡಾ.ಶಿವಪ್ರಸಾದ್ ಅವರು ನಮ್ಮೊಂದಿಗೆ ಹಂಚಿಕೊಂಡಿದ್ದಾರೆ.ನೀವೂ ಓದಿ ಸವಿಯಿರಿ. IMG_0678

ಹೆಲನ್ ನಮ್ಮನ್ನು ಬೆಳಗ್ಗೆ 9ಕ್ಕೆ ಭೇಟಿಯಾಗಿ ನಾವು ಇಂದು ಆಧುನಿಕ ಜಗತ್ತಿನ ಏಳು ವಿಸ್ಮಯಗಳಲ್ಲಿ ಒಂದಾದ ` ಕ್ರೈಸ್ಟ್ ದಿ ರಿಡೀಮರ್’ ಎಂಬ ಭವ್ಯವಾದ ಶಿಲಾಪ್ರತಿಮೆಯನ್ನು ನೋಡುತ್ತೇವೆಂದು ತಿಳಿಸಿದಳು. ಕಾರ್ಕೊ ವಾಡೊ ಬೆಟ್ಟದ ಮೇಲೆ ಸಮುದ್ರವನ್ನು ಎದುರಿಸಿ ನಿಂತಿರುವ ಜೀಸಸ್ ತನ್ನ ಎರಡು ಬಾಹುಗಳನ್ನೆತ್ತಿ ಕೈಗಳನ್ನು ಹೊರಗೆ ಚಾಚಿರುವ ಈ ಭವ್ಯ ಮೂರ್ತಿಯ ಚಿತ್ರವನ್ನು ಕಂಡಿದ್ದು, ಇದರ ಕಲ್ಪನೆ ನನ್ನ ಅರಿವಿನಲ್ಲಿತ್ತು. ಅಂದು ಅದನ್ನು ಸಾಕ್ಷಾತ್ ದರ್ಶನ ಮಾಡುತ್ತಿರುವುದು ನನ್ನ ಪಾಲಿಗೆ ಸೌಂದರ್ಯ ಯಾತ್ರೆ ಎಂದು ಹೇಳಬಹುದು. ನಾನು ಅದರ ಬಗ್ಗೆ ಬಹಳ ಪುಳಕಿತಗೊಂಡಿದ್ದೆ. ನಮ್ಮ ಹೋಟೆಲಿನಿಂದ ಆಚೆ ಬಂದು ಕೆಲವು ಸಮಯದ ನಂತರ ಸುರಂಗವನ್ನು ಹಾದು ಹೊರಬಂದ ನಮಗೆ ಮುಂದೆ ಒಂದು ದೊಡ್ಡ ಸರೋವರ ಕಾಣಿಸಿಕೊಂಡಿತು. ಇದನ್ನು `ರೊಡ್ರಿಗೊ ಡಿ ಫ್ರಿಯಟಾಸ್ ಲಗೋನ್’ ಎಂದು ಕರೆಯುತ್ತಾರೆ. ಒಂದು ಸಣ್ಣ ತೊರೆಯ ಮೂಲಕ ಈ ಸರೋವರಕ್ಕೆ ಸಾಗರದ ಸಂಪರ್ಕವಿದೆ. ಈ ಸರೋವರದ ಅಂಚಿನಿಂದ ಕಾರ್ಕೊವಾಡೊ ಎಂಬ ಬೆಟ್ಟ ಹಬ್ಬಿದೆ. ಅದರ ತುತ್ತ ತುದಿಯಲ್ಲಿ, ಆಕಾಶದಲ್ಲಿ ಹಾದು ಹೋಗುವ ಮೋಡಗಳ ಮಧ್ಯ ಜೀಸಸ್ ವಿಗ್ರಹ ಭವ್ಯವಾಗಿ ತೆರೆದುಕೊಳ್ಳುತ್ತಿತ್ತು. ನಾವು ಸರೋವರವನ್ನು ಬಳಸಿ ಬೆಟ್ಟದ ಇನ್ನೊಂದು ಭಾಗವನ್ನು ತಲುಪಿ ಬೆಟ್ಟದ ತುದಿಗೆ ತೆರಳುವ ಎಲೆಕ್ಟ್ರಿಕ್ ರೈಲಿನ ನಿಲ್ದಾಣಕ್ಕೆ ತೆರಳಿದೆವು. ಕಾರ್ಕೊವಾಡೊ ಬೆಟ್ಟ, ಸಮುದ್ರ ಮಟ್ಟದಿಂದ 2,329 ಅಡಿ ಎತ್ತರದಲ್ಲಿದೆ. ರೈಲ್ವೆ ನಿಲ್ದಾಣದಲ್ಲಿ ಹೆಲನ್ ಮುಂಚಿತವಾಗಿ ಕಾದಿರಿಸಿದ್ದ ಟಿಕೇಟ್‍ಗಳನ್ನು ಪಡೆದು ರೈಲಿಗಾಗಿ ಕಾದೆವು. ಸುಮಾರು 150 ಜನರನ್ನು ಸಾಗಿಸಬಲ್ಲ ಮೂರು ಡಬ್ಬಿಗಳ ರೈಲು ನಿಧಾನವಾಗಿ ಬೆಟ್ಟವನ್ನು ಏರಲು ಆರಂಭಿಸಿತು. ದಟ್ಟವಾದ ಅರಣ್ಯ ಸುತ್ತ ಆವರಿಸಿದ್ದು, ನಗರ ವಲಯದಲ್ಲಿದ್ದರೂ, ಇಲ್ಲಿ ಅರಣ್ಯವನ್ನು ಕಡಿದು ಮನೆ ಕಟ್ಟುವಂತಿಲ್ಲ. ಈ ಪ್ರದೇಶವನ್ನು ಟೆಚುಕಾ ರಾಷ್ಟ್ರೀಯ ಉದ್ಯಾನವನವೆಂದು ಸಂರಕ್ಷಿಸಲಾಗಿದೆ. ಸುಮಾರು 20 ನಿಮಿಷಗಳ ಕಣಿವೆ, ಅರಣ್ಯಗಳ ಸೊಬಗನ್ನು ವೀಕ್ಷಿಸುತ್ತ ಬೆಟ್ಟದ ತುದಿಯನ್ನು ತಲುಪಿದೆವು. ಚಿಕ್ಕ ಪ್ಲಾಟ್‍ಫಾರ್ಮ್ ದಾಟಿ ಪಕ್ಕದಲ್ಲಿದ್ದ ಎಸ್ಕಲೇಟರ್ ಹಿಡಿದೆವು. ನಮ್ಮ ಅದೃಷ್ಟ! ಸ್ವಲ್ಪವೂ ಮೋಡಗಳಿರಲಿಲ್ಲ, ಬಿಸಿಲು ಅಷ್ಟು ಚುರುಕಾಗಿರಲಿಲ್ಲ. ಎಸ್ಕಲೇಟರ್ ಮೇಲೆ ಬಂದಂತೆ ` ಕ್ರೈಸ್ಟ್ ದಿ ರಿಡೀಮರ್’ ಜೀಸಸ್ ವಿಗ್ರಹ ಧುತ್ತನೆ ಎದುರಾಗುತ್ತದೆ. ಬೆಟ್ಟದ ತುದಿ ಗ್ರಾನೈಟ್ ಶಿಲೆಯಾಗಿದ್ದು ಅದನ್ನು ಕಡಿದು ಒಂದು ಹಿರಿದಾದ ಪ್ಲಾಟ್‍ಫಾರ್ಮ್ ಕಟ್ಟಿದ್ದಾರೆ. ಶಿಲೆಯ ಆಧಾರ ಪೀಠವನ್ನು(Pedestal) ದಾಟಿ ಮುಂದಕ್ಕೆ ಸರಿದು 98 ಅಡಿ ಎತ್ತರದ ಭವ್ಯ ವಿಗ್ರಹವನ್ನು ಕಂಡು ಧನ್ಯರಾದೆವು. ಆಧಾರ ಪೀಠ 26 ಅಡಿ ಎತ್ತರದ್ದಾಗಿದೆ. ಜೀಸಸ್ ಮುಖದಲ್ಲಿನ ಒಂದು ಪ್ರಶಾಂತ ಭಾವ ಶಿಲೆಯಲ್ಲಿ ಚೆನ್ನಾಗಿ ಮೂಡಿಬಂದಿದೆ. ಅವನ ಕೂದಲು ಕುತ್ತಿಗೆ ಮತ್ತು ಭುಜಗಳಿಗೆ ಇಳಿದಿದೆ. ಜೀಸಸ್ ತನ್ನ ಎರಡೂ ಭುಜಗಳನ್ನೆತ್ತಿ ಕೈಬೆರಳುಗಳನ್ನು ಬಿಚ್ಚಿ ನಿಂತಿದ್ದು ಎಲ್ಲರಿಗೂ ತುಂಬು ಹೃದಯದ ಸ್ವಾಗತ ನೀಡಲು ಕಾತರನಾಗಿರುವಂತೆ ತೋರುತ್ತದೆ. ಈ ಒಂದು ಸ್ವಾಗತಾರ್ಹ ನಿಲುವು, ಶಿಲೆಯ ಸುಂದರ ತಾಣ, ಎತ್ತರ, ಗಾಂಭೀರ್ಯ ಕಂಡಾಗ ಜೀಸಸ್ ಇಲ್ಲಿ ಧರ್ಮಾತೀತನಾಗಿ ಕುವೆಂಪು ಪರಿಕಲ್ಪನೆಯ ವಿಶ್ವಮಾನವನಾಗಿ, ಸರ್ವಧರ್ಮ ಸಮನ್ವಯಗಳ ಸಂಕೇತವಾಗಿ ನಿಂತ ಕರುಣಾ ಮೂರ್ತಿಯಂತೆ ನನಗೆ ತೋರಿದ! ಜೀಸಸ್‍ನ ಸೊಂಟದಿಂದ ಕೆಳಗೆ ನೆರಿಗೆ ಇರುವ ಪಂಚೆ, ಮೇಲ್ಭಾಗದಲ್ಲಿ ಜುಬ್ಬದಂತೆ ಕಾಣುವ ವಸ್ತ್ರ, ಎಡಬಲದ ತೋಳಿನಿಂದ ಕೆಳಕ್ಕೆ ಇಳಿದಿರುವ ಶಲ್ಯ; ಇವೆಲ್ಲಾ ಜೀಸಸ್‍ಗೆ ಒಂದು ಸರಳ ಹಾಗೂ ಸುಂದರವಾದ ರೂಪವನ್ನು ತಂದಿದೆ. ಇಷ್ಟು ಬೃಹದಾಕಾರದ ಮೂರ್ತಿಯಲ್ಲಿ ಭಾವನೆಗಳನ್ನು ತಂದಿರುವುದು ಶ್ಲಾಘನೀಯ.

 

P1010175

ಯುರೋಪ್ ಮತ್ತು ಇಂಗ್ಲೆಂಡಿನಲ್ಲಿ ಹಲವಾರು ಚರ್ಚುಗಳನ್ನು ಕಂಡಿದ್ದ ನನ್ನ ಮನಸ್ಸಿನಲ್ಲಿ ಜೀಸಸ್ ಎಂದಾಕ್ಷಣ ಮೂಡುವ ಚಿತ್ರವೆಂದರೆ ಶಿಲುಬೆಗೆ ಏರಿ ಮುಳ್ಳಿನ ಕಿರೀಟ ಧರಿಸಿ, ಕೈ ಪಾದಗಳಿಂದ ರಕ್ತಸ್ರಾವವಾಗಿ, ಕ್ಷೀಣವಾಗಿ, ಯಾತನೆಯಿಂದ ನರಳುತ್ತಿರುವ ಅಸಹಾಯಕ ಮೂರ್ತಿ ಎನ್ನಬಹುದು. ಇದು ಭಕ್ತಿಗಿಂತ ಅನುಕಂಪ ಮತ್ತು ಮರುಕ ಹುಟ್ಟಿಸುವ ಚಿತ್ರ. ಆದರೆ ಅಂದು ನಾನು ಕಂಡ ಜೀಸಸ್ ತನ್ನ ಸಾಂಪ್ರದಾಯಕ ಸ್ವರೂಪವನ್ನು ತೊರೆದು ಇಲ್ಲಿ ಶಾಂತಿದೂತನಂತೆ ಕಾಣುತ್ತಾನೆ. ಇದು ಕೇವಲ ಕಲಾತ್ಮಕ ಆಕೃತಿ. ಹೀಗಾಗಿ ಇಲ್ಲಿ ಯಾವ ಪೂಜೆ ಪುನಸ್ಕಾರಗಳಿಲ್ಲ. ಆಧಾರ ಪೀಠದ ಕೆಳಗೆ ಒಂದು ಚಾಪಲ್ (ಪೂಜಾ ಮಂದಿರ) ಇದ್ದು ಇಲ್ಲಿ ಕಾಥೊಲಿಕ್ ಮದುವೆ ನಾಮಕರಣಗಳನ್ನು ಮಾಡುವುದಕ್ಕೆ ಅವಕಾಶವಿದೆ. ಈ ಮೂರ್ತಿಯನ್ನು ಕಡೆದ ಶಿಲ್ಪಿ ಫ್ರೆಂಚ್ ದೇಶದ ಮಾಕ್ಸಿಮಿಲಿಯಂ ಪಾಲ್ ಲ್ಯಾಂಡೊಸ್ಕಿಹಾಗೂ ಇದನ್ನು ನಿಲ್ಲಿಸಲು ಬೇಕಾದ ತಂತ್ರಜ್ಞಾನವನ್ನು ಒದಗಿಸಿದ ವ್ಯಕ್ತಿ ಹೈಟೂರ್ ಡಿ ಸಿಲ್ವ ಕೊಸ್ಟಾ ಎಂಬ ಬ್ರೆಜಿಲ್ ಎಂಜಿನೀಯರ್. ಮೂರ್ತಿಯ ಮುಖವನ್ನು ರೂಪಿಸಿದ್ದು ರೋನಿಯಾದ ಲಿಯಾನಿಡ್. ಜೀಸಸ್‍ನ ಹೊರಚಾಚಿದ ಕೈಗಳು 92 ಅಡಿ ಉದ್ದವಿದ್ದು ಒಟ್ಟಾರೆ 635ಮೆಟ್ರಿಕ್ ಟನ್ ತೂಕವಿದೆ. ಮೂರ್ತಿಯನ್ನು ಕಾಂಕ್ರೀಟ್ ಮತ್ತು ಸೋಪ್‍ಸ್ಟೋನ್ ಕಲ್ಲುಗಳಿಂದ ಕೆತ್ತಲಾಗಿದೆ. ಜೀಸಸ್ ಸ್ಮಾರಕವನ್ನು ಕಾರ್ಕೊವಾಡೊ ಬೆಟ್ಟದ ಮೇಲೆ ಕೂರಿಸುವ ಆಲೋಚನೆ 1850ರಲ್ಲಿ ಪ್ರಸ್ತಾಪಿತವಾಗಿದ್ದರೂ ಕೊನೆಗೆ 1920ರಲ್ಲಿ ಹಣ ಮತ್ತು ಅನುಮೋದನೆ ಸಹಿಗಳನ್ನು ಸಂಗ್ರಹಿಸಿ 1922ರಲ್ಲಿ ಕೆಲಸ ಆರಂಭವಾಯಿತು. ಮುಂದಿನ ಒಂಬತ್ತು ವರ್ಷದಲ್ಲಿ ಮೂರ್ತಿ ಸಿದ್ಧವಾಗಿ 12ನೇ ಅಕ್ಟೋಬರ್ 1931ರಲ್ಲಿ ಕ್ರೈಸ್ಟ್ ದಿ ರಿಡೀಮರ್ ಅನಾವರಣಗೊಂಡಿತು. 2008 ಫೆಬ್ರವರಿ ತಿಂಗಳಲ್ಲಿ ಸಿಡಿಲು ಬಡಿದು ಮೂರ್ತಿಯ ತಲೆ ಹುಬ್ಬು ಮತ್ತು ಕೈಗಳಿಗೆ ಹಾನಿ ಉಂಟಾಗಿ ದುರಸ್ತಿ ಮಾಡಲಾಯಿತು. ಸಿಡಿಲನ್ನು ಹೀರುವ ತಂತ್ರಜ್ಞಾನವನ್ನು ಮೂರ್ತಿಯೊಳಗೆ ಇಟ್ಟಿದ್ದರೂ ಆಗಾಗ್ಗೆ ಸಿಡಿಲಿನಿಂದ ಉಂಟಾಗುವ ಹಾನಿಯನ್ನು ರಿಪೇರಿ ಮಾಡಲಾಗುತ್ತಿದೆ. ಒಬ್ಬ ಕುತಂತ್ರಿ ಜೀಸಸ್ ಬಾಹುಗಳ ಮೇಲೆ ಪೇಂಟ್ ಸ್ಪ್ರೇ ಮಾಡಿ ವಿಕೃತಗೊಳಿಸಿ ಆಮೇಲೆ ಶರಣಾಗತನಾದ. ಪ್ಯಾರಿಸ್ ನಗರಕ್ಕೆ ಐಫೆಲ್ ಟವರ್, ಲಂಡನ್‍ಗೆ ಬಿಗ್‍ಬೆನ್ ಗಡಿಯಾರ ಸ್ತಂಭ ಮತ್ತು ನಮ್ಮ ಬೆಂಗಳೂರಿಗೆ ವಿಧಾನಸೌಧ ಹೇಗೊ ಹಾಗೆ ಕ್ರೈಸ್ಟ್ ದಿ ರಿಡೀಮರ್ ವಿಗ್ರಹ ರಿಯೊ ನಗರದ ಹೆಮ್ಮೆಯ ಕುರುಹು ಎನ್ನಬಹುದು. ಈ ಶಿಲಾಕೃತಿಯನ್ನು ಜುಲೈ 7ನೇ ತಾರೀಕು 2007ರಲ್ಲಿ ಪ್ರಪಂಚದಲ್ಲಿನ ಆಧುನಿಕ ಏಳು ವಿಸ್ಮಯಗಳಲ್ಲಿ ಒಂದು ಎಂದು ಪರಿಗಣಿಸ ಲಾಗಿದ್ದು ಇದರ ಪಟ್ಟಿಯಲ್ಲಿ ತಾಜ್‍ಮಹಲ್, ಮಾಚುಪೀಚು, ಪಿರಮಿಡ್‍ಗಳು, ಹಾಗೂ ಇತರ ಸ್ಥಳಗಳು ಸೇರಿವೆ.

ನಾವು ಕ್ರೈಸ್ಟ್ ದಿ ರಿಡೀಮರ್ ತಲುಪುವ ವೇಳೆಗೆ ಸಾಕಷ್ಟು ಪ್ರವಾಸಿಗಳು ಆಗಮಿಸಿದ್ದರು. ಎಲ್ಲರಿಗೂ ಜೀಸಸ್ ಮೂರ್ತಿಯ ಮುಂದೆ ತಾವು ಕೈಚಾಚಿ ಫೋಟೋ ತೆಗೆಸಿಕೊಳ್ಳುವ ತವಕ. ಹೀಗಾಗಿ ಅಲ್ಲಿ ಚಾಚಿದ ಕೈಗಳ ಜನಜಾತ್ರೆ! ಒಬ್ಬರ ಕೈ ಇನ್ನೊಬ್ಬರ ಕೈ, ಗಲ್ಲ ಮತ್ತು ಕಿವಿಗಳನ್ನು ತಗುಲಿ ಕೆಲವರಿಗೆ ಮನಸ್ತಾಪ ಉಂಟಾಗಿತ್ತು. ಈ ಗಲಿಬಿಲಿಯಲ್ಲೇ ನಾವು ಕೂಡಾ ಕೈ ಚಾಚಿ ಫೋಟೋ ತೆಗೆಸಿಕೊಂಡು, ವಿಶಾಲ ಜಗುಲಿಯ ಮುಂದಿನ ಮೆಟ್ಟಿಲುಗಳು ಇಳಿದು ಇನ್ನೊಂದು ಕೆಳ ಜಗಲಿಯನ್ನು ತಲುಪಿದೆವು. ಇಲ್ಲಿ ನಿಂತು ಸಮುದ್ರದ ಕಡೆ ಕಣ್ಣು ಹಾಯಿಸಿದೆವು. ದೂರದಲ್ಲಿ ಪ್ರಶಾಂತವಾದ ನೀಲಿ ಸಮುದ್ರ, ಅದರ ಅಂಚಿನಲ್ಲಿ ಬಿಳಿ ಮರಳು, ಮುರಿಯುವ ತೆರೆಗಳ ನೊರೆ, ಕಾಲಡಿಯಲ್ಲಿ ಸುತ್ತ ಕಣಿವೆ, ಅದರಲ್ಲಿ ಕಣ್‍ತಣಿಯುವ ಹಸಿರು, ಮುಂದಿನ ಕಣಿವೆಗಳ ಏರುಪೇರಿನಲ್ಲಿ ಏರಿ ಇಳಿಯುವ ಮನೆಗಳು, ಫವೇಲಾಗಳು (ಸ್ಲಂ), ಸಹಸ್ರಾರು ಬಹು ಅಂತಸ್ತಿನ ಬಿಳಿ ಕಟ್ಟಡಗಳು ಹೀಗೆ ರಿಯೋ ನಗರದ ವಿಹಂಗಮ ನೋಟ ಕಾಣುತ್ತದೆ. ಬಲಗಡೆ ಕಣಿವೆಯಲ್ಲಿ ನಾವು ಕೆಳಗೆ ನೋಡಿದ ದೊಡ್ಡ ಸರೋವರ, ಅದರ ಹಿಂದೆ ಕೋಪಕಬಾನ ಮತ್ತು ಇಪನೀಮ ಬೀಚ್ ಕಾಣತೊಡಗಿದವು. ಎಡಕ್ಕೆ ನೋಡಿದಾಗ ನಗರದ ಉತ್ತರ ಭಾಗದ ಮಾರಕಾನಾ ಸ್ಟೇಡಿಯಂ ಮತ್ತು ಹೆದ್ದಾರಿ ಕಂಡವು. ನಮ್ಮ ನೇರ ದೃಷ್ಟಿಯಲ್ಲಿ ಸಮುದ್ರದ ನೀಲಿಯಿಂದ ಶಿವಲಿಂಗದಂತೆ ಉದ್ಭವಿಸಿದ ಶುಗರ್ ಲೋಫ್ ಬೋಳು ಬೆಟ್ಟ (Sugar loaf Mountain)ಬಹಳ ಮೋಹಕವಾಗಿ ಕಾಣುತ್ತಿತ್ತು. ಅದರ ಆಚೆ ಈಚೆ ಸಮುದ್ರದಿಂದ ನಡುಗಡ್ಡೆಗಳಂತೆ ಕಾಣುವ ಹಲವಾರು ಬೆಟ್ಟಗಳಿವೆ. ಈ ರೀತಿಯ ಸಾಗರ ಮತ್ತು ಎತ್ತರದ ಬೆಟ್ಟಗಳ ಸಮಾಗಮ ರಿಯೋ ನಗರಕ್ಕೆ ಅಪೂರ್ವ ಸೌಂದರ್ಯ ಮತ್ತು ವಿಶಿಷ್ಟತೆಯನ್ನು ಒದಗಿಸಿದೆ. ನಾನು ಇಲ್ಲಿ ಕಂಡ ಈ ಒಂದು ಸುಂದರ ದೃಶ್ಯ ನನ್ನಲ್ಲಿನ ಕಾವ್ಯ ಪ್ರಜ್ಞೆಯನ್ನು ಬಡಿದೆಬ್ಬಿಸಿ ಒಂದು ಕವನಕ್ಕೆ ಸ್ಫೂರ್ತಿಯನ್ನು ಒದಗಿಸಿತು. “ದೊಡ್ಡ ಬೆಟ್ಟದ ತುತ್ತ ತುದಿಯಲಿ ನಿಂತ ಏಸುವ ನೋಡಿರಿ’’ ಎಂಬ ಪದ್ಯದ ಸಾಲು ಮೂಡಿಬಂದು ಪದ್ಯ ಹೀಗೆ ರೂಪುಗೊಂಡಿತು. ಅದಕ್ಕೆ ರಿಯೋ ಡಿ ಜನೀರೊ ಸ್ಮರಣೆ ಎಂಬ ಶೀರ್ಷಿಕೆ ಕೊಟ್ಟಿದ್ದೇನೆ. ಆ ಪದ್ಯ ಹೀಗಿದೆ :

ದೊಡ್ಡ ಬೆಟ್ಟದ ತುತ್ತ ತುದಿಯಲಿ

ನಿಂತ ಯೇಸುವ ನೋಡಿರಿ

ಸುತ್ತ ಹಬ್ಬಿದ ಕಣಿವೆ ತಳದಲಿ

ಹಚ್ಚ ಹಸುರಿನ ವನಸಿರಿ

 

ಏಳು ಬೀಳುವ ನೀಲಿ ತೆರೆಗಳ

ಅಂಚಿನಲ್ಲಿ ನಲಿಯಿರಿ

ನಿತ್ಯ ನಡೆಯುವ ಪ್ರಕೃತಿ ಪೂಜೆಗೆ

ಭಾವದಿಂದಲಿ ತಣಿಯಿರಿ

 

ಸೋರುತಿರುವ ಸೂರಿನಡಿಯಲಿ

ಹಸಿದ ಹೊಟ್ಟೆಗೆ ಮರುಗಿರಿ

ಅಂದ ಚಂದದ ರಿಯೊ ನಗರವ

ಮನದೊಳಿಟ್ಟು ಸ್ಮರಿಸಿರಿ.

 

ನಿಸರ್ಗಪ್ರೇಮ ಮತ್ತು ಫೋಟೋ ತೆಗೆಯುವ ಖಯಾಲಿ ಇರುವ ನನ್ನಂತ “ಹುಚ್ಚು”’ ಜನಗಳಿಗೆ ಇಲ್ಲಿ ಇನ್ನಿಲ್ಲದ ಫೋಟೋ ಅವಕಾಶಗಳು! ಸಂತೃಪ್ತಿ ತರುವಷ್ಟು ಫೋಟೋ   ವೀಡಿಯೊಗಳನ್ನು ತೆಗೆದುಕೊಂಡು ಇನ್ನೂ ಹೆಚ್ಚು ಹೊತ್ತು ಅಲ್ಲಿ ಕಾಲಕಳೆಯಬೇಕೆಂಬ ಆಸೆ ಇದ್ದರೂ ಮಾರ್ಗದರ್ಶಿಯ ಒತ್ತಡದಿಂದ ರೈಲ್ವೆ ನಿಲ್ದಾಣದ ಕಡೆ ನಡೆಯತೊಡಗಿದೆವು. ಹೆಲನ್ ತಿಳಿಸಿದ ಪ್ರಕಾರ ವಿಶೇಷ ದಿನಗಳ ರಾತ್ರಿಯಲ್ಲಿ ಮೂರ್ತಿಯನ್ನು ಬಣ್ಣ ಬಣ್ಣಗಳ ಫ್ಲಡ್ ಲೈಟ್‍ನಿಂದ ಅಲಂಕರಿಸುತ್ತಾರೆ. ಬ್ರೆಜಿಲ್ ಫುಟ್‍ಬಾಲ್ ವಲ್ರ್ಡ್ ಕಪ್ ಗೆದ್ದಾಗ ಬ್ರೆಜಿಲ್ ಬಾವುಟದ ಬಣ್ಣಗಳಿಂದ ಜೀಸಸ್‍ಗೆ ಅಲಂಕಾರ ಮಾಡಲಾಗುತ್ತದೆ. ಹಾಗೆ ಇತ್ತೀಚಿನ ದಿನಗಳಲ್ಲಿ ಪ್ಯಾರಿಸ್ ನಗರದ ಮೇಲೆ ಭಯೊತ್ಪಾದಕರು ಹಿಂಸಾಕೃತ್ಯಗಳನ್ನು ನಡೆಸಿದಾಗ ಫ್ರಾನ್ಸ್ ಬಾವುಟದ ಬಣ್ಣಗಳಾದ ನೀಲಿ, ಬಿಳಿ ಮತ್ತು ಕೆಂಪು ಬಣ್ಣಗಳ ಬೆಳಕನ್ನು ಜೀಸಸ್ ಮೇಲೆ ಚೆಲ್ಲಿ ಮೂರ್ತಿಗೆ `ಹೊದಿಸಿ’ದ ಫ್ರೆಂಚ್ ಬಾವುಟ ಅನುಕಂಪೆಯ ಸಂಕೇತವಾಗಿತ್ತು.

ನಾವು ಬೆಟ್ಟದಿಂದಿಳಿಯುವ ವೇಳೆಗೆ ಭೋಜನದ ಸಮಯವಾಗಿತ್ತು. ಅಂದು ಭಾನುವಾರ. ಅಂದು ಪೋರ್ಚುಗೀಸ್ ಜನರು ಬಹಳ ವಿರಾಮದ ಭೋಜನ ಪಾನೀಯ ಮಾಡುವುದು ಸಾಮಾನ್ಯ. ಸಂಡೆ ಲಂಚ್ ಅನುಭವವನ್ನು ನಮಗೆ ಒದಗಿಸುವ ಉದ್ದೇಶದಿಂದ ನಮ್ಮ ಎಂ.ಟಿ.ಆರ್ ಹೋಟೆಲ್‍ಗೆ ಹೊಲಿಸಬಹುದಾದ ಒಂದು ಸ್ಥಳೀಯ ಜನಪ್ರಿಯ ಪೋರ್ಚುಗೀಸ್ ರೆಸ್ಟೊರಾಂಟ್‍ನಲ್ಲಿ ನಮಗೆ ಸ್ಥಳ ಕಾದಿರಿಸಲಾಗಿತ್ತು. ಇಲ್ಲಿ ಸ್ಥಳೀಯರು ಅವರ ಸಂಸಾರದೊಡನೆ ಒಳ್ಳೆಯ ಉಡುಗೆ ತೊಡುಗೆಗಳನ್ನು ಧರಿಸಿ ನಮ್ಮ ಮದುವೆ ಮನೆಗಳಲ್ಲಿ ಕಾಣುವಂತೆ ಸಾಲಾಗಿ ಜೋಡಿಸಿದ ಮೇಜು ಕುರ್ಚಿಗಳಲ್ಲಿ ಕುಳಿತು ಹರಟುತ್ತ, ಬೀರ್ ವೈನ್‍ಗಳನ್ನು ಹೀರುತ್ತಾ ನಿಧಾನದಲ್ಲಿ ಊಟ ಶುರು ಮಾಡಿದ್ದರು. ಇವರು ಮುಖ್ಯವಾಗಿ ಮಾಂಸಾಹಾರಿಗಳಾದರೂ ಜೊತೆಗೆ ಬಹಳಷ್ಟು ಹಸಿರು ತರಕಾರಿ ಮತ್ತು ತರಾವರಿ ಬ್ರೆಡ್, ಆಲೂಗಡ್ಡೆ ಚಿಪ್ಸ್ ತಿನ್ನುವುದರಿಂದ ಸಸ್ಯಾಹಾರಿಗಳಾದ ನಮಗೆ ತೊಂದರೆಯಾಗಲಿಲ್ಲ. ಇಲ್ಲಿಯ ಸ್ಥಳೀಯ ಎಲೆ ತರಕಾರಿ, ಪೆಪ್ಪರ್, ಸೌತೆಕಾಯಿ, ಮತ್ತು  ಟೊಮೇಟೊ ಇವುಗಳ ಜೊತೆ ಬಹಳ ಸುಂದರವಾಗಿ ಅಲಂಕರಿಸಿದ ಕೌಂಟರ್‍ಗೆ ತೆರಳಿ ನಮಗೆ ಬೇಕಾದ ಆಯ್ಕೆ ಮಾಡಿ ಕೊಂಡು ತಟ್ಟೆಗೆ ಹಾಕಿಕೊಳ್ಳುವ ಸೆಲ್ಫ್ ಸರ್ವೀಸ್‍ಗೆ ಅವಕಾಶವಿತ್ತು. ತರಾವರಿ ಆಲಿವ್, ತರಕಾರಿ, ಬ್ರೆಡ್ ಮತ್ತು ಬೆಣ್ಣೆಯನ್ನು ಸವಿದೆವು. ಇಲ್ಲಿನ ಹಸಿ ತರಕಾರಿಗೆ ಅದರದೆ ಒಂದು ತಾಜಾ ರುಚಿಯಿದೆ ಎಂದು ಹೇಳಬಹುದು. ವೈನ್‍ಗಳು ಸಿಹಿಯಾಗಿ ಹದವಾಗಿದ್ದವು. ಇಲ್ಲಿ ಗಮನಿಸಿದ ವಿಶೇಷವೆಂದರೆ 4-5 ಕೇಜಿ ಮಾಂಸದ ಭಾರಿ ತುಂಡುಗಳನ್ನು ಒಂದು 3 ಅಡಿ ಭರ್ಜಿಯಲ್ಲಿ ತಿವಿದು ಏರಿಸಿಕೊಂಡು ಸೂಟ್ ಮತ್ತು ಬೋ ಟೈ ಧರಿಸಿದ್ದ ಸಿಬ್ಬಂದಿಗಳು ಕೈಯಲ್ಲಿ ಹರಿತವಾದ ಖಡ್ಗದಂತೆ ಕಾಣುವ ಉದ್ದದ ಚಾಕು ಹಿಡಿದು ಮೇಲೆ ಕೆಳಗೆ ಓಡಾಡುತ್ತಿದ್ದರು. ಬೇಕಾದವರಿಗೆ ಎಡಗೈಯಲ್ಲಿ ಹಿಡಿದಿದ್ದ ಮಾಂಸವನ್ನು ಬಲಗೈಯಲ್ಲಿದ್ದ ಚಾಕುವಿನಿಂದ ತರಿದು ಪ್ಲೇಟ್‍ಗೆ ಬೀಳುವಂತೆ ನೋಡಿಕೊಳ್ಳುತ್ತಿದ್ದರು. ಇಲ್ಲಿ ಭೋಜನ ಮಾಡುತ್ತಿದ್ದವರಿಗೆ ಯಾವ ರೀತಿಯ ಅವಸರವಿರಲಿಲ್ಲ. ಸಾಮಾನ್ಯವಾಗಿ 2-3 ತಾಸಿನ ವಿರಾಮ ಭೋಜನಗಳನ್ನು ಮುಗಿಸಿ ಕೊನೆಗೆ ಸ್ವೀಟ್, ಕೇಕ್ ಮತ್ತು ಇತರ ತಿನಿಸುಗಳನ್ನು ತಿಂದು ಕೈಕುಲಕಿ, ಹೆಂಗಸರನ್ನು ಅಪ್ಪಿ, ಲಘುವಾಗಿ ಕೆನ್ನೆಗೆ ಕೆನ್ನೆ ತಗುಲಿಸಿ ಮುತ್ತಿಡುವ ಶಬ್ದವನ್ನು ಮಾಡಿ ವಿರಮಿಸುತ್ತಿದ್ದರು. ಇಷ್ಟು ವಿರಾಮವಾದ ಭೋಜನ ಮುಗಿಸುವ ವೇಳೆಗೆ ಮಧ್ಯಾಹ್ನ ಮೂರು ಗಂಟೆಯಾಗಿತ್ತು. ಜೋರು ಬಿಸಿಲು ಮತ್ತು ಧಗೆ ಇದ್ದುದರಿಂದ ಸಾಕಾಗಿ ಹೋಟೆಲ್‍ಗೆ ತೆರಳಿ ಮಲಗಿಬಿಟ್ಟೆವು.

P1010194
                                                                                                        -ಡಾ. ಶಿವಪ್ರಸಾದ್ (ಚಿತ್ರ ಕೃಪೆ ಮತ್ತು ಬರಹ)
Advertisements

5 thoughts on “‘ಕ್ರೈಸ್ಟ್ ದಿ ರಿಡೀಮರ್ : ಆಧುನಿಕ ಜಗತ್ತಿನ ವಿಸ್ಮಯ’ -ಡಾ. ಶಿವಪ್ರಸಾದ್ ಅವರ ಪ್ರವಾಸ ಬರಹ

  1. ಪ್ರವಾಸ ಕಥನಗಳು ಬರಿದೆ ಸ್ಥಳ ಮಹಿಮೆಯ ಲೇಖನಗಳಾಗದೇ ಹೆಚ್ಚಿನ ಅನುಭವ ಓದುಗನಿಗೆ ಕೊಟ್ಟರೆ ಸಾಹಿತ್ಯವಾಗುವುದು. ನಿಮ್ಮ ಲೇಖನಕ್ಕೆ ಪ್ರತಿಮೆಯ ಮೇಲೆ ಬರೆದ ಕವನ, ಲೇಖನಕ್ಕೆ ಹೊಸ ಮೆರಗು ಕೊಟ್ಟಿದೆ. ಇದರೊಟ್ಟಿಗೆ ಸ್ಥಳೀಯರ ವಾರಾಂತ್ಯದ ಭೋಜನದ ಪರಿಯೂ ಹಾಸುಹೊಕ್ಕಾಗಿ ನವ ಆಯಾಮವನ್ನೊದಗಿಸಿದೆ. ಕ್ರಿಸ್ತನ ಪ್ರತಿಮೆ ನೋಡಿದಾಗೆಲ್ಲ ನನಗೆ ನೆನಪಾಗುವುದು ಬ್ರಾಡ್ಫರ್ಡಿನ ಮಾಂತ್ರಿಕ “ಡೈನಮೋ”. ಈತ ಕ್ರಿಸ್ತನ ಸನ್ನಿಧಿಯಲ್ಲಿ , ಸಾವಿರಾರು ಪ್ರವಾಸಿಗಳ ಎದುರು ಕ್ರಿಸ್ತನಂತೆ ಪೋಸ್ ಕೊಟ್ಟು ಗಾಳಿಯಲ್ಲಿ ತೇಲುತ್ತ ನಿಂತಿದ್ದ. ಅದ್ಭುತ ಪ್ರತಿಮೆಯ ಎದುರು ಅದ್ಭುತ ಮೋಡಿಗಾರಿಕೆ!

    Like

  2. ಈ ಪ್ರವಾಸ ಲೇಖನ ನನ್ನ “ದಕ್ಷಿಣ ಅಮೇರಿಕ ಒಂದು ಸುತ್ತು” ಎಂಬ ಪುಸ್ತಕದಿಂದ ಆಯ್ದ ಭಾಗವೆಂಬುದನ್ನು ಪ್ರಸ್ತಾಪ ಮಾಡಿಲ್ಲ
    ಇದನ್ನು ನಾನು ಸಂಪಾದಕರಿಗೆ ಮೊದಲೇ ತಿಳಿಪಡಿಸಲಿಲ್ಲ ಕ್ಷಮೆ ಇರಲಿ
    ಹೀಗಾಗಿ ನನ್ನ ಲೇಖನಕ್ಕೆ ಆದಿ ಅಂತ್ಯ ಇಲ್ಲದಂತೆ ಗೋಚರಿಸಿರಬಹುದು
    ಪ್ರತಿಕ್ರಯಿಸಿದ ಓದುಗರಿಗೆ ಧನ್ಯವಾದಗಳು

    Like

  3. ಚೆಂದವಾದ ಬರಹ.
    ಪುಸ್ತಕದಿಂದ ತೆಗೆದ ಭಾಗವಾದ ಕಾರಣ ತಟ್ಟನೆ ಶುರುವಾದಂತೆ ಅನಿಸಿದರೂ ತಕ್ಷಣ ಪ್ರವಾಸೀ ತಾಣಕ್ಕೆ ಒಯ್ಯುತ್ತದೆ. ಚೊಕ್ಕ ಕವನ ಅರ್ಥಪೂರ್ಣವಾಗಿದೆ. ಮತ್ತಷ್ಟು ಬೇಕಿತ್ತು ಎನಿಸುವಷ್ಟು ಫೋಟೋಗಳು ಚೆನ್ನಾಗಿವೆ.
    -Premalatha B

    Liked by 1 person

  4. ನಿಮ್ಮ ಪ್ರಯಾಣದ ಕತೆಗಳು ಇನ್ನಷ್ಟು ಮೂಡಿ ಬರಲಿ. ನಿಮ್ಮ ಬರಹ ಓದುತ್ತ ಅಲ್ಲಿಗೇ ಹೋಗಿ ಬಂದ ಹಾಗೆ ಆಯಿತು. ಜೊತೆಗೆ ಕವಿ ಮನಸಿನ ಕವಿತೆಯೂ ಚೆನ್ನಾಗಿದೆ. – ಕೇಶವ

    Liked by 1 person

  5. ನಾವು ಏಕೆ ಪ್ರವಾಸ ಮಾಡುತ್ತೇವೆ? Traveling broadens the mind ಎಂಬ ಹೇಳಿಕೆ ಇದೆ. ಆದರೆ ಪ್ರಾಚೀನ ಕಾಲದಲ್ಲಿ ಜೀವದ ಹಂಗು ಬಿಟ್ಟು ದೇಶಾಂತರ ಪ್ರವಾಸ ಮಾಡಿದ ಮೆಗೆಲ್ಲನ್, ಇಬ್ನ್ ಬತುತಾ, ಕೊಲಂಬಸ್ ಅವರ ಮಾತೇ ಬೇರೆ. ನಂತರದ ಕಾಲದಲ್ಲಿ ಹಂಪಿಯ ಅದ್ಭುತ ವರ್ಣನೆ ಕೊಟ್ಟ ಡೊಮಿಂಗೋ ಪೇಸ್, ಆಮೇಲೆ ಪ್ರಿ-ಇಂಟರ್ನೆಟ್ ಶಿವರಾಮ ಕಾರಂತರ ಪ್ರವಾಸದ ಧ್ಯೇಯ ಬೇರೆಯೇ ಆಗಿತ್ತು. ಇಂದಿನ ಕಾಲದಲ್ಲಿ, ಪುಸ್ತಕ, ಟೆಲಿವಿಷನ್ ಮತ್ತು ಇಂಟರ್ನೆಟ್ ನಲ್ಲಿ ಎಲ್ಲ ದೇಶಗಳಿಗೆ ದುಬಾರಿ ಖರ್ಚು, ಏರ್ಪೋರ್ಟ್ ಸೆಕ್ಯೂರಿಟಿ ಹಗರಣ, ವಾಂತಿ-ಬೇಧಿ ಅನಾರೋಗ್ಯವಿಲ್ಲದೆ, ವೆಜಿಟೇರಿಯನ್ ಆಹಾರಕ್ಕಾಗಿ ಪರದಾಡುವ ಕಾರಣವಿಲ್ಲದೆ ಸೋಫಾದ ಮೇಲೆ ಕುಳಿತುಕೊಂಡೆ ಹೋಗಿಬರುವ ಸೌಕರ್ಯವಿರುವಾಗ ಏಕೆ ದೂರದ ಊರಿಗೆ ಹೋಗುತ್ತೇವೆ? ಕೆಲವರು ’ಪಕ್ಕದ ಮನೆಯ ಜೋನ್ಸ್’ ಗಳಿಗೆ ಸರಿಸಾಟಿಯಾಗಿ (Keeping up with Joneses), ಅಥವಾ ಅವರಿಗಿಂತ ನಾವು ಒಂದು ತೂಕ ಹೆಚ್ಚೆಂದು ಹೋಗುವವರಿದ್ದಾರೆ. ನಾವೀಗ ವಾಸಿಸುವ ಚಳಿನಾಡಾದ ಯು ಕೆ ದಲ್ಲಿರುವ ನಮಗೆ ಭಾರತಕ್ಕೆ ಮನೆಗೆ ಹೋಗುವದನ್ನು ಬಿಟ್ಟು ಬಿಸಿಲನ್ನು ಹುಡುಕುತ್ತ ಅಥವಾ ಹಿಂದೆ ಓದಿದ exotic ನಾಡಿಗ ಹೋಗುವ ಕನಸನ್ನು ನನಸಾಗಿಸಲು ಹೋಗುವವರೇ ಹೆಚ್ಚು. ಅಂತಹ ದೇಶ ಬ್ರಜಿಲ್ ಎನ್ನ ಬಹುದು, ಅದರಲ್ಲೂ ವರ್ಲ್ಡ್ ಹೆರಿಟೇಜ್ ಸೈಟ್ ಆಗಿರುವ (ಜಗತ್ತಿನ ಏಳು ಅದ್ಭುತಗಳಲ್ಲೊಂದು??) ಕ್ರೈಸ್ತ್ ದ ರಿಡೀಮರ್ ಮೂರ್ತಿಯೂ ಒಂದು ಅನ್ನುವದರಲ್ಲಿ ಸಂಶವಿಲ್ಲ. ಇದನ್ನು ತಮ್ಮ ಅದ್ಭುತ ನಿರೂಪಣೆಯಿಂದ ನಮಗೆ ಅದನ್ನು ಸಾಬೀತು ಮಾಡಿದ್ದಾರೆ ಡಾ ಪ್ರಸಾದ ಅವರು. ಹೆನ್ರಿ ಮಿಲ್ಲರನ One’s destination is never a place, but rather a new way of looking at things ಎನ್ನುವಂತೆ ತಮ್ಮದೇ ರೀತಿಯಲ್ಲಿ ನೋಡಿ ಬರೆದುದಲ್ಲದೆ ಅವರ ಕವಿ ಹೃದಯ ಕವಿತೆಯನ್ನು ಸಹ ಹಾಡಿದೆ! ಜೊತೆಗೆ ಪ್ರವಾಸದ ಮತ್ತು ಸ್ಠಳೀಯರು ರೆಸ್ಟಾರಂಟ್ನ ಭೋಜನದ ವಿವರಗಳು ಮತ್ತು ಫೋಟೋ ಕ್ಲಿಕ್ಕಿಸುವ ಹುಚ್ಚುಈಗಿನ ಜೀವನದ ನೈಜ ಚಿತ್ರಣ ಕೊಡುತ್ತವೆ. ಇನ್ನು ಮುಂದೆಯೂ ದಕ್ಷಿಣ ಅಮೇರಿಕೆಯ ಬೇರೆ ಪ್ರದೇಶಗಳಿಗೆ ಕರೆದೊಯ್ಯುವವರಿದ್ದಾರೆ ಎಂದು ಅಪೇಕ್ಷಿಸುವೆ. ಅಂದರೆ ನನ್ನ ಪ್ರವಾಸ ತಪ್ಪುತ್ತದೆ! ಧನ್ಯವಾದಗಳು!

    Liked by 1 person

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.